Naan-anay nga Agtalekkayo ken ni Jehova Kadagiti Tiempo ti Rigat
“Ti Dios maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk.”—SALMO 46:1.
1, 2. (a) Ania a pagarigan ti mangipakita a di umdas ti panangikuna nga agtalektayo iti Dios? (b) Apay a saan laeng koma nga iti sao nga agtalektayo ken ni Jehova?
ADDA nagdumaan ti panangikuna nga agtalektayo iti Dios ken ti panangaramid iti dayta. Kas pagarigan, ti sasao nga “Agtalekkami iti Dios” ket nabayagen a mabasa kadagiti papel de banko ken sinsilio ti Estados Unidos.a Idi 1956, ti Kongreso ti Estados Unidos ket nangipaulog iti linteg a namagbalin kadagita a sasao kas ti nailian a pagsasao (motto) ti Estados Unidos. Ngem adu a tattao—saan laeng nga iti dayta a pagilian no di pay ket iti sangalubongan—ti ad-adda nga agtalek iti kuarta ken material a kinabaknang imbes nga iti Dios.—Lucas 12:16-21.
2 Kas pudno a Kristiano, saan laeng koma nga iti sao nga agtalektayo ken ni Jehova. No kasano a ti “pammati nga awanan ar-aramid natay,” awan met serserbi ti panangikuna nga agtalektayo iti Dios no ditay paneknekan dayta babaen dagiti aramidtayo. (Santiago 2:26) Iti immuna nga artikulo, naadaltayo a maiparangarangtayo ti panagtalek ken ni Jehova no agpatulongtayo kenkuana iti kararag, no agpaiwanwantayo iti Saona, ken no agpaidalantayo iti organisasionna. Usigentayo ita no kasanotay a mayaplikar dagita a tallo nga addang bayat dagiti panawen ti riribuk.
No Maikkat iti Panggedan Wenno Nababa ti Sueldo
3. Aniada a rigat ti panagbiag ti mapaspasaran dagiti adipen ni Jehova kadagitoy “napeggad a tiempo,” ken kasanotay nga ammo a sidadaan a tumulong kadatayo ti Dios?
3 Kadagitoy “napeggad a tiempo,” datayo a Kristiano maipasangotayo met kadagiti rigat ti panagbiag a mapaspasaran ti dadduma. (2 Timoteo 3:1) Gapuna, mabalin a di ninamnama a maikkattayo lattan iti panggedan. Wenno mapilitantayo nga agtrabaho iti adu nga oras uray nababa ti sueldo. Iti sidong dagita a kasasaad, mabalin a marigatantayo a ‘mangipaay iti kasapulan dagidiay kukuatayo,’ wenno sangakabbalayantayo. (1 Timoteo 5:8) Kadagita a panawen, sidadaan ngata a tumulong kadatayo ti Kangatuan a Dios? Wen! Siempre, saan nga iti amin a pakarigatan ti biag iti daytoy a sistema ti bambanag ket salaknibannatayo ni Jehova. Ngem no agtalektayo kenkuana, mapaneknekantayo a mismo a pudno dagiti sasao ti Salmo 46:1: “Ti Dios maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk.” Ngem kasanotay a maipakita a naan-anay nga agtalektayo ken ni Jehova no maipasangotayo iti pinansial a pakarigatan?
4. No maipasango kadagiti pinansial a parikut, ania ti mabalintayo nga ikararag, ken kasano a sungbatan ni Jehova dagiti kasta a kararag?
4 Ti maysa a pamay-an a maipakitatayo ti panagtalektayo ken ni Jehova ket babaen ti panagpatulongtayo kenkuana iti kararag. Ngem ania ti mabalintayo nga ikararag? No maipasangotayo kadagiti pinansial a parikut, ad-adda a kasapulantayo ti praktikal a sirib. Gapuna, ikararagtayo dayta! Ipanamnama kadatayo ti Sao ni Jehova: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana.” (Santiago 1:5) Wen, dawatentayo ti sirib ken ni Jehova—ti abilidad a mayaplikar a siuumiso ti pannakaammo, pannakaawat, ken panangilasin—tapno makaaramid kadagiti nainsiriban ken umiso a desision. Impanamnama kadatayo ti nailangitan nga Amatayo nga ipangagna dagiti kasta a kararag. Sidadaan unay a mangilinteg iti dalan dagidiay agtalek kenkuana iti amin a puso.—Salmo 65:2; Proverbio 3:5, 6.
