Ti Panangmatmat ti Biblia

Mabalinmo Kadi nga Ayaten Dagiti Kabusormo?

Imbaga ni Jesu-Kristo: “Kunak kadakayo: Itultuloyyo nga ayaten dagiti kabusoryo ken ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit, yantangay pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.”—Mateo 5:44, 45.

IBILANGMO kadi ti relihion kas mangiparegta iti ayat ken talna wenno kas mangrubrob iti gura ken kinaranggas? Ita, adu ti mangibilang iti dayta kas mangrubrob iti gura ken kinaranggas, nangruna no ti relihion ket makiramraman iti politika, mangidumduma iti partikular a puli, wenno mangitantandudo iti nasionalismo. Ngem kas ipakita dagiti sinao ni Jesus, dagiti pudno nga ‘annak ti Dios’ iparparangarangda ti ayat ti Dios—uray kadagiti kabusorda.

Kastoy ti kinuna ti maysa pay nga agserserbi iti Dios: “No ti kabusormo mabisin, pakanem; no mawaw, ikkam iti mainum . . . Dika ipalubos a parmekennaka ti dakes, no di ket itultuloymo a parmeken ti dakes babaen ti naimbag.” (Roma 12:20, 21) Ngem talaga kadi a posible ti kasta nga ayat iti daytoy nasinasina a lubong? Saan nga agduadua dagiti Saksi ni Jehova a sumungbat iti wen! Usigem ti ulidan ni Jesus ken dagiti nagkauna a pasurotna.

Inayatda Dagiti Kabusorda

Insuro ni Jesus ti kinapudno maipapan iti Dios, ket adu ti naragsakan a dimngeg kenkuana. Ngem adda met dagiti kimmontra, a dadduma ket gapu iti kinaignoranteda. (Juan 7:12, 13; Aramid 2:36-38; 3:15, 17) Nupay kasta, intultuloy ni Jesus nga inranud ti makaispal-biag a mensahe iti amin, agraman kadagiti bumusbusor kenkuana. (Marcos 12:13-34) Apay? Ammona a mabalin nga agbalbaliw ti dadduma, bigbigenda nga isu ti Mesias, ken itunosda ti biagda kadagiti naespirituan a kinapudno a masarakan iti Sao ti Dios.—Juan 7:1, 37-46; 17:17.

Impakita ni Jesus ti ayatna kadagiti kabusorna uray iti daydi rabii nga isu ket di nainkalintegan nga inaresto dagiti nagtagiarmas a bumusbusor. Kinapudnona, pinaimbagna ti maysa kadagiti nangtiliw kenkuana a piningasan ni apostol Pedro babaen iti kampilan. Iti dayta a gundaway, imbaga ni Jesus ti napateg a prinsipio a mangiwanwanwan agingga ita kadagiti pudno a pasurotna. Kinunana: “Amin dagidiay mangaramat iti kampilan mataydanto iti kampilan.” (Mateo 26:48-52; Juan 18:10, 11) Agarup 30 a tawen kalpasanna, insurat ni Pedro: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna. . . . Idi agsagsagaba, saan a nagipangpangta, no di ket intultuloyna nga intalek ti bagina iti [Dios].” (1 Pedro 2:21, 23) Nalawag a nasursuro ni Pedro nga ayat, saan ket a panagibales, ti rumbeng nga annuroten dagiti pudno a pasurot ni Kristo.—Mateo 5:9.

Amin dagidiay ‘sisisinged a mangsursurot iti addang ni Jesus’ ipakpakitada ti naayat ken makaay-ayo a kababalinna. “Ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin, . . . nga agtultuloy a medmedanna ti bagina iti sidong ti dakes,” kuna ti 2 Timoteo 2:24. Dagita a kababalin ket agminar iti natalna ken mannakikappia a panagbiag ti maysa a Kristiano.

