Bautismo a “Maipaay iti Nagan ti”
TI PANANGADAL kadagiti rinibo a kadaanan a sekular a papiro a dokumento a nasarakan kadagiti kadaratan ti Egipto iti rugrugi daytoy a siglo masansan a lawlawaganna ti Kristiano a Griego a Kasuratan. Kasano? Babaen ti panangusig iti wagas ti pannakausar dagiti sumagmamano a sao, matulongantayo a makagteng iti umiso a pannakaawat kadagiti isu met la a sasao a nausar iti Kasuratan.
Maysa a pangarigan isu ti panangusar ni Jesus iti “iti nagan ti” idi imbilinna kadagiti adalanna sakbay nga immuli sadi langit: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.” Aniat’ kayat a sawen ni Jesus?—Mateo 28:19.
Natakuatan dagiti eskolar a kadagiti sekular a sursurat ti ebkas nga “iti nagan ti,” wenno “maipaay iti nagan ti” (Kingdom Interlinear), ket nausar a mainaig iti bayad “a maisingir iti maysa.” Patien ti propesor iti teolohia a ni Dr. G. Adolf Deissmann a gapu iti ebidensia iti papiro, “ti kapanunotan . . . iti ebkas a bautisaran a maipaay iti nagan ti Apo, wenno mamati a maipaay iti nagan ti Anak ti Dios, ipasimudaagna a ti bautismo wenno pammati kaipapananna ti panagbalin a kukua ti Dios wenno ti Anak ti Dios.”—Italiko kukua ni Deissmann.
Makapainteres, inusar dagiti Judio idi kaaldawan ni Jesus ti umasping nga ebkas, kas inlawlawag ti Theological Dictionary of the New Testament: “Maaramid ti pannakakugit ti proselita . . . ‘iti nagan ti proselita,’ tapno maawat iti Judaismo. Maaramid daytoy a pannakakugit . . . ‘iti nagan ti tulag,’ tapno maawat iti tulag.” Maipasdek ngarud ti relasion ket agbalin a proselita ti di-Judio iti sidong ti bileg ti tulag.
Isu a para iti Kristiano, ti bautismo a sumaruno iti dedikasion ipasdeknat’ nasinged a pannakirelasion ken Jehova a Dios, iti Anakna a ni Jesu-Kristo, ken iti nasantuan nga espiritu. Bigbigen ti kumberte ti autoridadda iti baro a wagas ti panagbiagna. Usigenyo no kasano a pudno daytoy iti tunggal maysa kadagiti tallo a nainaganan.
Babaen ti panangbigbig iti autoridad ti Dios, umadanitayo kenkuana ken sumrek iti pannakirelasion kenkuana. (Hebreo 12:9; Santiago 4:7, 8) Agbalintayo a kukua ti Dios kas ad-adipenna, a ginatangna babaen ti daton a subbot ni Jesu-Kristo. (1 Corinto 3:23; 6:20) Kinuna met ni apostol Pablo kadagiti immuna-siglo a Kristiano a kukua ida ni Jesu-Kristo, saan a ti asinoman a tao a nangidanon kadakuada ti kinapudno. (1 Corinto 1:12, 13; 7:23; idiligyo ti Mateo 16:24.) Ipasimudaag ti bautismo iti nagan ti Anak ti panangbigbig iti daytoy a kinapudno, panangawat ken Jesus kas “ti dalan ken ti pudno ken ti biag.”—Juan 14:6.
Nasken met ti nasantuan nga espiritu iti umiso a pannakirelasiontayo ken Jehova ken Jesu-Kristo. Ipakita ti bautismo iti nagan ti nasantuan nga espiritu a bigbigentayo ti paset ti espiritu iti pannakilangen ti Dios kadatayo. Tarigagayantayo a paidalan iti dayta, saan a di ikankano wenno agtignay a maibusor iti dayta, a lapdan ti panagtignayna kadatayo. (Efeso 4:30; 1 Tesalonica 5:19) Ti impersonal a kasasaad ti espiritu di mangparnuay ti pakarigatan no iti pannakausar wenno kaipapananna, a kas met ti pannakausar ti “iti nagan ti tulag” iti Judaismo.
Ngarud, iti tiempo ti dedikasion ken bautismo, masapul nga utobentayo a sikakararag ti nairaman iti baro a relasiontayo. Kasapulan ti panagpasakop iti pagayatan ti Dios, a naipakita iti ulidan ken iti subbot nga impaay ni Jesu-Kristo, a maaramid babaen ti nasantuan nga espiritu bayat nga iturongna amin nga adipen ti Dios iti ayat ken panagkaykaysa iti intero a lubong.