Nasayaat a Panangidaulo​—Asino ti Makaipaay?

“TUNGGAL balay adda nangibangon,” kuna ti Biblia, “ngem ti nangibangon iti amin a bambanag isu ti Dios.” (Hebreo 3:4; Apocalipsis 4:11) Yantangay ni Jehova, ti pudno a Dios, ti Namarsua kadatayo, “pagaammona unay ti pannakapormatayo.” (Salmo 103:14) Naan-anay nga ammona dagiti limitasion ken kasapulantayo. Ket gapu ta naayat a Dios, kayatna a penken dagita a kasapulan. (Salmo 145:16; 1 Juan 4:8) Nairaman dita ti panagkasapulantayo iti nasayaat a panangidaulo.

Babaen ken propeta Isaias, indeklara ni Jehova: “Adtoy! Kas maysa a saksi kadagiti nasional a bunggoy isu intedko, kas maysa a panguluen ken komandante kadagiti nasional a bunggoy.” (Isaias 55:4) Ti solusion ti agdama a panagkasapulan iti epektibo a mamangulo iramanna ti panangam-ammo iti daytoy a Pangulo​—ti dinutokan ti Mannakabalin-amin a Dios​—ken ti panangbigbig iti panangidaulona. Asino ngarud daytoy naipadto a Pangulo ken Komandante? Ania dagiti kualipikasionna kas pangulo? Pangituronganna kadatayo? Ania ti masapul nga aramidentayo tapno magunggonaan iti panangidaulona?

Dumteng ti Naikari a Pangulo

Agarup 2,500 a tawen ti napalabas, nagparang ni anghel Gabriel ken ni propeta Daniel ket kinunana kenkuana: “Rebbeng nga ammuem ken maaddaanka iti pannakatarus a manipud iruruar ti sao a mangisubli ken mangbangon manen iti Jerusalem agingga iti Mesias a Panguluen, addanto pito a lawas, kasta met innem a pulo ket dua a lawas. Isu agsublinto ket pudno a mabangon manen, nga addaan iti publiko a plasa ken kanal, ngem iti karirigatan kadagiti tiempo.”​—Daniel 9:25.

Nalawag a pinakaammuan ti anghel ni Daniel maipapan iti espesipiko a tiempo ti iyaay ti pinili ni Jehova a Pangulo. Ti “Mesias a Panguluen” ket agparang kalpasan ti 69 a lawas, wenno 483 a tawen, a nangrugi idi 455 K.K.P., idi naibilin a maibangon manen ti Jerusalem.a (Nehemias 2:1-8) Ania ti napasamak iti ngudo dayta a periodo? Kuna ni Lucas a mannurat ti Ebanghelio: “Idi maikasangapulo ket lima a tawen ti panagturay ni Tiberio Cesar, idi a ni Poncio Pilato ti gobernador ti Judea, ket ni Herodes ti agturay iti distrito ti Galilea [29 K.P.], . . . ti deklarasion ti Dios dimteng ken Juan nga anak ni Zacarias idiay let-ang. Gapuna isu napan iti intero a pagilian nga adda iti aglawlaw ti Jordan, a mangikaskasaba iti bautismo kas simbolo ti panagbabawi maipaay iti pannakapakawan dagiti basol.” Iti daydi a tiempo, “siiinanama dagiti tattao” iti Mesias a Panguluen. (Lucas 3:1-3, 15) Nupay napan dagiti tattao ken ni Juan, saan nga isu ti Pangulo.

Sa idi Oktubre ti 29 K.P., ni Jesus a taga Nazaret nagpabautisar ken ni Juan. Nangsaksi ni Juan, a kunana: “Naimatangak ti espiritu a bumabbaba a kas kalapati manipud langit, ket nagtalinaed kenkuana. Uray pay saanko a naam-ammo, ngem Daydiay mismo a nangibaon kaniak tapno mangbautisarak iti danum kinunana kaniak, ‘Siasinoman dayta makitam a bumabbabaan ken pagtalinaedan ti espiritu, isu daytoy ti mangbautisar iti nasantuan nga espiritu.’ Ket nakitak dayta, ken sinaksiak a daytoy isu ti Anak ti Dios.” (Juan 1:32-34) Idi nabautisaran, nagbalin ni Jesus kas ti napulotan a Pangulo​—ti Mesias, wenno Kristo.

