Nagannak, Tultulonganyo Kadi ti Anakyo a Rumang-ay Agingga iti Bautismo?

1. Ania ti kayat a siguraduen dagiti nagannak sakbay nga agpabautisar dagiti annakda?

“MANO a bulan a sangkaibagak kada Nanang ken Tatang a kayatkon ti agpabautisar, ket kanayon a kasaritadak maipapan iti dayta. Kayatda a siguraduen nga ammok a serioso ti desisionko. Idi Disiembre 31, 1934, dimteng met laengen daytoy nga espesial a pasamak iti biagko.” Kasta ti panangiladawan ni Blossom Brandt iti napasamak sakbay ti panagbautisarna. Kasta met laeng dagiti nagannak ita, interesadoda a tumulong kadagiti annakda nga agaramid iti nainsiriban a desision. Mabalin a mangyeg iti problema iti naespirituan ti awan gapgapuna a panangitantan iti bautismo. (Sant. 4:17) Ngem kas masirib a nagannak, kayatda a siguraduen a nakasaganan ti annakda a mangibaklay kadagiti responsabilidad a kakuykuyog ti panagbalin a Kristiano sakbay nga agpabautisarda.

2. (a) Ania ti nadlaw ti dadduma a manangaywan iti sirkito? (b) Ania ti usigentayo iti daytoy nga artikulo?

² Maseknan ti dadduma a manangaywan iti sirkito ta nadlawda nga adda dagiti agtutubo nga annak ti Saksi a dandanin wenno nasurok bassit a 20 ti tawenna a saan pay a bautisado. Kaaduanna a makigimgimong ken makiramramanda iti panangasaba. Ibilangda ti bagida kas Saksi ni Jehova. Nupay kasta, agkedkedda a mangidedikar iti biagda ken Jehova ken agpabautisar. Ania dagiti mabalin a makagapu? Adda dagiti situasion a dagiti nagannak ti mangibaga nga itantanda pay ti agpabautisar. Iti daytoy nga artikulo, usigentayo ti uppat a rason no apay a lapdan ti dadduma a nagannak nga agpabautisar ti annakda.

ADDA KADIN ITI HUSTO NGA EDAD TI ANAKKO?

3. Ania ti pakadanagan dagiti nagannak ni Blossom?

³ Maawatantayo a madanagan laeng dagiti nagannak ni Blossom, a nadakamat itay, amangan no saan pay a maawatan ti anakda ti kinapateg ken kinaserioso ti bautismo gapu ta ubing pay. Kasano a maammuan dagiti nagannak no talaga a nakasaganan nga agdedikar ti anakda?

4. Kasano a makatulong kadagiti nagannak ti bilin ni Jesus iti Mateo 28:19, 20 iti panangisuroda kadagiti annakda?

⁴ Basaen ti Mateo 28:19, 20. Kas napagadalan iti napalabas nga artikulo, awan ti ibaga ti Biblia nga espesipiko nga edad tapno mabalinen nga agpabautisar ti maysa. Ngem pagimbagan dagiti nagannak no panunotenda ti kaipapanan ti panagaramid iti adalan. Ti Griego a sao a naipatarus kas ‘agaramid iti adalan’ iti Mateo 28:19 kaipapananna met ti panangisuro a ti panggep ket mangaramid kadagiti estudiante, wenno adalan. Ti adalan ket daydiay agsursuro ken mangtarus kadagiti pannursuro ni Jesus ken daydiay determinado a mangtungpal kadagita. Ti koma ngarud kalat ti amin a Kristiano a nagannak ket suruanda dagiti annakda manipud kinamaladaga a ti panggepda ket tulongan ida nga agbalin a bautisado nga adalan ni Kristo. Siempre, saan a kualipikado a mabautisaran ti maysa a maladaga. Ngem ipakita ti Biblia nga uray dagiti ubbing kabaelanda nga awaten ken ipateg dagiti kinapudno iti Biblia.

5, 6. (a) Sigun iti panangiladawan ti Biblia ken Timoteo, ania ti maibagatayo maipapan iti bautismona? (b) Kasano a sieepektibo a matulongan dagiti mannakaawat a nagannak ti anakda?

