Panangispal ti Biag iti Panawen ti Bisin

1. Ania a nainsiriban a panagtignay ti innala ni Jose kabayatan dagiti tawtawen iti kinawadwad, ken ania ti nagbanaganna?

DAGDAGUS kalpasan ti pannakaitudingna kas administrador ti taraon sinursur ni Jose ti daga ti Egipto. Naiyurnos a naimbag dagiti bambanag idi mangrugin dagiti tawtawen ti kawadwad. Itan nagbunga ti daga iti nakaad-adu! Ket inummong ni Jose amin a pagtaraon nga aggapu kadagiti aw-away nga adda idi iti arubayan ti tunggal siudad, nga indulinna ida sadiay siudad. Ket ni Jose “indulinna dagiti bukbukel a kasla darat ti baybay, adu unay, inggana nga insardengna ti panagbilangna, ta di mabalinen a bilangen.”​—Genesis 41:46-49.

2. Iti ania a personal a panagsakripisio a nabalinan dagiti tattao ti nakagun-od iti pagtaraonda?

² Dagiti pito a tawtawen ti kawadwad naggibusda, ket ti panagbisin nangrugi kas impadto ni Jehova​—maysa a panagbisin a saan laeng nga idiay Egipto no di ket ti bisin “iti amin a dagdaga.” Idi dagiti mabisinan a tattao idiay Egipto mangrugidan nga agikkis ken Faraon a maipaay iti tinapay, kinuna ni Faraon kadakuada: “Dumanonkayo ken ni Jose. Aniaman nga ibagana kadakayo, aramidenyo.” Naglako ni Jose ti binukel kadagiti Egipcio aginggana a naibus dagiti kuartada. Kalpasanna inawatna dagiti an-animalda kas pagbayad. Kamaudiananna, immay dagiti tattao ken ni Jose a kunkunada: “Gatangennakami ken ti dagami a maipaay iti tinapay, ket dakami agraman ti dagami agbalinkamto nga ad-adipen ken Faraon.” Gapuna ni Jose ginatangna ti amin a daga dagiti Egipcio a maipaay ken Faraon.​—Genesis 41:53-57; 47:13-20.

Ti Probision a Maipaay iti Naespirituan a Panangpakan

3. Ania nga ahensia ti impadto ni Jesus a mangipaay iti taraon iti umiso a tiempo?

³ No kasano a dagiti binukel nga inwaras ni Jose kaipapananna ti biag kadagiti Egipcio, kasta met ti pudno a naespirituan a taraon nasken a pangsustiner kadagiti Kristiano a nagbalin nga ad-adipen ni Jehova gapu iti dedikasionda Kenkuana baeten ti Dakdakkel a Jose, ni Jesu-Kristo. Bayat ti naindagaan a ministeriona, impadto ni Jesus a dagiti napulotan a paspasurotna ibaklaydanto ti responsabilidad a panangisaknap kadagitoy a probision. Insaludsodna: “Siasino ngarud ti matalek ken naannad nga adipen nga inkabil ni apona nga agaywan iti sangakabbalayanna, tapno ikkanna ida iti taraon no pannakaipaayna? Naragsak daydiay nga adipen a masarakanto ni apona inton umay a kasta ti aramidenna.”​—Mateo 24:45, 46.

4. Kasano a ti probision nga inaramid ti klase “adipen” itatta umasping iti naorganisar idi kaaldawan ni Jose?

⁴ Ti matalek a natda daytoy klase “naannad nga adipen” itatta ar-aramidenda ti aniaman a Nainkasuratan a kabaelanda tapno makita a dagiti dedikado a Saksi ni Jehova, agraman dagiti interesado a tattao iti lubong ket umawatda iti makaited-biag a naespirituan a taraon. Daytoy a naitalek kadakuada ti mabigbigbig kas maysa a sagrado nga annongen ket maar-aramid kas maysa a sagrado a serbisio ken ni Jehova. Mainayon pay, inorganisar ti “adipen” dagiti kongregasion ket ab-abastuanda dagitoy kadagiti literatura ti Biblia iti kasta unay kaadu tapno maaddaanda iti nawadwad a “bin-i” ti Pagarian a maiwaras iti publiko kadagiti naituding a luglugarda. Katupag daytoy idi kaaldawan ni Jose, idi inurnongna dagiti tattao kadagiti siudad ket impaayanna ida kadagiti binukel saan laeng nga agpaay a pakabiaganda no di ket ti maimuladanto pay kadagiti maudi a panagani.​—Genesis 47:21-25; Marcos 4:14, 20; Mateo 28:19, 20.

