‘Ti Matalek nga Adipen’ Napagballigianna ti Pannubok!

“Dayta ti naituding a tiempo a ti panangukom mangrugi iti balay ti Dios.”​—1 PEDRO 4:17.

1. Ania ti nasarakan ni Jesus idi sinukimatna ti “adipen”?

IDI Pentecostes 33 K.P., dinutokan ni Jesus ti maysa nga “adipen” a mangtaraon iti ‘sangakabbalayanna’ iti umiso a tiempo. Idi 1914, naitrono ni Jesus kas Ari, ket di nagbayag, sinukimatna dayta nga “adipen.” Iti kaaduan a pasetna, nasarakanna dayta nga “adipen” a pudno a “matalek ken masirib.” Gapuna, intalekna iti dayta nga adipen ti “amin a sanikuana.” (Mateo 24:45-47) Nupay kasta, adda met ti maysa a dakes nga adipen, a saan a matalek wenno masirib.

“Dayta a Dakes nga Adipen”

2, 3. Nagtaudan ti “dakes nga adipen,” ken kasano a nagbalin a kasta?

² Dinakamat ni Jesus ti dakes nga adipen apaman a nailawlawagna ti maipapan ‘iti matalek ken masirib nga adipen.’ Kinunana: “No dayta a dakes nga adipen kunaenna iti pusona, ‘Ni apok agtaktak,’ ket rugianna a kabilen dagiti padana nga adipen ket makipangan ken makiinum kadagiti napaneknekan a managbartek, ti apo dayta nga adipen umayto iti aldaw a saanna nga inanamaen ken iti oras a saanna nga ammo, ket dusaennanto iti kakaruan unay ket itudingnanto kenkuana ti pannakabagina a mairaman kadagiti managinsisingpet. Sadiay nga addanto ti panagsangitna ken ti panagngaretnget dagiti ngipenna.” (Mateo 24:48-51) Ti ebkas a “dayta a dakes nga adipen” ipalagipna kadatayo ti immun-una a sasao ni Jesus maipapan iti matalek ken masirib nga adipen. Wen, ti “dakes nga adipen” ket dati a kameng ti matalek nga adipen.a Kasano?

³ Sakbay ti 1914, adu a kameng ti matalek a klase adipen ti kasta unay a mangnamnama a maikaykaysada iti Nobio idiay langit iti dayta a tawen, ngem saan a natungpal ti ninamnamada. Gapu iti dayta ken kadagiti dadduma a pasamak, adu ti nadismaya ken sumagmamano ti nagsakit ti nakemda. Dadduma kadagitoy ti berbal a ‘nangkabil’ kadagiti dati a kakabsatda ken nakikaduada “kadagiti napaneknekan a managbartek,” dagiti narelihiosuan a grupo ti Kakristianuan.​—Isaias 28:1-3; 32:6.

4. Ania ti inaramid ni Jesus iti “dakes nga adipen” ken kadagiti amin a nangipakita iti umasping a kababalin?

⁴ Dagitoy a dati a Kristiano nagbalinda a kas ti “dakes nga adipen,” ket dinusa ida ni Jesus iti ‘nakaro unay.’ Kasano? Inlaksidna ida, ket napukawda ti nailangitan a namnamada. Ngem saanda nga insigida a nadadael. Masapul a mapasaranda ti maysa a periodo ti panagsangit ken panagngaretnget ti ngipen “iti sipnget iti ruar” ti kongregasion Kristiano. (Mateo 8:12) Sipud kadagidi nga al-aldaw, sumagmamano a napulotan nga indibidual ti nangiparangarang iti umasping a dakes a kababalin, a mangipakita a karamanda iti “dakes nga adipen.” Dadduma kadagiti “sabsabali a karnero” ti saan met a nagmatalek kas kadakuada. (Juan 10:16) Amin dagita a kabusor ni Kristo ket nagtungpal iti agpadpada a naespirituan a “sipnget iti ruar.”

5. Ania ti reaksion ti matalek ken masirib nga adipen, a maisupadi iti “dakes nga adipen”?

⁵ Kaskasdi, limmasat ti matalek ken masirib nga adipen iti isu met laeng a pannubok a naipasango iti “dayta a dakes nga adipen.” Ngem imbes nga agsakit ti nakemda, nagpaaturda. (2 Corinto 13:11) Rimmayray ti ayatda ken ni Jehova ken kadagiti kakabsatda. Kas resultana, nagbalinda a “maysa nga adigi ken sadiri ti kinapudno” kadagitoy nariribuk a “maudi nga aldaw.”​—1 Timoteo 3:15; 2 Timoteo 3:1.

