Kasano a ti Tao ket Kaladladawan ti Dios?

“TI DIOS pinarsuana ti tao a kaladladawanna met laeng, iti ladawan ti Dios pinarsuana; pinarsuana ida a lalaki ken babai.” Kasta ti kuna ti naipaltiing a rekord, ngem ania ti kayat a sawen dayta? Kasano a naparsua ti immuna a lalaki ken babai a kaladladawan ti Dios?​—Genesis 1:27.

Kaing-ingasda aya ti Dios? Saan, imposible dayta. Ti tao ket natauan, nailasagan, nairanta nga agbiag ditoy daga. Ti Dios ket espiritu, nga agnanaed iti di mailadawan a nailangitan a dayag nga awan ti tao a makaasideg. (Exodo 33:18-20; 1 Corinto 15:50) Kasano ngarud a naaramid ti tao a kaladladawan ti Dios? Ngamin, naikkan ti tao iti kabaelan a mangiparangarang kadagiti kangrunaan a galad ti Dios​—ayat, kinahustisia, sirib, ken pannakabalin​—​kasta met dagiti dadduma pay a kababalin.

Dagiti Kababalin ni Jehova

Maanninaw dagiti kababalin ni Jehova a Dios iti amin a parsuana, ngem nangnangruna a naiparangarang dagitoy iti pannakilangenlangenna iti immuna a natauan a pagassawaan, da Adan ken Eva. (Roma 1:20) Naipakita ti ayatna iti panangparsuana iti daga nga apag-isu la unay a pagtaengan ti tao. Inyaramidan ni Jehova ti lalaki iti perpekto nga asawa nga agbalin a kaduana ken ina dagiti annakna. Insaadna ida a dua iti nagpintas a minuyongan ken sibubuslon nga intedna amin a kasapulanda tapno makapagtultuloyda nga agbiag a siraragsak. Kasayaatan iti amin, inikkan ti Dios ida iti gundaway nga agbiag nga agnanayon.​—Genesis 2:7-9, 15-24.

Naipakita ti sirib ti Dios iti panangsubokna iti immuna a natauan a pagassawaan. Tapno makapagtalinaedda a kameng ti sapasap a pamilia ni Jehova ken tapno agbiagda nga agnanayon kas nagannak ti sangatauan, masapul nga agbalinda a pagwadan iti kinamatalek ken pudno a panagdaydayaw. Gapuna, inikkan ni Jehova ida iti gundaway a mangipakita iti kasasaad ti pusoda iti sidong ti tumutop a pannubok​—saanda a mangan iti bunga ti kayo ti pannakaammo ti naimbag ken dakes. Anian a nainsiriban iti biang ni Jehova ti panangipalubosna kadagiti tao a mangipaneknek iti kinatulnog ken panagayatda kenkuana sakbay nga itedna kadakuada dagiti nagsayaat a pribilehio nga adda iti panunotna!

Naipakita ti kinahustisia ti Dios iti panangipaannurotna kadagiti nangato a pagalagadanna kadagiti parsuana ken iti dina panangikompromiso kadagidiay a pagalagadan. Naipakita dayta iti panangipaayna kada Adan ken Eva iti amin a gundaway a mangaramid iti umiso. Ket idi napaayda a nangaramid iti dayta, naipakita ti kinahustisiana iti panangsentensiana kadakuada nga aglak-am iti naibaga a dusa ti panagsukir.

Naipakita ti pannakabalin ni Jehova iti panangibanagna iti sentensiana. Impasimudaag ni Satanas, ti dakkel a rebelde, nga ulbod ni Jehova, ket tinukonan ni Satanas ni Eva kadagiti dadakkel a banag no sumupring iti Dios. (Genesis 3:1-7) Ngem di kabaelan ni Satanas a tungpalen ti karina. Dina nalapdan ni Jehova a mangpatalaw kada Adan ken Eva idiay minuyongan ti Eden, ken dina nalapdan ti pannakatungpal dagiti sasao ti Dios ken Adan: “Tapukka ket iti tapuk agsublikanto.” (Genesis 3:19) Nupay kasta, saan nga inwayat nga insigida ni Jehova ti dusa a patay, ket iti daytoy impakitana pay ti ayatna. Inikkanna da Adan ken Eva iti panawen a mangpataud kadagiti annak a babaen dayta, matungpal ti orihinal a panggepna iti sangatauan.​—Genesis 1:28.

