Itultuloyyo nga Asikasuen ti Panangisuroyo

“Itultuloymo nga asikasuen ti bagim ken ti isursurom. Agtalinaedka kadagitoy a bambanag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.”​—1 TIMOTEO 4:16.

1, 2. Apay a kasapulan unay ita dagiti nareregta a mannursuro?

“INKAYO . . . ket mangaramidkayo kadagiti adalan a tattao iti isuamin a nasnasion, . . . nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19,20) Gapu iti daytoy a bilin ni Jesu-Kristo, rumbeng nga ikagumaan dagiti amin a pudno a Kristiano ti agbalin a mannursuro. Kasapulan unay dagiti nareregta a mannursuro tapno matulongan dagiti nasingpet panagpuspusoda a tattao a gumun-od iti pannakaammo maipapan iti Dios sakbay a maladaw ti amin. (Roma 13:11) Indagadag ni apostol Pablo: “Ikasabam ti sao, naganetgetka koma iti dayta iti mainugot a panawen, iti nariribuk a panawen.” (2 Timoteo 4:2) Kalikaguman daytoy ti panangisuro iti uneg ken ruar ti kongregasion. Kinapudnona, saan la a basta panangipakaammo iti mensahe ti Dios ti ramanen ti annongen a panangasaba. Nasken ti epektibo a panangisuro tapno agbalin nga adalan dagiti interesado.

² Agbibiagtayo kadagiti “napeggad a tiempo a narigat a pakilangenan.” (2 Timoteo 3:1) Maim-impluensiaan ti panunot dagiti tattao kadagiti sekular a pilosopia ken palso a sursuro. Adu ti “nasipngetan ti isipda” ken “napukawda ti amin a moral a kaririknada.” (Efeso 4:18, 19) Addaan dagiti dadduma kadagiti nasaem nga emosional a sugat. Wen, dagiti tattao pudno a “nalalatan ken naiwarawarada a kasla karkarnero nga awanan pastor.” (Mateo 9:36) Nupay kasta, no ipakattayo ti arte ti panangisuro, matulongantayo dagiti nasingpet panagpuspusoda a tattao a mangaramid kadagiti kasapulan a panagbalbaliw.

Dagiti Mannursuro iti Uneg ti Kongregasion

3. (a) Ania ti ramanen ti bilin ni Jesus a mangisuro? (b) Siasino ti addaan kangrunaan a rebbengen a mangisuro iti uneg ti kongregasion?

³ Babaen ti urnos a panagadal iti Biblia iti pagtaengan, minilion ti personal a masursuruan. Ngem kalpasan a mabautisaranda, kasapulan dagiti kabbaro ti kanayonan a tulong tapno “maparamut ken maipasdek[da] iti pamuon.” (Efeso 3:17) Bayat a tungpalentayo ti bilin ni Jesus a nailanad iti Mateo 28:19,20 ken iturongtayo dagiti kabbaro iti organisasion ni Jehova, mabenepisiaranda iti masursuroda iti uneg ti kongregasion a mismo. Sigun iti Efeso 4:11-13, adda dagiti lallaki a nadutokan nga agserbi kas “papastor ken mannursuro, a maipaay iti pannakaator dagiti sasanto, maipaay iti trabaho a panagministerio, maipaay iti pannakapabileg ti bagi ni Kristo.” No dadduma, ti arte ti panangisuroda ramanenna ti pannakasapul iti ‘panangtubngar, panangtinggar, panangbagbaga, buyogen ti amin a mabayag a panagitured.’ (2 Timoteo 4:2) Nagpateg ti trabaho dagiti mannursuro, isut’ gapuna nga iti suratna kadagiti taga Corinto, insaruno ni Pablo a dinakamat dagiti mannursuro kalpasan unay dagiti apostol ken mammadto.​—1 Corinto 12:28.