Dagiti Masirib ken Naampang a Birhen

6. (a) Kasano nga inyilustrar ni Jesus ti kinasirib ti matalek a klase adipenna? (b) Sakbay ti 1914, ania a mensahe ti impakaammo dagiti napulotan a Kristiano?

⁶ Kalpasan ti panangdakamatna iti “dayta a dakes nga adipen,” tinukoy ni Jesus ti dua a pangngarig a mangipakita no apay a dadduma laeng kadagiti napulotan a Kristiano ti agtalinaed a matalek ken masirib.b Kas panangipakita iti kinasiribda, kinunana: “Ti pagarian ti langlangit agbalinto a kas iti sangapulo a birhen a nangala kadagiti pagsilawanda ket rimmuarda a sumabet iti nobio. Lima kadakuada ti naampang, ket lima ti masirib. Ta dagiti naampang intugotda dagiti pagsilawanda ngem saanda a nangitugot iti lana, idinto ta dagiti masirib nangitugotda iti lana kadagiti pagkargaanda a mairaman kadagiti pagsilawanda.” (Mateo 25:1-4) Ti sangapulo a birhen ipalagipda kadatayo dagiti napulotan a Kristiano sakbay ti 1914. Namnamaenda nga agparang ti nobio, ni Jesu-Kristo. Gapuna, “rimmuarda” tapno sabtenda ni Jesus, a situtured nga inkasabada nga agpatingga idi 1914 ti “naituding a pampanawen dagiti nasion.”​—Lucas 21:24.

7. Kaano ken apay nga arigna a ‘nakaturog’ dagiti napulotan a Kristiano?

⁷ Husto ti ninamnamada. Nagpatingga idi 1914 ti naituding a pampanawen dagiti nasion ket nangrugi nga agturay ti Pagarian ti Dios iti sidong ni Kristo Jesus. Ngem napasamak dayta iti di makita a langlangit. No ditoy daga, nangrugi ti naipadto a ‘nakakaasi’ a kasasaad ti sangatauan. (Apocalipsis 12:10, 12) Simmaruno ti tiempo ti pannakasubok. Gapu ta saan pay idi a nalawag ti pannakaawat dagiti napulotan a Kristiano, impagarupda a ‘nagtaktak ti nobio.’ Gapu ta dida ammo ti aramidenda ken busoren ida ti lubong, gimminad ken dandani nagsardeng ti organisado a panangasabada iti publiko. Kas kadagiti birhen iti pangngarig, ‘nagdungsa ken nakaturogda’ iti naespirituan, no kasano a kasta met ti inaramid dagiti saan a matalek nga agkunkuna a Kristiano kalpasan a natay dagiti apostol ni Jesus.​—Mateo 25:5; Apocalipsis 11:7, 8; 12:17.

8. Ania ti makagapu a naipukkaw: “Adtoyen ti nobio!” ket ania ti nasken nga aramiden dagiti napulotan a Kristiano iti daydi a tiempo?

⁸ Kalpasanna idi 1919, adda di ninamnama a napasamak. Mabasatayo: “Iti mismo a tengnga ti rabii adda timmaud a pukkaw, ‘Adtoyen ti nobio! Rummuarkayon a sumabet kenkuana.’ Idin amin dagidiay a birhen timmakderda ket tinarimaanda dagiti pagsilawanda.” (Mateo 25:6, 7) No kaano a kasla awanen ti namnama, naidagadag ti panagbalin nga aktibo! Idi 1918, ni Jesus, “ti mensahero ti tulag,” dimteng iti naespirituan a templo ni Jehova tapno sukimaten ken gugoranna ti kongregasion ti Dios. (Malakias 3:1) Iti kasta, nasken a rummuar dagiti napulotan a Kristiano tapno sabtenda ni Jesus iti naindagaan a paraangan dayta a templo. Panawenen tapno ‘mangipaayda iti lawag.’​—Isaias 60:1; Filipos 2:14, 15.

9, 10. Idi 1919, kasano a “masirib” ti dadduma a Kristiano ken “naampang” ti dadduma?

