“Apo, Isurom Kadakami No Kasano ti Agkararag”

“Kinuna kenkuana ti maysa kadagiti adalanna: ‘Apo, isurom kadakami no kasano ti agkararag.’”​—LUCAS 11:1.

1. Apay a nagpaisuro ti maysa nga adalan ni Jesus no kasano ti agkararag?

NAMINSAN idi 32 K.P., napaliiw ti maysa nga adalan nga agkarkararag ni Jesus. Dina mangngeg ti ibagbaga ni Jesus iti Amana, nalabit gapu ta naulimek dayta a kararag. Kaskasdi, idi nalpas ni Jesus, kinuna kenkuana ti adalan: “Apo, isurom kadakami no kasano ti agkararag.” (Lucas 11:1) Apay a kiniddawna ti kasta? Ti kararag ket kadawyan a paset ti panagbiag ken panagdayaw dagiti Judio. Naglaon ti Hebreo a Kasuratan iti adu a kararag a masarakan iti libro a Salmo ken iti dadduma pay. No kasta, saan a kidkiddawen ti adalan a maisuro kenkuana ti maysa a banag a dina pulos ammo wenno dina pulos inar-aramid. Awan duadua nga ammona ti pormalistiko a kararag dagiti relihioso a lider ti Judaismo. Ngem ita, napaliiwna ti panagkararag ni Jesus, ket nadlawna nga adda dakkel a nagdumaan dagiti managinsisingpet a kararag dagiti rabbi ken ti wagas ti panagkararag ni Jesus.​—Mateo 6:5-8.

2. (a) Ania ti mangipasimudaag a saan a panggep ni Jesus a sao por sao nga ulitentayo ti modelo a kararag? (b) Apay nga interesadotayo a sursuruen no kasano ti agkararag?

² Agarup 18 a bulan sakbayna, iti Sermonna iti Bantay, insuro ni Jesus kadagiti adalanna ti maysa a kararag a pagtuladanda no agkararagda. (Mateo 6:9-13) Posible nga awan daytoy nga adalan iti daydi a gundaway, isu a siaasi nga inulit ni Jesus dagiti napateg a linaon ti modelo a kararag. Nakadkadlaw ta dina inulit a sao por sao, a mangipasimudaag a saan a mekanikal a kararag dayta a basta laeng ikabesa. (Lucas 11:1-4) Kas iti dayta a di nainaganan nga adalan, kayattayo met a sursuruen no kasano ti agkararag tapno dagiti kararagtayo ad-adda nga iyadaninatayo ken ni Jehova. Usigentayo ngarud ti intero a modelo a kararag, kas inlanad ni apostol Mateo. Naglaon dayta iti pito a kiddaw. Tallo ti mainaig kadagiti panggep ti Dios ken uppat ti mainaig kadagiti material ken naespirituan a kasapulantayo. Iti daytoy nga artikulo, usigentayo ti umuna a tallo a kiddaw.

Naayat nga Ama

3, 4. Ania ti ipasimudaag ti panangawagtayo ken ni Jehova iti “Amami”?

³ Maibatay kadagiti nadakamat iti rugrugi, impakita ni Jesus a nasken nga iyanninaw dagiti kararagtayo ti nasinged ngem nadayaw a relasiontayo ken ni Jehova. Agpaay a nangnangruna iti pagimbagan dagiti adalanna a naummong iti sibayna iti dayta a paset ti bantay, kinuna kadakuada ni Jesus nga awaganda ni Jehova kas “Amami nga adda iti langlangit.” (Mateo 6:9) Sigun iti maysa nga eskolar, agsasao man ni Jesus iti pamiliar a porma ti Hebreo wenno iti Aramaiko, ti termino nga inaramatna para iti “Ama” ket umasping iti nasinged nga awag ti ubing iti amana. Ti panangawagtayo ken ni Jehova kas “Amami” ipariknana ti nabara ken addaan panagtalek a relasion kenkuana.