4. Kasano a matulongannatayo ti abilidad a mangisuro a mangipangag iti balakad ni Pablo a nailanad iti Hebreo 10:24, 25?

⁴ Pudno, saan nga amin a Kristiano ket agserbi a kas panglakayen, wenno manangaywan. Nupay kasta, maiparegta kadagiti amin nga aggiginnutugotda “iti ayat ken nasayaat nga ar-aramid.” (Hebreo 10:24, 25) Ti panangaramid iti dayta kadagiti gimong ramanenna dagiti nasayaat pannakaisaganada ken naimpusuan a komento a makapabileg ken makaparegta kadagiti sabsabali. Mabalin met dagiti aduan kapadasan nga agibumbunannag iti Pagarian ti ‘mangparegta iti nasayaat nga ar-aramid’ babaen ti panangiranudda iti pannakaammo ken sagudayda kadagiti kabbaro no kaduada ida nga agtrabaho iti ministerio iti tay-ak. Mabalin nga iranud ti nagpateg a pannursuro kadagiti kasta a gundaway ken kadagiti di pormal nga okasion. Kas pagarigan, maidagadag kadagiti nataengan a babbai nga agbalinda a ‘mannursuro iti naimbag.’​—Tito 2:3.

Naguyugoy a Mamati

5, 6. (a) Kasano a naiduma ti pudno a Kristianidad iti palso a panagdayaw? (b) Kasano a matulongan dagiti panglakayen dagiti kabbaro a mangaramid kadagiti nainsiriban a desision?

⁵ No kasta, naiduma unay ti pudno a Kristianidad kadagiti palso a relihion, nga adu kadagita ti mangkonkontrol iti panagpampanunot dagiti miembroda. Idi adda ni Jesus ditoy daga, ginay-at dagiti panguluen ti relihion a kontrolen ti gistay amin a benneg ti biag dagiti tattao babaen kadagiti makapadagsen nga aramid-tao a tradision. (Lucas 11:46) Masansan a kasta met laeng ti ar-aramiden ti klero ti Kakristianuan.

⁶ Nupay kasta, ti pudno a panagdayaw ket “sagrado a panagserbi” nga ipaaytayo a buyogen ti “pannakabalin[tayo] nga agrason.” (Roma 12:1) Dagiti adipen ni Jehova ‘naguyugoyda a mamati.’ (2 Timoteo 3:14) No dadduma, mabalin a kasapulan a mangipatungpal dagidiay mangidadaulo kadagiti pagannurotan ken sistema a mangpaannayas iti panagandar ti kongregasion. Nupay kasta, imbes nga idesisionan dagiti panglakayen dagiti padada a Kristiano, isuroda ida “a mangilasin agpadpada iti umiso ken di umiso.” (Hebreo 5:14) Ar-aramiden daytoy dagiti panglakayen kangrunaanna babaen ti panangtaraonda iti kongregasion “kadagiti sasao ti pammati ken iti nasayaat a sursuro.”​—1 Timoteo 4:6.

Asikasuenyo ti Panangisuroyo

7, 8. (a) Kasano a makapagserbi kas mannursuro dagiti tattao a limitado dagiti abilidadda? (b) Ania ti mangipamatmat a kasapulan ti personal a panagregget iti panagbalin nga epektibo a mannursuro?

⁷ Ngem subliantayo ti annongentayo amin a mangisuro. Tapno maaramidtayo daytoy a trabaho, kasapulan kadi ti partikular a saguday, edukasion, wenno abilidad? Saan met ketdi a kasta. Dagiti ordinario a tattao a limitado laeng ti abilidadda ti kaaduan a mangar-aramid iti daytoy sangalubongan a trabaho a panangisuro. (1 Corinto 1:26-29) Inlawlawag ni Pablo: “Addaankami itoy a gameng [ti ministerio] kadagiti dinamili a basehas [dagiti imperpekto a bagi], tapno ti pannakabalin a nalablabes ngem ti gagangay biang koma ti Dios ket saan nga iti bagbagimi.” (2 Corinto 4:7) Ti naballigi unay a sangalubongan a panangikasaba iti Pagarian ket pammaneknek iti bileg ti espiritu ni Jehova!