Wen, ti naikari a “panguluen ken komandante kadagiti nasional a bunggoy” isu ni Jesu-Kristo. No usigentayo dagiti galadna kas pangulo, dagdagus a mabigbigtayo a ti panangidaulona ket adayo a natantan-ok ngem kadagiti galad dagiti moderno a matarigagayan a pangulo.

Ti Mesias​—Matarigagayan a Pangulo

Ti nasayaat a pangulo ket mangipaay iti nalawag nga instruksion ken tumulong kadagiti idadauluanna a tattao a gumun-od iti kired, determinasion ken abilidad tapno masolbarda dagiti parikut. ‘Nasken daytoy tapno agballigi ti maika-21 a siglo a pangulo,’ kuna ti libro a 21st Century Leadership: Dialogues With 100 Top Leaders. Anian a nagsayaat ti panangisagana ni Jesus kadagiti agdengdengngeg no kasanoda a tamingen dagiti situasion iti kada aldaw! Usigenyo laengen ti kalatakan a palawagna​—ti Sermon iti Bantay. Nabaknang kadagiti praktikal a balakad dagiti sasao a nairekord iti Mateo kapitulo 5 agingga 7.

Usigenyo, kas pagarigan, ti balakad ni Jesus no kasano a risuten dagiti di pagkikinnaawatan. Kinunana: “No, ngarud, ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo.” (Mateo 5:23, 24) Ti kapatgan isu ti panangikagumaan a makikappia​—a napatpateg pay ngem iti panangibanag iti maysa a relihioso nga annongen, kas iti panangidatag iti daton iti altar ti templo idiay Jerusalem nga ipaannurot ti Mosaiko a Linteg. No saan a maannurot daytoy, saan a makaay-ayo iti Dios ti panagdayaw. Praktikal iti kaaldawantayo ti balakad ni Jesus, no kasano a praktikal dayta kadagiti naglabas a siglo.

Tinulongan met ni Jesus dagiti agdengdengngeg a mangliklik iti imoralidad. Indagadagna kadakuada: “Nangngegyo a naikuna, ‘Dika makikamalala.’ Ngem kunak kadakayo a ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:27, 28) Anian a maitutop a pakdaar! Apay koma nga agturongtayo iti pannakikamalala babaen ti panangpampanunot iti dayta? Ti pannakikamalala ken pannakiabig ket mangrugi iti puso, kuna ni Jesus. (Mateo 15:18, 19) Masiribtayo no saluadantay ti pusotayo.​—Proverbio 4:23.

Ti Sermon iti Bantay ket naglaon met iti agkakaimbag a balakad maipapan iti panagayat kadagiti kabusor, panangipakita iti kinaparabur, umiso a panangmatmat kadagiti material ken naespirituan a bambanag, ken dagiti umarngi kadagita. (Mateo 5:43-47; 6:1-4, 19-21, 24-34) Insuro pay ni Jesus kadagiti agdengdengngeg no kasano ti agpatulong iti Dios babaen ti kararag. (Mateo 6:9-13) Ti Mesias a Panguluen pakirdenna ken isaganana dagiti pasurotna no kasano a tamingenda dagiti parikut a gagangay iti sangatauan.

Innem a daras iti Sermon iti Bantay, rinugian ni Jesus dagiti sasaona babaen dagiti ebkas a “nangngegyo a naikuna” wenno “kasta met a naikuna,” ngem nangituyang iti sabali pay a kapanunotan, a kunkunana “nupay kasta, kunak kadakayo.” (Mateo 5:21, 22, 27, 28, 31-34, 38, 39, 43, 44) Ipamatmat dagita a sasao nga adda nayugali dagiti agdengdengngeg, sigun iti oral a tradision dagiti Fariseo. Ngem adda impakita ni Jesus a sabali a wagas​—maysa a mangyanninaw iti pudpudno nga anag ti Mosaiko a Linteg. Iparparegta ngarud ni Jesus ti panagbalbaliw, ket inaramidna daytoy iti wagas a nalaka nga awaten dagiti pasurotna. Wen, tinignay ni Jesus dagiti tattao a mangaramid iti dakkel a panagbalbaliw iti biagda, iti naespirituan ken iti moral. Pagilasinan dayta ti pudno a pangulo.