5, 6. (a) Apay a nasayaat nga agpaiwanwantayo iti Sao ti Dios no maipapan iti panangdaer kadagiti pakarigatan iti biag? (b) Ania ti mabalintayo nga aramiden tapno makissayan ti pakaringgoran no maikkattayo iti panggedan?
5 Ti panagpaiwanwan iti Sao ti Dios ti maysa a pamay-an a maipakita ti panagtalek ken ni Jehova. Napaneknekan a “mapagpiaran unay” dagiti nainsiriban a pammalagipna a masarakan iti Biblia. (Salmo 93:5) Nupay nasurok a 1,900 a tawenen ti napalabas sipud idi nakompleto a naisurat, naglaon dayta a naipaltiing a libro iti mapagpiaran a balakad ken nauneg a pannakaawat a makatulong kadatayo a mangdaer kadagiti pakarigatan iti biag. Usigenyo ti sumagmamano nga ehemplo ti sirib a masarakan iti Biblia.
6 Napaliiw idi ni masirib nga Ari Solomon: “Nasam-it ti turog daydiay agserserbi, uray pay no bassit wenno adu ti kanenna; ngem ti aglaplapusanan a kukua daydiay nabaknang saan a mangipalubos kenkuana a maturog.” (Eclesiastes 5:12) Agkalikagum iti panawen ken kuarta ti panangisimpa, panangdalus, panangmantener, ken panangsaluad kadagiti material a sanikuatayo. Isu a no naikkattayo iti panggedan, mabalin a gundawayantayo dayta a mangusig iti estilo ti panagbiagtayo, nga ikagumaan nga ilasin dagiti kasapulantayo kadagiti saantayo a talaga a kasapulan. Tapno makissayan ti pakaringgoran, nainsiriban la ketdi no mangaramid iti sumagmamano a panagbalbaliw. Kas pagarigan, mabalin ngata nga aramiden a simple ti panagbiagtayo, nalabit umakar iti basbassit a pagtaengan wenno ikkaten dagiti saan a talaga a kasapulan a material a sanikua?—Mateo 6:22.
7, 8. (a) Kasano nga impakita ni Jesus nga ammona nga adda pagannayasan dagiti imperpekto a tattao a madanagan unay maipapan kadagiti material a banag? (Kitaenyo met ti footnote.) (b) Ania ti nainsiriban a balakad ni Jesus tapno maliklikan ti nalabes a panagdanag?
7 Iti Sermon iti Bantay, imbalakad ni Jesus: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto.”b (Mateo 6:25) Ammo ni Jesus a dagiti imperpekto a tattao gagangay a maseknanda no pangalaanda kadagiti kasapulanda iti biag. Kasano ngarud a ‘maisardengtayo ti maringgoran’ kadagita a bambanag? ‘Itultuloyyo a sapulen nga umuna ti pagarian,’ kinuna ni Jesus. Aniaman a parikut ti pakaipasanguantayo, masapul nga itultuloytayo nga iyun-una iti biagtayo ti panagdayaw ken ni Jehova. No aramidentayo dayta, ti nailangitan nga Amatayo ‘inayonnanto’ kadatayo dagiti amin nga inaldaw a kasapulantayo. Aniaman ti mapasamak, ipaayna dagiti kasapulantayo.—Mateo 6:33.
8 Kastoy ti kanayonan a balakad ni Jesus: “Dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran.” (Mateo 6:34) Saan a nainsiriban ti nalabes a panagdanag no ania ti mabalin nga adda iti sumaruno nga aldaw. Kinuna ti maysa nga eskolar: “Manmano laeng a pumudno ti pagam-amkantayo a mapasamak iti masanguanan.” Maliklikantayo ti nalabes a panagdanag no sipapakumbaba nga ipangagtayo ti balakad ti Biblia nga iyun-una dagiti kapatgan a banag iti biagtayo ken pakaseknan laeng no ania ti kasapulan iti kada aldaw.—1 Pedro 5:6, 7.