Kamaudiananna, naiparangarang ti ayat, kinahustisia, pannakabalin, ken sirib ni Jehova a Dios iti karina a mangipaay iti maysa a bin-i a mangdadael kadagiti aramid ni Satanas ken mangrisut kadagiti nakalkaldaang a resulta dayta immuna a yaalsa iti kinasoberano ti Dios. (Genesis 3:15) Anian a nakaskasdaaw ti Namarsua kadatayo!

Panagregget a Tumulad iti Dios

Nupay saandan a perpekto, maiparangarang pay laeng dagiti tattao dagiti kababalin ti Dios. Gapuna, pinaregta ni Pablo dagiti Kristiano idi kaaldawanna: “Agbalinkayo a tumutulad iti Dios, kas annak a dungdunguen.” (Efeso 5:1) Nupay kasta, iti intero a historia, impakita ti kaaduan ti nakaro a di panangikankano kadagiti kababalin ti Dios. Idi kaaldawan ni Noe, napalalo ti kinadakes dagiti tao nga inkeddeng ni Jehova a dadaelen ti isuamin a sangatauan malaksid ken ni Noe ken ti pamiliana. “Nalinteg a tao [ni Noe]. Pinaneknekanna ti bagina nga awan pakapilawanna kadagiti kasadaranna,” ken impakitana ti panagayatna iti Dios babaen ti panangtungpalna iti bilbilin ti Dios.a “Inaramid amin ni Noe ti imbilin ti Dios kenkuana. Kasta ti inaramidna.” (Genesis 6:9, 22) Impakita ni Noe ti panagayatna kadagiti padana a tao ken ti panangsalimetmetna iti kinahustisia babaen ti panagbalinna a “manangaskasaba iti kinalinteg.” (2 Pedro 2:5) Impakitana ti sirib ken siuumiso nga inusarna ti pisikal a pigsana babaen ti panangtungpalna iti bilin ti Dios a mangbangon iti dakkel a daong, mangipempen iti taraon sadiay, mangurnong kadagiti animal, ken sumrek iti daong iti panangibilin ni Jehova. Impakitana pay ti panagayatna iti kinalinteg iti dina panangipalubos kadagiti managdakdakes a kaarrubana a mangdadael iti nasayaat a kababalinna.

Dakamaten ti Biblia dagiti adu a dadduma pay a nangipakita met kadagiti nadiosan a kababalin. Ti kangrunaan isu ni Jesu-Kristo, a naan-anay a kaladladawan ti Dios, isut’ gapuna a naikunana: “Ti nakakita kaniak nakitana met ti Ama.” (Juan 14:9) Ti ayat ti kangrunaan kadagiti kababalin nga impakita ni Jesus. Ti panagayatna iti Amana ken iti sangatauan ti nangtignay kenkuana a mangpanaw iti nailangitan a taengna ken agbiag a kas maysa a tao ditoy daga. Dayta ti nangtignay kenkuana a nangidaydayaw iti Amana babaen ti nalinteg a kababalinna ken nangikasaba iti naimbag a damag ti pannakaisalakan iti sangatauan. (Mateo 4:23; Juan 13:31) Kalpasanna, ti ayat ti nangtignay ken Jesus a mangipaay iti perpekto a biagna a pakaisalakanan ti sangatauan, ken napatpateg pay, pakasantipikaran ti nagan ti Dios. (Juan 13:1) Iti panagregget a tumulad iti Dios, adda pay aya nasaysayaat nga ulidan a suroten ngem ni Jesu-Kristo?​—1 Pedro 2:21.

Kasano nga Ad-adda nga Agbalintayo a Kaladladawan ti Dios Ita?