Dagiti Mannakikapia nga ‘Embahador Para ken Kristo’

Insurat ni apostol Pablo kadagiti kapammatianna: “Dakami ngarud ket embahador a mangisunsuno ken Kristo . . . Kas dagiti suno ni Kristo ipakaasimi: ‘Makikappiakayo iti Dios.’” (2 Corinto 5:20) Dagiti embahador dida makibibiang iti napolitikaan ken namilitariaan nga ar-aramid dagiti pagilian a pagserserbianda. Imbes ketdi, agtalinaedda a neutral. Ti trabahoda ket mangibagi ken mangitandudo iti gobierno nga ireprepresentarda.

Kasta met laeng no maipapan kadagiti embahador ken mensahero ni Kristo. Matmatanda ni Jesus kas Ari ken itandudoda ti nailangitan a Pagarianna babaen iti natalna a panangiwaragawagda iti naimbag a damag. (Mateo 24:14; Juan 18:36) Gapuna, insurat ni Pablo kadagiti Kristiano idi panawenna: “Saankami a makigubat a maitunos iti kinasiasinomi iti lasag. Ta dagiti igam ti pannakigubatmi saan a nainlasagan, ngem mannakabalin babaen iti Dios a maipaay a pangbalintuag iti . . . panagrasrason ken tunggal natan-ok a banag a naibangon maibusor iti pannakaammo iti Dios.”—2 Corinto 10:3-5; Efeso 6:13-20.

Idi insurat ni Pablo dagita a sasao, maidaddadanes dagiti Kristiano iti adu a lugar. Sigurado a mabalinda koma ti agibales. Ngem intultuloyda ketdi nga inayat dagiti kabusorda ken inranudda ti mensahe ti pannakikappia iti amin a mayat a dumngeg. Kuna ti Encyclopedia of Religion and War: “Dagiti kaunaan a pasurot ni Jesus dida inanamongan ti gubat ken dida nagserbi iti militar,” ta minatmatanda dagita nga aramid kas “maikontra iti ayat a prinsipio ni Jesus ken iti bilinna nga ayatenda dagiti kabusorda.”a

Kas kadagiti nagkauna a Kristiano, bigbigen dagiti Saksi ni Jehova a ni Jesus ti Arida. Isu met ti bigbigenda kas Ari ti Pagarian ti Dios—ti nailangitan a gobierno nga asidegen a mangyeg iti manayon a talna ken talged ditoy daga. (Daniel 2:44; Mateo 6:9, 10) Gapuna, kas kadagiti embahador ken mensahero, iwarwaragawagda ti kinatan-ok unay dayta a Pagarian. Ikagkagumaanda met ti agbalin a nasayaat nga umili kadagiti pagilian a pagnanaedanda babaen iti panagbayadda iti buisda ken panagtulnogda iti linteg no la ket ta saan a maikontra dayta iti linteg ti Dios.—Aramid 5:29; Roma 13:1, 7.

Ngem nakalkaldaang ta kas kadagiti nagkauna a Kristiano, dagiti Saksi no dadduma ket mapadpadakes, maidaddadanes, ken di maawatan ti sabsabali. Kaskasdi a dida pulos bumales. Imbes ketdi, ikagkagumaanda ti ‘makikappia iti amin a tattao,’ a mangnamnamada a dadduma kadagiti bumusbusor ket ‘makikappia iti Dios’ ken maaddaan iti gundaway nga agbiag nga agnanayon.b—Roma 12:18; Juan 17:3.

[Footnotes]

NAPANUNOTMO KADIN?

◼ Kasano ti rumbeng a panangtrato dagiti Kristiano kadagiti kabusorda?—Mateo 5:43-45; Roma 12:20, 21.

◼ Ania ti reaksion ni Jesus idi naidadanes?—1 Pedro 2:21, 23.

◼ Apay a dagiti nagkauna a Kristiano dida inanamongan ti literal a pannakigubat?—2 Corinto 5:20; 10:3-5.