Maipaay Kadi ti Relihion dagiti Kasapulantayo?

ANIANTO ti kanenmi? Anianto ti inumenmi? Anianto ti ikawesmi? Adda ti kinaganat dagitoy a salsaludsod, nangnangruna no narigat ti pananggun-od kadagiti kangrunaan a kasapulan iti biag. Kaskasdi, paliiwenyo a kinuna ni Jesu-Kristo: “Dikay naagawa iti maipaay iti biagyo no ania ti kanenyonto wenno ania ti inumenyonto, ket uray ti bagiyo no ania ti ikawesyonto.” (Mateo 6:25) Nakaskasdaaw kadi dayta? Ta ngamin, no adda siasinoman nga agkurang iti taraon, kawes, ken pagtaengan, ti kasapulanna ket praktikal a tulong, saan a ti mabalin a panangmatmat dagiti dadduma kas maysa a narelihiusuan a pammadayaw.

Ni Jesus saan a di nakipagrikna, wenno padpadasenna a palabsen a dagdagus ti isyu. Ammona a naimbag ti kasapulan dagiti tattao. Nupay kasta, ammona met ti pudpudno a peggad. No maipapan iti panangpennek kadagiti kasapulantayo, nakalaklaka ti mangisentro iti panagbiagtayo kadagiti namaterialan a bambanag ket mariknatayo a saanen a napateg ti Dios. Ngarud, masapul a maaddaantayo kadagiti umiso nga ipangpangruna.

Maaddaantayo kadagiti umiso nga ipangpangruna no surotentayo ti balakad ni Jesus: “Birukenyo nga umuna ti pagarian ken ti kinalinteg ti [Dios], ket amin dagitoy a bambanag mainayondanto kadakayo.” (Mateo 6:33) No surotenyo daytoy a balakad, ti relihion​—ti pudno a relihion a naibatay iti kinapudno iti Biblia​—mabalin a pennekenna dagiti kasapulantayo.

Saan met a di nainkalintegan ni Jesus iti panangisingasingna, nupay kasta, a ti basta panagbalin nga adalanna ken isusurot kadagiti narelihiusuan a sursurona ket dagdagus a mangrisot kadagiti parparikuttayo; ken saanna met kayat a sawen a dagiti adalanna basta agtugawda laengen ken aguray iti Dios a mangipaay kadakuada a simimilagro. Ta, mabalin a tunggal maysa ket mabalin nga agbalin a Kristiano no dayta kaipapananna ti dagdagus a pannakawayawaya manipud kadagiti amin a pakarigatan iti biag! Ti kayat a sawen ni Jesus ket ti Amana, ni Jehova a Dios, mangipaay iti isuamin a kasapulan tapno pennekenna amin dagiti kasapulantayo. Dayta ti makagapu no apay a kinuna met ni Jesus: “Ni Amayo a nainlangitan ammona ti pannakasapulyo amin kadagitoy.”​—Mateo 6:32.

Penneken met ni Jehova dagiti nasken a napapateg a naespirituan a kasapulantayo. Babaen iti Nasantuan a Kasuratan, impaayannatayo kadagiti naipaltiing a panangiwanwan a mangiturong iti biagtayo iti kasayaatan a pamay-an. (Isaias 48:17) Nangipasdek ti Dios iti maysa nga asosasion dagiti managdaydayaw a mangipaay iti suportar no kasapulan. (Aramid 4:34) Mangipaay met ti tulong kadagiti ad-adipenna babaen iti nasantuan nga espirituna, wenno aktibo a puersana. (Lucas 11:13; Galacia 5:22-25) Kasta met, nangipaay ti Dios iti probision a mangisubli iti Paraiso ditoy daga.​—Lucas 23:43; Apocalipsis 21:1-4.