Itatta, kasanotay a maipakita dagiti kababalin ti Dios ket iti kasta makapagtignaytayo a kaladladawan ti Dios? Bueno, usigenyo nga umuna ti kababalin nga ayat. Kinuna ni Jesus: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.” Kasanotay a maipakita ti panagayat iti Dios? Sumungbat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.”​—Mateo 22:37; 1 Juan 5:3.

Siempre, tapno masalimetmetantayo dagiti bilin ni Jehova, masapul nga ammuentayo dagitoy. Ramanen dayta ti panagbasbasa, panangad-adal, ken panangutob iti Sao ti Dios, ti Biblia, ken kadagiti literatura ti Biblia. Kas iti salmista, rumbeng a maikunatayo: “Anian a panagayatko iti lintegmo! Isu ti imutektekak nga agmalmalem.” (Salmo 119:97) Bayat nga umun-uneg ti pannakaawattayo iti Sao ti Dios, mairuamtayo iti panagpampanunot ti Dios. Masursurotayo nga ayaten ti kinalinteg ken guraen ti kinadakes. (Salmo 45:7) Napaay ni Adan iti daytoy a banag. Ammona ti linteg ni Jehova, ngem awan umdas a panagayatna iti dayta tapno tungpalenna. No basbasaentayo ti Sao ti Dios, rumbeng a saludsodantay a kanayon ti bagitayo, ‘Kasano nga agaplikar daytoy kaniak? Aniat’ maaramidak tapno ad-adda a maitunosko ti kababalinko kadagiti kababalin ti Dios?’

Kinuna pay ni Jesus: “Masapul nga ayatem ti kaarrubam a kas iti bagim.” (Mateo 22:39) Ti tunggal natakneng a tao patpatgenna ti bagina ken kayatna ti kasayaatan para iti bagina. Saan a dakes dayta. Ngem ipakpakitatay kadi ti kasta met laeng a panagayat iti padatayo a tao? Sursurotentay kadi ti pammagbaga ti Biblia: “Dika medmedan ti imbag kadagiti karbenganna, no adda ita imam iti pannakabalin a mangaramid”?​—Proverbio 3:27; Galacia 6:10.

Ti met ngay galad a sirib? Ti tarigagaytayo a mangiparangarang iti daytoy a galad iturongnatayo nga agadal iti Biblia gapu ta naglaon dayta iti nadiosan a sirib. Kunaen ti Salmo 119:98-100: “Dagiti bilbilinmo pagbalinendak a nanaknakem ngem dagiti kabusorko, ta agnanayonda kaniak. Ad-adda ti pannakaawatko ngem amin dagiti mannursuro kaniak, ta dagiti palagipmo isuda ti ut-utobek. Ad-adda ti maawatko ngem dagiti lallakay, gapu ta sinalimetmetak dagiti al-alagadem.” Idiay Proverbio 3:18, nailadawan ti sirib kas “maysa a kayo ti biag.” No gumun-odtayo iti sirib ken ipakattayo dayta, magun-odantayo ti anamong ti Dios ken ti gunggona a biag nga agnanayon.​—Eclesiastes 7:12.

Ti met ngay kinahustisia? Iti daytoy dakes a lubong, ti kinahustisia ket maysa a nagpateg a galad para kadagidiay mayat a mangay-ayo iti Dios. Inayat ni Jesus ti kinalinteg (kinahustisia) ken ginurana ti kinadakes. (Hebreo 1:9) Kasta met ti ar-aramiden dagiti Kristiano ita. Ti kinahustisia ti mangtignay kadakuada a mangapresiar kadagiti umiso a kababalin. Liklikanda dagiti dakes a wagas daytoy a lubong ket ti panangaramid iti pagayatan ti Dios ti kapatgan a banag iti biagda.​—1 Juan 2:15-17.

