Dagiti Manangaywan ken Ministerial nga Adipen Teokratiko ti Pannakadutokda
“Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan.”—ARAMID 20:28.
1, 2. Kasano a matungtungpal ti Isaias 60:22?
IDI un-unana, impakauna ni Jehova nga addanto nakaskasdaaw a mapasamak iti tiempo ti panungpalan. Adda a naikuna babaen ken propeta Isaias: “Ti bassit agbalinto a sangaribu, ket ti kabassitan maysa a napigsa a nasion: Siak, ni Jehova, aramidekto a nadaras iti panawenna.”—Isaias 60:22.
2 Adda kadi pammaneknek a matungtungpal ita daytoy a padto? Wen, adda! Idi dekada 1870, nabuangay ti maysa a kongregasion dagiti tattao ni Jehova idiay Allegheny, Pennsylvania, U.S.A. Manipud iti dayta a bassit a pangrugian, pinullo ribu a kongregasion ti nabuangay ken rumangrang-ay iti sangalubongan. Minilion a manangiwaragawag iti Pagarian—a mangbukel iti nabileg a nasion—ti naitimpuyog ita iti nasurok a 91,000 a kongregasion iti 235 a dagdaga iti aglikmut ti lubong. Di pagduaduaan a daytoy ti mangpasingked a ni Jehova pappapartakenna ti pannakaurnong dagiti pudno a managdaydayaw sakbay a dumteng ti “dakkel a rigat” a nakaas-asidegen.—Mateo 24:21; Apocalipsis 7:9-14.
3. Ania ti kayat a sawen ti pannakabautisar ‘iti nagan ti Ama, ti Anak, ken ti nasantuan nga espiritu’?
3 Idi nakapagdedikardan ken ni Jehova, ken mayannurot kadagiti bilin ni Jesus, dagitoy a minilion a tattao nabautisaranda “iti nagan ti Ama ken ti Anak ken ti nasantuan nga espiritu.” (Mateo 28:19) Ti pannakabautisarda “iti nagan ti Ama” kaipapananna a dagitoy a dedikado a tattao bigbigenda ni Jehova kas nailangitan nga Ama ken Ubbog ti Biagda ken agpasakupda iti kinasoberanona. Ti pannakabautisar ‘iti nagan ti Anak’ ipasimudaagna nga awatenda ni Jesu-Kristo kas Mannubbot, Pangulo, ken Arida. Bigbigenda met ti paset ti nasantuan nga espiritu, wenno aktibo a puersa ti Dios, a mangiwanwan iti biagda. Ipamatmatna daytoy a nabautisaranda ‘iti nagan ti nasantuan nga espiritu.’
4. Kasano ti pannakaorden dagiti Kristiano a ministro?
4 Iti panagpabautisarda, maordenan dagiti baro nga adalan kas ministro ni Jehova a Dios. Siasino ti mangorden kadakuada? Agaplikar met kadakuada ti sasao a nailanad iti 2 Corinto 3:5: “Ti panagbalinmi a makaanayen a kualipikado agtaud iti Dios.” Ibilangda nga awanen ti nasaysayaat a pakaidayawan ngem ti panangorden kadakuada ni Jehova a Dios a mismo! Kalpasan a mabautisaranda, agtultuloy a rumang-ayda iti naespirituan kas ministro ti “naimbag a damag” no la ket ta agpaidalanda iti espiritu ti Dios ken itultuloyda ti agbiag a mayannurot iti Saona.—Mateo 24:14; Aramid 9:31.
Teokratiko—Saan a Demokratiko—a Pannakadutok
5. Demokratiko kadi ti pannakapili dagiti Kristiano a manangaywan ken ministerial nga adipen? Ilawlawagyo.
5 Masapul nga adda dagiti nataengan ken kualipikado a manangaywan ken dagiti makabael a katulonganda a ministerial nga adipen tapno maasikaso dagiti naespirituan a kasapulan ti dumakdakkel a bilang dagiti aktibo a ministro. (Filipos 1:1) Kasano a madutokan dagiti kasta a naespirituan a lallaki? Saan a kas iti maar-aramid iti Kakristianuan. Kas pagarigan, saan a demokratiko ti pannakapili dagiti Kristiano a manangaywan, kayatna a sawen, botosan ida ti kaaduan a miembro ti kongregasion. Imbes ketdi, teokratiko ti pannakadutokda. Ania ti kayat a sawen dayta?