⁹ Ngem aguraykayo! Iti pangngarig, adda parikut ti dadduma a babbalasang. Intuloy ni Jesus: “Dagiti naampang kinunada kadagiti masirib, ‘Ikkandakami iti lanayo, agsipud ta dagiti pagsilawanmi ngannganida maiddepen.’” (Mateo 25:8) No awan ti lana, saan a makaited iti lawag dagiti pagsilawan. Dagiti lana ti pagsilawan ipalagipda kadatayo ti kinapudno iti Sao ti Dios ken ti nasantuan nga espirituna, a mangkabal kadagiti pudno nga agdaydayaw tapno makaipaayda iti lawag. (Salmo 119:130; Daniel 5:14) Sakbay ti 1919, dagiti masirib a napulotan a Kristiano siaanep nga inadalda no ania ti pagayatan ti Dios para kadakuada, nupay temporario a kimmapuyda. Gapuna, nakasaganada idi nayawis a maisilnag ti lawag.​—2 Timoteo 4:2; Hebreo 10:24, 25.

¹⁰ Ngem adda dagiti napulotan a saan a nakasagana nga agsakripisio wenno siaanep nga agregget​—nupay sipapasnek a tarigagayanda ti makikadua iti Nobio. Gapuna, saanda a nakasagana idi dimteng ti panawen a masapul a sireregta a maikasaba ti naimbag a damag. (Mateo 24:14) Pinadasda pay ketdi a pakapuyen dagiti naregta a kakaduada, nga arigna a kidkiddawenda ti dadduma a lana dagiti kakaduada. Iti pangngarig ni Jesus, ania ti inaramid dagiti masirib a birhen? Kinunada: “Amangan no awan ti makaanay a maipaay kadakami ken kadakayo. Imbes ketdi, inkayo kadagidiay aglaklako iti dayta ket gumatangkayo iti maipaay kadakayo.” (Mateo 25:9) Umasping iti dayta, dagiti nasungdo a napulotan a Kristiano idi 1919 dida nagaramid iti aniaman a mangpakapuy iti panangisilnagda iti lawag. Gapuna, napagballigianda ti pannubok.

11. Ania ti napasamak kadagiti naampang a birhen?

¹¹ Inngudo ni Jesus: “Bayat a [dagiti naampang a birhen] mapmapanda gumatang, dimteng ti nobio, ket dagiti birhen a sisasagana simrekda a kimmuyog kenkuana iti padaya ti kasar; ket ti ridaw nairikep. Kalpasanna immay met ti dadduma kadagiti birhen, a kunkunada, ‘Apo, apo, ilukatannakami!’ Kas sungbat kinunana, ‘Ibagak kadakayo ti pudno, Saankayo nga am-ammo.’” (Mateo 25:10-12) Wen, saan a nakasagana ti dadduma iti isasangpet ti Nobio. Gapuna, napaayda iti pannubok ket napukawda ti gundaway a makiraman iti nailangitan a padaya ti kasar. Anian a nakalkaldaang!

Ti Pangngarig Maipapan Kadagiti Talento

12. (a) Kasano nga inyilustrar ni Jesus ti kinamatalek? (b) Asino ti tao a “napan iti sabali a daga”?

¹² Kalpasan nga inlawlawagna ti kinasirib, insaruno ni Jesus ti kinamatalek. Kinunana: “Dayta ket kas idi a ti maysa a tao, a nganngani agdaliasat iti sabali a daga, inayabanna dagiti adipenna ket intalekna kadakuada dagiti sanikuana. Ket iti daydiay maysa isu nangted iti lima a talento, iti sabali dua, iti sabali pay maysa, iti tunggal maysa sigun iti bukodna a kabaelan, ket isu napan iti sabali a daga.” (Mateo 25:14, 15) Ti tao iti dayta a pangngarig isu ni Jesus, a “napan iti sabali a daga” idi nagpalangit idi tawen 33 K.P. Ngem sakbay dayta, intalek ni Jesus “dagiti sanikuana” kadagiti matalek nga adalanna. Kasano?

13. Kasano nga insagana ni Jesus ti maysa a dakkel a trabaho ken kasanona nga inautorisaran nga agnegosio “dagiti adipenna”?

¹³ Bayat ti ministeriona ditoy daga, insagana ni Jesus ti maysa a dakkel a trabaho babaen ti panangikasabana iti naimbag a damag ti Pagarian iti intero nga Israel. (Mateo 9:35-38) Sakbay a “napan iti sabali a daga,” intalekna dayta a trabaho kadagiti matalek nga adalanna, a kunkunana: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:18-20) Babaen kadagitoy a sasao, inautorisaran ni Jesus “dagiti adipenna” nga agnegosio agingga iti panagsublina, “iti tunggal maysa sigun iti bukodna a kabaelan.”