⁴ No kunatayo nga “Amami,” bigbigentayo met a pasetnatayo ti maysa a dakkel a pamilia dagiti lallaki ken babbai a mangbigbig ken ni Jehova kas ti Gubuayan ti Biag. (Isaias 64:8; Aramid 17:24, 28) Dagiti Kristiano a napulotan iti espiritu naibilangda nga “annak ti Dios,” ket kenkuana ‘maipukkawda: “Abba, Ama!”’ (Roma 8:14, 15) Minilion ti nagbalin a nasungdo a kakaduada. Indedikar dagitoy ti biagda ken ni Jehova ken insimboloda ti dedikasionda babaen ti bautismo iti danum. Amin dagitoy a “sabsabali a karnero” mabalinda met ti umadani ken ni Jehova iti nagan ni Jesus ken mabalinda nga awagan ni Jehova iti “Amami.” (Juan 10:16; 14:6) Mabalintayo ti regular nga agkararag iti nailangitan nga Amatayo tapno maidaydayawtayo ti Dios, tapno makapagyaman kenkuana maigapu iti amin a kinaimbag nga ipakpakitana kadatayo, ken tapno mayallatiw kenkuana dagiti dadagsentayo, buyogen ti panagtalek nga ipatpategnatayo.​—Filipos 4:6, 7; 1 Pedro 5:6, 7.

Panagayat iti Nagan ni Jehova

5. Ania ti panglukat a kiddaw ti modelo a kararag, ken apay a maitutop dayta?

⁵ Ipakita ti panglukat a kiddaw no ania ti nasken a mayun-una. Kunana: “Masantipikar koma ti naganmo.” (Mateo 6:9) Wen, ti pannakasantipikar ti nagan ni Jehova ti rumbeng a kapatgan kadatayo gapu ta ay-ayatentayo ti Dios ken kaguratayo ti amin a naaramid a panangumsi iti naganna. Napadakes ti nagan ni Jehova gapu iti iyaalsa ni Satanas ken iti panangisungsongna iti umuna a pagassawaan nga agsukir iti Dios. Napagduaduaan ti wagas ti panangwatwat ni Jehova iti sapasap a kinasoberanona. (Genesis 3:1-6) Maysa pay, sinigsiglon a naumsi ti nagan ni Jehova gapu kadagiti nakababain nga aramid ken sursuro dagidiay agkunkuna a mangibagi kenkuana.

6. Ania ti liklikantayo nga aramiden no ikararagtayo a masantipikar koma ti nagan ni Jehova?

⁶ Ti panangikararagtayo iti pannakasantipikar ti nagan ni Jehova ipakitana no ayantayo a dasig mainaig iti isyu ti sapasap a kinasoberano​—naan-anay a supsuportarantayo ti kalintegan ni Jehova a mangituray iti uniberso. Kayat ni Jehova nga agnaed iti uniberso dagiti adda nakemda a parsua a sidadaan ken sirarag-o nga agpasakup iti nalinteg a kinasoberanona gapu ta ay-ayatenda ti Dios ken ti amin nga irepresentar ti naganna. (1 Cronicas 29:10-13; Salmo 8:1; 148:13) Ti panangipategtayo iti nagan ni Jehova tulongannatayo a di agaramid iti aniaman a pakaumsian dayta a nasantuan a nagan. (Ezequiel 36:20, 21; Roma 2:21-24) Yantangay ti talna ti uniberso ken dagiti agnanaed iti dayta ket agpannuray iti pannakasantipikar ti nagan ni Jehova ken naayat a panagpasakup iti kinasoberanona, ti kararagtayo a “masantipikar koma ti naganmo” ipakitana ti panagtalektayo a matungpal ti panggep ni Jehova nga agpaay a pakaidayawanna.​—Ezequiel 38:23.

Ti Ikarkararagtayo a Pagarian

7, 8. (a) Ania a Pagarian ti insuro ni Jesus nga ikararagtayo? (b) Ania ti maadaltayo kadagiti libro a Daniel ken Apocalipsis maipapan iti dayta a Pagarian?

⁷ Daytoy ti maikadua a kiddaw iti modelo a kararag: “Umay koma ti pagariam.” (Mateo 6:10) Mainaig unay daytoy a kiddaw iti immuna a nadakamat. Ti usaren ni Jehova a mangsantipikar iti nasantuan a naganna isu ti Mesianiko a Pagarian, ti nailangitan a gobiernona, ket ti Anakna a ni Jesu-Kristo ti nadutokan nga Ari. (Salmo 2:1-9) Ti padto ni Daniel iladawanna ti Mesianiko a Pagarian kas maysa a “bato” a natikap manipud iti maysa a “bantay.” (Daniel 2:34, 35, 44, 45) Ti bantay iladawanna ti sapasap a kinasoberano ni Jehova. No kasta, ti Pagarian nga iladawan ti bato ket maysa a baro nga ebkas ti sapasap a turay ni Jehova. Iti dayta a padto, nagbalin ti bato a “dakkel a bantay ket pinunnona ti intero a daga,” a mangipasimudaag a ti Mesianiko a Pagarian ti mangibagi iti kinasoberano ti Dios iti panangiturayna iti daga.

