Ti Pagilasinan—Ipangpangagyo Aya Dayta?
“KAYATMI a dagiti tattao iti tunggal pagilian ket nanamenda ti kinarang-ay, kinaimbag ken kinaragsak. Ti dalan nga agturong iti daytoy ket babaen iti panagturong iti maysa a siwayawaya iti nuklear, di naranggas a lubong.”—Perestroika, ni Mikhail Gorbachev a pangulo ti Soviet.
Nainkalintegan laeng, pagduaduaan ti adu a pudpudno a kabaelanto ti tao ti mangpataud kadagita a sangalubongan a kasasaad. Sabali pay a pangulo, nga isu ni Jesu-Kristo, ti nangikari ti dakdakkel pay—maysa a paraiso a daga a sadiay uray ti ipapatay mapasungani. (Mateo 5:5; Lucas 23:43; Juan 5:28, 29) Siempre, ti pamay-an a panangaramid iti daytoy ket babaen ti nadiosan nga ibaballaet. Kas sungbat iti saludsod a no “kaano” ti iyaay dayta nga ibaballaet, kuna ni Jesus: “Ti pagarian ti Dios saanto nga umay babaen ti panagpalpaliiw a makita.” Iti damo, dagidiay laeng natadem ti panagpalpaliiwda babaen iti piguratibo a mata ti agila ti makailasinto iti dayta. (Lucas 17:20, 37) Apay a kasta?
No Apay Kasapulantay ti Pagilasinan
Nanipud iyuulina sadi langit, ni Jesu-Kristo ti “agnaed iti maysa a lawag a di maasitgan, isu a saan a nakita ti uray siasino a tao ket di met mabalin a kitaen.” (1 Timoteo 6:16) Ngarud, dagiti literal a natauan a matmata nikaanoman isut’ saandanton a makita manen. Kas kinuna ni Jesus iti maudi nga aldaw ti naindagaan a biagna: “Adda pay apagbassit ket ti lubong dinakto makitan.” (Juan 14:19) Isut’ makita iti piguratibo a pamay-an.—Efeso 1:18; Apocalipsis 1:7.
Kaskasdi, kuna ni Jesus a posible para kadagiti adalanna a maawatan no kasano a mangrugi nga agturay ti Pagarian ti Dios. Kasano? Babaen iti maysa a pagilasinan. Kas sungbat iti saludsod nga, “Anianto ti pagilasinan iti kaaddam?” imbalabala ni Jesus ti makitkita a pammaneknek iti masanguanan a di makita a panagturayna.—Mateo 24:3.
Nairaman iti pagilasinan isut’ ilustrasion a mangipakpakita no ania a kita dagiti tattao ti magunggonaan iti dayta. “Uray sadino a yan ti bagi a natay,” kuna ni Jesus, “aguurnongdanto met idiay dagiti agila.” (Mateo 24:28) Amin dagidiay agtarigagay a makalasat iti panungpalan ti agdama a sistema nga agturong iti baro a lubong ti Dios ti masapul nga ‘aguurnong’ ken tagiragsakenda ti naespirituan a taraon a kadua dagiti kas agila a “pinili” ni Kristo.—Mateo 24:31, 45-47.
Panangsaluad Kontra ti Di Pannakaan-anus
Awan tao ti makakuenta ti petsa iti panungpalan ti agdama a dakes a sistema. “Maipapan iti dayta nga aldaw wenno dayta nga oras,” kuna ni Jesus, “awan ti makaammo, uray pay dagiti anghel sadi langit, uray pay toy Anak, no di laeng ti Ama.”—Marcos 13:32, 33.
Ngem mabalin ngata, a ti pagilasinan ti mapasamak iti rukod ti adu a natauan a kapkaputotan? Saan. Ti pagilasinan ket mapasamak bayat ti maysa a partikular a kaputotan. Ti isu met laeng a kaputotan a makakita ti panangrugi ti pagilasinan ti makakitanto met ti kangitingitanna iti “rigat a dipay napasamak nanipud idi damo ti pannakaparsua.” Tallo a historiador, da Mateo, Marcos, ken Lucas, ti nangilanad iti pammasiguro ni Jesus iti daytoy.—Marcos 13:19, 30; Mateo 24:13, 21, 22, 34; Lucas 21:28, 32.