Panangpennek kadagiti Namaterialan a Kasapulantayo

Usigenyo itan ti dadduma a prinsipio iti Biblia a nakatulong kadagiti tattao a mangpennek kadagiti namaterialan a kasapulanda. Ti Kristiano nga apostol a ni Pablo nagsurat:

“Agdalustay koma iti isuamin a kinarugit ti lasag ken espiritu.” (2 Corinto 7:1)

Panunotenyo dagiti amin a parparikut a mabalin a malisiantayo no liklikantayo ti pannakamulit iti tabako, saan a legal a droga, ken dagiti dadduma pay a bambanag a mangtulaw iti bagi. Ken anian a nasaysayaat pay no ditay saysayangen ti kuartatayo, tiempotayo, ken panunottayo kadagiti imoral a literatura ken paglinglingayan a mabalin a makamulit iti espiritutayo!

Kunaen met ti Kasuratan:

“Dika makitipon kadagiti mangnginum iti arak, kadagiti narawet iti lasag. Ta ti mammartek ken nabuklis pumanglawdanto, ket ti saguyepyep kawesannanto ti tao iti rutayrutay.” (Proverbio 23:20, 21)

Paliiwenyo ti kamaudianan a pagbanagan iti panagbarbartek ken ti kinabuklis​—kinapanglaw ken kinarutayrutay. Adu itatta​—uray pay dagiti relihiuso unay a tattao​—ti agtalinaed a napanglaw gapu iti kinamanaglablabes iti inumen a de alkohol wenno pannakaadikto kadagiti bambanag a mangmulit iti lasag. Ti panangliklik kadagita a bambanag tapno makitunos iti pagalagadan iti Biblia mabalin nga adu ti maitulongna kadatayo a mangpennek kadagiti kasapulantayo iti taraon, kawes, ken pagtaengan.

Ti sabali pay a prinsipio a nakatulong kadagiti Kristiano a mangpennek kadagiti kasapulanda ket makita iti sasao ni apostol Pablo a:

“Ta mapnekkami unay nga adda nasayaat a konsiensiami, a tarigagayanmi ti agbiag a sitatakneng kadagiti isuamin a bambanag.” (Hebreo 13:18)

Ti kinasingpet kadagiti amin a pannakilangenda ti namagbalin kadagiti adu a Kristiano a makaipaay kadagiti bagbagida ken kadagiti pamiliada. Daytoy ti nakagun-od iti nasayaat a pakasarsaritaanda, ket dagiti dadduma kaykayatdan ti makipagnegosio kadakuada. Ti maysa a mapagtalkan wenno napudno a tao mabalin a saan a kanayon nga addaan iti kaaduan iti namaterialan a pamay-an, ngem gagangay isu ti addaan ti kangrunaan a kasapulan iti biag ket taginayonenna ti panagraemna iti bagina met laeng.

Mainaig a naimbag iti daytoy isu ti balakad a:

“Daydi nagtaktakaw saan koma nga agtakawen, no di ket agtrabaho nga aramidenna ti naimbag, babaen ti imana tapno adda pagitedna iti adda pakasapulanna.” (Efeso 4:28)

Ti panangiyaplikar itoy a prinsipio ti nakatulong kadagiti adu a manggun-od ken mangsalimetmet iti pagtrabahuanda gapu iti kinamapagtalkanda. Kas banagna, nabaelanda ti nangipaay kadagiti bagbagida ken kadagiti pamiliada. Imbes a maimpektaran iti espiritu daytoy a lubong, isu a mangiturong iti di panangikankano kadagiti adu a kinukusit nga ar-aramid, dagiti Kristiano mapagtalkanda, ket daytoy mangipaay kadagiti naimbag a pagbanagan.