⁸ Iti daytoy a gobierno a Pagarian, kadua ni Kristo dagiti 144,000, a ‘nagatang manipud iti sangatauan’ tapno makipagturay kenkuana kas ar-ari ken papadi. (Apocalipsis 5:9, 10; 14:1-4; 20:6) Tinukoy ida ni Daniel kas “dagiti sasanto Daydiay Katan-okan.” Kaduada ni Kristo nga Uloda a nakaitalkan “ti pagarian ken ti panagturay ken ti kinadaeg dagiti pagarian iti baba ti amin a langlangit . . . Ti pagarianda ket di nakedngan ti kapautna a pagarian, ket amin dagiti panagturay agserbi ken agtulnogdanto kadakuada a mismo.” (Daniel 7:13, 14, 18, 27) Maitutop dayta a ladawan ti nailangitan a gobierno nga insuro ni Kristo nga ikararag dagiti pasurotna.

Apay nga Itultuloy nga Ikararag nga Umay ti Pagarian?

9. Apay a maitutop nga ikararagtayo nga umay ti Pagarian ti Dios?

⁹ Iti modelo a kararag, insuro ni Kristo nga ikararagtayo nga umay ti Pagarian ti Dios. Ti pannakatungpal dagiti padto ti Biblia ipakitana a naipasdek idiay langit ti Mesianiko a Pagarian idi 1914.a No kasta, maitutop pay laeng kadi nga ikararagtayo nga “umay” ti Pagarian? Wen. Iti ngamin padto ni Daniel, ti Mesianiko a Pagarian nga isimbolo ti maysa a bato agtupakto kadagiti napolitikaan a gobierno ti tao, nga isimbolo ti dakkel a ladawan. Ti bato burakennanto dayta a ladawan. Kuna ti padto ni Daniel: “Ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”​—Daniel 2:44.

10. Apay nga il-iliwentayo ti iyaay ti Pagarian ti Dios?

¹⁰ Il-iliwentayo a makita ti panangdadael ti Pagarian ti Dios iti dakes a sistema ti bambanag ni Satanas gapu ta kaipapanan daytoy ti pannakasantipikar ti nasantuan a nagan ni Jehova ken ti pannakatalipupos ti amin a bumusbusor iti kinasoberano ti Dios. Sipapasnek nga ikararagtayo: “Umay koma ti pagariam,” ken makidanggaytayo ken ni apostol Juan iti panangikuna: “Amen! Umayka, Apo Jesus.” (Apocalipsis 22:20) Wen, sapay koma ta umayen ni Jesus a mangsantipikar iti nagan ni Jehova ken mangalangon iti kinasoberanona tapno matungpal ti kinuna ti salmista: “Tapno maammuan koma dagiti tattao a sika, nga agnagan Jehova, sika laeng ti Kangatuan iti intero a daga.”​—Salmo 83:18.

“Maaramid Koma ti Pagayatam”

11, 12. (a) Ania ti kidkiddawentayo no ikararagtayo a ‘maaramid koma ti pagayatan ti Dios, kas sadi langit, kasta met iti daga’? (b) Ania ti sabali pay nga ipasimudaagna no ikararagtayo a maaramid koma ti pagayatan ni Jehova?

¹¹ Kalpasanna, insuro ni Jesus nga ikararag dagiti adalanna: “Maaramid koma ti pagayatam, kas sadi langit, kasta met iti daga.” (Mateo 6:10) Naadda ti uniberso gapu ta dayta ti pagayatan ni Jehova. Inyikkis dagiti mannakabalin nga anghel: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (Apocalipsis 4:11) Adda panggep ni Jehova agpaay kadagiti “bambanag iti langlangit ken ti bambanag iti daga.” (Efeso 1:8-10) Kinapudnona, no ikararagtayo a maaramid ti pagayatan ti Dios, kaipapananna a kidkiddawentayo nga ibanag ni Jehova ti panggepna. Maysa pay, ipakpakitatayo nga il-iliwentayo a makita a matungpal ti pagayatan ti Dios iti intero nga uniberso.

