Situtulok nga Agserbikayo iti Dios

“SIRARAGSAKAKTO unay a mangbusbos ken naan-anay a mabusbos maipaay kadagiti kararuayo,” insurat ni apostol Pablo. (2 Corinto 12:15) Ania ti ipasimudaag kadakayo dagitoy a sasao maipapan iti panangmatmat ken kababalin a patanoren koma dagiti adipen ni Jehova? Sigun iti maysa nga eskolar ti Biblia, idi insurat ni Pablo dagita a sasao kadagiti Kristiano idiay Corinto, kastoy ti kayatna a sawen: “Situtulokak a mangusar iti pigsa, panawen, ken biagko, ken ti amin nga adda kaniak agpaay iti pagimbaganyo, kas iti ama a maragsakan a mangaramid iti kasta maipaay kadagiti annakna.” Nakasagana ni Pablo a “naan-anay a mabusbos,” wenno “agbannog ken mapaksuyan,” no dayta ti kasapulan tapno maitungpalna ti ministeriona kas Kristiano.

Maysa pay, ‘siraragsak unay’ nga inaramid ni Pablo amin dagita. “Naan-anay a situtulok” a nangaramid iti dayta, kuna ti The Jerusalem Bible. Dakayo ngay? Situtulokkay kadi a mangusar iti panawen, pigsa, saguday, ken sanikuayo a pagserbi ken ni Jehova a Dios ken para iti pagimbagan dagiti sabali, uray no ‘mabannog ken mapaksuyankayo’ no dadduma tapno laeng maaramidyo dayta? Ken ‘siraragsak unay’ kadi nga aramidenyo daytoy?

Pulos a Dida Kayat ti Agserbi

Saan la a bumdeng ti kaaduan a tattao nga agserbi iti Dios no di ket pulos a dida kayat nga aramiden dayta. Awananda iti panagyaman, agimbubukodda, nasukir pay ketdi. Inallukoy ni Satanas da Adan ken Eva iti kasta a panagpampanunot. Siuulbod a kinunana nga ‘agbalinda a kas iti Dios, a makaammo iti naimbag ken dakes’​—a kabaelanda nga ikeddeng iti kabukbukodanda no ania ti umiso ken di umiso. (Genesis 3:1-5, NW) Dagidiay addaan ita iti kasta a panagpampanunot ipagarupda a rumbeng a naan-anay a nawayada nga agaramid iti kaykayatda nga awan a pulos ti sungsungbatanda iti Dios wenno dina ida pakibiangan. (Salmo 81:11, 12) Kayatda nga usaren ti amin nga ik-ikutanda nga agpaay iti bukodda a pagimbagan.​— Proverbio 18:1.

Mabalin a diyo anamongan ti kastoy a nalabes a panangmatmat. Nalabit pudpudno nga apresiarenyo ti sagut a biag a tagtagiragsakenyo ita ken ti nasaysayaat pay a namnama a panagbiag nga agnanayon iti paraiso a daga. (Salmo 37:10, 11; Apocalipsis 21:1-4) Mabalin a napalaus ti yamanyo ken Jehova gapu iti kinaimbagna kadakayo. Ngem nasken nga agannadtayo amin iti peggad a ni Satanas kabaelanna a ballikugen ti panagpampanunottayo tapno saanen a makaay-ayo iti Dios ti panagserbitayo. (2 Corinto 11:3) Kasano a mapasamak daytoy?

Nasken ti Situtulok a Panagserbi

Kayat ni Jehova ti situtulok, naimpusuan a panagserbi. Pulos a dinatay piliten a mangaramid iti pagayatanna. Ar-aramiden ni Satanas ti amin a kabaelanna a mangimpluensia wenno mangallukoy kadagiti tattao a mangaramid iti pagayatanna. Mainaig iti panagserbi iti Dios, dakamaten ti Biblia ti maipapan kadagiti obligasion, bilin, annuroten, ken dadduma pay. (Eclesiastes 12:13; Lucas 1:6) Ngem ti kangrunaan a motibotayo nga agserbi iti Dios isu ti panagayattayo kenkuana.​—Exodo 35:21; Deuteronomio 11:1.

Uray no kasano kaanep ti panagserbi ni Pablo iti Dios, ammona nga awan mamaay daytoy no ‘awan ayatna.’ (1 Corinto 13:1-3) Iti panangawag dagiti nagsurat iti Biblia kadagiti Kristiano kas ad-adipen ti Dios, saanda a tuktukoyen ti nakaay-ay-ay a panagpaadipen gapu iti panangpilit. (Roma 12:11; Colosas 3:24) Ti kayatda a sawen isu ti situtulok a panagpasakup a naibatay iti nauneg, naimpusuan a panagayat iti Dios ken iti Anakna a ni Jesu-Kristo.​—Mateo 22:37; 2 Corinto 5:14; 1 Juan 4:10, 11.

