Dagiti Saludsod Manipud Kadagiti Managbasa

No dadduma mangngegtayo dagiti kakabsat nga agsao wenno mangikararag iti iyaay ti Pagarian ti Dios ditoy daga. Umiso kadi daytoy a sasao?

Iti direkta a pannao, saan a Nainkasuratan dayta a panangyebkas kadagiti bambanag. Nailangitan ti Pagarian ti Dios. Gapuna, insurat ni apostol Pablo: “Ti Apo ispalennakto manipud iti tunggal nadangkes nga aramid ket isalakannakto maipaay iti nailangitan a pagarianna. Kenkuana maadda koma ti dayag iti agnanayon ken awan inggana. Amen.”​—2 Timoteo 4:18; Mateo 13:44; 1 Corinto 15:50.

Naipasdek ti Pagarian idiay langit idi 1914, ket pulos a dinto mayallatiw iti naisubli a naindagaan a Paraiso wenno iti sadinoman. Ni Jesu-Kristo ti Ari ti Pagarian. Kas Ari, adda autoridad ni Jesus kadagiti anghel. Gapuna, iti makannawan ti Dios kadagiti langlangit ti mayanatup a pagturayanna. Makikadua kenkuana dagiti napulotan a Kristiano kas ar-ari ken papadi idiay langit.​—Efeso 1:19-21; Apocalipsis 5:9, 10; 20:6.

No kasta, kayat kadi a sawen daytoy a saantayon a rumbeng nga iyebkas iti Dios dagiti kiddaw a masarakan iti paset ti Kararag ti Apo a kunana: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga”? (Mateo 6:10) Iti kasumbabangirna, umiso dayta a kararag ken napnuan pay laeng iti kaipapanan.

Agtignayto pay laeng ti Pagarian ti Dios iti ultimo a wagas agpaay ditoy daga, ket daytoy ti pampanunotentayo no ikararag ken usarentayo ti sasao nga umasping iti Kararag ti Apo. Kas pagarigan, ipadto ti Daniel 2:44 a ti Pagarian ‘umayto’ a mangdadael kadagiti amin a nasion ken isunto ti mangituray ditoy daga. Dakdakamaten ti Apocalipsis 21:2 ti Baro a Jerusalem a bumabbaba manipud langit. Ti Baro a Jerusalem ket buklen ti 144,000 a napulotan a Kristiano nga agbalinto a nobia ni Kristo. Makipagtawiddanto met ken Jesus iti Pagarian. Gapuna iladawan ti Apocalipsis 21:2 ti panangiturongda iti atensionda ditoy daga, buyogen dagiti naindaklan a bendision nga ibungana iti matalek a sangatauan.​—Apocalipsis 21:3, 4.

Agingga a matungpal dagitoy ken ti dadduma pay a nakaay-ayat a padto, umisonto latta nga ikararag ken Jehova a Dios maitunos iti sasao ni Jesus, “Umay koma ti pagariam.” Ngem laglagipentay koma a saan a literal nga umay ti Pagarian ditoy planeta a Daga. Idiay langit ti ayan ti gobierno ti Pagarian, saan a ditoy daga.

[Picture Credit Line iti panid 31]

Daga: Naibatay iti ladawan ti NASA