⁵ Ubing pay idi ti adalan a ni Timoteo idi impapusona ti kinapudno. Imbaga ni apostol Pablo a naammuan ni Timoteo dagiti kinapudno iti Kasuratan manipud kinamaladagana. Nupay saan nga agdaydayaw ken Jehova ti tatangna, ti Judio a nanang ken lolana ti nangisuro kenkuana a mangipateg iti Kasuratan. Dayta ti makagapu a natibker ti pammatina. (2 Tim. 1:5; 3:14, 15) Idi dandanin wenno nasurok la bassit a 20 ti tawen ni Timoteo, kualipikadon a mangibaklay kadagiti espesial a pribilehio iti kongregasion Kristiano kas maysa nga adalan.​—Ara. 16:1-3.

⁶ Siempre, agduduma dagiti ubbing; saan nga agpapada ti panawen wenno kapartak ti panagmataenganda. Dadduma nga ubbing ti mangibaga a kayatdan ti agpabautisar gapu ta nasapa ti panagmataengan ti panunotda. Mabalin a saan pay a kayat ti dadduma ti agpabautisar ta panagriknada ket ubingda pay. Gapuna, saan a piliten dagiti mannakaawat a nagannak nga agpabautisar ti anakda. Imbes ketdi, tulonganda ti anakda a rumang-ay iti naespirituan sigun iti kabaelanna. Maragsakan dagiti nagannak no ipapuso ti anakda ti kuna ti Proverbio 27:11. (Basaen.) Nupay kasta, dida koma pulos liplipatan ti kalatda a mangtulong iti anakda nga agbalin a Kristiano nga adalan. Bayat a sipapanunotda iti dayta isaludsodda koma iti bagida, ‘Umdas kadin ti pannakaammo ti anakko tapno agdedikaren iti Dios ken agpabautisar?’

UMDAS KADIN TI PANNAKAAMMO TI ANAKKO?

7. Kasapulan kadi a nakaad-adu ti pannakaammo ti maysa sakbay a mabautisaran? Ilawlawagmo.

⁷ Kas mannursuro iti uneg ti pamilia, gagangay laeng a kayat dagiti nagannak a maaddaan dagiti annakda iti umdas a pannakaammo a mabalin a pakaibatayan ti panagdedikar. Nupay kasta, saan a kasapulan a nakaad-adu ti pannakaammo ti maysa tapno mabalinnan ti agdedikar iti Dios ken agpabautisar. Kalpasan ti bautismo, masapul nga agtultuloy a rumang-ay iti umiso a pannakaammo ti amin nga adalan. (Basaen ti Colosas 1:9, 10.) Kasano ngarud kaadu a pannakaammo ti kasapulan?

8, 9. Ania dagiti masursurotayo iti salaysay maipapan ken Pablo ken iti guardia ti pagbaludan?

⁸ Makasursuro dagiti nagannak iti kapadasan ti maysa a pamilia idi umuna a siglo. (Ara. 16:25-33) Iti maikadua a panagdaliasat ni Pablo kas misionero, pinasiarna ti Filipos idi agarup 50 C.E. Bayat nga adda sadiay, naarestoda iti kaduana a ni Silas gapu iti ulbod a pammabasol ket naibaludda. Karabiyanna, nagginggined ket nagunggon dagiti pundasion ti pagbaludan ken naglukat ti amin a ruangan. Idi agpakamatay koman ti guardia gapu iti butengna a nakalibas dagiti balud, pinukkawan ni Pablo. Insuro da Pablo ken Silas ti kinapudno iti guardia ken iti pamiliana. Ania ti inaramidda idi impategda ti kinapudno a naammuanda maipapan ken Jesus? Dagus a nagpabautisarda. Ania ti masursurotayo iti dayta?

⁹ Sigun iti tradision, mabalin a retirado a soldado ti guardia ti pagbaludan. Awan ammona iti Kasuratan. Tapno ngarud maaddaan iti natibker a pannakaammo iti Kasuratan, masapul a maammuanna dagiti kangrunaan a kinapudno iti Biblia, maawatanna ti kaipapanan ti panagbalin nga adipen ti Dios, ken determinado a mangtungpal kadagiti pannursuro ni Jesus. Nupay apagbiit laeng, natignay nga agpabautisar gapu ta naammuanna dagiti kangrunaan a kinapudno iti Kasuratan ken impategna dagita. Awan duadua nga intultuloyna a ninayonan ti pannakaammona kalpasan ti bautismona. Sigun iti daytoy a pagarigan, ania ti mabalinmo nga aramiden no ibaga ti anakmo a talaga nga ipatpategna dagiti kangrunaan a pannursuro iti Kasuratan, agraman ti kaipapanan ken kinapateg ti dedikasion ken bautismo? Kas Kristiano a nagannak, nalabit ibagayo a mabalinna ti makisarita kadagiti panglakayen tapno tingitingenda no kualipikadon a mabautisaran.a Kas iti dadduma a bautisado nga adalan, agtultuloy a manayonan ti pannakaammona iti panggep ni Jehova bayat ti panagbiagna, ken uray iti agnanayon.​—Roma 11:33, 34.