9. No agparikut iti pinansial, ania a tulong ti mabalintay a magun-od kadagiti publikasion nga ipapaay ti “matalek ken masirib nga adipen”?
9 No agparikut iti pinansial, maipakitatayo met ti panagtalek ken ni Jehova babaen ti panagpaiwanwan kadagiti publikasion nga ipapaay ti “matalek ken masirib nga adipen.” (Mateo 24:45) Pasaray mangitampok ti magasin nga Agriingkayo! kadagiti artikulo a naglaon kadagiti makatulong a balakad ken singasing no kasano a tamingen dagiti pinansial a pakarigatan. Iti artikulo a “Kinaawan Trabaho—Ania Dagiti Solusion?” iti ruar ti Agosto 8, 1991, imbalabalana ti walo a praktikal a balakad a timmulong iti adu a tattao a mangtaginayon iti pinansial ken emosional a kinatalged bayat ti kinaawan ti trabaho.c Siempre, dagita a balakad ket nasken a tingitingen buyogen ti umiso a panangmatmat iti pudno a kinapateg ti kuarta. Nausig daytoy iti artikulo a “Banag a Napatpateg Ngem Kuarta,” a nagparang iti isu met laeng a ruar.—Eclesiastes 7:12.
No Parparigaten ti Sakit
10. Kasano a ti napasamak ken ni Ari David ipakitana a realistiko ti agtalek ken ni Jehova no agsagaba iti nakaro a sakit?
10 Realistiko kadi ti agtalek ken ni Jehova no agsagaba iti nakaro a sakit? Wen! Ammo ni Jehova ti marikrikna dagiti masakit a kameng ti ilina. Malaksid iti dayta, sidadaan pay a tumulong. Usigentayo, kas pagarigan, ni Ari David. Nalabit a nakaro met ti sakitna idi insuratna ti maipapan iti pannakilangen ti Dios iti maysa a nalinteg a masakit. Kinunana: “Isu saranayento ni Jehova a mismo iti idda ti panagsakit; isuamin a pagiddaanna pudno unay a baliwamto bayat ti panagsakitna.” (Salmo 41:1, 3, 7, 8) Nagtalinaed a natibker ti panagtalek ni David iti Dios, ket idi agangay, immimbag ti ari. Ngem kasanotayo a maipakita ti panagtalek iti Dios no parparigatennatayo ti maysa a sakit?
11. No agsakittayo, ania ti mabalintay a kiddawen iti nailangitan nga Amatayo?
11 No agsakittayo, ti maysa a pamay-an a maipakitatayo ti panagtalek ken ni Jehova ket babaen ti panagkararag kenkuana tapno tulongannatayo nga agibtur. Mabalintayo a kiddawen a tulongannatayo a mangyaplikar iti “praktikal a sirib” tapno maaddaantayo iti salun-at a realistiko nga ipalubos ti kasasaadtayo. (Proverbio 3:21) Mabalintay met a kiddawen kenkuana a tulongannatayo nga aganus ken agibtur tapno maandurantayo dayta a sakit. Kangrunaan iti amin, kayattayo a kiddawen ken ni Jehova a saranayennatayo, nga ipaayna ti kired tapno makapagtalinaedtayo a matalek kenkuana ket ditay mapukaw ti kinatimbengtayo, aniaman ti mapasamak. (Filipos 4:13) Ti panangsalimetmet iti kinatarnawtayo iti Dios ket napatpateg pay ngem iti panangtaginayon iti agdama a biagtayo. No salimetmetantayo ti kinatarnawtayo, ti Naindaklan a Mananggunggona itedna kadatayo ti agnanayon a perpekto a biag ken salun-at.—Hebreo 11:6.
12. Aniada a prinsipio iti Kasuratan ti makatulong kadatayo nga agaramid kadagiti nainsiriban a desision no maipapan iti panagpaagas?
