Suportaram ti Pagarian ti Dios Itan!
Panunotem nga adda um-umay a napigsa a bagyo. Idi kuan, ibrodbrodkasen dagiti ahensia ti gobierno daytoy naganat a pakdaar: “AGBAKUITKAYON!” Ania ti aramidem? Sigurado nga agkamangka iti natalged a lugar.
Arigna addatayo iti lugar a dalanan ti napigsa a “bagyo,” nga inawagan ni Jesus iti “dakkel a rigat.” (Mateo 24:21) Saantayo a maliklikan dayta. Ngem adda maaramidantayo tapno maprotektarantayo ti bagitayo. Ania?
Iti Sermonna iti Bantay, imbalakad ni Jesu-Kristo: “Itultuloyyo ngarud a sapulen nga umuna ti Pagarian [ti Dios] ken ti kinalinteg[na].” (Mateo 6:33) Kasanotayo a maaramid dayta?
Sapulen nga umuna ti Pagarian ti Dios. Kaipapanan daytoy a masapul nga ibilangtayo ti Pagarian ti Dios a napatpateg ngem iti aniaman. (Mateo 6:25, 32, 33) Apay? Gapu ta saan a masolbar dagiti tattao dagiti problema ti sangatauan. Ti laeng Pagarian ti Dios ti makaaramid iti dayta.
Sapulen ti kinalintegna. Masapul nga ikagumaantayo a tungpalen dagiti nalinteg a prinsipio ken linteg ti Dios. Apay? Gapu ta dakes ti resultana no datayo ti mangikeddeng no ania ti umiso ken di umiso. (Proverbio 16:25) Ngem no surotentayo dagiti pagalagadan ti Dios, maparagsaktayo ti Dios ken magunggonaantayo.—Isaias 48:17, 18.
Itultuloymo ngarud a sapulen nga umuna ti Pagarian ti Dios ken ti kinalintegna. Imballaag ni Jesus a mabalin a masinga ti dadduma ket panunotendan a natalgeden ti biagda no adu ti kuartada. Ib-ibusen met ti dadduma ti tiempo ken pigsada a mangasikaso kadagiti problemada nga uray la awanen ti panawenda nga agserbi iti Dios.—Mateo 6:19-21, 25-32.
Ngem inkari ni Jesus kadagiti mangsuporta iti Pagarian ti Dios a magun-odda ti kasapulanda itan ken matagiragsakda ti agnanayon a bendision iti masanguanan.—Mateo 6:33.
Uray no inyun-una dagiti adalan ni Jesus idi umuna a siglo ti panangsapul iti Pagarian ti Dios ken iti kinalintegna, saanda idi a nakita ti panagpatingga ti amin nga ut-ot ken rigat. Ngem naprotektaranda. Kasano?
Nagbiagda maitunos kadagiti nalinteg a pagalagadan ti Dios, ket dayta ti nangprotektar kadakuada kadagiti pakarigatan a sinagaba dagiti saan a nagtulnog iti Dios. Ti nabileg a pammatida nga umay ti Pagarian ti nangtulong kadakuada a mangsango uray iti karirigatan a problema. Inikkan met ida ti Dios iti “bileg a nalablabes ngem iti gagangay” tapno mapagballigianda dagita.—2 Corinto 4:7-9.
SAPULEM KADI NGA UMUNA TI PAGARIAN?
Nagtulnog dagiti Kristiano idi umuna a siglo iti bilin ni Jesus a sapulenda nga umuna ti Pagarian. Inkasabada ti naimbag a damag maipapan iti Pagarian iti lugarda. (Colosas 1:23) Adda kadi mangar-aramid iti kasta ita?
Adda! Ammo dagiti Saksi ni Jehova nga ababan ti nabatbati a panawen sakbay a pagpatinggaen ti Pagarian ti Dios daytoy agdama a sistema ti bambanag. Isu nga ikagkagumaanda a tungpalen ti bilin ni Jesus: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.”—Mateo 24:14.
Ania ti reaksionmo iti naimbag a damag? Paregtaendaka a mangtulad kadagiti umili iti siudad ti Berea idiay Macedonia idi umuna a siglo. Idi nangngegda ken Apostol Pablo ti naimbag a damag maipapan iti Pagarian, “sigagagar” nga inawatda ti mensahena ken siaannad a ‘sinukimatda ti Kasuratan’ tapno masiguradoda nga umiso ti nangngegda, ket inyaplikarda dayta.—Aramid 17:11, 12.
Maaramidmo met dayta. No sapulem nga umuna ti Pagarian ti Dios ken ti kinalintegna, maprotektaranka itan ket matagiragsakmo ti agnanayon a talna ken talged iti masanguanan.