Adda, nupay kasta, ti peggad ti panagbalin a di makaan-anus. Pitopulo ket uppat a tawen ti napalabasen nanipud pay panagbettak ti Gubat Sangalubongan I idi 1914. Manipud natauan a punto de vista, kasla nakabaybayagen daytoy. Ngem dagiti immagila ti panagmatmatana a Kristiano a nakakita ti Gubat Sangalubongan I ti sibibiagda pay unay. Saan pay a limmabas ti kaputotanda.
Idi intedna ti pagilasinan, namakdaar ni Jesus iti peggad ti panagbalin a di makaan-anus. Nagsao maipapan kadagiti tattao nga agkunanto iti puspusoda: “Ni apok mabayag pay nga umay.” Impakita ni Jesus a no dagita a rikrikna, ket saan a malapdan, ti mabalin mangiturong iti minamaag a panagtignay. (Mateo 24:48-51) Dagiti apostol ni Kristo adut’ makunada pay maipapan iti daytoy.
“Dagiti Mangrabrabngis”
Sigun iti mannurat ti Biblia a ni Judas, impakdaar dagiti apostol ni Jesus ti sumaganad: “Iti kamaudianan a tiempo addanto mangrabrabngis a sumursurot kadagiti nadangkes a tarigagayda.”—Judas 17, 18.
Ti tarigagay nga agbiag iti maysa a nadalus a baro a lubong ti naglaka a masukatan “kadagiti nadangkes a tarigagay.” Daytoy ti nangnangruna a nakapegpeggad itatta gapu kadagiti metodo ti panangiyebkas ken komunikasion ti lubong. Nikaanoman iti historia ti tao a ti kinaranggas, espiritismo, ken seksual nga imoralidad ket kastat’ kasaknap ti pannakaipakpakitana. Masansan nga isudat’ tema dagiti presentasion ti radio ken musika, ken isudat’ makitkita kadagiti nakaad-adu a programa ti TV, video, pablaak, libro, ken kadagiti magasin.
Ti pagilasinan ti mangitudtudo iti panungpalan ti kasta a kinadangkes. Ngarud, natural, a dadduma a tattao nga addaan panagayat kadagiti nadangkes a bambanag rabngisenda ti pagilasinan. Kas naipadto, ikalinteganda a “dagiti isuamin a bambanag agtultuloyda a kas met la idi punganay ti pannakaparsua.”—2 Pedro 3:3, 4.
‘Ti Ayat Lumamiisto’
Iti nabiit pay, maysa a 75-años nga Americano nga autor, a ni Paul Bowles, ti ininterbio ti magasin a Newsweek. Iti panangsungbatna iti saludsod nga, “Aniat’ panangmatmatmo iti lubong?” simmungbat ni Bowles: “Ti lubong ti napirpirsayen iti sentido moral. Awanen ti mapagpiaran wenno nasingpet kas idi 60 a tawen ti napalabasen. Adda kapanunotan no ania idi ti natakneng a lalaki; daytat’ maipatpateg a galad iti Makinlaud a kulturami. Itan awanen [ti mangikankano]. Adda met ti aglablabes a panangipagpaganetget iti kuarta.”
Daytoy a situasion ket isut’ kas impadto ti Biblia. Impadto ni Jesus: “Ket agsipud ta agadunto ti kinadakes ti ayat dagiti adu lumamiisto.” (Mateo 24:12; 2 Timoteo 3:1-5) Bayat a lumanlanlan ti kinaagum ken kinaimut, bumasbassit met ti ayat iti Dios. Umad-adu dagiti tattao a mangipangpangruna ti tartarigagayda ngem iti linlinteg ti Dios babaen ti panagaramid kadagiti kriminal nga ar-aramid, terorismo, kinasuitik iti negoso, seksual nga imoralidad, ken panangabuso ti droga.
Dadduma mailasinda ti kaitungpalan ti pagilasinan ngem saanda nga agtignay iti dayta agsipud ta ad-adda a pampanunotenda ti panangay-ayoda iti bagbagida. Iti kasumbangirna, ti panangipangag ti pagilasinan kasapulanna ti panagibtur iti panangipakita ti awan-imutna a panagayat iti Dios ken iti pada a tao.—Mateo 24:13, 14.