14. Apay a saan a manamnama nga agpapada ti magapuanan ti tunggal maysa iti negosio?

¹⁴ Ti ebkas nga “iti tunggal maysa sigun iti bukodna a kabaelan” ipasimudaagna a saan nga agpapada ti pribilehio wenno abilidad dagiti Kristiano idi umuna a siglo. Kas kada Pablo ken Timoteo, dadduma ti nawaya a nakiraman iti trabaho a panangasaba ken panangisuro. Mabalin a limitado ti nagapuanan ti dadduma gapu iti kasasaadda. Kas pagarigan, dadduma a Kristiano ket adipen, masakit, lakayen wenno baketen, wenno addaan kadagiti pagrebbengan iti pamilia. Ken adda dagiti pribilehio iti kongregasion a saan a tinagiragsak ti dadduma nga adalan. Dagiti napulotan a babbai ken dadduma a napulotan a lallaki dida nangisuro iti kongregasion. (1 Corinto 14:34; 1 Timoteo 3:1; Santiago 3:1) Ngem aniaman ti personal a kasasaadda, amin dagiti napulotan nga adalan ni Kristo, lallaki ken babbai, ket nabilin nga agnegosio, nga usarenda a naimbag dagiti oportunidad ken kasasaadda iti Nakristianuan a ministerio. Kasta met laeng ti aramiden dagiti moderno aldaw nga adalan ni Kristo.

Nangrugi ti Panagsukimat!

15, 16. (a) Kaano a dimteng ti tiempo ti pannakikuenta? (b) Aniada a baro nga oportunidad iti ‘negosio’ ti naited kadagiti matalek?

¹⁵ Intuloy ti pangngarig: “Kalpasan ti nabayag a tiempo immay ti apo dagidiay nga adipen ket nakikuenta kadakuada.” (Mateo 25:19) Idi 1914​—nga awan duadua a nabayag a tiempo kalpasan ti 33 K.P.​—nangrugi nga agturay ni Kristo Jesus. Tallo ket kagudua a tawen kalpasanna, idi 1918, dimteng ni Jesus iti naespirituan a templo ti Dios ket tinungpalna ti sasao ni Pedro: “Dayta ti naituding a tiempo a ti panangukom mangrugi iti balay ti Dios.” (1 Pedro 4:17; Malakias 3:1) Panawenen tapno makikuenta.

¹⁶ Ania ti inaramid dagiti adipen, dagiti napulotan a kakabsat ni Jesus, mainaig kadagiti “talento” ti Ari? Manipud idi 33 K.P. agingga idi 1914, adu ti siaanep a nagtrabaho iti ‘negosio’ ni Jesus. (Mateo 25:16) Uray idi umuna a sangalubongan a gubat, impakitada ti nasged a tarigagayda nga agserbi iti Apo. Gapuna, maitutop laeng a maikkan dagiti matalek nga adipen kadagiti baro a gundaway nga ‘agnegosio.’ Dimtengen ti tiempo ti panungpalan daytoy sistema ti bambanag. Masapul a maikasaba ti naimbag a damag iti intero a daga. Nasken a maani “ti anien iti daga.” (Apocalipsis 14:6, 7, 14-16) Masapul a maurnong dagiti maudi a kameng ti klase trigo ken ti “maysa a dakkel a bunggoy” ti sabsabali a karnero.​—Apocalipsis 7:9; Mateo 13:24-30.

17. Kasano a dagiti matalek a napulotan a Kristiano ‘simrekda iti rag-o ni apoda’?

¹⁷ Maysa a naragsak a panawen ti panagani. (Salmo 126:6) Maitutop ngarud nga idi 1919, idi a ni Jesus impabaklayna kadagiti matalek a napulotan a kakabsatna ti dakdakkel nga annongen, kinunana: “Matalekka iti sumagmamano a banag. Dutokankanto iti adu a banag. Sumrekka iti rag-o ni apom.” (Mateo 25:21, 23) Maysa pay, saantay a matukod ti rag-o ti Apo kas kabbaro a naitrono nga Ari iti Pagarian ti Dios. (Salmo 45:1, 2, 6, 7) Makipagrag-o ti matalek a klase adipen babaen ti panangibagida iti Ari ken panangpaaduda kadagiti sanikuana ditoy daga. (2 Corinto 5:20) Naragsakda kas ipakita dagiti naimpadtuan a sasao iti Isaias 61:10: “Di bumurong nga agragsakakto ken Jehova. Ti kararuak agrag-onto iti Diosko. Ta kinawesannak kadagiti pagan-anay ti pannakaisalakan.”