6. (a) Ania ti pudno a teokrasia? (b) Apay a teokratiko ti pannakadutok dagiti manangaywan ken ministerial nga adipen?
6 Iti simple a pannao, ti pudno a teokrasia ket turay ti Dios. Sibubulos dagiti Saksi ni Jehova nga agpasakup iti kinasoberanona ken agtitinnulongda tapno maibanag ti pagayatan ti Dios. (Salmo 143:10; Mateo 6:9, 10) Teokratiko ti pannakadutok dagiti Kristiano a manangaywan, wenno panglakayen, ken dagiti ministerial nga adipen agsipud ta ti pannakairekomenda ken pannakadutok dagiti kasta a responsable a lallaki ket maitunos iti urnos ti Dios a naituyang iti Nasantuan a Kasuratan. Ket kas “pannakaulo ti isuamin,” ni Jehova siempre ti addaan kalintegan a mangikeddeng no kasano nga agandar ti makitkita nga organisasionna.—1 Cronicas 29:11, NW; Salmo 97:9.
7. Kasano a matartarawidwidan dagiti Saksi ni Jehova?
7 Maigidiat iti adu a narelihiosuan a grupo iti Kakristianuan, saan a dagiti Saksi ni Jehova ti makakaammo a mangikeddeng no ania a narelihiosuan nga urnos ti surotenda. Dagitoy a napasnek a Kristiano ikagkagumaanda a suroten dagiti pagalagadan ni Jehova. Ti pannakaisaad dagiti manangaywan ket saan a babaen ti turay ti kongregasion, hirarkia, wenno presbiteria. No gay-aten dagiti elemento ti lubong a biangan dagitoy a panangdutok, saan a makikompromiso ti ili ni Jehova. Sititibker a salimetmetanda ti takder a siuumiso nga inyebkas dagiti apostol idi umuna a siglo idi kinunada: “Masapul nga agtulnogkami iti Dios kas agturay imbes a kadagiti tattao.” (Aramid 5:29) Gapuna, dagiti Saksi agpasakupda iti Dios iti amin a banag. (Hebreo 12:9; Santiago 4:7) Maragsakan ti Dios no surotenda ti teokratiko a pamay-an.
8. Ania ti nagdumaan dagiti demokratiko ken teokratiko a pamay-an?
8 Kas ad-adipen ni Jehova, ti Naindaklan a Teokrata, nasayaat a laglagipentayo ti nagdumaan dagiti demokratiko ken teokratiko a pamay-an. Kadagiti demokratiko a pamay-an, adda dagiti pannakabagi ti tunggal partido ken masansan nga adda maaramid a kampania, ket no siasino ti ibotos ti kaaduan, isu ti maisaad. Iti teokratiko a panangdutok, awan dagiti kasta a pamay-an. Saan a dagiti tattao wenno ti aniaman a legal nga ahensia ti mangdutok. Mabalin a tuktukoyen ni Pablo ti panangdutok kenkuana ni Jesus ken ni Jehova kas “apostol kadagiti nasion” idi kinunana kadagiti taga Galacia nga isu ket nadutokan “saan a manipud kadagiti tattao wenno babaen ti maysa a tao, no di ket babaen ken Jesu-Kristo ken ti Dios nga Ama, a nangpagungar kenkuana kadagiti natay.”—Roma 11:13; Galacia 1:1.
Dinutokan ti Nasantuan nga Espiritu
9. Ania ti kuna ti Aramid 20:28 maipapan iti pannakadutok dagiti Kristiano a manangaywan?
9 Impalagip ni Pablo kadagiti manangaywan nga agnanaed sadi Efeso a dinutokan ida ti Dios babaen ti nasantuan nga espiritu. Kinunana: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna babaen ti dara ti bukodna nga Anak.” (Aramid 20:28) Nasken nga itultuloy dagiti Kristiano a manangaywan ti agpaidalan iti nasantuan nga espiritu bayat nga itungtungpalda dagiti rebbengenda kas papastor ti arban ti Dios. No ti nadutokan a lalaki dinan matungtungpal ti pagalagadan ti Dios, iti naikeddeng a tiempo iturong ti nasantuan nga espiritu ti pannakaikkatna iti saadna.