“Tarigagay Itoy a Biag”
Namakdaar met ni Jesus a, malaksid kadagiti inaagum a ragragsak, dagiti lehitimo a pisikal a pagkasapulan ti pangbusbosan ti dadduma ti tiempoda a gapu itoy maliwayanda ti pagilasinan. Inggunamgunamna: “Ket agaluadkayo di la ket ta dagiti puspusoyo mapnoda ti kinarawet ken panagbartek ken kadagiti tarigagay itoy a biag, ket iti kasta umayto a kellaat kadakayo dayta nga aldaw. Ta kas maysa a silo ti yaaynanto kadagiti amin nga agnaed iti rabaw ti isuamin a daga.”—Lucas 21:34, 35.
Ti Biblia, siempre, iparparegtana ti naragsak a panagbiag ti pamilia. (Efeso 5:24–6:4) Masansan a daytoy sapulenna a ti ulo ti pamilia ti rumaman iti maysa a kita ti pannakaiyempleo wenno negosio tapno masuportaranna ti asawana ken annakna. (1 Timoteo 5:8) Kaskasdi, kinakuriteng met ti panangipalubos a ti biag ti maysa ket agliklikmut lattan iti pamilia, negosio, ken kadagiti material a bambanag. Gapu itoy a peggad, namakdaar ni Jesus: “Ket no kasano ti naaramid kadagiti aldaw ni Noe, kastanto met kadagiti aldaw ti Anak ti tao: manganda idi, aginumda, mangasawada, ken makiasawada agingga iti aldaw nga iseserrek ni Noe iti daong, ket immay ti layus ket pinukawna amin ida. . . Kastanto iti aldaw a pannakaiparangarang ti Anak ti tao.”—Lucas 17:26-30; Mateo 24:36-39.
“Maalanto” wenno “Mabatinto?”
Ti oras naladawen. Din agbayag, bumallaetton ti Pagarian ti Dios a mangpalinteg kadagiti bambanag. Kalpasanna maapektaranton amin a tattao iti maysa kadagiti dua a pamay-an. Kas inlawlawag ni Jesus: “Iti kasta addanto dua a lallaki iti talon: ti maysa maalanto ket ti sabali mabatinto; addanto dua a babbai nga aggilgiling iti paggilingan: ti maysa maalanto ket ti sabali mabatinto.”—Mateo 24:40, 41.
Inton umayen dayta kangitingitan a tiempo, anianto ti sasaadenyo? Mabatikayto aya nga agpaay iti pannakadadael, wenno maalakayonto a maipaay iti pannakaispal? Tapno maiwanwankayo iti umiso a direksion, usigenyo manen ti pangngarig nga inted ni Jesus: “Uray sadino a yan ti bagi a natay, aguurnongdanto met idiay dagiti agila.”—Lucas 17:34-37; Mateo 24:28.
Ipagpaganetget ni Jesus ti pannakasapul ti panagbalin a natudio ti panagkitkitana, nga addaan panagkaykaysa iti panagtignay. Dagidiay maala a maipaay iti pannakaisalakan ket isuda dagidiay regular nga aguurnong ken magunggunggonaan manipud iti naespirituan a panagtaraon nga ipapaay ti Dios. Minilmilion dagiti nakapaspasaren a ti kasta a naespirituan a panangtaraon ti aggapgapu manipud nasinged a pannakitimtimpuyog iti maysa kadagiti nasurok a 55,000 a kongregasion dagiti Saksi ni Jehova ken babaen iti panagad-adal kadagiti naibatay iti Biblia a publikasion kas daytoy inkay basbasaen itatta.
Nasurok a tallo milion a Saksi ni Jehova ti mangipakpakita ti pammati ti pagilasinan babaen ti panangiranranudda ti “naimbag a damag ti pagarian” kadagiti kaarrubada. (Mateo 24:14) Ab-abrasaenyo met laeng aya a sipopositibo ti naimbag a damag? No kasta, maawatanyonto ti kari ti pannakailasat nga agturong iti naindagaan a paraiso.
[Ladawan iti panid 5]
Adu ti naigamer unay kadagiti ragragsak a gapu itoy maliwliwayanda ti pagilasinan
[Ladawan iti panid 6]
Ti panangipangag ti pagilasinan ramanenna ti panagtataripnongtayo tapno mataraonan iti Sao ti Dios