¹² Babaen ti kastoy a kararag, ipakpakitatayo met a situtuloktayo a mangitunos iti biagtayo iti pagayatan ni Jehova. Kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Kas ken Jesus, pagragsakantayo nga aramiden ti pagayatan ti Dios kas dedikado a Kristiano. Ti panagayattayo ken ni Jehova ken iti Anakna tignayennatayo a mangaramat iti biagtayo a “saanen nga agpaay iti tartarigagay dagiti tattao, no di ket agpaay iti pagayatan ti Dios.” (1 Pedro 4:1, 2; 2 Corinto 5:14, 15) Ikagumaantayo a liklikan dagiti aramid nga ammotayo a maikaniwas iti pagayatan ni Jehova. (1 Tesalonica 4:3-5) Babaen ti panangiwayatayo nga agbasa ken agadal iti Biblia, ‘maitultuloytayo a mailasin no ania ti pagayatan ni Jehova,’ a pakairamanan ti aktibo a pannakipasettayo iti panangikasaba iti “daytoy naimbag a damag ti pagarian.”​—Efeso 5:15-17; Mateo 24:14.

Ti Pagayatan ni Jehova Idiay Langit

13. Kasano a nabayagen a maar-aramid ti pagayatan ti Dios sakbay pay nga immalsa ni Satanas?

¹³ Nabayagen a maar-aramid ti pagayatan ni Jehova idiay langit sakbay pay nga immalsa ti maysa kadagiti espiritu nga annakna a nagbalin a ni Satanas. Iti libro a Proverbio, ti inauna nga Anak ti Dios ket nailadawan kas sirib a kasla maysa a persona. Ipakitana nga iti di mabilang a panawen, ti bugbugtong nga Anak ti Dios ket ‘maragragsakan iti sanguananna iti isuamin a tiempo,’ a pagrag-oanna nga aramiden ti pagayatan ni Amana. Idi agangay, isu ti nagserbi kas “nasigo a managobra” ni Jehova idi naparsua ti amin a bambanag “iti langlangit ken iti rabaw ti daga, ti bambanag a makita ken ti bambanag a di makita.” (Proverbio 8:22-31; Colosas 1:15-17) Ni Jesus ti inusar ni Jehova kas Sao, wenno Pannakangiwatna.​—Juan 1:1-3.

14. Ania ti maadaltayo iti Salmo 103 no kasano nga ar-aramiden dagiti anghel ti pagayatan ni Jehova idiay langit?

¹⁴ Ipakita ti salmista nga awan makaartap iti kinasoberano ni Jehova ket dagiti linaklaksa nga anghel ipangagda dagiti instruksion ken bilbilinna. Mabasatayo: “Ni met laeng Jehova impasdekna a sititibker ti tronona iti mismo a langlangit; ket ti bukodna a kinaari nangdominar iti ngatuen ti isuamin. Bendituenyo ni Jehova, O dakayo nga anghelna, a nabileg iti pannakabalin, a mangitungtungpal iti saona, babaen iti panagimdeng iti timek ti saona. Bendituenyo ni Jehova, dakayo amin a buybuyotna, dakayo a ministrona, nga agar-aramid iti pagayatanna. Bendituenyo ni Jehova, dakayo amin nga ar-aramidna, kadagiti amin a lugar ti pagturayanna [wenno, “kinasoberano”].”​—Salmo 103:19-22.

15. Idi nagturay ni Jesus iti Pagarian, ania ti epekto dayta iti pannakatungpal ti pagayatan ti Dios idiay langit?

¹⁵ Uray kalpasan nga immalsa, makastrek pay idi ni Satanas idiay langit, kas ipamatmat ti libro a Job. (Job 1:6-12; 2:1-7) Kaskasdi, ti libro nga Apocalipsis impakpakaunana ti tiempo a maikkatto idiay langit da Satanas ken dagiti demoniona. Agparang a dimteng dayta a tiempo di nagbayag kalpasan a naisaad ni Jesu-Kristo iti Pagarian idi 1914. Sipud idin, awanen ti lugar dagidiay a rebelioso idiay langit. Addada laengen iti aglikmut ti daga. (Apocalipsis 12:7-12) Awanen ti mangngeg a timek dagiti sumupsupiat idiay langit. Ti laeng mangngeg isu dagiti timek a mangidaydayaw ‘iti Kordero’ a ni Kristo Jesus, ken siraraem a mangipadpadayag ken ni Jehova. (Apocalipsis 4:9-11) Talaga a maar-aramid idiay langit ti pagayatan ni Jehova.