⁸ Nupay kasta, kasapulan ti napasnek a panagregget tapno agbalintayo a “mangmangged nga awan ti aniaman nga ibainna, nga aramate[ntayo] a siuumiso ti sao ti kinapudno.” (2 Timoteo 2:15) Indagadag ni Pablo ken Timoteo: “Itultuloymo nga asikasuen ti bagim ken ti isursurom. Agtalinaedka kadagitoy a bambanag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Timoteo 4:16) Kasanotay a maannadan ti panangisurotayo, iti man uneg wenno ruar ti kongregasion? Kasapulan kadi nga agbalintayo a nalaing wenno sursuruentayo dagiti wagas ti panangisuro tapno maaramidtay dayta?

9. Ania ti napatpateg ngem kadagiti nakayanakan nga abilidad?

⁹ Iti nalatak a Sermonna iti Bantay, nalawag a nangiparangarang ni Jesus iti naisangsangayan a pannakaammo kadagiti wagas ti panangisuro. Kalpasan ti panagsaona, “nagsiddaaw unay dagiti bunggoy iti wagas ti panangisurona.” (Mateo 7:28) Siempre, awan kadatayo ti kas kalaing ni Jesus a mangisuro. Nupay kasta, saan a kasapulan nga agbalintayo a nalaing a pumapalawag tapno agbalin nga epektibo a mannursuro. Kinapudnona, sigun iti Job 12:7, uray dagiti ‘animal’ ken ‘tumatayab’ siuulimek a makaisuroda! Malaksid pay iti aniaman a nakayanakan a saguday wenno paglaingantayo, ti nangnangruna a napateg isu ti ‘kita ti tao’ a pagbalinantayo​—dagiti galad nga ik-ikutantayo ken naespirituan nga ugali a napatanortayo a mabalin a tuladen dagiti isursurotayo.​—2 Pedro 3:11; Lucas 6:40.

Estudiante ti Sao ti Dios

10. Kasano a nangipaay ni Jesus iti nasayaat nga ulidan kas estudiante ti Sao ti Dios?

¹⁰ Masapul nga estudiante ti Sao ti Dios ti epektibo a mannursuro kadagiti Nainkasuratan a kinapudno. (Roma 2:21) Nangipaay ni Jesu-Kristo iti naisangsangayan a pagtuladan iti daytoy a banag. Iti ministeriona, nagadaw wenno nangyebkas ni Jesus kadagiti kapanunotan a pumada kadagiti teksto iti agarup kagudua dagiti libro ti Hebreo a Kasuratan.a Uray idi 12 pay laeng ti tawenna, nabatad nga adun ti ammona maipapan iti Sao ti Dios. Nasarakan idi “a situtugaw iti tengnga dagiti mannursuro ken agim-imdeng kadakuada ket agsalsaludsod kadakuada.” (Lucas 2:46) Idi nataenganen, ugali ni Jesus ti mapan iti sinagoga, a pakaibasaan idi ti Sao ti Dios.​—Lucas 4:16.

11. Aniada a nasayaat nga ugali iti panagadal ti rebbeng a patanoren ti maysa a mannursuro?

¹¹ Naanepkay kadi nga agbasa iti Sao ti Dios? No agsukimatkayo iti dayta, “maawatan[yonto] ti panagbuteng ken ni Jehova, ken masarakan[yonto] ti pannakaammo iti Dios.” (Proverbio 2:4, 5) Patanorenyo ngarud dagiti nasayaat nga ugali iti panagadal. Ikagumaanyo a basaen nga inaldaw ti maysa a paset ti Sao ti Dios. (Salmo 1:2) Iyugaliyo a basaen ti tunggal ruar ti Pagwanawanan ken Agriingkayo! apaman a maawatyo. Umimdengkayo a naimbag kadagiti gimong ti kongregasion. Sursuruenyo ti agsukisok a siaannad. Sursuruenyo a ‘tuntonen amin a banag buyogen ti kinaumiso’ tapno saanyo a masobraan ti isursuroyo ken tapno saankayo a makaited iti di umiso nga impormasion.​—Lucas 1:3.