12 Ti panagtalek ken ni Jehova tignayennatayo met nga agpaiwanwan iti Saona, ti Biblia. Dagiti prinsipio a masarakan iti Kasuratan matulongannatayo a mangaramid kadagiti nainsiriban a desision no maipapan iti panagpaagas. Kas pagarigan, gapu ta ammotayo a kondenaren ti Biblia ti “panangannurot iti espiritismo,” liklikantayo ti aniaman a kita ti panagpaeksamen wenno panagpaagas a nainaig iti espiritismo. (Galacia 5:19-21; Deuteronomio 18:10-12) Adtoy ti sabali pay a mapagpiaran a sirib a linaon ti Biblia: “Ti asinoman nga awanan kapadasan maaddaan pammati iti tunggal sao, ngem daydiay nasaldet utobenna dagiti addangna.” (Proverbio 14:15) Gapuna, no pampanunotentayo ti agpaagas, nainsiriban a birokentayo ti mapagpiaran nga impormasion imbes a “maaddaan iti pammati iti tunggal sao.” Ti kasta a “kinasimbeng ti panunot” matulongannatayo a siaannad a mangtingiting kadagiti adda a pagpiliantayo ken mangaramid iti desision a pinanunot a naimbag.—Tito 2:12.
13, 14. (a) Aniada a makaisuro nga artikulo maipapan iti salun-at ti naipablaak kadagiti Pagwanawanan ken Agriingkayo! a magasin? (Kitaenyo ti kahon iti panid 17.) (b) Ania a balakad maipapan iti panangtaming kadagiti nakaro a sakit ti intampok ti Agriingkayo! nga Enero 22, 2001?
13 Maiparangarangtayo met ti panagtalektayo ken ni Jehova babaen ti panagsukimat kadagiti publikasion nga ipapaay ti matalek nga adipen. Ti Pagwanawanan ken Agriingkayo! a magasin ket pasaray mangipablaak kadagiti makaisuro nga artikulo maipapan iti nagduduma nga espesipiko a sakit ken parikut iti salun-at.d No dadduma, mangitampok dagitoy a magasin kadagiti artikulo maipapan kadagiti indibidual a sibaballigi a nangdaer kadagiti nadumaduma a sakit, rikriknaen, ken pisikal a depekto. Kanayonanna, dadduma nga artikulo ti nangidatag kadagiti Nainkasuratan a singasing agraman dagiti nainsiriban a balakad no kasano nga anduran dagiti nakaro a sakit.
14 Kas pagarigan, ti Enero 22, 2001 a ruar ti Agriingkayo! intampokna ti maysa a serye dagiti artikulo nga addaan iti paulo a “Liwliwa Kadagiti Masakit.” Inlawlawag dagita nga artikulo dagiti makatulong a prinsipio ti Biblia agraman dagiti impormasion manipud kadagiti nainterbiu nga indibidual nga adu a tawen a nangibtur kadagiti makabaldado a sakit. Kastoy ti imbalakad ti artikulo a “Sibaballigi a Panangibtur iti Sakitmo—Kasano?”: Ammuenyo ti aniaman a mabalinyo nga ammuen maipapan iti sakityo. (Proverbio 24:5) Mangipasdek kadagiti praktikal a kalat, agraman ti kalat a panangtulong iti sabali a tattao. Kaskasdi, bigbigenyo a mabalin a saanyo a maragpat dagiti kalat a kabaelan a ragpaten dagiti dadduma. (Aramid 20:35; Galacia 6:4) Diyo iputputong ti bagiyo. (Proverbio 18:1) Aramidenyo a makaay-ayo kadagiti sabsabali ti panangbisitada kadakayo. (Proverbio 17:22) Kangrunaan iti amin, taginayonenyo ti nasinged a relasion ken ni Jehova ken iti kongregasion. (Nahum 1:7; Roma 1:11, 12) Saantay kadi nga agyaman iti mapagtalkan a panangiwanwan nga ipapaay ni Jehova babaen ti organisasionna?
