Ti Panagtalek ken Jehova Agturong iti Dedikasion ken Bautismo
“Agtalekka ken Jehova ket agaramidka iti naimbag; agnaedka koma ditoy daga, ket agtaraonka iti kinamatalekna.”—SALMO 37:3.
1. Ania a pammaneknek dagiti mamasirib a tattao iti lubong ti mangipakita a kinamaag ti panagtalek kadagiti natauan a papangulo?
ITI siasino ti pagkammatalkantayo? Kadagiti natauan a papangulo? Ipakita dagiti rekordda a kinamaag ti agmatalek kadagiti imperpekto a tattao. Apay, uray dagiti mamasirib iti lubong bigbigenda dayta a kinapudno! Gapuna, ti Europeo a magasin ti negosio a Vision naminsan kunana a ti “dakes unay maipapan iti agdama a kasasaad a ta awan ti makakita ti dalan a ruaran iti dayta.” Ken ti historiador iti ekonomia a ni Robert Heilbroner kunana: “Awan sabalin a mangngatngatngat kadatayo. Isu dayta ti panangsuspetsa nga awan ti enkargado, nga awan ti nakabalan a mangtaming kadagiti problema nga agargarasugas kadatayo.”
2. Aniat’ maikuna maipapan kadagiti panggunggona ti moderno a siensia?
2 Pudno, adun nga idudur-as ti naaramidan ti tao kadagiti nadumaduma a tay-ak ti siensia. Ngem nakagunggona aya amin dagitoy? Saan. Kas intudo ni autor a Lewis Mumford: “Ti panunot a dagiti mekanikal ken sientipiko nga idudur-as igarantiyana ti katupagna a natauan a gunggona . . . ti nagbalin itan a naan-anay a di maikalintegan.” Maysa a kaso a mangpaneknek iti dayta isu ti tudo nga asido (acid rain), nga isut’ mangsabsabidong kadagiti danaw ken karkarayan ken daytat’ mangdaddadael iti minilmilion kadagiti kaykayo. Mainayon pay, ti nakalkaldaang a kasasaad ti lubong—ti ilalanlan ti krimen, kinaranggas, ken terrorismo, iti droga, ken pannakaigamer iti alkohol, ken kadagiti maiyallatiw babaen iti sekso a saksakit, ken ti di mapugtuan a kasasaad ti panagbiag—amin paneknekanda nga awan mamaayna ti panagtalek kadagiti natauan a papangulo.
3. Ti Sao ti Dios mangted ania a balakad maipapan no sadino ti rebbeng a pangisaadantay ti panagtalektayo?
3 Maiyanatup unay a ti Sao ti Dios balakadannatayo: “Dika agkammatalek kadagiti prinsipe, ken iti anak ti tao, a kenkuana awan ti tulong. Ti angesna agpukaw, isu agpulang iti dagana; iti dayta met laeng nga aldaw dagiti pampanunotna mapukawda.” (Salmo 146:3, 4) No saan a kadagiti tattao, ngarud, asino ti pagkammatalkantayo? Mabalintayo ti agtalek iti Namarsua iti langit ken daga, kas mabasatayo: “Nagasat ti tao nga agkammatalek ken Jehova, ket ti talgedna ni met laeng Jehova.”—Jeremias 17:7.
Apay Agkammatalek ken Jehova?
4. Ania dagiti kangrunaan a galad ni Jehova, ken kasanoda nga itden kadatayo dagiti nasin-aw a rason a panagtalek kenkuana?
4 Mabalintayo ti agtalek ken Jehova agpaay kadagiti nasin-aw a rason. Umuna, mabalintay nga ikabil ti panagtalek kenkuana gapu kadagiti kangrunaan a galadna—ayat, kinasirib, kinahustisia, ken pannakabalin—ken dagiti dadduma pay a nakaskasdaaw a kualidad. Ipasiguro ti Saona kadatayo nga isu ti omnipotente, maysa kadagiti titulona kas “Dios a Mannakabalin-amin.” (Genesis 28:3) Anian a pangibatayan ti panagtalek dayta! Awan asinoman ti mabalin a sibaballigi a mangbusor ken ni Jehova, ket mabalin a mangtungday ti pangpanggepna. Isu met ti Omnisiente. Saanna laeng nga ammo ti panungpalan manipud iti pangrugian, a ti masanguanan maysa a silulukat a libro kenkuana, ngem agtataeng met kenkuana amin a pannakaammo ken kinasirib, kas makita babaen kadagiti nakaskasdaaw nga ar-aramidna iti panamarsua. Nikaanoman iti aniaman kadagiti pannakilangenna a nakaaramid iti maysa a panagbiddut. (Isaias 46:10; Roma 11:33-35) Nangnangruna pay ngem dayta, ni Jehova ti naan-anay a mapagtalkan, Dios iti kinalinteg ken kinamatalek. Imposible kenkuana nga agulbod. (Deuteronomio 32:4; Tito 1:2; Hebreo 6:18) Kangrunaan iti isuamin, yantangay ti awan agum a panagayatna ti dominante a kualidadna, maiyanatup a naikuna: “Ti Dios isu ti ayat.”—1 Juan 4:8, 16.