Ayat ken Panagraem Kadagidiay Isursuroyo

12. Kasano ti panangtrato ni Jesus kadagiti adalanna?

¹² Ti maysa pay a napateg a galad isu ti umiso a panangtrato kadagidiay isursuroyo. Linais dagiti Fariseo dagidiay dimngeg ken Jesus. “Daytoy a bunggoy a di makaammo iti Linteg nailunodda a tattao,” kinunada. (Juan 7:49) Ngem addaan ni Jesus iti nauneg nga ayat ken panagraem kadagiti adalanna. Kinunana: “Saankay nga awaganen iti ad-adipen, agsipud ta ti adipen dina ammo no ania ti aramiden ti apona. Ngem inawagankay iti gagayyem, agsipud ta isuamin a bambanag a nangngegko manipud iti Amak impakaammok kadakayo.” (Juan 15:15) Ipamatmat daytoy no kasano ti rumbeng a panangisuro dagiti adalan ni Jesus.

13. Kasano ti panangtrato ni Pablo kadagidiay sinursuruanna?

¹³ Kas pagarigan, saan a nalamiis wenno nakaporpormal ti pannakilangen ni Pablo kadagiti sinursuruanna. Kinunana kadagiti taga Corinto: “Uray no addaankayo koma iti sangapulo ribo a manangisuro ken Kristo, pudno nga awanankayo iti adu nga amma; ta ken Kristo Jesus nagbalinak nga amayo babaen ti naimbag a damag.” (1 Corinto 4:15) Adda dagiti kanito nga uray la nakalua ni Pablo a namagbaga kadagidiay sinursuruanna! (Aramid 20:31) Naisangsangayan met ti kinaanus ken kinaimbag nga impakitana. Dayta ti gapuna a naikunana kadagiti taga Tesalonica: “Nagbalinkami a naalumamay iti tengngayo, a kas met laeng no ti agtagtagibi nga ina taripatuenna dagiti bukodna nga annak.”​—1 Tesalonica 2:7.

14. Apay a nagpateg ti personal nga interes kadagiti iyad-adalantayo iti Biblia? Iyilustraryo.

¹⁴ Tultuladenyo kadi da Jesus ken Pablo? Ti napasnek a panagayat kadagiti iyad-adalantayo mapunnuanna ti aniaman a pagkurangan dagiti nakayanakan nga abilidadtayo. Marikna kadi dagiti iyad-adalantayo iti Biblia nga addaantayo iti napasnek a personal nga interes kadakuada? Iwaywayaantay kadi nga am-ammuen ida a naimbag? Idi marigatan ti maysa a Kristiano a babai a tumulong iti iyad-adalanna a rumang-ay iti naespirituan, siaayat nga insaludsodna: “Adda kadi problemam?” Impeksa ti babai ti linaon ti pusona. Inyesngawna dagiti adu a pakaseknan ken pakaringgoranna. Dayta a naayat a panagsarita ti namagbalbaliw a namimpinsan iti dayta a babai. Kadagiti kasta a kasasaad, maitutop dagiti Nainkasuratan a kapanunotan ken dagiti makaliwliwa ken makaparegta a sasao. (Roma 15:4) Ngem agannadkayo: Mabalin a napartak ti irarang-ay ti iyad-adalanyo iti Biblia ngem nalabit adda pay dagiti di Nakristianuan a kababalin a masapul a parmekenna. Saan ngarud a nainsiriban ti makisinninged unay kenkuana. Nasken a mamantener dagiti umno a pagbeddengan para kadagiti Kristiano.​—1 Corinto 15:33.

15. Kasanotay a maipakita ti panagraem kadagiti iyad-adalantayo iti Biblia?

¹⁵ Ti panagraem kadagiti iyad-adalantayo ramanenna ti ditay panangkontrol iti personal a biagda. (1 Tesalonica 4:11) Kas pagarigan, mabalin nga iyad-adalantayo ti maysa a babai a makikabkabbalay iti maysa a lalaki. Nalabit addan annakda. Tangay addaanen iti umiso a pannakaammo iti Dios, kayat ti babai nga ilinteg dagiti bambanag iti imatang ni Jehova. (Hebreo 13:4) Nasken kadi a makikasar iti lalaki wenno makisina? Nalabit ditay umanamong a makikasar iti lalaki a bassit wenno awan ti interesna kadagiti naespirituan a banag agsipud ta mabalin a lapdan daytoy ti irarang-ayna iti masanguanan. Iti sabali a bangir, nalabit iyam-amaktayo ti pagimbagan dagiti annakna ket iti panagkunatayo nasaysayaat a makikasar laengen iti dayta a lalaki. Iti aniaman a kasasaad, kinaawan panagraem ken di naayat ti makibiang iti biag ti iyad-adalantayo ken mangipilit kadagiti bukodtayo a kapanunotan kadagita a banag. Total, isunto ti agapit iti bunga ti desisionna. No kasta, saan kadi a nasaysayaat a sanayen ti kasta nga estudiante a mangaramat iti bukodna a “pannakabalin nga agrason” ket isu a mismo ti agdesision no ania ti rebbeng nga aramidenna?​—Hebreo 5:14.