Masapul nga iyanninaw met ti panagserbitayo iti Dios ti nauneg a panagayat kadagiti tattao. “Nagbalinkami a naalumamay iti tengngayo, a kas met laeng no ti agtagtagibi nga ina taripatuenna dagiti bukodna nga annak,” insurat ni Pablo iti kongregasion sadi Tesalonica. (1 Tesalonica 2:7) Sigun iti paglintegan ti adu a pagilian ita, adda obligasion dagiti inna a mangaywan kadagiti annakda. Ngem ar-aramiden daytoy ti kaaduan nga inna saan laeng a tapno matungpalda ti linteg. Ar-aramidenda dayta gapu ta ipatpategda dagiti annakda. Kinapudnona, siraragsak nga agsakripisio iti kasta unay ti agtagtagibi nga ina gapu kadagiti annakna! Gapu ta addaan ni Pablo iti kasta met laeng a ‘nadungngo a panagayat’ kadagidiay pinagserbianna, ‘naay-ayo unay’ (“situtulok,” King James Version; “maragsakan,” New International Version) a nangusar iti mismo a biagna tapno matulonganna ida. (1 Tesalonica 2:8) Ayat ti mangtignay kadatayo a mangtulad iti ulidan ni Pablo.​—Mateo 22:39.

Ti Ngay Mapilpilit a Panagserbi?

Siempre, ditay koma ipateg nga ad-adda ti bagitayo ngem iti Dios ken kadagiti tattao. Ta no mapasamak dayta, mabalin a saanen a naimpusuan, napilpilit laengen ti panagserbitayo. Amangan no agsakit pay ketdi ti nakemtayo, a marurodtayo ta ditay maaramid ti kaykayattayo. Napasamak daytoy kadagiti dadduma nga Israelita a napukaw ti panagayatda iti Dios ngem nagserbida latta kenkuana gapu laeng ta obligadoda. Ania ti nagbanaganna? Nagbalin a ‘makabannog’ kadakuada ti panagserbi iti Dios.​—Malakias 1:13.

Nasken a kanayon nga “awan pilawna,” awan depektona, ken “kasayaatan” dagiti maidaton iti Dios. (Levitico 22:17-20; Exodo 23:19, NW) Ngem imbes a dagiti kasayaatan kadagiti animalda ti itedda ken Jehova, dagiti saanda a kayat a mismo ti indaton dagiti tattao idi kaaldawan ni Malakias. Ania ti reaksion ni Jehova? Kinunana kadagiti papadi: “No mangidatagkayo iti bulsek nga animal a kas daton: ‘Saan a dakes,’ [kunayo]. Ket no mangidatagkayo iti pilay wenno masakit nga animal: ‘Saan a dakes.’ Padasenyo man nga iyasideg iti gobernadoryo. Maragsakan ngata kadakayo, wenno awatennakayo ngata a siaayat? . . . Ket inyegyo ti rinabsut, ken ti pilay, ken ti masakit; wen, inyegyo a kas sagut. Pagragsakak aya dayta iti imayo?”​—Malakias 1:8, 13, NW.

Kasano a mapasamak daytoy iti asinoman kadatayo? Mabalin a ‘makabannog’ dagiti sakripisio nga ar-aramidentayo no awanantayo iti pudpudno a natallugod a puso ken espiritu. (Exodo 35:5, 21, 22; Levitico 1:3; Salmo 54:6; Hebreo 13:15, 16) Kas pagarigan, ti kadi tidtidda a panawentayo ti maaw-awat ni Jehova?

Iti panagkunayo, maay-ayo kadi ti Dios no piliten ti maysa a napudno a kameng ti pamilia wenno naregta a Levita ti di natallugod nga Israelita a mangpili iti kasayaatan nga animal nga idatonna idinto ta iti kinaagpaysona dina kayat nga idaton dayta? (Isaias 29:13; Mateo 15:7, 8) Saan nga inawat ni Jehova dagiti kasta a daton ket idi kamaudiananna linaksidna dagiti tattao a nangidaton kadagita.​—Oseas 4:6; Mateo 21:43.

Pagragsakanyo nga Aramiden ti Pagayatan ti Dios

Tapno makaay-ayo iti Dios ti panagserbitayo kenkuana, masapul a tuladentayo ti ulidan ni Jesu-Kristo. “Sapulek, saan a ti bukodko a pagayatan,” kinunana, “no di ket ti pagayatan daydiay nangibaon kaniak.” (Juan 5:30) Naragsakan unay ni Jesus a nagserbi a sitatallugod iti Dios. Tinungpal ni Jesus ti naimpadtuan a sasao ni David: “Pagragsakak nga aramiden ti pagayatam, O Diosko.”​—Salmo 40:8.

Nupay pagragsakan ni Jesus nga aramiden ti pagayatan ni Jehova, saan a kanayon a nalaka daytoy. Usigenyo ti napasamak sakbay la unay ti pannakatiliw, pannakausig, ken pannakapapatayna. Bayat nga adda iti minuyongan ti Getsemani, ‘naldaangan unay’ ken ‘natutuok’ ni Jesus. Maladingitan unay nga uray la “ti ling-etna nagbalin a kas kadagiti tedted ti dara nga agtintinnag iti daga” bayat nga agkarkararag.​—Mateo 26:38; Lucas 22:44.