Tapno iyilustrar: Maysa kadagiti Saksi ni Jehova idiay Japan tarigagayanna ti basbassit nga oras ti panagtrabaho iti tunggal lawas tapno maaddaan iti ad-adu a tiempo a maipaay iti naespirituan nga ar-aramid. Idi kinalikagumanna daytoy, nupay kasta, ti nangiyempleo kenkuana ti nangikkat kenkuana manipud iti trabahona. Gapu iti dayta, ti ina ti nangiyempleo kenkuana nagimtuod: “Inikkatmo aya ti mapagtalkan unay a tao?” Kakaasi ti Saksi idi natukkol ti likudna gapu iti panagaramidna iti sabali a trabaho. Di nagbayag kalpasanna, nasabetna ti dati a nangiyempleo kenkuana, isu a naupay gapu ta naammuanna a maysa kadagiti empleadona ti agtaktakaw iti balitok, platinum, ken dagiti singsing manipud iti kompaniana iti alahas. Ti nangiyempleo kenkuana ti dagdagus a nangdawat iti Saksi nga agsubli iti trabaho, nga iti daytoy a tiempo agtrabaho iti sidong ti kayatna a kasasaad. Ti lalaki tarigagayanna ti maysa a mapagtalkan a trabahador.

Sigun ken ni apostol Pablo, ti maysa a Kristiano “agtrabaho nga aramidenna ti naimbag” saan laeng a tapno ipaayanna ti bagina met laeng no di ket tapno “adda pagitedna iti adda pakasapulanna.” (Efeso 4:28) Kabayatan iti tiempo iti pakasapulan, dagiti pudno a Kristiano kankanayon a situtulokda a tumulong kadagiti dadduma. Maysa a pamilia idiay Fiji ti nakapadas iti daytoy idi ti pagtaenganda ket nakaro ti pannakadadaelna gapu iti bagyo bayat ti kaaddada iti maysa a Nakristianuan a kumbension. Idi nakaawiddan, nasarakanda ti maysa a buya iti nadadael. Nasarakanda met dagiti padada a manamati a siraragsak a nangipaay kadagiti sanikuada a mangipaay iti pamilia iti pagtaengan ken tulong tapno maibangonda manen ti pagtaenganda. “Makaliwliwa,” kinuna ti ama, “no ammom nga addada dagiti Kristiano a pudno a mangipateg kenka.”

Ni Jesu-Kristo nakarikna iti kasta unay pannakipagrikna kadagiti agkasapulan. Kadagiti adu nga okasion, personal a tinulonganna dagiti daksanggasat iti maysa a pamay-an wenno iti sabali. Siempre, ammo ni Jesus nga agingga a mapalubosan ti kaadda daytoy dakes a sistema dagiti bambanag, ti kinapanglaw ken dagiti dadduma pay a sosial a parparikut agtalinaeddanto. (Juan 12:8) Ngarud, nupay no nangipaay iti adu a tulong kadagiti tattao iti namaterialan, ti pudpudno a panggep iti ministeriona isu ti panangpennek kadagiti naespirituan a kasapulanda.

Idi a ti bunggoy a binussogna ti nangsurot ken ni Jesus agingga iti Capernaum, imbagana daytoy nakapatpateg a komento: “Sapulendak, saan a gapu ta nakakitakayo kadagiti pagilasinan, no di ket gapu ta nangankayo kadagiti tinapay ket nabsogkayo. Agtrabahokayo, saan a gapu ti taraon a mapukaw, no di ket gapu iti taraon a mataginayon a maipaay iti biag nga agnanayon, nga itedto kadakayo ti Anak ti tao.” (Juan 6:26, 27) Ania ti kayat a sawen ni Jesus?

Ti kayat a sawen ni Jesus ket adda peggadna a dagiti tattao ti makitimpuyog laeng kenkuana ken kadagiti adalanna a maipaay laeng kadagiti namaterialan a pagimbagan. Ngem ammona a daytoy saanto a mangiyeg iti manayon a gunggona. Gapuna kinunana: “Naragsak dagidiay a sipapanunot kadagiti naespirituan a kasapulanda, ta kukuada ti pagarian ti langit. Naragsak dagiti mabisin ken mawaw iti kinalinteg, ta mapnekdanto.”​—Mateo 5:3, 6.