16. Kasano a maipakita dagiti panglakayen ti ayat ken panagraem iti arban ti Dios?

¹⁶ Nangnangruna a napateg kadagiti panglakayen ti kongregasion a tratuenda ti arban a buyogen ti ayat ken panagraem. Idi sinuratanna ni Filemon, kinuna ni Pablo: “Nupay addaanak iti dakkel a wayawaya iti panagsao mainaig ken Kristo tapno bilinenka nga aramidem ti umiso, bagbagaanka ketdi maipuon iti ayat.” (Filemon 8, 9) No dadduma, mabalin a rumsua dagiti makapaupay a kasasaad iti kongregasion. Nalabit kasapulan pay ketdi ti kinainget. Indagadag ni Pablo ken Tito nga “itultuloy[na] a tubngaren [dagiti nakabasol] a buyogen ti kinainget, tapno nasalun-atda koma iti pammati.” (Tito 1:13) Uray pay kasta, masapul nga agannad dagiti manangaywan di la ket ta makapagsaoda a sigugubsang iti kongregasion. Insurat ni Pablo: “Ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin, kualipikado a mangisuro, nga itultuloyna a medmedan ti bagina iti sidong ti dakes.”​—2 Timoteo 2:24; Salmo 141:3.

17. Ania a biddut ti naaramid ni Moises, ket ania ti maadal dagiti panglakayen iti daytoy?

¹⁷ Masapul a kanayon a laglagipen dagiti manangaywan a “ti arban ti Dios” ti pakilanglangenanda. (1 Pedro 5:2) Nupay napakumbaba ni Moises, adda idi kanito a nalipatanna daytoy. Dagiti Israelita “bimmusorda iti espirituna, ket isu kadagiti bibigna nagsao a dina napuotan.” (Salmo 106:33) Nakapungtot unay ti Dios iti kastoy a di umiso a pannakatrato ti arbanna, uray pay no nakabasolda. (Numeros 20:2-12) No maipasangoda kadagiti umasping a karit ita, ikagumaan koma dagiti panglakayen ti mangisuro ken mamagbaga a buyogen ti nauneg a pannakaawat ken kinaanus. Mangipangag dagiti kakabsat no matratoda a buyogen ti konsiderasion ken kas indibidual nga agkasapulan iti tulong, saan a kas din pulos agbalbaliw. Rebbeng a salimetmetan dagiti panglakayen ti positibo a panangmatmat a kas ken Pablo idi kinunana: “Adda panagtalekmi iti Apo maipapan kadakayo, nga ar-aramidenyo ken itultuloyyonto nga aramiden dagiti bambanag nga ibilinmi.”​—2 Tesalonica 3:4.

Panangipaay Kadagiti Kasapulanda

18, 19. (a) Kasanotay a maipaay ti kasapulan dagiti iyad-adalantayo iti Biblia a limitado dagiti abilidadda? (b) Kasanotay a matulongan dagiti iyad-adalantayo a marigatan a mangawat kadagiti espesipiko a banag?