ANIA TI KASAYAATAN NGA EDUKASION PARA ITI ANAKKO?

10, 11. (a) Ania ti patien ti dadduma a nagannak? (b) Ania koma ti kangrunaan a pakaseknan ti maysa a nagannak?

¹⁰ Patien ti dadduma a nagannak a nasaysayaat para kadagiti annakda nga itantanda pay laeng ti agpabautisar tapno maaddaanda pay iti nangato nga edukasion ken natalged a trabaho. Saan met a dakes a panunoten dayta, ngem makatulong ngata dayta tapno agbalin a pudpudno a naballigi ti anakda? Napatpateg pay, maitunos ngata dayta iti Kasuratan? Ania a wagas ti panagbiag ti iparparegta ti Sao ni Jehova?​—Basaen ti Eclesiastes 12:1.

¹¹ Nagpateg a laglagipen a daytoy a lubong ken ti amin a pasetna ket maibusor iti pagayatan ken pampanunot ni Jehova. (Sant. 4:7, 8; 1 Juan 2:15-17; 5:19) Ti nasinged a relasion ti maysa nga ubing ken Jehova ti kasayaatan a proteksionna ken Satanas, iti lubongna, ken iti di nadiosan a pampanunotna. No ipangpangruna dagiti nagannak ti sekular a bambanag, mabalin a mariro ti anakda ket agpeggad ti relasionna iti Dios. Kayat ngata a talaga dagiti naayat a nagannak a ti lubong ti mangsukog iti panangmatmat ti anakda iti balligi? Kinapudnona, agbalintayo laeng a naragsak ken naballigi no ni Jehova ti kangrunaan iti biagtayo.​—Basaen ti Salmo 1:2, 3.

KASANON NO MAKABASOLTO TI ANAKKO?

12. Apay a kayat ti dadduma a nagannak nga itantan ti anakda ti agpabautisar?

¹² Inlawlawag ti maysa a Kristiano nga ina ti rason no apay nga inupayna ti balasitangna nga agpabautisar. Kinunana: “Mabainak a mangibaga a ti kangrunaan a rason ket ti urnos a panangilaksid.” Kas iti dayta a kabsat, pampanunoten ti dadduma a nagannak a nasaysayaat no itantan ti anakda ti agpabautisar agingga a maikkatnan ti inuubingan a tigtignayna ken agbalinen a nanakem. (Gen. 8:21; Prov. 22:15) Mabalin a kunaenda, ‘Saan a mailaksid ti anakko no saan pay a bautisado.’ Apay a kamali dayta a panagrasrason?​—Sant. 1:22.

13. Awan kadi sungsungbatan ti maysa ken Jehova no saan a nabautisaran? Ilawlawagmo.

¹³ Maawatantayo a saan a kayat dagiti nagannak nga agpabautisar ti anakda no saanda pay a nataengan nga agaramid iti pudpudno a dedikasion. Ngem di umiso a panunoten a saan a manungsungbat ken Jehova ti maysa nga ubing gapu ta saan a nabautisaran. Apay? Saan a bautismo ti nakaibatayanna no manungsungbat ti maysa ken Jehova wenno saan. Imbes ketdi, addan sungsungbatan ti maysa nga ubing iti Dios no ammonan no ania ti naimbag ken dakes iti imatang ni Jehova. (Basaen ti Santiago 4:17.) Gapuna, imbes nga upayen dagiti masirib a nagannak nga agpabautisar ti anakda, ikagumaanda ketdi ti mangipakita iti nasayaat nga ulidan. Manipud pay kinamaladaga, tulonganda ti anakda a mangpatanor iti naimpusuan a panangipateg kadagiti nangato a moral a pagalagadan ni Jehova. (Luc. 6:40) Dayta a panangipateg ti kasayaatan a proteksion ta matignay ti anakmo a mangsurot iti nalinteg a dalan ni Jehova.​—Isa. 35:8.