Ti Pagayatan ni Jehova Ditoy Daga

16. Kasano a ti modelo a kararag paneknekanna a di umiso ti sursuro ti Kakristianuan maipapan iti namnama ti sangatauan?

¹⁶ Dagiti relihion ti Kakristianuan dida iraman ti daga kadagiti panggep ti Dios, ta kunada a mapan idiay langit ti amin a naimbag a tattao. Ngem insuro ni Jesus nga ikararagtayo: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Maikuna kadi a talaga a matungtungpal ti pagayatan ni Jehova ditoy daga a sinaplit ti kinaranggas, kinaawan hustisia, sakit, ken ipapatay? Saan a pulos! Masapul ngarud a sipapasnek nga ikararagtayo a maaramid koma ti pagayatan ti Dios ditoy daga, maitunos iti kari nga inrekord ni apostol Pedro: “Adda baro a langlangit [ti Mesianiko a Pagarian a gobierno nga iturayan ni Kristo] ken baro a daga [nalinteg a kagimongan dagiti tattao] nga ur-urayentayo sigun iti karina, ket kadagitoy agtaeng ti kinalinteg.”​—2 Pedro 3:13.

17. Ania ti panggep ni Jehova agpaay iti daga?

¹⁷ Adda panggep ni Jehova no apay a pinarsuana ti daga. Pinaltiinganna ni propeta Isaias a mangisurat: “Daytoy ti kinuna ni Jehova, ti Namarsua iti langlangit, Isu ti pudno a Dios, ti Nangporma iti daga ken ti Nangaramid iti dayta, Isu Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan a mismo: ‘Siak ni Jehova, ket awanen ti sabali.’” (Isaias 45:18) Inkabil ti Dios ti umuna a pagassawaan iti maysa a paraiso a minuyongan, ket imbilinna kadakuada: “Agbungakayo ken agadukayo ket punnuenyo ti daga ken parukmaenyo.” (Genesis 1:27, 28; 2:15) Nalawag ti panggep ti Namarsua: daytoy daga ket pagnaedan dagiti perpekto ken nalinteg a tattao a siraragsak nga agpasakup iti kinasoberano ni Jehova ken agbiag nga agnanayon iti Paraiso nga inkari ni Kristo.​—Salmo 37:11, 29; Lucas 23:43.

18, 19. (a) Ania ti nasken a mapasamak sakbay a naan-anay a maaramid ti pagayatan ti Dios ditoy daga? (b) Aniada a dadduma a paset ti modelo a kararag ni Jesus ti mausig iti sumaganad nga artikulo?

¹⁸ Saan a naan-anay a matungpal ti panggep ni Jehova mainaig iti daga no napno ti lubong kadagiti lallaki ken babbai a bumusbusor iti kinasoberanona. Babaen ti panangusarna kadagiti mannakabalin nga espiritu a puersa iti sidong ti panangidaulo ni Kristo, ‘dadaelen ti Dios dagidiay mangdaddadael iti daga.’ Agnanayon nga awanton ti intero a dakes a sistema ti bambanag ni Satanas, a pakairamanan ti ulbod a relihion, nalulok a politika, naagum ken suitik a komersio, ken makadadael a militar. (Apocalipsis 11:18; 18:21; 19:1, 2, 11-18) Maalangonto ti kinasoberano ni Jehova ken masantipikar ti naganna. Ikarkararagtayo amin dagitoy no kunatayo: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:9, 10.

¹⁹ Ngem iti modelo a kararag, impakita ni Jesus a mabalintay met nga ikararag dagiti personal a banag. Dagitoy a paset ti insurona a kararag ti mausig iti sumaganad nga artikulo.

[Footnote]

Pangrepaso

• Apay a maitutop nga awagantayo ni Jehova kas “Amami”?

• Apay a kapatgan kadatayo ti panangikararag a masantipikar koma ti nagan ni Jehova?

• Apay nga ikararagtayo nga umay ti Pagarian ti Dios?

• Ania ti ipamatmatna no ikararagtayo a maaramid ti pagayatan ti Dios ditoy daga kas met idiay langit?

[Ladawan iti panid 9]

Dakkel ti nakaidumaan dagiti kararag ni Jesus kadagiti managinsisingpet a kararag dagiti Fariseo

[Ladawan iti panid 10]

Ikararag dagiti Kristiano nga umay ti Pagarian ti Dios, a masantipikar ti naganna, ken maaramid ti pagayatanna