¹⁸ Madadaan ti epektibo a mannursuro a makiataday kadagiti abilidad ken limitasion dagiti iyad-adalanna. (Idiligyo ti Juan 16:12.) Iti pangngarig ni Jesus maipapan kadagiti talento, nangted ti apo kadagiti pribilehio “iti tunggal maysa sigun iti bukodna a kabaelan.” (Mateo 25:15) Mabalintay a tuladen dayta a padron no mangikonkonduktatayo iti panagadal iti Biblia. Gagangay laeng a kayattayo a mabiit a maturpos ti panagadal iti maysa a naibatay-Biblia a publikasion. Ngem nasken a bigbigentayo a saan nga amin ket nalaing nga agbasa wenno napartak a mangtarus kadagiti baro nga ideya. Gapuna, nasken a tingitingentayo no kaano nga umallatiw iti sabali a punto bayat ti panagadal no marigatan a makiagpang dagiti agtigtignayen a tattao. Napatpateg ti panangtulong kadagiti estudiante a mangtarus iti ad-adalenda ngem ti panangsaklaw iti material iti naikeddeng a kapartak.​—Mateo 13:51.

¹⁹ Pudno met dayta kadagiti iyad-adalantayo iti Biblia a marigatan a mangawat kadagiti espesipiko a banag, kas iti Trinidad wenno dagiti narelihiosuan a piesta. Nupay kadawyan a di kasapulan ti mangiraman iti nasiraraktayo a naibatay-Biblia a material iti panagadaltayo, mabalintay nga aramiden dayta sagpaminsan no nabatad a makagunggona daytoy. Nasken a tingitingentay a naimbag dayta tapno saan a bumannayat ti irarang-ay ti iyad-adalantayo.

Napasnekkay Koma!

20. Kasano a nangipaay ni Pablo iti pagwadan iti panangipakita iti kinapasnek ken kombiksion iti panangisurona?

²⁰ “Nasgedkayo koma iti espiritu,” kuna ni Pablo. (Roma 12:11) Wen, mangikonkonduktatayo man iti panagadal iti Biblia iti pagtaengan wenno adda pasettayo iti gimong ti kongregasion, aramidentay koma dayta a sireregta ken sipapasnek. Kinuna ni Pablo kadagiti taga Tesalonica: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati.” (1 Tesalonica 1:5) Iti kasta, inranud da Pablo ken dagiti kakaduana “saan laeng a ti naimbag a damag ti Dios, no di ket kasta met dagiti bukod[da] a kararua.”​—1 Tesalonica 2:8.

21. Kasanotay a mamantener ti kinapasnek no mangisursurotayo?

²¹ Aggubuay ti napaypayso a kinapasnek iti natibker a panamati a dagiti iyad-adalantayo iti Biblia nasken a mangngeganda ti ibagatayo. Pulos a ditay koma panunoten a maysa laeng a rutina ti aniaman nga annongtayo a mangisuro. Iti daytoy a banag, awan duadua nga inannadan ni Esdras nga eskriba ti panangisurona. “Impapusona ti nagsapul iti linteg ni Jehova, ken mangaramid kenkuana, ken mangisuro iti Israel.” (Esdras 7:10) Kasta met koma ti aramidentayo babaen ti panagsagana a naimbag ken panangutob iti pateg ti material. Ikararagtayo ken Jehova a punnuennatayo iti pammati ken kombiksion. (Lucas 17:5) Ti kinapasnektayo matulonganna dagiti iyad-adalantayo iti Biblia a mangpatanor iti napaypayso a panagayat iti kinapudno. Siempre, ti panangannad iti panangisurotayo mabalin a ramanenna ti panangipakat kadagiti espesipiko a wagas ti panangisuro. Salaysayen ti sumaganad nga artikulo ti dadduma kadagitoy.

[Footnote]

Malagipyo Kadi?

◻ Apay a kasapulan ita dagiti nalaing a Kristiano a mannursuro?

◻ Aniada a nasayaat nga ugali iti panagadal ti mabalintay a patanoren?

◻ Apay a nagpateg ti ayat ken panagraem kadagidiay isursurotayo?

◻ Kasanotay a maipaay ti kasapulan dagiti iyad-adalantayo iti Biblia?

◻ Iti panangisuro kadagiti sabsabali, apay a nagpateg ti kinapasnek ken kombiksion?

[Ladawan iti panid 10]

Dagiti nasayaat a mannursuro estudianteda a mismo iti Sao ti Dios

[Ladawan iti panid 13]

Ipakitayo ti personal nga interes kadagiti iyad-adalanyo iti Biblia