5. Ania a rekord ti linaon ti Sao ti Dios, a mamaneknek iti kinamapagtalkanna?
5 Dagiti pannakilangen ni Jehova iti sangatauan paneknekanna ti kinamapagtalkanna a Dios ti kinamannakabalin-amin, kinasirib, kinahustisia, ken ayat. Impasiguro ni Moises kadagiti Israelitas a salsalimetmetan ni Jehova ti tulagna ken kinamanangngaasina kadagidiay agayat kenkuana ken mangsalimetmet ti bilbilinna. (Deuteronomio 7:9) Iti immun-una, intalimeng ni Jehova ti managbuteng-Dios a Noe ken ti pamiliana a limmasat iti dakkel a Layus. Insalakan ti Dios ni nalinteg a Lot ken dagiti dua nga annakna a babbai manipud iti naapuy a pannakadadael ti Sodoma ken Gomorra. Iti kamaudiananna, inruar ti Dios dagiti Israelitas manipud Egipto ket impaayna kadakuada ti daga ti Canaan kas panangtungpal ti karina ken Abraham. (Genesis 7:23; 17:8; 19:15-26) Ket di met aya inispal ni Jehova dagiti tallo a Hebreo a naipalladaw iti umap-apuy nga urno, agraman ken ni Daniel manipud rukib dagiti leon?—Daniel 3:27; 6:23.
6. Ania a moderno-aldaw nga ebidensia ti adda kadatayo a saan a mintis ti panagtalek ken Jehova?
6 A ni Jehova isu daydiay mabalintayo a pangisaadan ti panagtalektayo ti paneknekan met ti kapkapadasan dagiti moderno-aldaw a Saksina. Kas pangarigan, impangta ni Adolf Hitler a talipuposenna ti “puli” dagiti Saksi ni Jehova idiay Alemania. Ngem imbes ketdi ni Hitler ken ti Nazi a partidona ti naikisap, ket itatta dayta a bunggoy dagiti Saksi ti rimmang-ay iti adu a daras agingga iti 119,000. Mainayon pay, iti literal ginasgasut nga estoria ti panagbiag dagiti Saksi ni Jehova ti naipablaaken Ti Pagwanawanan ken iti kaduana a magasin nga Agriingkayo! kas nalawag a pammaneknek iti kinapudno a ni Jehova pudno nga isu ti Dios a mabalintay a pagtalkan.
No Apay Dadduma Dida Agkammatalek ken Jehova
7. Apay a kinuna ti maysa a tao nga isu ti maysa a “Miron ni Jehova”?
7 Kaskasdi, anian a nagbassit itatta dagiti agtaltalek ken Jehova! Uray pay adu kadagiti nakaammon kadagiti kualidadna ken panagballigina napaayda a mangisaad ti panagtalekda kenkuana. Maysa nga artikulo a nagparang iti pagiwarnakan nga U.S. Catholic (Enero 1979) kunana maipapan iti kasta a tao: “Idi dagiti agsalsaludsod inimtuodda ti lalaki no ania ti pilina a relihion, insungbatna, ‘Ti kunak ket maysaak a Miron ni Jehova.’ Idi naawis nga ilawlawagna no ania ti kayatna a sawen kinunana: ‘Mamatiak unay a kas kadagiti Saksi ni Jehova—ngem diak kayat ti mairaman.’” Nagkomento ti magasin: “Ti dedikado a Saksi ni Jehova awan pagpilianna no di isu ti naan-anay a mairaman.”
8. Ania dagiti pamunganayan a kababalin a mamagbalin iti maysa a tao a tarigagayanna a mairaman iti panagserbi ken Jehova?
8 Apay kadi a dadduma dida kayat ti mairaman? Agsipud ta awananda ti umiso a kasasaad ti puso. Ti tao masapul a “siuumiso a nakasagana nga agpaay iti biag nga agnanayon.” (Aramid 13:48) Kas impamatmat ni Jesus iti pangngarigna iti agmulmula, dagidiay agbunga inawatda ti sao ti kinapudno iti ‘nasayaat ken nalinteg a puso.’ (Lucas 8:15) Wen, ti kinapudno ket saan a makaallukoy kadagiti di napasnek. Ti kangrunaan a kasapulan isu ti nadalus a puso. Ti kinapudno ti Sao ti Dios saan met a makaallukoy kadagidiay natangsit. Kasapulan met ti napakumbaba a kababalin. (Santiago 4:6) Mainayon pay, ti kinapudno saan a makaallukoy kadagiti mapmapneken iti bagbagida, dagidiay nalinteg ti panagkitkitada ti bagida. Ngem daytat’ makaallukoy kadagidiay silalagip kadagiti naespirituan a kasapulanda, nga agbisin ken mawawan iti kinalinteg, ken agsennaay ken umas-asug kadagiti isuamin a makarimon a bambanag a makitkitada iti lubong itatta.—Mateo 5:3, 6; Ezequiel 9:4.
