Saludsod

◼ Agingga kaano nga iyadalantayo ti estudiante iti Biblia a narang-ay iti naespirituan?

Nasayaat no itultuloytayo nga iyadalan ti estudiante iti Biblia a narang-ay iti naespirituan agingga a mairingpasna ti dua a publikasion—Ania a Talaga ti Isursuro ti Biblia? ken “Agtalinaedka iti Ayat ti Dios.” Agaplikar met daytoy iti mayad-adalan iti Biblia a nabautisaranen sakbay pay a malpasna dagitoy dua a libro. Uray no nabautisaranen, mabalintayo latta nga itultuloy nga ireport ti oras, panagsarungkar, ken panangyadaltayo kenkuana. No adda kaduatayo a mangyadal, mabalinna met nga ireport ti oras a nabusbos iti panangyadal.—Kitaenyo ti panid 2 iti Marso 2009 a Ti Ministeriotayo iti Pagarian.

Dagiti kabbaro ket napateg a maaddaan iti nasayaat a pundasion iti kinapudno sakbay nga isardengtayo nga iyadalan. Masapul a ‘naparamutda’ ken Kristo ken ‘natibkerda iti pammati’ tapno masarangetda dagiti pakasuotan a sigurado a mapasaranda. (Col. 2:6, 7; 2 Tim. 3:12; 1 Ped. 5:8, 9) Malaksid iti dayta, tapno epektibo ti panangisurotayo kadagiti sabsabali, nasken a maaddaanda iti “umiso a pannakaammo iti kinapudno.” (1 Tim. 2:4) No kompletuentayo nga iyadal ti dua a libro kadagiti iyad-adalantayo, tultulongantayo ida nga agtalinaed iti “dalan nga agturong iti biag”—Mat. 7:14.

Sakbay a maaprobaran ti panagpabautisar ti estudiante, siguraduen dagiti panglakayen no natarusanna met laeng a silalawag dagiti kangrunaan a sursuro iti Biblia ken no agbibiag a maitunos kadagita. Ad-adda a naannad dagiti panglakayen a mangtingiting iti daytoy no saan pay a nalpas ti estudiante ti umuna a libro. No saan pay a kualipikado a mabautisaran, siguraduen dagiti panglakayen a matulongan ti estudiante tapno makakualipikarto nga agpabautisar iti masanguanan.—Kitaenyo ti Organisado a Mangaramid iti Pagayatan ni Jehova, panid 217-218.

[Blurb iti panid 2]

Dagiti kabbaro ket napateg a maaddaan iti nasayaat a pundasion iti kinapudno