5. (a) Ania a naisangsangayan nga atension ti ipapaay ti “adipen” kadagiti pagkasapulan ti sangakabbalayan iti panawen ti krisis? (b) Kasano a ti “aglaplapusanan” a naespirituan a sagana idi 1986 maiyarig kadagiti abasto idi panawen ni Jose?

⁵ Uray pay no ti trabaho a panangaskasaba iti publiko ket maiparit ken maidaddadanes dagiti Saksi ni Jehova, ti ‘matalek nga adipen’ matmatanna ti panangipaay iti naespirituan a taraon a kas sagrado nga annongen. (Aramid 5:29, 41, 42; 14:19-22) No dumteng dagiti didigra, kas kadagiti bagyo, layus, ken ginggined, kitaen ti “adipen” a maipaay agpadpada ti pisikal ken naespirituan a kasapulan ti sangakabbalayan ti Dios. Uray pay dagidiay adda kadagiti kampo konsentrasion madandanonda a regular kadagiti naimaldit a sasao. Dagiti nasional a pagbeddengan saanda a mapalpalubosan a mangpasardeng ti panagayus ti naespirituan a taraon kadagidiay agkasapulan iti dayta. Ti panangtaginayon iti abasto kasapulanna ti tured ken pammati ken ni Jehova, ken masansan iti kalalainganna a kinasikap. Ti intero a lubong bayat laeng ti 1986, ti “adipen” ti nakapataud iti aglaplapusanan a 23,828,314 a Biblia ken dagiti libro a natangken-akkubda, agraman 550,216,455 a magasin​—pudno unay a “kasla darat iti baybay, adu unay.”

Ibabales, Dusa, wenno Asi?

6, 7. (a) Kasano a ti panagbisin nagbanag iti panagruknoy dagiti sangapulo a kakabsat ni Jose iti ama iti sanguananna? (b) Iti ania a pamay-an a ni Jose a mismo ket adda a masusuot itatta?

⁶ Idi agangay dimteng ti bisin idiay daga ti Canaan. Imbaon ni Jacob dagiti sangapulo a kakabsat ni Jose iti ama idiay Egipto tapno gumatang ti binukel. Ngem saanna nga imbaon ni Benjamin, ti kakaisuna a naan-anay a kabsat ni Jose, gaput’ butengna, kas kinunana, a “di la mamin-ano no adda peggad a mapagtengna.” Yantangay ni Jose ti aglaklako, dagiti kakabsatna immayda kenkuana ket nagpaklebda iti sanguananna. Nupay saanda a nabigbig ti kabsatda, ni Jose am-ammona ida.​—Genesis 42:1-7.

⁷ Itan nalagip ni Jose dagiti immun-una a tagtagainepna maipapan kadakuada. Ngem ania itan ti aramidenna? Isu aya ti bumales? Iti panawen ti dakkel a panagkasapulanda, rebbengna aya a pakawanen ti panangtrato nga inawatna kadagiti im-imada? Kasanon daydiay panagledleddaang ni amana? Rebbeng aya a lipaten daytoyen? Kasano itan ti panagrikna dagiti kakabsatna maipapan ti naindaklan a kinadakes a naaramidanda? Uray met ni Jose, masusuot iti daytoy a banag. Dagiti aya tigtignayna maitunosda iti kababalin nga ipakitanto kamaudiananna iti Dakdakkel a Jose, ni Jesu-Kristo, kas nadeskribir idiay 1 Pedro 2:22, 23: “Isu saan a nagaramid iti basol, ket awan ti nasarakan nga allilaw iti ngiwatna. Isu nga idi rinabrabngisda, saan a simmungbat iti dakes. Idi nagsagaba, saan a nangam-ames, no di ket nagtalek iti daydiay mangukom a sililinteg.”

8. Babaen iti ania a maiwanwan ni Jose, a mangiyilustrar iti ania maipapan ken ni Jesus ken kadagiti adalanna?

⁸ Yantangay makitkita ni Jose ti panangiturturongna kadagiti pasamak, rebbeng nga isut’ agannad a mangitungpal kadagiti linlinteg ken prinsipio ti Dios. Iti isu met laeng a pamay-an, ni Jesus ti kanayon a magagaran a ‘mangaramid iti pagayatan ni Amana’ bayat ti panangipapaayna iti biag nga agnanayon kadagiti ‘mangalagad iti pammati kenkuana.’ (Juan 6:37-40) Kas kadagiti “embahador a maisuno ken Kristo,” tungtungpalen met dagiti napulotan nga ad-adalanna ti sagrado a naitalek kadakuada a “mangipalawag kadagiti umili dagiti amin a sasao a maipapan itoy a biag.”​—2 Corinto 5:20; Aramid 5:20.