10. Kasano nga addaan napateg a paset ti nasantuan nga espiritu iti teokratiko a panangdutok?
10 Kasano nga addaan ti nasantuan nga espiritu iti napateg a paset? Umuna iti amin, ti rekord a nakailanadan dagiti pagannurotan para iti naespirituan a panangaywan ket impaltiing ti nasantuan nga espiritu. Iti suratna kada Timoteo ken Tito, imbinsabinsa ni Pablo dagiti kualipikasion a rumbeng a maragpat dagiti manangaywan ken ministerial nga adipen. Amin-amin, 16 a nagduduma a kualipikasion ti dinakamatna. Kas pagarigan, dagiti manangaywan rumbeng nga awan pakababalawanda, natimbeng iti panagug-ugali, nasimbeng iti panunot, naurnos, managpadagus, kualipikado a mangisuro, ken mapagulidanan nga ulo ti pamilia. Masapul a saanda a mammartek, saan a managayat iti kuarta, ken ammoda ti agteppel. Umasping iti dayta, nangato a pagalagadan ti maipaannurot kadagiti lallaki nga agtarigagay a madutokan kas ministerial nga ad-adipen.—1 Timoteo 3:1-10, 12, 13; Tito 1:5-9.
11. Ania ti dadduma kadagiti kualipikasion a masapul a maragpat dagiti lallaki nga agtarigagay a maaddaan iti responsabilidad iti kongregasion?
11 No repasuentayo dagitoy a kualipikasion, maawatantayo a dagidiay mangidaulo iti panagdayaw ken Jehova masapul a mapagulidananda iti Nakristianuan a kababalin. Dagiti lallaki nga agtarigagay a maaddaan iti responsabilidad iti kongregasion nasken a paneknekanda nga agtigtignay kadakuada ti nasantuan nga espiritu. (2 Timoteo 1:14) Masapul nga iparangarang dagitoy a lallaki dagiti bunga ti espiritu ti Dios nga “ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel.” (Galacia 5:22, 23) Maanninaw dagita a bunga iti pannakilangenda kadagiti kapammatianda ken iti dadduma. Mabalin a nagsayaat ti panangiparangarang dagiti dadduma kadagiti bunga ti espiritu, idinto a dagiti dadduma mabalin a nabatbatad ti panangipakitada kadagiti kualipikasion para iti manangaywan. Ngem no iti wagas ti panagbiagda, amin dagidiay agtarigagay a madutokan kas manangaywan wenno ministerial nga adipen rumbeng nga ipakitada a naespirituanda a lallaki, a maragpatda dagiti pagannurotan ti Sao ti Dios.
12. Siasino ti maikuna a dinutokan ti nasantuan nga espiritu?
12 Idi binalakadan ni Pablo dagiti dadduma nga isu ket tuladenda, nawaya a maibagana dayta agsipud ta tinuladna a mismo ni Jesu-Kristo, a ‘nangibati kadatayo iti pagwadan tapno surotentayo a sisisinged dagiti addangna.’ (1 Pedro 2:21; 1 Corinto 11:1) Maikuna ngarud a dinutokan ti nasantuan nga espiritu dagidiay nakaragpat kadagiti Nainkasuratan a pagannurotan idi madutokanda kas manangaywan wenno ministerial nga adipen.
13. Kasano a tulongan ti nasantuan nga espiritu dagidiay mangirekomenda kadagiti lallaki nga agserbi iti kongregasion?
13 Adda maysa pay a banag a mangipasimudaag no kasano nga agtignay ti nasantuan nga espiritu iti panangirekomenda ken panangdutok kadagiti manangaywan. Kinuna ni Jesus a “ti Ama idiay langit mangted iti nasantuan nga espiritu kadagidiay agdawdawat kenkuana!” (Lucas 11:13) Gapuna, no agtataripnong dagiti panglakayen iti lokal a kongregasion tapno mangirekomendada kadagiti lallaki a mapabaklayan iti responsabilidad iti kongregasion, ikararagda ti panangiwanwan ti espiritu ti Dios kadakuada. Ibatayda ti rekomendasionda iti ibagbaga ti naipaltiing a Sao ti Dios, ket ti nasantuan nga espiritu tulonganna ida a mangtingiting no naragpat ti kabsat a nairekomenda dagiti Nainkasuratan a pagannurotan. Saan a ti makinruar a langa, edukasion, wenno nainkasigudan nga abilidad ti kitaen dagidiay mangirekomenda. Ti kangrunaan a kitaenda ket no naespirituan a tao daydiay nairekomenda, a saan a bumdeng nga umasideg nga agpabalakad kenkuana dagiti miembro ti kongregasion.
