Malagipyo Pay Aya?

Inikkanyo aya ti naannad a panagpampanunot dagiti nabiit pay a ruar Ti Pagwanawanan? No kasta, mabalin a malaglagipyo pay dagiti sumaganad:

◻ Apay a di rebbeng a rambakan ti maysa a Kristiano ti Krismas?

Maysa a rason a ta ti piesta ti Krismas namunganay iti pagano a selebrasion ti Saturnalia, ti Romano a piesta ti dios ti agrikultura a ni Saturno. Kuna ti Sao ti Dios: “Saankay a makikadua iti sangol dagiti saan a mammati.” (2 Corinto 6:14-17) Ti Kristiano saan a maisina manipud kadagiti di mammati bayat nga isut’ kaskasdi a mangramrambak pay laeng ti piesta a napaganuan ti namunganayanna.​—12/15, panid 6.

◻ Ania ti Nakristianuan a Jubileo?

Daytat pannakawayawaya a ramanenna “ti kinapudno” nga isu ti mangibulos kadagiti tattao manipud “linteg ti basol ken ti ipapatay.” Daytoy a kinapudno ti naisentro “iti Anak,” ni Jesu-Kristo. (Juan 8:31-36; Roma 8:1, 2, 21)​—1/1, panid 21.

◻ Kaano a maselebraran ti Nakristianuan a Jubileo?

Idi Pentecostes 33 K.P., nangrugi a maselebraran ti Nakristianuan a Jubileo babaen kadagidiay naituding a maipaay iti biag idiay langit. Iti manamati a sangatauan a mangtagiragsakto iti biag nga agnanayon ditoy daga, maysa a naindaklan a Nakristianuan a Jubileo ti mapasaranto bayat ti Milenio, inton mapunasto aminen a marka ti natawid a basol ken kinaimperpekto.​—1/1, panid 21, 22, 27.

◻ Apay a dagiti Saksi ni Jehova saanda nga agipatpatakder ti eskuelaan para kadagiti ubbing idiay Asia ken dadduma pay?

Gapu iti kunaen ti Biblia, masapul a dagiti Saksi ni Jehova ti nangnangruna a maseknan iti nakaibaonanda a mangikasaba iti nagpateg a mensahe maipapan iti Pagarian ti Dios. (Mateo 24:14; 28:19, 20) Siaammoda met kadagiti natauan a panagsagsagaba ken kinaulpit ti agdama a sistema, ket kayatda ti tumulong aginggat’ kabaelanda. Kaskasdi bigbigenda a ti pudpudno a remedio ket adda, saan a kadagiti natauan nga im-ima, no di ket iti panangispal a dandanin iyeg dayta a Pagarian ti Dios. (Salmo 146:3-10)​—1/15, panid 7.

◻ Ania a ramramit ti pammati ti maadaltayo manipud kadagiti ulidan da Abel, Enoc, Noe, Abraham, ken ni Moises?

Ti pammati kas ken Abel pabilgenna ti panangapresiartayo iti daton ni Jesus. Ti pudno a pammati tulongannatayo nga agbalin a maingel, kas ken ni Enoc. Kas ken ni Noe, ti pammati tignayennatayo a sumurot kadagiti pannursuro ti Dios. Ti pammati ni Abraham ti mangipaganetget kadatayo ti pannakasapul nga agtulnog iti Dios ken agtalek kadagiti karkarina. Masapul nga agtalinaedtayo nga awan tulawna manipud iti lubong ken agtakder a sisusungdo kas ili ti Dios, kas impakita ni Moises.​—1/15, panid 20.

◻ Iti ania a pamay-an a ti panagusiuso ket mabalin a bendision wenno lunod?

Ti nasalun-at a panagusiuso maipapan iti Namarsuatayo, ti pagayatanna, ken kadagiti pangpanggepna ti mabalin a makapnek unay ken makagunggona, mangiyeg ragsak ken pakabang-aran iti biagtayo. Iti kasumbangirna, ti di mamedmedan a panagusiuso ti mabalin a mangiturong kadatayo iti pannakailumlum iti panangpugpugto ken natauan a teoria, a mangpakapsut ti pudpudno a pammati ken nadiosan a debosion. 2/1, panid 29.

◻ Aniat’ kayat a sawen ni Jesus idi a nagkararag: “Ama, no mabalin lumabas koma daytoy a kopa”? (Mateo 26:39)

Maseknan ni Jesus maipapan iti pammabasol a panangtabbaaw a naipabasol kenkuana. Isu daytoy ti kadadaksan a palimed a pagbasolan ti maysa a Judio. Ti ipapatayna iti dayta a kasasaad ti kasla, ngarud, mangiyeg iti pannakalais ti nailangitan nga Amana. 2/15, panid 13.

◻ Tapno maibturan ti maysa a tao ti panagsagaba wenno rigat, aniat’ nainsiriban a kurso nga alaenna?

Kasayaatan para kenkuana ti agbalin a naanus, a kumita a siinanama iti Dios a maipaay iti pakabang-aran, ken ad-adda nga umadani Kenkuana. Daytoy ti mamagbalin a nalaka para iti maysa a tao a lasaten dagiti dadduma nga umas-asping a kapadasan iti biag a di mapukawan iti namnama. (Dagiti Un-unnoy 3:25-31) 2/15, panid 24.

◻ Asinoda “ti sangapulo ket dua a tribo ti Israel” a nadakamat ni Jesus idiay Lucas 22:28-30?

Ireprepresentar amin daytoy dagiti tattao iti sangatauan nga ukomento ni Kristo ken dagiti 144,000 a nababbaba a papadina maipapan iti pannakapabaro ti kaputotan iti amin a pinanggep ti Dios nga agpaay iti daytoy a daga. (Mateo 19:28) 3/1, panid 28.

◻ Aniat’ kayat a sawen ti nadiosan a talna, ket kasano a magun-odan dayta?

Ti nadiosan a talna ket maysa a kalmado a kasasaad ti isip ken puso, ti makin-uneg a kasasaad ti kinatalinaay, agpapan pay aniat’ mapaspasamak. (Salmo 4:8) Daytat’ mapagteng laeng manipud iti naanamongan a pannakirelasion iti Dios, a napagbalin a posible babaen iti daton a subbot ni Kristo Jesus. (Colosas 1:19, 20) 3/15, panid 11, 14 15.

◻ Ania dagiti probision adda kadatayo a tumulong kadatayo tapno maam-ammotayo a nasingsinged pay ti Dios?

Agpadpada nga addaantayo ti Biblia ken ti pannakaawat kadagiti sinigsiglo a natungtungpalen a padto ti Biblia. Kasta met, addaantayo ti rekord iti Ebanghelio ti biag, ar-aramid, ken sasao ni Jesu-Kristo, a nagkunaan ni Pablo: “Ta kenkuana [ni Kristo] agtaeng ti naan-anay a kinadios a sibubukel.” (Colosas 2:9) 4/1, panid 6.