9, 10. (a) Ania a kurso ita ti innala ni Jose, ken apay? (b) Kasanot’ panangipakita ni Jose ti asi a pakaiyaspingan ti ania nga ipakitanto ni Jesus?

⁹ Saan nga impanayag ni Jose ti bagina a dagdagus kadagiti kakabsatna. Imbes ketdi, nagsao a sidadamsak kadakuada babaen iti maysa a manangipatarus, a kunkunana: “Dakayo agsimsimisimkayo!” Yantangay nadakamatda ti ub-ubing a kabsatda, indawat ni Jose a paneknekanda ti kinapudnoda babaen ti panangiyegda iti daytoy idiay Egipto. Nangngegan ni Jose a sasawenda a sibababawi iti maysa ken maysa a daytoy a panagturong dagiti paspasamak ket mabalin nga isu ti supapak ti panangilakoda kenkuana, ni Jose, iti pannakaadipen. Impakni ni Jose ti bagina, ket nagsangit. Nupay kasta, pinaibaludna ni Simeon kas maysa a prenda agingga nga agsublida a kaduada ni Benjamin.​—Genesis 42:9-24.

¹⁰ Ni Jose saan a bumalbales gapu iti kinadakes a naaramidan kenkuana. Kayatna laeng a maammuan no pudpudno ti panagbabawida, manipud iti kaungan ti puspusoda, tapno maipakita ti asi kadakuada. (Malakias 3:7; Santiago 4:8) Buyogen iti naasi a kababalin nga umas-asping iti daydiay ipakitanto ni Jesus, saan laeng a pinunno ni Jose dagiti supsupotda iti binukel no di ket insublina pay kadakuada ti pirakda iti ngarab ti supot ti tunggal maysa. Mainayon pay pinabalonanna ida a maipaay iti panagdaliasatda.​—Genesis 42:25-35; idiligyo iti Mateo 11:28-30.

11. (a) Idi agangay, aniat’ nakapilitan ni Jacob nga aramiden, ken apay nga immanamong met laeng idi kamaudiananna? (b) Kasano a ti Roma 8:32 ken 1 Juan 4:10 ti mangipasiguro kadatayo iti ayat ti Dios?

¹¹ Idi agangay, naibusdan ti taraon a ginatangda idiay Egipto. Indawat ni Jacob kadagiti siam nga annakna nga agsublida ket gumatangda pay ti ad-adu. Iti napalabas, isut’ nagpakpakaasi maipapan ken Benjamin, a kunkunana: “Ti anakko saanto a makipagsalog kadakayo, ta natayen ti kabsatna a lalaki ket is-isu la ti nabati. Ket no adda dakes a mapasamakna iti dalan a papananyo, pababaenyonto met ti ubanko gapu iti leddaang agpapan ken Sheol.” Nupay kasta, kalpasan ti adu a panangal-allukoy ken ti panangitukon ni Juda nga isu ti personal a responsable ken ni Benjamin, situtukiad nga immanamong ni Jacob a nangipalubos iti panangalada iti ubing a kaduada.​—Genesis 42:36–43:14.

12, 13. (a) Kasano a nangipilit ni Jose ti maysa a suot tapno maipanayag ti kababalin ti puso dagiti kakabsatna? (b) Kasano a dagiti resulta ti nangted iti pangibatayan ni Jose iti panangipakitana iti asi?

¹² Idi nakita ni Jose nga immay ni Benjamin a kadua dagiti kakabsatna, inawisna ida idiay balayna, a sadiay nangidasar iti maysa a daya. Para ken ni Benjamin inikkanna ti bingay a maminlima a daras ngem ti bingay ti tunggal maysa kadagiti dadduma. Kalpasanna nangaramid ni Jose iti maysa a maudi a panangsuot kadagiti kakabsatna. Iti daytoy manen, insublina amin a kuartada kadagiti supot ti tunggal maysa, ngem ti bukodna a naisangsangayan a kopa a pirak inkabilna idiay ngarab ti supot ni Benjamin. Kalpasan ti panagrubuat ken ipapanawda, imbaon ni Jose ti manangaywan ti balayna tapno akusaran ida iti panagtatakaw ket sinukisokna ti supsupotda a maipaay iti kopana. Idi daytat’ nasarakan iti supot ni Benjamin, pinisang dagiti agkakabsat dagiti kawkawesda. Naisublida manen tapno sanguenda ni Jose. Ni Juda ti nangaramid iti makatukay-rikna nga iyaararaw a maipaay iti asi, nga intukonna ti panagbalinna nga adipen a maisandi ken ni Benjamin tapno ti ubing ket makapagsubli ken ni amana.​—Genesis 43:15–44:34.