14. Ania ti maadaltayo iti Aramid 6:1-3?
14 Nupay agkaykaysa ti bagi dagiti panglakayen ken ti agdaldaliasat a manangaywan a mangirekomenda kadagiti kakabsat nga agserbi kas panglakayen ken ministerial nga adipen, maaramid ti aktual a panangdutok sigun iti padron a naipasdek idi umuna a siglo. Naminsan, kasapulan idi nga adda dagiti lallaki a kualipikado iti naespirituan a mangibaklay iti napateg nga annongen. Kastoy ti imbilin ti bagi a manarawidwid: “Sumapulkayo maipaay iti bagbagiyo kadagiti pito a napaneknekan a lallaki manipud iti nagtetengngaanyo, a napno iti espiritu ken sirib, tapno dutokantayo ida itoy a nasken nga aramid.” (Aramid 6:1-3) Nupay dagiti lallaki a direkta a nangtaming iti kasasaad ti nangirekomenda, dagiti responsable a lallaki idiay Jerusalem ti nangdutok. Kasta met laeng ti maar-aramid ita.
15. Kasano a nainaig ti Bagi a Manarawidwid iti pannakadutok dagiti lallaki?
15 Ti Bagi a Manarawidwid dagiti Saksi ni Jehova ti direkta a mangdutok kadagiti amin a kameng dagiti Branch Committee. Iti panangikeddeng no siasino ti mabalin a mangibaklay iti kasta a nadagsen a responsabilidad, silalagip ti Bagi a Manarawidwid iti kinuna ni Jesus: “Tunggal maysa a naikkan iti adu, adunto ti makalikaguman kenkuana; ket daydiay insaad dagiti tattao nga agaywan iti adu, kalikagumandanto kenkuana ti ad-adu ngem iti gagangay.” (Lucas 12:48) Malaksid iti panangdutok kadagiti kameng ti Branch Committee, ti Bagi a Manarawidwid ti mangdutok kadagiti panglakayen iti Bethel ken agdaldaliasat a manangaywan. Nupay kasta, tudinganda dagiti mapagtalkan a kakabsat kas pannakabagida a mangdutok kadagiti dadduma pay. Adda met Nainkasuratan a padron para iti daytoy.
‘Mangdutokka, a kas Kadagiti Imbilinko Kenka’
16. Apay nga imbati ni Pablo ni Tito idiay Creta, ket ania ti ipasimudaag daytoy maipapan iti teokratiko a panangdutok iti kaaldawantayo?
16 Kinuna ni Pablo iti katrabahuanna a ni Tito: “Gapu itoy a rason imbatika idiay Creta, tapno mapalintegmo dagiti bambanag nga addaan pakapilawan ken tapno makadutokka kadagiti lallakay iti tunggal siudad, a kas kadagiti imbilinko kenka.” (Tito 1:5) Kalpasanna, imbinsabinsa ni Pablo dagiti kualipikasion a kitaen ni Tito kadagiti lallaki a kualipikado a madutokan. Gapuna, iti kaaldawantayo, ti Bagi a Manarawidwid dutokanna dagiti kualipikado a kakabsat kadagiti sanga nga opisina nga agserbi kas pannakabagina a mangdutok kadagiti panglakayen ken ministerial nga adipen. Dagiti pannakabagi ti Bagi a Manarawidwid rumbeng a maawatan ken surotenda a naimbag dagiti Nainkasuratan a pagannurotan iti panangdutok. No kasta, imatonan ti Bagi a Manarawidwid ti pannakadutok dagiti kualipikado a lallaki nga agserbi kadagiti kongregasion dagiti Saksi ni Jehova iti sangalubongan.
17. Kasano ti panangtaming ti sanga nga opisina kadagiti nairekomenda a madutokan kas manangaywan ken ministerial nga adipen?
17 No naipatuloden iti sanga nga opisina ti Watch Tower Society ti nagnagan dagiti nairekomenda a madutokan kas manangaywan ken ministerial nga adipen, dagiti aduan iti kapadasan a lallaki agpaidalanda iti espiritu ti Dios no mangdutokda. Bigbigen dagitoy a lallaki nga adda sungsungbatanda, ket masapul a saanda nga agdarasudos a mangdutok iti siasinoman a lalaki, di la ket ta makiramanda kadagiti basolna.—1 Timoteo 5:22.
18, 19. (a) Kasano a maipakaammo no adda dagiti nadutokan? (b) Kasano a maaramid ti amin nga addang a nainaig iti panangirekomenda ken panangdutok?