No Agtultuloy ti Maysa a Pagkapuyan ti Lasag
15. Kasano a napagballigian ni apostol Pablo ti pannakidangadangna kadagiti pagkapuyan ti imperpekto a lasag, ket ania ti masiguradotayo?
15 “Iti lasagko, awan agnanaed a naimbag,” insurat ni apostol Pablo. (Roma 7:18) Ammo a mismo ni Pablo no kasano karigat ti makidangadang kadagiti tarigagay ken pagkapuyan ti imperpekto a lasag. Kaskasdi, adda kompiansa ni Pablo a madaeranna dagita. (1 Corinto 9:26, 27) Kasano? Babaen ti naan-anay a panagtalek ken ni Jehova. Gapuna, maikuna ni Pablo: “Nakaay-ay-ayak a tao! Siasinonto ti mangalaw kaniak iti bagi nga agpaspasar itoy nga ipapatay? Pagyamanan iti Dios baeten ken Jesu-Kristo nga Apotayo!” (Roma 7:24, 25) Datayo ngay? Adda met pannakidangadangtayo kadagiti pagkapuyan ti lasag. Bayat a makidangdangadangtayo kadagita a pagkapuyan, naglaka ti maawanan iti kompiansa, a patientayo a ditay mapagballigian dagita. Ngem matulongannatayo ni Jehova no, kas ken Pablo, agtalektayo Kenkuana ket saan laeng nga iti bukodtayo a pigsa.
16. No agtultuloy ti maysa a pagkapuyan ti lasag, ania ti masapul nga ikararagtayo, ken ania ti nasken nga aramidentayo no tumaud manen ti pagkapuyan ti lasag?
16 No agtultuloy ti maysa a pagkapuyan ti lasag, maipakitatayo nga agtalektayo ken ni Jehova babaen ti iyaararaw kenkuana iti kararag. Kasapulan a kiddawen, ipakaasi pay ketdi, ken ni Jehova ti tulong ti nasantuan nga espirituna. (Lucas 11:9-13) Mabalin nga espesipiko a kiddawen ti panagteppel, a maysa kadagiti bunga ti espiritu ti Dios. (Galacia 5:22, 23) Ania ti nasken nga aramidentayo no tumaud manen ti pagkapuyan ti lasag? Ikagumaantayo ti di sumuko. Ditay koma pulos mauma a sipapakumbaba nga agkararag iti naasi a Diostayo, a kiddawentayo ti pammakawan ken tulongna. Ni Jehova dina pulos laksiden, wenno umsien, ti puso a “nadunor ken naidagel” gapu iti masidsidir a konsiensia. (Salmo 51:17) No umararawtayo kenkuana buyogen ti napudno, agbabbabawi a puso, tulongannatayo ni Jehova a makidangadang kadagiti sulisog.—Filipos 4:6, 7.
17. (a) Apay a makatulong nga usigen no ania ti panagrikna ni Jehova iti maysa a pagkapuyan a sarsarangtentayo? (b) Aniada a teksto ti mabalin nga ikabesatayo no makidangdangadangtayo a mangkontrol iti kinamanagpungpungtot? a mangmedmed iti dilatayo? a mangsaranget iti panagannayas kadagiti naalas a paglinglingayan?
17 Maipakitatayo met ti panagtalek ken ni Jehova babaen ti panagpaiwanwan iti Saona. Babaen ti panangusar iti maysa a konkordansia ti Biblia wenno ti Watch Tower Publications Index, masungbatantayo ti saludsod nga: ‘Ania ti panagrikna ni Jehova iti maysa a pagkapuyan a sarsarangtek?’ Ti panangusig iti panagrikna ni Jehova maipapan iti dayta a banag mapabilegna ti tarigagaytayo a mangay-ayo kenkuana. Iti kasta, matuladtayo ti panagriknana, a guraentayo ti kagurana. (Salmo 97:10) Nabigbig dagiti dadduma a makatulong no imemoria dagiti teksto ti Biblia a mayanatup iti maysa nga espesipiko a pagkapuyan a sarsarangtenda. Ikagkagumaantayo kadi a parmeken ti kinamanagpungpungtottayo? No kasta, mabalin nga imemoriatayo dagiti teksto a kas iti Proverbio 14:17 ken Efeso 4:31. Marigatantayo kadi a mangmedmed iti dilatayo? Mabalintayo nga ikabesa dagiti teksto a kas iti Proverbio 12:18 ken Efeso 4:29. Agannayastayo kadi kadagiti naalas a paglinglingayan? Mabalintayo nga ikabesa dagiti teksto a kas iti Efeso 5:3 ken Colosas 3:5.
