Malagipyo Pay Kadi?

Inusigyo met laeng kadi dagiti nabiit pay a ruar Ti Pagwanawanan? No kasta, makapainteres a lagipen dagiti sumaganad:

◻ Ania ti sumagmamano a saludsod a rumbeng nga utoben ti dua a Kristiano sakbay a panunotenda ti panagtulag nga agkallaysa?

‘Talaga aya a diak pagduaduaan ti espiritualidad ti kayatko nga ikallaysa ken ti debosionna iti Dios? Isu aya ti kayatko a katakunaynay nga agserbi iti Dios bayat ti panagbiagmi? Ammomin aya a naimbag ti katatao ti tunggal maysa? Sigurado aya nga agkatunosankamto bayat ti panagbiagmi? Pagaammomin aya dagiti napalabas nga aramid ken agdama a kasasaad ti tunggal maysa?’​—8/15, panid 31.

◻ Ania ti kayat a sawen ni Jesus idi kinunana kadagiti pasurotna: “Dakayo ti asin ti daga”? (Mateo 5:13)

Imparipirip ni Jesus a ti panangasaba dagiti pasurotna kadagiti sabsabali maipapan iti Pagarian ti Dios ket mabalin a mangpreserba, wenno mangsalbar iti biag dagiti agdengngeg kadakuada. Kinapudnona, dagidiay mangipangag iti sasao ni Jesus ket masalakniban iti moral ken naespirituan a panagrakaya iti lubong.​— 8/15, panid 32.

◻ Kasano a maliklikan ti agnobio ti silo ti seksual nga imoralidad?

No ag-date-kayo, nainsiriban a liklikanyo a duduakay laeng iti agbalinto nga asawam kadagiti di maitutop a kasasaad. Kasayaatan no adda kakaduayo wenno kadagiti publiko a lugar ti pagpasiaranyo. Limitaranyo ti panaglinnailoyo, a respetuenyo ti rikrikna ken konsiensia ti tunggal maysa.​—9/1, panid 17, 18.

◻ Ania ti pannakaawat?

Dayta ti abilidad a mangsukimat iti maysa a banag sa amirisen ti pakabuklanna babaen ti panangtarus iti panagnanaig dagiti bennegna ken iti mismo a pakabuklanna, ket iti kasta maala ti anagna. (Proverbio 4:1)​—9/15, panid 13.

◻ Ania ti dawdawaten ni Jehova kadatayo ita?

Iti simple a sasao, dawdawaten ni Jehova nga umimdengtayo iti Anakna ken surotentayo ti ulidan ken sursurona. (Mateo 16:24; 1 Pedro 2:21)​—9/15, panid 22.

◻ Asino laeng ti makasagrap iti talna?

Yantangay ni Jehova “ti Dios a mangipaay iti talna,” dagiti laeng tattao a mangay-ayat iti Dios ken addaan nauneg a panagraem kadagiti nalinteg a prinsipiona ti makasagrap iti talna. (Roma 15:33)​—10/1, panid 11.

◻ Kasano a nagun-od ni Jose ti moral a kired ta napagkedkedanna ti asawa ni Potifar iti inaldaw?

Napatpateg nga amang ken ni Jose ti relasionna ken ni Jehova ngem kadagiti apagbiit a ragragsak. Kasta met a nupay awan iti sidong ti kodigo ti linteg a naggapu iti Dios, nalawag ti pannakaawat ni Jose kadagiti moral a prinsipio. (Genesis 39:9)​—10/1, panid 29.

◻ Kasano kapateg ti kinamasindadaantayo a mangpakawan iti kakabsattayo?

Manamnamatayo nga agtultuloy a pakawanennatayo ti Dios no madadaantayo a mangpakawan kadagiti sabsabali. (Mateo 6:12, 14; Lucas 11:4)​—10/15, panid 17.

◻ Ania a kita dagiti basol ti tuktukoyen ti Mateo 18:15-17, ket ania ti mangipasimudaag iti dayta?

Dagiti talaga a serioso a basol ti tuktukoyen ni Jesus a mangituggod iti pannakaibilang ti nakabasol “kas maysa a tao dagiti nasion ken kas maysa nga agsingsingir iti buis.” Saan a makilanglangen dagiti Judio kadagiti Gentil, ken liniklikanda dagiti agsingsingir iti buis. No kasta, dagiti serioso a basol ti tuktukoyen ti Mateo 18:15-17, saan a basta personal a biddut wenno pannakasair a mabalin a pakawanen ken lipaten lattan. (Mateo 18:21, 22)​—10/15, panid 19.

◻ Ania ti kaipapanan ti pudpudno a panangipateg iti Sao ti Dios? Ti panangipateg iti Sao ti Dios ket panagbiag mayannurot kadagiti pagalagadanna. (Salmo 119:97, 101, 105) Kalikaguman daytoy ti agtultuloy a panangbalbaliw iti panagpampanunot ken kabibiag.​—11/1, panid 14.

◻ Gapu ta aglaplapusanan ti aw-awatentayo ken ni Jehova, ania ti mabalintay nga isubad iti katan-okan nga Ari ken Manangted?

Ipalgak ti Biblia a ti kasayaatan a maisaguttayo ken Jehova isu “ti sakripisio ti panagdaydayaw.” (Hebreo 13:15) Apay? Agsipud ta direkta a mainaig daytoy a sakripisio iti maysa a kangrunaan a pakaseknan ni Jehova iti daytoy tiempo ti panungpalan, ti panangsalbar iti biag. (Ezequiel 18:23)​—11/1, panid 21.

◻ Ania ti kayat a sawen ni Solomon idi insuratna: “Dagiti sasao ti mamasirib kakasda la kadagiti pagduyok”? (Eclesiastes 12:11)

Dagiti sasao dagiti addaan iti nadiosan a sirib dagdagenda dagiti agbasa wenno agdengngeg nga agbalbaliw maitunos iti nainsiriban a sasao a mabasa wenno mangngegda.​—11/15, panid 21.

◻ Ania ti nadiosan a pannakaawat?

Dayta ti abilidad a mangilasin iti umiso ken di umiso ken panagpili iti dalan a rebbeng a suroten. Ti panangadal ken panangyaplikar iti Sao ti Dios ket mangted iti pannakaawat.​—11/15, panid 25.

◻ Ti kinamasindadaan nga umawat kadagiti annongen ket matibnokan koma iti ania? (1 Timoteo 3:1)

Masapul a matibnokan daytoy iti kinatimbeng. Awan koma ti asinoman nga umawat iti nakaad-adu nga annongen no pakapukawanto met laeng ti rag-ona nga agserbi ken Jehova. Makomendaran ti espiritu ti kinamasindadaan, ngem masapul met a ti kinamasindadaan iyanninawna ti kinaemma ken “kinasimbeng ti panunot.” (Tito 2:12; Apocalipsis 3:15, 16)​—12/1, panid 28.

◻ Kasano a sanguen ti karit ti panangpadakkel iti annak?

Balakadan ti Dios dagiti nagannak nga agbalinda a pagwadan, gayyem, mannakikomunikar, ken mannursuro. (Deuteronomio 6:6,7)​—12/1, panid 32.