18 Maipakaammo no adda dagiti nadutokan babaen ti surat a namarkaan iti opisial a timbre a naggapu iti legal nga ahensia. Mausar ti kasta a surat uray no saan la a maymaysa a kabsat ti madutokan iti kongregasion.
19 Ti teokratiko a panangdutok ket aggapu ken Jehova babaen ti Anakna ken ti makitkita a kalasugan nga us-usaren ti Dios ditoy daga, “ti matalek ken masirib nga adipen” ken ti Bagi a Manarawidwid. (Mateo 24:45-47) Ti nasantuan nga espiritu ti mangiturong wenno mangiwanwan iti amin nga addang a nainaig iti kasta a panangirekomenda ken panangdutok. Wen, ta dagiti kualipikasion ket nailanad iti Sao ti Dios, nga impaltiing ti nasantuan nga espiritu, ket daydiay nadutokan iparparangarangna dagiti bunga dayta nga espiritu. Gapuna, maikuna a ti nasantuan nga espiritu ti nangdutok. No kasano a teokratiko ti pannakadutok dagiti manangaywan ken ministerial nga adipen idi umuna a siglo, pudno a kasta met ita.
Agyamantayo iti Panangiwanwan ni Jehova
20. Apay a maikunatayo ti kas iti kinuna ni David iti Salmo 133:1?
20 Iti daytoy a tiempo ti naespirituan a kinarang-ay ken teokratiko nga idudur-as ti trabaho a panangikasaba iti Pagarian, agyamantayo ta ni Jehova ti kangrunaan a mangimatmaton iti pannakadutok dagiti manangaywan ken ministerial nga adipen. Gapu iti kastoy a Nainkasuratan nga urnos, kas Saksi ni Jehova mataginayontayo dagiti nangato a pagalagadan ti Dios iti kinalinteg. Maysa pay, ti Nakristianuan a kababalin ken napasnek a panagregget dagitoy a lallaki dakkel ti maitulongda iti nakaskasdaaw a talna ken panagkaykaysatayo kas ad-adipen ni Jehova. Gapuna, kas ken salmista a David, matignaytayo a mangikuna: “Kitaenyo, nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!”—Salmo 133:1.
21. Kasano a matungtungpal ita ti Isaias 60:17?
21 Anian a yamantayo iti panangiturong ni Jehova babaen ti Sao ken nasantuan nga espirituna! Ken pudno a napnuan kaipapanan ti sasao a nailanad iti Isaias 60:17: “Iti lugar ti suer mangyegakto ti balitok, ket iti landok mangyegakto ti pirak, ket iti kayo ti suer, ken iti batbato ti landok. Ket aramidekto met dagiti pagturayem a talna, ken dagiti agsingsingir ti buis a nalinteg.” Bayat nga ad-adda a maipatpatungpal dagiti teokratiko nga urnos kadagiti Saksi ni Jehova, sagsagrapentayo dagitoy nagsayaat a kasasaad iti organisasion ti Dios ditoy daga.
22. Ania ti rumbeng a pagyamanantayo, ket ania koma ti determinado nga aramidentayo?
22 Agyamantayo unay kadagiti teokratiko nga urnos a sursurotentayo. Ken apresiarentayo unay ti narigat ngem makapnek a trabaho nga ar-aramiden dagiti manangaywan ken ministerial nga adipen a nadutokan iti teokratiko a wagas. Naimpusuan nga idaydayawtayo ti naayat a nailangitan nga Amatayo, a mangparparang-ay kadatayo iti naespirituan ken sibabaknang a mangbembendision kadatayo. (Proverbio 10:22) Determinadotay koma ngarud a makidanggay iti organisasion ni Jehova. Kangrunaan iti amin, itultuloytayo ti agserbi a sangsangkamaysa iti pakaidayawan ken pakaitan-okan ti naindaklan ken nasantuan a nagan ni Jehova.
Kasanoyo a Sungbatan?
• Apay a maikunatayo a teokratiko, saan a demokratiko, ti pannakadutok dagiti manangaywan ken ministerial nga adipen?
• Kasano a dinutokan ti nasantuan nga espiritu dagiti responsable a Kristiano a lallaki?
• Kasano a nainaig ti Bagi a Manarawidwid iti pannakadutok dagiti manangaywan ken ministerial nga adipen?
• No maipapan iti teokratiko a panangdutok, apay a rumbeng nga agyamantayo ken Jehova?
[Dagiti Ladawan iti panid 15]
Pribilehio dagiti panglakayen ken ministerial nga adipen ti agserbi babaen ti teokratiko a pannakadutokda