Ti Panagtalek ken Jehova Agturong iti Dedikasion
9, 10. (a) Aniat’ nesesita sakbay a maikabil ti maysa a tao ti panagtalekna ken Jehova, ken kasano ti panangabrasa dagiti addaan umiso a kasasaad ti pusona? (b) Iti siasino ti pangalagadan ti pammati dagiti kakasta a tattao?
9 Sakbay a maikabil ti maysa a tao ti panagtalekna ken Jehova, umuna masapul a makangngeg pay ti maipapan Kenkuana. Ngem “kasanonto ngarud ti panangawagda iti daydiay dida pinati? Ket kasano ti panamatidanto iti daydiay dida nangnangngeg? Ket kasanonto ti pannakangngegda no awan ti mangaskasaba?” (Roma 10:14) Bayat a mangaskasaba dagiti ad-adipen ni Jehova, umabrasa dagiti umiso ti kasasaad ti pusoda, kas inaramid dagiti adu idiay Tesalonica idi ugma. Maipapan kadagitoy, insurat ni Pablo: “Idi inawatyo kadakami ti sao a paibaga ti Dios, inawatyo, saan a kasla sao dagiti tattao, no di ket, kas pudno a sao ti Dios, nga agaramid met kadakayo a mammati.”—1 Tesalonica 2:13.
10 Ti pannakaammoda maipapan ken Jehova, dagita a nasingpet panagpuspusona ti mangalagadto ti pammati kenkuana. Daytoy ti nasken, ta “no awan ti pammati saan a mabalin nga ay-ayuen a naimbag, ta masapul a ti umadani iti Dios patienna koma nga adda ket gunggonaanna dagiti mangsapul kenkuana.” (Hebreo 11:6) Ken nasken met isu ti panangalagad ti pammati iti Anak ti Dios. “Ket awan ti sabali a pakaisalakanan uray siasino, ta awan ti sabali a nagan iti babaen ti langit, a naited kadagiti tao, a pakabalinantayo a maisalakan”—wen, awan sabali a nagan malaksid ti nagan ni Jesu-Kristo.—Aramid 4:12.
11. Ti panagtalek ken Jehova tignayenna ti maysa a tao a sumurot iti ania a balakad nga inted ni apostol Pedro?
11 Ti panagtalek iti Sao ti Dios, ken Jehova, ken ni Jesu-Kristo nga Anakna tignayenna ti maysa a tao a mangipangag ti balakad ni apostol Pedro kadagiti Judio idi kaaldawanna: “Agbabawikayo ngarud, ket agsublikayo tapno mapunas dagiti basbasolyo, iti kasta umayto dagiti aldaw ti bang-ar nga aggapu iti sanguanan ni Jehova.” (Aramid 3:19) Babaen ti pananggun-od ti pannakaammo ken Jehova ken kadagiti pagannurotanna, maammuan ti maysa a tao a ti pagayatan ti Dios nga agpaay kenkuana isut’ panagbalinna a pasurot ni Jesu-Kristo. Kas panangiyebkas ni Pedro iti dayta: “Maipaay iti daytoy naawiskayo, ta ni Kristo nagsagaba met gapu kadakayo, a nangibati kadakayo iti ulidan tapno surotenyo dagiti addangna.” (1 Pedro 2:21) Inaramid a nalawag ni Jesus no ania ti nairaman idi a kinunana: “No sinoman a tao ti mayat nga umay sumurot kaniak, paglikudanna ti bagina ket alaenna ti kayona a pagtutuokan ket agtultuloy a surotennak.” (Mateo 16:24) Kaipapanan dayta ti panangidedikar ti maysa iti bagina ken Jehova a mangaramid ti pagayatanna ken sumurot kadagiti addang ni Jesu-Kristo.
