Salsaludsod Dagiti Agbasbasa

Iti modelo a kararagna, impasimudaag kadi ni Jesus a maar-aramiden idiay langit ti pagayatan ti Dios nupay saan pay idi a naitapuak manipud langit dagiti dakes nga anghel?

Kas nairekord iti Mateo 6:10, kinuna ni Jesus: “Maaramid koma ti pagayatam, kas sadi langit, kasta met iti daga.” Daytoy a kiddaw ket mabalin a tarusan iti dua a pamay-an. Umuna, kas maysa a kiddaw a maaramid koma ditoy daga ti pagayatan ti Dios kas maar-aramid idin idiay langit wenno, maikadua, kas kiddaw a naan-anay koma a maaramid dayta agpadpada idiay langit ken ditoy daga.a Ti kaipapanan ti immuna a sasao ni Jesus, nga “umay koma ti pagariam,” ipasimudaagna nga ad-adda a maitunos iti Kasuratan ti maikadua a panangmatmat. Ipatuldona met dagiti situasion idi adda ditoy daga ni Jesus ken ti naunday a tiempo kalpasanna. Kasano?

Ti libro nga Apocalipsis ipatuldona ti dua a nakadkadlaw a resulta ti pannakaipasdek ti Pagarian ti Dios idiay langit. Ti umuna apektaranna ti mismo a langit, ti maikadua, ti daga. Kuna ti Apocalipsis 12:7-9, 12: “Bimtak ti gubat sadi langit: Ni Miguel ken dagiti anghelna nakibakalda iti dragon, ket nakibakal ti dragon ken dagiti anghelna ngem saan a nangabak, awan met ti nasarakanen a lugar maipaay kadakuada idiay langit. Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana. Gapu itoy agragsakkayo, dakayo a langlangit ken dakayo nga agnaed kadakuada! Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.”

Nadalusan ti langit manipud iti amin nga espiritu a rebelde idi maitapuak ni Satanas ken dagiti demonio manipud langit kalpasan ti 1914, a nangyeg iti rag-o kadagiti nasungdo nga anghel nga annak ni Jehova, nga adayo nga ad-adu ti bilangda ngem dagiti rebelde. (Job 1:6-12; 2:1-7; Apocalipsis 12:10) Gapuna, natungpal idiay langit ti kiddaw iti modelo a kararag ni Jesus. Nasungdo ken ni Jehova dagiti amin a nabati iti dayta a nailangitan a disso ken naan-anay nga agpaspasakupda iti kinasoberanona.

Maipaganetget nga uray kasakbayan dayta, idi maipalubos pay a makastrek idiay langit dagiti dakes nga anghel, saandan a paset ti pamilia ti Dios ken nakednganen ti wayawayada. Kas pagarigan, ipalgak ti Judas 6 nga idi umuna a siglo K.P., ‘naisaganada kadagiti agnanayon a pannakaparaut iti sidong ti napuskol [a naespirituan] a kinasipnget maipaay iti pannakaukom iti naindaklan nga aldaw.’ Kasta met, kuna ti 2 Pedro 2:4: “Ti Dios saan a nagteppel a mangdusa kadagiti anghel a nagbasol, no di ket, babaen ti panangitapuakna kadakuada idiay Tartaro [ti kasasaad a naan-anay a pannakaipababa], impanna ida kadagiti abut ti napuskol [a naespirituan] a kinasipnget tapno maidulinda a maipaay iti pannakaukom.”b

No idilig iti nailaksid a kasasaadda idi addada pay idiay langit, dagiti dakes nga anghel ipakpakatda ita ti dakkel nga autoridad iti intero a daga. Kinapudnona, ti Sao ti Dios awaganna ni Satanas kas “ti agturay iti daytoy a lubong” ken dagiti demoniona kas “dagiti agturay iti lubong daytoy a kinasipnget.” (Juan 12:31; Efeso 6:11, 12; 1 Juan 5:19) Gapu iti autoridadna, nabalinan ti Diablo nga intukon ken ni Jesus “dagiti amin a pagarian ti lubong ken ti dayagna” a kasukat ti maysa a tignay ti panagdayaw. (Mateo 4:8, 9) Nalawag ngarud, addanto dadakkel a panagbalbaliw ditoy daga inton “umay” ti pagarian ti Dios.

Ditoy daga, ti ‘iyaay’ ti Pagarian ti Dios agresulta iti naan-anayto a baro a sistema ti bambanag. Ti Pagarian rippuogenna amin a turay ti tao ken agbalinto kas kakaisuna a gobierno ditoy daga. Kabayatan dayta, dagiti managbuteng-Dios nga iturayanna agbalinto a maysa a “baro a daga.” (2 Pedro 3:13; Daniel 2:44) Ti Pagarian ikkatennanto met ti basol ti natulnog a sangatauan ket pagbalinennanto ti daga a maysa a sangalubongan a paraiso. Iti kasta a pamay-an, interamente nga ikkatenna ti impluensia ti sataniko a turay.​—Roma 8:20, 21; Apocalipsis 19:17-21.

Iti ngudo ti Milenio, inton maitungpal ti Mesianiko a Pagarian ti pagayatan ti Dios, “ti Anak a mismo ipasakupnanto met ti bagina iti Daydiay a nangipasakup iti amin a bambanag kenkuana, tapno ti Dios agbalinto nga amin a bambanag iti tunggal maysa.” (1 Corinto 15:28) Kalpasanna, addanto ti maudi a pannubok. Kalpasan dayta, ni Satanas, dagiti demoniona, ken amin a naallilaw a rebelde a tao ti permanente a matalipuposto iti “maikadua nga ipapatay.” (Apocalipsis 20:7-15) Kamaudiananna, amin nga adda panunotna a parsua idiay langit ken ditoy daga agnanayonto nga agpasakupda a sirarag-o iti naayat a kinasoberano ni Jehova. Iti pakabuklan, dayta ti naan-anay a kaitungpalan dagiti sasao iti modelo a kararag ni Jesus.​—1 Juan 4:8.

[Footnotes]