¹³ Itan ta kumbinsido iti panagbalbaliw ti puso dagiti kakabsatna, din matngelan ni Jose dagiti rikriknana. Kalpasan ti panangibilinna a tunggal maysa a sabsabali ket rummuarda, kinuna ni Jose: “Siak ni Jose a kabsatyo, nga inlakoyo a naipan sadi Egipto. Ket ita saankayo nga agladingit ket dikayo met agpungtot kadagiti bagbagiyo ta inlakodak ditoy; ta imbaonnak ti Dios nga inyuna kadakayo tapno mamagbiagak . . . tapno aywanankayo a matda iti lubong ket ispalenkayo a nabiag iti dakkel a salakan.” Kalpasanna kinunana kadagiti kakabsatna: “Agdaraskayo ket sumang-atkayo ken amak, ket kunayo kenkuana, ‘ . . . Sumalogka kaniak. Dika agtaktak. Ket agnaedka iti daga a Gosen, ket . . . siak taraonankayto sadiay, ta matda pay laeng dagiti lima a tawen a panagbisin; di la ket ta pumanglawka, sika, ken ti sangakabbalayam ken amin nga adda kenka.’”​—Genesis 45:4-15.

14. Ania a nakaragragsak a damag ti naipakaammo ken Jacob?

¹⁴ Idi nangngegan ni Faraon ti damag maipapan kadagiti kakabsat ni Jose, imbagana ken ni Jose a mangala kadagiti luglugan manipud daga ti Egipto tapno iyegna ni amana ken ti amin a sangakabbalayanna idiay Egipto agsipud ta ti kasayaatan ti amin a dagdaga ti Egipto isunto ti kukuada. Idi nangngeganna amin a napasamak, napasaranta ti espiritu ni Jacob ket indir-ina: “Isunan! Sibibiag pay met la ket ni Jose nga anakko! Ay, innakto ket kitaekto ta diak pay matay!”​—Genesis 45:16-28.

Nakawadwadwad ti Naespirituan a Taraon

15. Iti siasino itan ti taliawantayo a maipaay iti naespirituan a pannakataraon, ket kasano a maipasiguro kadatayo ti kinaaglaplapusanan?

¹⁵ Aniat’ kaipapanan amin daytoy kadatayo itatta? Gapu ta silalagiptayo kadagiti naespirituan a kasapulantayo, kumitkitatayo iti Daydiay adayo a dakdakkel ngem ti naasi a Faraon idi panawen ni Jose. Isu ti Soberano nga Apo a ni Jehova a mangipapaay iti pagtaraon ken pannakaiwanwan a makalasat kadagitoy nasipnget nga al-aldaw iti lubong a mabisinan iti kinapudno ti Biblia. Datayo ti nagagawa a maipaay kadagiti intereses ti Pagarianna, a kaiyariganna, impantayo amin nga apagkapullotayo iti kamaligna. Anian a sipaparabur nga inlukatna kadatayo “dagiti tawtawa ti langit,” nga imbuyatna ti bendision “agingga nga awanton ti pagkasapulan”!​—Malakias 3:10.

16. (a) Sadino laeng ti pakasarakan itatta ti makaispal-biag a “taraon”? (b) Kasano a napalawa ti panagmula ti binukel a maipaay iti mabisbisinan a sangatauan?

