Dagiti Naemma Tawidendanto ti Daga
“Ar-arapaapek ti pannakabalbaliw ken pannakaisubli ti nakaparsuaan. . . . Saan nga inton bigat, no di ket iti mabayag pay a tiempo, inton addan ti baro a langit ken baro a daga.”—Jean-Marie Pelt, Pranses nga eksperto iti aglawlaw.
GAPU ta madanaganda kadagiti kasasaad iti nakaparsuaan ken iti kagimongan, adu ti mangtartarigagay a mapagbalin koma a paraiso ti planetatayo. Ngem saan laeng dayta a maysa nga arapaap ti moderno a panawen. Nabayagen nga inkari ti Biblia ti pannakaisubli ti Paraiso a daga. Sinao ni Jesus ti dadduma kadagita idi kinunana, “Dagiti naemma . . . tawidendanto ti daga” ken “Maaramid koma ti pagayatam kas sadi langit.” (Mateo 5:5; 6:10, Ti Biblia) Ngem saan nga amin a tattao ita ket mamati iti maysa a paraiso a daga a pagnaedan dagiti naemma. Para iti kaaduan a mangibagbaga a Kristianoda, awanen ti Paraiso.
Ti Pranses a linawas a magasin a La Vie ilawlawagna no apay a binaybay-anen ti Iglesia Katolika ti panamati iti paraiso—ditoy man daga wenno idiay langit: “Kalpasan a sibibileg nga inimpluensiaanna dagiti Katoliko a sursuro iti di kumurang a 19 a siglo, ti [kapanunotan nga adda] paraiso ket saanen a nairaman kadagiti narelihiosuan nga aktibidad, sermon iti Domingo, kurso iti teolohia, ken klase ti katekismo.” Ti mismo a sao a paraiso ket nakuna a “nakullaapan” iti “misterio ken pannakariro.” Saan pay ketdin a kayat a pagsaritaan dayta ti dadduma a manangaskasaba agsipud ta “iladawanna ti adu unay nga ideya maipapan iti kinaragsak iti daga.”
Para ken ni Frédéric Lenoir, maysa a sosiolohista maipapan iti relihion, dagiti panangmatmat maipapan iti paraiso ket “nakairuaman laengen a kapanunotan ti kaaduan.” Umasping iti dayta, ni Jean Delumeau a historiador ken autor ti sumagmamano a libro mainaig iti dayta a banag, kunana a simboliko ti kaitungpalan dagiti kari ti Biblia. Insuratna: “No iti saludsod nga, ‘Addanto kadi pay Paraiso?’ Kastoy ti kanayon a sungbat ti Kristiano a relihion: Gapu iti panagungar ti Manangisalakan, dumtengto ti aldaw a masagraptayto amin ti kinaragsak.”
Napateg pay kadi ti mensahe maipapan iti maysa a paraiso a daga? Ania aya a talaga ti masanguanan ti planetatayo? Saan kadi a nalawag no ania ti agur-uray iti masanguanan, wenno, mabalin a makitatayo dayta a silalawag? Masungbatan dagita a saludsod iti sumaganad nga artikulo.
[Picture Credit Line iti panid 2]
AKKUB:Emma Lee/Life File/Getty Images