Apay a natutuok ni Jesus? Nalawag a saan a gapu ta ti bagina laeng ti pampanunotenna wenno bumdeng a mangaramid iti pagayatan ti Dios. Madadaan idi a matay, nga uray la tinubngarna ni Pedro idi kinunana: “Kaasiam ta bagim, Apo; dinto pulos maadda kenka daytoy a pagtungpalan.” (Mateo 16:21-23) Maseknan idi ni Jesus no kasano a ti ipapatayna kas maum-umsi a kriminal apektaranna ni Jehova ken ti nasantuan a naganna. Ammo ni Jesus a masaktan unay ni Amana a makakita iti kasta a naulpit a pannakatrato ti dungdungnguenna nga Anak.

Naawatan met ni Jesus nga umad-adani idin ti maysa a napateg a kanito iti pannakaibanag ti panggep ni Jehova. Ti matalek a panangtungpal kadagiti linteg ti Dios nabatad nga ipakitana a kabaelan met koma ni Adan nga inaramid dayta. Ti kinamatalek ni Jesus ibutaktakna a bin-ig a kinaulbod ti kuna ni Satanas a no masuot dagiti tattao saanda a situtulok ken simamatalek nga agserbi iti Dios. Babaen ken Jesus, dadaelento ni Jehova ni Satanas ken pukawennanto dagiti epekto ti iyaalsana.​—Genesis 3:15.

Anian a nagdagsen a responsabilidad ti naipabaklay ken Jesus! Ti nagan ni Amana, ti talna iti uniberso, ken ti pannakaisalakan ti sangatauan ket nagpannuray iti kinamatalek ni Jesus. Gapu ta mabigbigna daytoy, inkararagna: “Amak, no mabalin, daytoy a kopa lumabas koma kaniak. Nupay kasta, saan a kas iti pagayatak, no di ket kas iti pagayatam.” (Mateo 26:39) Uray iti sidong ti nakaro a rigat, pulos a di napukaw ti kinatulok ni Jesus nga agtungpal iti pagayatan ni Amana.

‘Ti Espiritu Sigagagar, Ngem ti Lasag Nakapuy’

Yantangay nagsagaba iti kasta unay ni Jesus bayat ti panagserbina ken Jehova, manamnamatayo a parigatennatay met ni Satanas kas ad-adipen ti Dios. (Juan 15:20; 1 Pedro 5:8) Maysa pay, imperpektotayo. Isu nga uray no sitatallugodtayo nga agserbi iti Dios, saan a nalaka nga aramiden dayta. Nakita ni Jesus no kasano ti panangikarigatan dagiti apostolna a mangaramid iti amin nga indawatna kadakuada. Dayta ti gapuna a kinunana: “Ti espiritu, pudno unay, sigagagar, ngem ti lasag nakapuy.” (Mateo 26:41) Awan a pulos ti naikasigudan a pagkapuyan ti perpekto a natauan a lasagna. Nupay kasta, pampanunotenna ti kinalap-it ti lasag dagiti adalanna, ti kinaimperpekto a natawidda ken imperpekto nga Adan. Ammo ni Jesus a gapu iti natawid a kinaimperpekto ken kadagiti pagkapuyan a bungana, marigatanda a mangibanag iti amin a kayatda nga aramiden mainaig iti panagserbida ken Jehova.

No kasta ngarud, mabalin a mariknatayo ti kas iti narikna ni apostol Pablo, a nariribukan unay idi saan a makapagserbi a naan-anay iti Dios gapu iti kinaimperpektona. “Adda kaniak ti pannakabael nga agtarigagay,” insurat ni Pablo, “ngem awan ti pannakabael nga agaramid iti nasayaat.” (Roma 7:18) Ditay met maaramid a naan-anay ti amin a naimbag a banag a kayattayo nga aramiden. (Roma 7:19) Saan a gapu ta bumdengtayo, no di ket gapu laeng ta ti kinalap-it ti lasag lapdanna uray ti kasayaatan a panagreggettayo.

Ditay koma maupay. No naimpusuan nga itedtayo ti amin a kabaelantayo, sigurado a makaay-ayo iti Dios ti panagserbitayo. (2 Corinto 8:12) Sapay koma ta ‘aramidentayo ti amin a kabaelantayo’ a mangtulad ken Kristo a naan-anay a nagpasakup iti pagayatan ti Dios. (2 Timoteo 2:15; Filipos 2:5-7; 1 Pedro 4:1, 2) Supapakan ken suportaran ni Jehova ti kasta a natallugod nga espiritu. Itedna kadatayo ti “pannakabalin a nalablabes ngem ti gagangay” a mangsulnit kadagiti pagkapuyantayo. (2 Corinto 4:7-10) Iti tulong ni Jehova, kas ken Pablo, ‘siraragsak unay a mangbusbos ken naan-anay a mabusbostayo’ iti napateg a panagserbi Kenkuana.

[Ladawan iti panid 21]

Situtulok nga inaramid ni Pablo ti amin a kabaelanna a nagserbi iti Dios

[Ladawan iti panid 23]

Uray no nagtutuok iti kasta unay, inaramid ni Jesus ti pagayatan ni Amana