18. Apay a saan a nakapasa ti dadduma iti pannubok, ket ania ti resultana?

¹⁸ Nakalkaldaang ta saan nga amin ket nakapasa iti pannubok. Mabasatayo: “Immasideg daydiay immawat iti maysa a talento ket kinunana, ‘Apo, am-ammoka a maysaka a nainget a tao, nga agan-ani iti saanmo a nagmulaan ken agur-urnong sadiay a saanmo a nagtaepan. Gapuna a nagbutengak ket napanak ket inlemmengko ti talentom iti daga. Adtoy alaem ti kukuam.’” (Mateo 25:24, 25) Umasping iti dayta, saan a ‘nagnegosio’ ti dadduma a napulotan a Kristiano. Sakbay ti 1914, saanda a sireregta nga inranud ti namnamada, ket dida kayat a rugian idi 1919. Ania ti reaksion ni Jesus iti kinasadutda? Inikkatna ti amin a pribilehioda. ‘Naipalladawda iti sipnget iti ruar, a sadiay ket agsangit ken agngaretnget dagiti ngipenda.’​—Mateo 25:28, 30.

Nagtultuloy ti Panagsukimat

19. Kasano a nagtultuloy ti panagsukimat, ken ania ti determinado nga aramiden ti amin a napulotan a Kristiano?

¹⁹ Siempre, kaaduan kadagidiay nagbalin a napulotan nga adipen ni Kristo bayat ti tiempo ti panungpalan ket saan pay nga agserserbi ken ni Jehova idi nangrugi a nagsukimat ni Jesus idi 1918. Saanda kadi a nairaman iti dayta a panagsukimat? Nairamanda. Ti napasamak idi 1918/19 ket rugrugi la ti panagsukimat, idi a nakapasa iti pannubok kas maysa a grupo ti matalek ken masirib nga adipen. Nagtultuloy ti pannakasukimat ti tunggal indibidual a napulotan a Kristiano agingga iti permanente a pannakaselioda. (Apocalipsis 7:1-3) Gapu ta ammoda dayta, dagiti napulotan a kakabsat ni Kristo determinadoda nga agtultuloy nga ‘agnegosio.’ Determinadoda nga agmasirib, a salimetmetanda ti naruay a suplay ti lana tapno agraniag ti lawag. Ammoda a no agtalinaed a matalek agingga ken patay ti asinoman kadakuada, isu ket awaten ni Jesus idiay langit.​—Mateo 24:13; Juan 14:2-4; 1 Corinto 15:50, 51.

20. (a) Ania ti determinado nga aramiden ti sabsabali a karnero ita? (b) Silalagip dagiti napulotan a Kristiano iti ania a banag?

²⁰ Ti dakkel a bunggoy ti sabsabali a karnero tinuladda dagiti napulotan a kakabsatda. Ammoda a mangyeg iti dakkel a responsabilidad ti pannakaammoda kadagiti panggep ti Dios. (Ezequiel 3:17-21) Gapuna, iti tulong ti Sao ni Jehova ken ti nasantuan nga espirituna, mapagtalinaedda met a naruay ti suplay ti lanada babaen ti panagadal ken pannakigimong. Ken pagsilnagenda ti lawagda, a makiramanda iti trabaho a panangasaba ken panangisuro ket iti kasta, ‘agnegnegosioda’ kas kadagiti napulotan a kakabsatda. Ngem silalagip dagiti napulotan a Kristiano nga isuda ti nakaitalkan dagiti talento. Sungsungbatanda no kasano ti pannakausar dagiti sanikua ti Apo ditoy daga. Uray no manmano ti bilangda, dida mabalin nga ipasa ti responsabilidadda iti dakkel a bunggoy. Bayat a silalagipda iti dayta, “ti matalek ken masirib nga adipen” itultuloyna nga idauluan ti panangaywan iti negosio ti Ari, nga agyaman iti suporta dagiti dedikado a kameng ti dakkel a bunggoy. Dagiti kameng ti dakkel a bunggoy bigbigenda ti responsabilidad dagiti napulotan a kakabsatda ken matmatanda a pribilehio ti agtrabaho iti sidong ti panangiwanwan dagitoy.