Malaksid iti bisin iti namaterialan a taraon, adda ti bisin iti kinapudno ken iti naespirituan a pannakapnek. Adda ti pudno a kinaragsak no mapennek daytoy a naespirituan a bisin. Ti Kakristianuan nakapataud iti materialistiko ti panagpampanunotna a sosiedad. Dagiti relihion iti Dumaya binaybay-anda dagiti tattao iti naespirituan a kinasipnget. Ngem ti pudno a panagdaydayaw​—ti relihion ni Jesu-Kristo​—pinennekna ti naespirituan a kasapulan dagiti tattao. Maaramidanna ti kasta met laeng kadakayo. Magun-odanyo dagitoy a probision no gundawayanyo ida.

Kas pangarigan, manipud iti maysa a Kristiano a mangaskasaba iti kalsada, maysa nga agtutubo a lalaki idiay Mauritius ti immawat kadagiti kopia Ti Pagwanawanan ken ti kaduana a pagiwarnak nga Agriingkayo! Iti sumaruno a lawas isut’ nagsubli a maipaay kadagiti ad-adu pay a magasin. Inlawlawagna a pampanunotennan ti panagbekkel gapu iti pinansial a parparikutna, ngem dagiti magasin ti nangtulong kenkuana a makabigbig nga adda maysa a Dios a mangipateg kadatayo. Ti naespirituan a bisin ti agtutubo a lalaki mangrugrugin a mapennek.

Makitatayto pay aya ti tiempo inton amin dagiti kasapulantayo mapennekdan a naan-anay? Ikarkari ti Biblia a makitatayto. Pudno, mabannog dagiti tattao nga agdengngeg kadagiti karkari maipapan kadagiti umay a nasaysayaat a bambanag. Masansan a mapaayda. Ngem addaantayo iti panagtalek kadagiti karkari iti Biblia. Ti Autorna, ni Jehova a Dios, tungpalenna ti tunggal kari nga aramidenna. Inyebkas ni Josue a naimbag daytoy idi pinalagipanna dagiti padana nga Israelitas: “Ket ammuenyo iti amin a pusoyo ken amin a kararuayo, nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo. Isuda amin natungpalda kadakayo. Awan ti nagkurang kadakuada nga uray maysa.”​—Josue 23:14.

Ti pudno a solusion dagiti amin a parparikuttayo agpannuray iti kaitungpalan iti nakaskasdaaw a karkari ti Dios a mangdalus iti isuamin a daga. (Apocalipsis 11:18) Amin dagiti kasapulantayo mapennekdanto inton ti Pagarianna isublinanto ti Paraiso ditoy daga, a tungpalenna ti orihinal a panggepna iti sangatauan. (Mateo 6:9, 10) Iti kasta ditayton mangngeg ‘ti panagsangit wenno panagsaibbek’ manipud kadagiti tattao a saan a mapnek kadagiti kasapulanda. Babaen ti mapagtalkan a panagtrabaho ken ti panangiyaplikar kadagiti nadiosan a prinsipio, tagiragsakendanto ti naan-anay, makapnek a panagbiag.​—Isaias 65:17-25.

Ni Maria, ti dati a Katoliko a madre a nadakamat a nasaksakbay, nakagun-od iti panagtalek. Nabigbigna nga isu ket nagbibiag iti naespirituan a kinasipnget bayat ti adu a tawtawen, a sinaplit iti buteng maipapan iti masanguanan ken dina nakita ti pudno a panggep iti biag. Ngem ti pannakaammona iti kinapudno iti Biblia ti nangbalbaliw amin iti dayta. “Naggapuak iti sipnget a simrek iti lumawlawag a lawag,” kinunana. (Salmo 43:3; Proverbio 4:18) Daytoy saan laeng a nangtulong kenkuana a maaddaan kadagiti nasken a namaterialan a kasapulanna no di ket pinennekna pay ti naespirituan a panagbisinna ken pannakawawna. Wen, ti relihion​—ti pudno a relihion​—mabalinna a penneken dagiti kasapulantayo.

[Ladawan iti panid 7]

Ti pudno a relihion pennekennanto amin a kasapulantayo