Maysa a libro maipapan iti panagimanehar ti mangipatuldo no kasano karigat ti mangibanag iti kasta a panagbalbaliw. Kunana: “Ti ahente ti panagbalbaliw [pangulo] nasken a maseknan a kas iti maysa a social worker, maaddaan iti pannakaawat ti maysa a sikologo, ti salun-at ti maysa a tumataray, ti kinaanep ti maysa a bulldog, ti abilidad ti maysa nga ermitanyo nga agbiag a bukbukodna, ken ti kinaanus ti maysa a santo. Ket uray no adda amin kenkuana dagitoy a galad, saan a sigurado nga agballigi.”

“Agtignay koma dagiti pangulo sigun iti kayatda a panagtignay dagiti pasurotda,” kinuna ti maysa nga artikulo a napauluan iti “Panangidaulo: Napateg Kadi Dagiti Kababalin?” Talaga a nasken nga iyaplikar ti maysa a nasayaat a pangulo ti isursurona. Anian a pudno dayta ken Jesu-Kristo! Wen, insurona dagiti pasurotna nga agbalin a napakumbaba, ngem nangipakita met iti aktual nga aramid a pakasursuruanda babaen ti panangbuggona kadagiti sakada. (Juan 13:5-15) Saanna a basta imbaon dagiti adalanna a mangikasaba iti naimbag a damag ti Pagarian ti Dios, no di ket sipipinget nga inaramidna a mismo dayta a trabaho. (Mateo 4:18-25; Lucas 8:1-3; 9:1-6; 10:1-24; Juan 10:40-42) Ket no maipapan iti panagpaidalan iti mamangulo, nangipaay ni Jesus iti ulidan. “Ti Anak saanna a kabalinan nga aramiden ti maysa a banag iti bukodna a nakem,” kinunana maipapan iti bagina, “no di laeng ti makitana nga ar-aramiden ti Ama.”​—Juan 5:19.

Ti panangusig kadagita a kinuna ken inaramid ni Jesus nalawag nga ipakitana nga isut’ matarigagayan a Pangulo. Kinapudnona, lab-awanna ti amin a natauan a pagalagadan ti nasayaat a panangidaulo. Perpekto ni Jesus. Agbiag nga agnanayon gapu ta naawatna ti imortalidad kalpasan ti ipapatay ken panagungarna. (1 Pedro 3:18; Apocalipsis 1:13-18) Asino kadagiti tattao a pangulo ti makaragpat kadagitoy a kualipikasion?

Ania ti Nasken nga Aramidentayo?

Kas ti agturturay nga Ari iti Pagarian ti Dios, ti “Mesias a Panguluen” iburaynanto dagiti bendision iti natulnog a sangatauan. Maipapan iti daytoy, inkari ti Kasuratan: “Ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” (Isaias 11:9) “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” (Salmo 37:11) “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” (Mikias 4:4) “Ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.

Kasapulan unay ti lubong ita ti epektibo a pangulo. Ngem ni Jesu-Kristo iturturongna dagiti naemma iti maysa a natalna a baro a lubong, a sadiay ket agkaykaysanto ti natulnog a sangatauan iti panagdayaw ken ni Jehova a Dios ken agturong iti kinaperpekto. Anian a nagpateg nga ikagumaantayo ti gumun-od iti pannakaammo maipapan iti pudno a Dios ken iti dinutokanna a Pangulo sa agtignay maitunos iti dayta a pannakaammo!​—Juan 17:3.

Maysa kadagiti kasayaatan a pamay-an a maipakitatayo ti panagraem iti maysa a tao isu ti panangtulad kenkuana. Saantay kadi ngarud a tuladen ti katan-okan a Pangulo iti intero a historia​—ni Jesu-Kristo? Kasanotayo a maaramidan dayta? Ania ti epektona iti biagtayo ti panangbigbig iti panangidaulona? Dagitoy a saludsod ken dadduma pay ti masungbatan iti sumaruno a dua nga artikulo.

[Footnote]

[Ladawan iti panid 4]

Impakpakauna ni Daniel ti iyaay ti Pangulo a pinili ti Dios

[Dagiti Ladawan iti panid 7]

Dagiti pannursuro ni Jesus insaganana dagiti tattao a sumango kadagiti parikut iti biag

[Ladawan iti panid 7]

Iturong ni Jesus ti natulnog a sangatauan iti maysa a natalna a baro a lubong