18. No adda kayattay a parmeken a pagkapuyan, apay a ditay koma mabain nga agpatulong kadagiti panglakayen?
18 Ti panagpatulong kadagiti dinutokan ti espiritu a panglakayen iti kongregasion ket maysa pay a pamay-an a maiparangarang ti panagpannuray ken ni Jehova. (Aramid 20:28) Total, dagitoy a “sagut a tattao” ket probision a naggapu ken ni Jehova babaen ken Kristo a nairanta a mangsalaknib ken mangaywan kadagiti karnerona. (Efeso 4:7, 8, 11-14) Pudno, mabalin a saan a nalaka ti agpatulong tapno madaeran ti maysa a pagkapuyan. Mabalin a mabaintayo, a maamaktayo di la ket ta bumaba ti panagkita kadatayo dagiti panglakayen. Ngem awan duadua a raemendatayo dagitoy a naespirituan ken nataengan a lallaki gapu iti turedtayo nga agkiddaw iti tulong. Maysa pay, ikagkagumaan dagiti panglakayen nga iyanninaw dagiti galad ni Jehova no maipapan iti panangtrato iti arban. Dagiti makaliwliwa, praktikal a balakad ken pammagbagada manipud iti Sao ti Dios ti mabalin a talaga a kasapulantayo tapno bumileg ti determinasiontayo a mangparmek iti pagkapuyantayo.—Santiago 5:14-16.
19. (a) Iti ania a wagas nga us-usaren ni Satanas ti kinabarengbareng ti biag iti daytoy a sistema? (b) Ania ti iraman ti panagtalek, ket ania koma ti nabileg a determinasiontayo?
19 Ditay pulos koma liplipatan nga ammo ni Satanas nga ababan ti tiempona. (Apocalipsis 12:12) Kayatna nga usaren ti kinabarengbareng ti biag iti daytoy a lubong tapno upayen ken pasardengennatayo. Naan-anay koma nga agtalektayo iti kuna ti Roma 8:35-39: “Siasinonto ti mangisina kadatayo manipud iti ayat ti Kristo? Ti kadi rigat wenno pannakatuok wenno pannakaidadanes wenno bisin wenno kinalamolamo wenno peggad wenno kampilan? . . . Iti kasupadina, kadagitoy amin a banag rumrummuartayo a naan-anay a naballigi babaen kenkuana a nangayat kadatayo. Ta kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno ti bambanag nga addan wenno ti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus nga Apotayo.” Anian nga ebkas ti panagtalek ken ni Jehova! Ngem saan laeng a basta emosion dayta a panagtalek. Imbes ketdi, nairaman iti dayta a panagtalek dagiti nainsiriban a desision nga ar-aramidentayo iti inaldaw. Aramidentayo koma ngarud a nabileg a determinasiontayo ti naan-anay a panagtalek ken ni Jehova kadagiti panawen ti rigat.
[Footnotes]
a Iti suratna iti pagaramidan ti kuarta idiay Estados Unidos, a napetsaan iti Nobiembre 20, 1861, kinuna ti Treasury Secretary a ni Salmon P. Chase: “Awan ti nabileg a pagilian malaksid no papigsaen ti Dios, wenno natalged malaksid no salaknibanna. Ti panagtalek dagiti umilitayo iti Dios ket nasken a maipakaammo babaen dagiti sinsilio ti pagiliantayo.” Kas resultana, ti pagsasao nga “Agtalekkami iti Dios” ti damo a nagparang kadagiti sinsilio ti Estados Unidos idi 1864.