¹⁶ Iti makanawan ni Jehova isu ti Administrador ti Taraon, nga isu itan ti naitrono nga Ari, ti naipadayagen a Jesus. (Aramid 2:34-46) No kasano a dagiti tattao inlakoda dagiti bagbagida kas ad-adipen tapno agbiagda, kasta met amin itatta a kayatda ti agtultuloy a sibibiag masapul nga umayda ken ni Jesus, nga agbalinda kas paspasurotna a dedikado iti Dios. (Lucas 9:23, 24) No kasano ti panangiturong ni Jacob kadagiti annakna a mapan ken Jose a maipaay iti taraon, kasta met inwanwan ni Jehova dagiti sibabawi a tattao a mapan iti dungdungngoenna nga Anak, ni Jesu-Kristo. (Juan 6:44, 48-51) Inurnong ni Jesus dagiti paspasurotna kadagiti kongregasion a kaiyariganda dagiti siudad​—a nasuroken ngem 52,000 ti bilangda iti intero a lubong itatta​—a sadiay ti pakatartaraonanda iti aglaplapusanan a naespirituan a taraon ken maipapaayanda iti aglaplapusanan a “binukel,” kas dagiti “bin-i” a maipaay iti panagmula iti pagtalonan. (Genesis 47:23, 24; Mateo 13:4-9, 18-23) Dagitoy a sasaksi ni Jehova ket situtulokda a managtrabaho! Umad-adu kadakuada ti agbolboluntario a maipaay iti amin-tiempo a serbisio kas payunir, nga itan addan 595,896 kadakuada a makipaspaset, kas kangatuan a bilang, iti daytoy a napribilehiuan a trabaho iti maysa a bulan idi napan a tawen. Dayta ti addaan promedio a nasursurok ngem 11 a payunir iti tunggal kongregasion!

17. Ania a dadduma a naimpadtuan a salaysay ti umas-asping iti panagkaykaysa dagiti sangapulo a kakabsat ni Jose iti ama?

¹⁷ Nakaskasdaaw nga amin dagiti sangapulo a kakabsat ni Jose iti ama, nga itan nagbabawiandan dagiti dati a kababalin ken aramidda ket naikaykaysada kenkuana idiay Egipto, a kadua ti Sodoma, iladladawan ti lubong nga isut’ nakailansaan ni Jesus. (Apocalipsis 11:8) Daytoy ti mangipalagip kadatayo iti Zacarias 8:20-23, a nagtungpal iti pannakaisalaysay ti “sangapulo a lallaki” a nagkuna, “Dakami kumuyogkaminto kadakayo a tattao,” kayatna a sawen, iti napulotan nga ili ni Jehova, a kaskasdi adda pay bassit a natda nga agserserbi ditoy daga.

18. Ti naisangsangayan a parabur a naipakita ken ni Benjamin ti umas-asping iti ania iti moderno a tiempo?

¹⁸ Nupay kasta, ania met ngay ti maipapan iti naan-anay a kabsat ni Jose, ni Benjamin, a gaput’ rigat ti pannakaipasngayna isut’ nakapukawan ti biag ti ingunguten unay nga asawa ni Jacob a ni Raquel? Ni Benjamin ti nangnangruna nga impatpateg ni Jose, nga awan duadua nakasingsinged ti panagriknana iti daytoy nga anak a lalaki ti mismo nga inana. Mabalin nga isu daytoy ti makagapu iti panangawat ni Benjamin iti maminlima a daras a bingay idi amin dagiti 12 nga agkakabsat ket damdamo unay a nakapagtitiponda iti padaya idiay balay ni Jose. Saan aya a nagsayaat ti panangiladawan ni Benjamin iti natda kadagiti napulotan a Saksi itatta, a kaaduan kadagidiay adda a sibibiag ket naurnongda iti dasig ti Apo nanipud 1919? Daytoy a klase “Benjamin” ti pudpudno nga immawat iti naisangsangayan a bingay manipud ken ni Jehova, ta ti ‘espirituna met laeng paneknekanna dagiti espirituda.’ (Roma 8:16) Uray met dagitoy nasuotda maipapan iti kinatarnawda bayat a dagiti “karnero” ti Apo ti tumultulong kadakuada.​—Mateo 25:34-40.

19. Ania a panagasping ti napaliiw iti nagbaetan ti iyaakar dagiti sangakabbalayan ti Israel idiay Gosen ken ti pannakaurnong ti ili ti Dios itatta?

¹⁹ Makapainteres nga, idi inyurnos ni Faraon ti pannakaiyeg ni Jacob ken ti sangakabbalayanna idiay Egipto, amin a lallaki a “kararua” a nagnaed sadiay ket adda bilangda a 70, a pakamultiplikaran ti 7 ken 10. (Genesis 46:26, 27) Dagitoy dua a bilang ti sipapateg a maus-usar iti intero a Kasuratan, ti “7” masansan nga ipampamatmatna ti nailangitan ken ti “10” ti naindagaan a kinanaan-anay. (Apocalipsis 1:4, 12, 16; 2:10; 17:12) Daytoy ti katupag ti adda a kasasaad itatta, inton namnamaentayo a ni Jehova urnongenna iti “daga[na],” ti naespirituan a paraiso a pagragragsakantayo itan, ti maudi a kameng ti pamiliana a Saksi. (Idiligyo iti Efeso 1:10.) “Mailasin ni Jehova dagiti tattao a kukuana,” ken uray pay itan isasaadna ida iti “kasasayaatan iti daga,” kas ti kasasaad idi ti Gosen iti pagturayan ni Faraon.​—Genesis 47:5, 6; 2 Timoteo 2:19.