21. Ania a balakad ti agaplikar kadagiti amin a Kristiano sakbay ti 1914 agingga iti kaaldawantayo?

²¹ Gapuna, nupay daytoy dua a pangngarig lawlawaganda dagiti pasamak idi 1919 wenno kadagiti panawen nga asideg iti dayta a tawen, agaplikar ti prinsipioda kadagiti amin a pudno a Kristiano bayat ti maudi nga al-aldaw. Iti kasta, nupay ti balakad ni Jesus iti ngudo ti pangngarig maipapan iti sangapulo a birhen ket agaplikar nga umuna kadagiti napulotan a Kristiano sakbay ti 1919, agaplikar latta ti prinsipiona kadagiti amin a Kristiano. Sapay koma ta ipapusotayo amin ti sasao ni Jesus: “Agtultuloykayo nga agbantay, ngarud, agsipud ta saanyo nga ammo ti aldaw wenno uray ti oras.”​—Mateo 25:13.

[Footnotes]

Mailawlawagyo Kadi?

• Kaano a sinukimat ni Jesus dagiti pasurotna, ket ania ti nasarakanna?

• Apay a tinulad ti dadduma a napulotan a Kristiano ti kababalin “dayta a dakes nga adipen”?

• Kasanotayo a maipakita a masiribtayo iti naespirituan?

• Kas panangtulad kadagiti matalek a napulotan a kakabsat ni Jesus, kasanotayo a makapagtultuloy nga ‘agnegosio’?

[Kahon iti panid 16]

KAANO NGA UMAY NI JESUS?

Iti Mateo kapitulo 24 ken 25, nagduduma ti kaipapanan ti ‘iyaay’ ni Jesus. Saan a masapul nga ‘umay’ a literal. Imbes ketdi, ‘umay’ iti anag nga iturongna ti atensionna iti sangatauan wenno kadagiti pasurotna, masansan a tapno mangukom. Gapuna, idi 1914, ‘immay’ ni Jesus tapno rugianna ti kaaddana kas naitrono nga Ari. (Mateo 16:28; 17:1; Aramid 1:11) Idi 1918, ‘immay’ kas mensahero ti tulag ken rinugianna nga inukom dagidiay agkunkuna nga agserserbida ken ni Jehova. (Malakias 3:1-3; 1 Pedro 4:17) Iti Armagedon, ‘umay’ tapno dadaelenna dagiti kabusor ni Jehova.​—Apocalipsis 19:11-16.

Ti iyaay (wenno, idadateng) a maulit-ulit a nadakamat iti Mateo 24:29-44 ken 25:31-46 ket mapasamak kabayatan ti “dakkel a rigat.” (Apocalipsis 7:14) Iti sabali a bangir, ti iyaay a maulit-ulit a nadakamat iti Mateo 24:45 agingga iti 25:30 tuktukoyenna ti panangukom ni Jesus kadagidiay agkunkuna nga adalanna mangrugi idi 1918 ken agtultuloy. Saan a lohikal a kunaen, kas pagarigan, a ti pannakagunggona ti matalek nga adipen, ti pannakaukom dagiti naampang a birhen, ken ti pannakaukom ti nabuntog nga adipen, a nangidulin iti talento ti Apo, ket mapasamak inton ‘umay’ ni Jesus kabayatan ti dakkel a rigat. Mangipasimudaag dayta nga adu kadagiti napulotan nga adipen ti masarakan a saan a matalek kabayatan ti dakkel a rigat ket iti kasta masapul a masukatan. Imbes ketdi, ipamatmat ti Apocalipsis 7:3 nga amin a napulotan nga adipen ni Kristo ket permanente a ‘naselioanen’ inton dumteng dayta a tiempo.

[Ladawan iti panid 14]

Awan ti gunggona a naawat ti “dakes nga adipen” idi 1919

[Ladawan iti panid 15]

Nakasagana dagiti masirib a birhen idi dimteng ti nobio

[Ladawan iti panid 17]

‘Nagnegosio’ dagiti matalek nga adipen

Awan ti inaramid ti nabuntog nga adipen

[Dagiti Ladawan iti panid 18]

Dagiti napulotan ken ti “dakkel a bunggoy” intultuloyda a pinagsilnag ti lawagda