b Ti pakaringgoran a nadakamat ditoy isu ti “buteng nga addaan panagdanag, a mangikkat iti amin a rag-o ti biag.” “Dikay maringgoran” wenno “dikay madanagan,” kuna ti dadduma a patarus. Ngem dagiti kasta a patarus ipasimudaagna a ditay koma rugian ti maringgoran wenno madanagan. Kuna ti maysa a reperensia: “Ti Griego a sao a nausar ket mangipasimudaag iti bilin nga isardeng nga aramiden ti maysa a banag a madama nga ar-aramiden (present progressive tense).”
c Dagitoy dagiti walo a punto: (1) Dika agaburido a dagus; (2) agpanunot a positibo; (3) agsapul kadagiti baro a kita ti trabaho; (4) agbiag a maitunos iti kabaelanyo—saan nga iti kabaelan ti sabali; (5) agannadkayo iti panagutang; (6) pagtalinaedenyo a nagkaykaysa ti pamilia; (7) salimetmetanyo ti panagraem iti bagiyo; ken (8) agbadyet.
d Dagitoy a naibatay-Biblia a pagbasaan saanda nga irekomenda wenno itandudo ti aniaman a partikular a panangagas, yantangay personal a desision daytoy ti indibidual. Dagiti artikulo a mangilawlawag kadagiti espesipiko nga an-annayen wenno sakit ket nairanta a mangimpormar kadagiti agbasbasa no ania dagita kas pagaammo iti agdama.
Malagipyo Pay?
• No maipasango kadagiti pakarigatan ti biag, kadagiti ania a pamay-an a maipakitatayo ti panagtalek ken ni Jehova?
• Kasanotayo a maipakita ti panagtalektayo iti Dios no parparigatennatayo ti sakit?
• No agtultuloy ti maysa a pagkapuyan ti lasag, kasanotayo a maipakita a pudno nga agpampannuraytayo ken ni Jehova?
[Kahon iti panid 17]
Malagipyo Kadi Dagitoy nga Artikulo?
No parparigatennatayo ti sakit, makapabileg a basaen ti maipapan kadagiti dadduma a sibaballigi a nangdaer kadagiti sakit, an-annayen, wenno pisikal a depektoda. Dagiti sumaganad ket sumagmamano nga artikulo a naipablaaken iti Pagwanawanan ken Agriingkayo! a magasin.
Ti “Panangparmek Kadagiti Pagkapuyak” ket naisentro iti panangtaming iti negatibo a panagpampanunot ken panagleddaang.—Ti Pagwanawanan, Mayo 1, 1990.
“Uray Pay ti ‘Iron Lung’ Di Mangpasardeng iti Panangasabana.”—Agriingkayo!, Enero 22, 1993.
Ti “Maysa a Bala ti Nangbalbaliw iti Biagko” intampokna ti panangtaming iti pannakaparalisa.—Agriingkayo!, Oktubre 22, 1995.
Ti “Dikay Ammo No Anianto ti Pagbalinan ti Biagyo Inton Bigat” salaysayenna ti panangdaer iti bipolar disorder.—Ti Pagwanawanan, Disiembre 1, 2000.
Ti “Makapagsao Met Laengen ni Loida” intampokna ti panangtaming iti cerebral palsy.—Agriingkayo!, Mayo 8, 2000.
“Ti Panangibturko iti Endometriosis.”—Agriingkayo!, Hulio 22, 2000.
“Ti Pannakidangadangko iti Scleroderma.”—Agriingkayo!, Agosto 8, 2001.
“Nagballigiak a Nakidangadang iti Postpartum Depression.”—Agriingkayo!, Hulio 22, 2002.
[Ladawan iti panid 15]
No naikkat iti panggedan, nainsiriban nga usigentayo ti estilo ti panagbiagtayo
[Ladawan iti panid 16]
Ipakita ti pakasaritaan ni Loida no kasano a makatulong ti panagtalek ken ni Jehova tapno makapagibtur ti maysa. (Kitaenyo ti kahon iti panid 17)
[Ladawan iti panid 18]
Ditay koma mabain nga agpatulong a mangparmek iti pagkapuyantayo