20. Agpapan pay iti naespirituan a panagbisin itatta, apay a masapul nga agrag-otayo?

²⁰ Idi kaaldawan ni Jose, dagiti tawtawen ti panagbisin ti simmaruno kadagiti tawtawen ti kawadwad. Itatta, dagita ti aggidgiddan. Maisupadi iti naespirituan a panagbisin iti daga iti ruar ti pabor ni Jehova, adda ti panaglaplapusanan ti naespirituan a taraon iti lugar a pagdaydayawan ken ni Jehova. (Isaias 25:6-9; Apocalipsis 7:16, 17) Wen, nupay adda ti panagbisin iti panagdengngeg kadagiti sasao ni Jehova iti Kakristianuan, kas impadto ni Amos, ti sao ni Jehova ti rummuar manipud nailangitan a Jerusalem. Anian ti panangparagsak dayta kadatayo!​—Amos 8:11; Isaias 2:2, 3; 65:17, 18.

21. (a) Ania a naindaklan a pribilehio ti tagtagiragsakentayo itatta? (b) Agpaay iti ania ti pagyamanantayo, ket kasanotay a maiyebkas ti panagyamantayo?

²¹ Itatta, iti sidong ti panangiwanwan ti Dakdakkel a Jose, ni Jesu-Kristo, addaantay ti naindaklan a pribilehio a maurnong kadagiti kas siudad a kongregasion. Sadiay pagrambakantayo iti kinaaglaplapusanan dagiti nabaknang a naespirituan a taraon ken kasta met ti panagmula kadagiti bin-i ti kinapudno ken panangisaknap ti naimbag a damag a ti naespirituan a taraon ti adda a magun-odan. Daytoy ar-aramidentay a pakagunggonaan dagiti amin a mangawat kadagiti termino ken sagana a siayat nga inyurnos ti Soberano nga Agturay, ni Jehova. Anian ti panagyamantayo iti Diostayo a maipaay iti sagut ti Anakna, ti Dakdakkel a Jose, nga agserserbi kas ti masirib nga Administrador iti naespirituan a taraon! Isu ti binilin ni Jehova nga agtignay kas ti manangispal iti biag iti daytoy tiempo ti naespirituan a panagbisin. Sapay koma ta tunggal maysa kadatayo ipakitana ti regta iti panangipaay iti sagrado a serbisio a sumursurot iti ulidanna ken iti sidong ti panangidadaulona!

Makitkitayo Aya ti Katupagna?

◻ Kasano a ni Jose umasping ken ni Jesus kas ti Administrador ti Pagtaraon?

◻ Ania ti adda iti drama ni Jose a maiyarig iti panagbalin nga ad-adipen ti Dios babaen iti dedikasion?

◻ Ania a kualidad ti impakita ni Jose ken ni Jesus kas pagulidanantayo itatta?

◻ Kas idi kaaldawan ni Jose, ania a naan-anay nga urnos a maipaay iti pannakaiwaras ti taraon ti adda met itatta?

◻ Ti panangusigtayo iti daytoy a drama tignayennatayo a mangaramid iti ania?

[Dagiti ladawan iti panid 16, 17]

Iti lubong a naabbongutan iti naespirituan a panagbisin, ti Dakdakkel a Jose mangipapaay a siwawadwad kadagiti isuamin nga umay kenkuana nga addaan pammati

Kas ti panangipakita dagiti sangapulo a kakabsat ni Jose iti ama iti panagpasakop, maysa a dakkel a bunggoy itan ti mangbigbig ken ni Kristo

Kas kadagiti 70 a karkararua iti sangakabbalayan ni Jacob, ti naan-anay a bilang dagiti “karnero” ni Jehova makagtengda iti nasayaat a “daga”​—ti naespirituan a paraiso a tagtagiragsakentayon

[Ladawan iti panid 18]

Ti moderno-aldaw a klase Benjamin ti nangnangruna a pinaraburan ni Kristo, nga immawat iti aglaplapusanan a “taraon iti umiso a tiempo”