MAKATULONG TI DADDUMA

14. Kasano a makatulong dagiti panglakayen kadagiti nagannak a mangtultulong kadagiti annakda a rumang-ay iti bautismo?

¹⁴ Kas naespirituan a papastor, matulongan dagiti panglakayen dagiti nagannak babaen ti panangiparegtada kadagiti naespirituan a kalat. Malagip ti maysa a sister a nagpayunir iti nasurok a 70 a tawen ti epekto ti pannakisarita kenkuana ni Brother Charles T. Russell idi innem laeng ti tawenna. Kinunana, “Kinasaritanak maipapan kadagiti naespirituan a kalatko iti 15 a minuto.” Talaga nga adda agpaut nga epekto ti positibo a sasao ken pammaregta. (Prov. 25:11) Mabalin met nga iraman dagiti panglakayen dagiti nagannak ken ti annakda kadagiti proyekto iti Kingdom Hall, kas iti panangited iti trabaho sigun iti edad ken kabaelanda.

15. Kasanotayo a maparegta dagiti agtutubo iti kongregasion?

¹⁵ Makatulong dagiti kakabsat iti kongregasion babaen ti panangipakitada iti maitutop a personal nga interes kadagiti ubbing. Ramanen dayta ti panagbalin a nasiput kadagiti panagrang-ayda iti naespirituan. Adda kadi agtutubo a nagkomento iti naimpusuan ken nabagas wenno nagpaset iti gimong iti tengnga ti lawas? Adda kadi agtutubo a nagballigi a nangsango ti pakasubokan ti kinatarnawna wenno nangasaba iti eskuelaanda? Alertokayo koma a mangted iti naimpusuan a komendasion. Mabalin kadi a kasaritam ti maysa nga agtutubo sakbay wenno kalpasan ti gimong tapno maipakitam ti pudno nga interes kenkuana? Dadduma laeng dagita a pamay-an tapno marikna dagiti agtutubo a paset ida ti “dakkel a kongregasion.”​—Sal. 35:18.

TULONGAM TI ANAKMO A RUMANG-AY AGINGGA ITI BAUTISMO

16, 17. (a) Ania ti pakainaigan ti bautismo iti namnama ti maysa iti masanguanan? (b) Ania a ragsak ti ikagumaan koma a ragpaten ti amin a Kristiano a nagannak? (Kitaen ti ladawan iti rugi ti artikulo.)

¹⁶ Ti panangpadakkel iti anak iti “disiplina ken panangiturong-panunot ni Jehova” ket maysa a kasayaatan a pribilehio ti maysa a Kristiano a nagannak. (Efe. 6:4; Sal. 127:3) Saan a kas iti annak dagiti nagkauna nga Israelita, ti annak dagiti Kristiano ket saan nga automatiko a dedikado ken Jehova. Kanayonanna, saan a matawid ti panagayat iti Dios ken iti kinapudno. Manipud pannakayanak ti ubing, masapul a ti panggep dagiti nagannak ket agbalin nga adalan ti anakda ken tulonganda nga agbalin a dedikado ken bautisado nga adipen ni Jehova. Adda kadi pay napatpateg ngem iti dayta? Laglagipentayo a ti pananggun-odna iti marka ti pannakaisalakan iti um-umayen a dakkel a rigat ket nakadepende iti dedikasion ti tunggal indibidual, iti bautismona, ken iti matalek a panagserbina iti Dios.​—Mat. 24:13.

¹⁷ Idi inkeddeng ni Blossom Brandt ti agpabautisar, kayat a siguraduen dagiti managbuteng iti Dios a nagannakna a nakasaganan a mangaramid iti kapatgan nga addang iti biagna. Idi siguradodan a nakasaganan ni Blossom, sinuportaranda ti desisionna. Iti rabii sakbay ti bautismona, adda nagpintas a banag nga inaramid ni tatangna. Kinuna ni Blossom: “Imbagana nga agparintumengkami amin, ket indaulona ti kararag. Imbagana ken Jehova a kasta unay ti ragsakna iti desision ti bassit nga anakna a mangidedikar iti biagna Kenkuana.” Kalpasan ti nasurok nga 60 a tawen, kinuna ni Blossom: “Diakto pulos malipatan dayta!” Dakayo a nagannak, mapadasanyo koma met ti ragsak ken pannakapnek a makakita nga agbalin dagiti annakyo a dedikado ken bautisado nga adipen ni Jehova.