No maipapan iti pannakabalin, addaantayo amin iti dayta. Nainkasigudan nga addaantayo iti pisikal ken intelektual a pannakabalin, ket bayat nga agmatmataengantayo kas Kristiano, pumigsa ti pannakabalintayo iti naespirituan a pamay-an. Pabilgennatayo ni Jehova babaen ti nasantuan nga espirituna tapno, nupay kasla nakapsuttayo, kabaelantayo nga aramiden ti pagayatan ni Jehova. Kinuna ni Pablo: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.” (Filipos 4:13) Magun-odtayo ti kasta met laeng a bileg no ikararagtayo ti espiritu ni Jehova.

Panangikasaba iti Naimbag a Damag

Ti panangiparangarangtayo kadagiti uppat a kangrunaan a galad ti Dios ket makita iti panangtungpaltayo iti bilin nga: “Inkayo ngarud ket mangaramidkayo kadagiti adalan a tattao iti isuamin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a tungpalenda dagiti isuamin a bambanag nga imbilinko kadakayo. Ket, adtoy! addaak kadakayo iti isuamin nga al-aldaw agingga iti panungpalan ti sistema ti bambanag.” (Mateo 28:19, 20) Ti kasta a trabaho a panangisuro mangyeg iti biag kadagidiay mangipangag. Anian a nagsayaat nga ebkas ti ayat kadagidiay, kaaduanna, naan-anay a ganggannaet kadatayo!

Mainayon pay, ti kasta a panangisuro ket isu ti nainsiriban nga aramiden. Mangpataud dayta iti agpaut a bunga. Adda pay aya sabali a trabaho a maikuna: “Babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka”? (1 Timoteo 4:16) Awan ti maabak iti trabaho a panangaramid iti adalan. Dagidiay agimdeng ken dagidiay mangisuro agpada a magun-odda dagiti agnanayon a bendision.

No maipapan iti kinahustisia, isursuro dagiti Kristiano dagiti nalinteg a prinsipio kadagiti yad-adalanda iti Biblia. Tultulongantay ida nga agserbi ken Jehova, “ti Dios ti kinahustisia.” (Malakias 2:17) Dagidiay mangidedikar ita iti biagda nga agserbi ken Jehova ken agtalinaed a matalek naideklarada a nalinteg, napalinteg, a mangiturong iti pannakaispalda inton Armagedon.​—Roma 3:24; Santiago 2:24-26.

Anian a parangarang ti pannakabalin ti panangikasaba ken panangisuro iti naimbag a damag iti intero a lubong! (Mateo 24:14) Kasapulan ti panagibtur iti panagtultuloy a mangasaba kadagiti teritoria a di kayat ti kaaduan ti dumngeg. Ngem ni Jehova, babaen ti espirituna, ipaayna ti bileg a kasapulan tapno makapagibturtayo agingga iti panungpalan.​—Isaias 40:30, 31; Mateo 24:13; Lucas 11:13.

Pudno, kas imperpekto a kaputotan ni Adan, saantay a maiparangarang a naan-anay dagitoy nagsayaat a kababalin. Ngem, laglagipenyo, naaramid ti tao a kaladladawan ti Dios, ket no ikagumaantayo a tuladen ti Dios, uray kaskasano tungtungpalentayo ti panggep ti kaaddatayo. (Eclesiastes 12:13) No ipakattayo ti amin a kabaelantayo ken dumawat iti pammakawan no agbidduttayo, mainanamatayo ti makastrek iti nalinteg a baro a lubong ti Dios, a pakaragpatantayo iti kinaperpekto iti kamaudiananna. Iti kasta, addatayto iti paraiso a daga a napno kadagiti perpekto a tattao, a mangiparparangarang a naan-anay kadagiti kababalin ni Jehova a Dios. Anian a nagragsak! Kamaudiananna, iti naan-anay a kaipapanan ti sao, agbalinto dagiti tattao a kaladladawan ti Dios.

[Footnote]

[Ladawan iti panid 25]

Impakita ni Jesus kadatayo no kasano a sukayen dagiti nadiosan a kababalin ni Jehova

[Ladawan iti panid 26]

Kamaudiananna, agbalinto dagiti tattao a naan-anay a kaladladawan ti Dios