Ti Dedikasion ket Saan a Basta Maysa Pay a Panagkari
12. Kasano ti masansan a panangusar ti Kakristianuan ti sao a “panagkari”?
12 Iti Kakristianuan ti termino a “panagkari” ti maulit-ulit a maus-usar maipapan iti panagbalin a Kristiano. Gapuna naibaga kadatayo a dagiti Evangelicals iti Estados Unidos “ipagpaganetgetda ti personal a panagkari ken ni Jesus.” Ti maysa a klerigo a Romano Katoliko nagsao maipapan ti “narelihiusuan a panagkari ti Katoliko.” Iti panangidepensana ti napolitikaan a pannakairamanna, naminsan kinuna ti maysa a padi a Katoliko: “Ti ipapanko iti politika ket kanayonan ti panagkarik (kas maysa a padi).” Ken dagiti negosio ipabpablaakda ti “Karimi kadagiti Sukimi.” Ngarud, iti kinapudnona, mabalin a nakaad-adu ti pagkarian ti maysa a tao a mammaminsan: dagiti kari iti negosio, dagiti sosial a kari, napolitikaan a kari, ken narelihiusuan a kari.
13. Aniat’ nairaman iti dedikasion ken Jehova?
13 Nupay kasta, ti dedikasion ken Jehova a Dios ket saan a basta sabali pay a kita ti panagkari. Ti panagkari ket maysa laeng a “tulagan wenno sinapataan a mangaramid ti maysa a banag iti masanguanan.” Ngem ti panangaramid ti maysa a dedikasion kaipapananna ‘ti panangipaay ti bagi ti maysa a naipangpangruna iti serbisio wenno panagdayaw iti maysa a nasantuan a biag wenno agpaay kadagiti sagrado a pakausaranna.’ Kaaduan a tattao ti kontentoda a basta mangaramid ti panagkari imbes a ti dedikasion. Awan duadua daytoy ti makagapu iti kinapudno a ti relihionda ket kasla laeng iti maysa a musika nga adda iti nalikudan. Daytat’ makaay-ayo a dengdenggen ngem saan a makasinga iti aniaman a talaga a kayat nga aramiden ti maysa a tao.
14. Apay a ti basta panagkari saan a makaay-ayo ken Jehova a Dios?
14 Ti dedikasion iti Dios pagbalinenna ti panagaramid iti pagayatanna nga isut’ kapatgan a banag iti biag. Sapulenna a ti indibidual tungpalenna ti umuna ken kadakkelan a bilin, nga insitar ni Jesus idi a kinunana: “Ket ayatem ni Jehova a Diosmo iti amin a pusom ken iti amin a kararuam ken iti amin a panunotmo ken kadagiti isuamin a pigsam.” Impaganetget ni Jesus ti naipampamaysa a kasasaad ti panagserbi iti Dios idi a kinunana: “Awan ti makabalin nga agserbi iti dua nga appo; ta guraennanto ti maysa ket ayatennanto ti sabali, wenno sumurotto iti maysa ket umsienna ti sabali. Dikay mabalin ti agserbi iti Dios ken iti Kinabaknang.” (Marcos 12:30; Mateo 6:24) Nalawag, ngarud, a ti basta panagkari ket saan a makaay-ayo ken ni Jehova.
Apay a Maitaneb iti Danum?
15. Ania nga ulidan ti impakita ni Jesus maipapan ti publiko a panangiyebkas ti pammati iti Dios?
15 Apay nga isimbolo ti dedikasion iti Dios babaen ti pannakabautisar? No tarigagayan ti maysa a tao nga agbalin a maysa kadagiti Saksi ni Jehova, awan ti pagpilianna. Pudno met dayta no tarigagayanna ti maammuan kas maysa a Kristiano, a pasurot ni Jesu-Kristo. Ti “Matalek a Saksi” ni Jehova, ni Jesus, nangted ti padron nga agpaay iti daytoy, ta isut’ nabautisaran idiay Karayan Jordan. Yantangay mangbabautisar ni Juan kadagiti nagbabawi a managbasol, saanna a maawatan no apay a tarigagayan ni Jesus ti mabautisaran, ngem kinuna ni Jesus kenkuana: “Anamongam ita, ta kasta ti maipaay kadatayo a panangtungpal ti amin a kinalinteg.” (Apocalipsis 1:5; Mateo 3:13-17) Ngarud ti Anak ti Dios nangaramid ti maysa a publiko a panangiyebkas ti pammatina babaen ti panangiparangna ti bagina ken ni Jehova, a nangited ti ulidan nga agpaay kadagiti isuamin a mangaramid ti nadiosan a pagayatan.
16. Ania a bilin ti inted ni Jesus kadagiti pasurot a maipapan iti bautismo, ket aniat’ mangipakita a nagtulnogan dagiti adalanna dayta a bilin?
16 Ad-adda pay ngem iti dayta, di nagbayag sakbay ti panagsublina ken Amana idiay langit, imbilin ni Jesus kadagiti pasurotna: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.” (Mateo 28:19, 20) Ti salaysay iti libro dagiti Aramid ipakitana a sireregta a nagtulnogan dagiti adalan ni Jesus dayta a bilin.—Aramid 2:40, 41; 8:12; 9:17, 18; 19:5.
17. Apay a ti panangwarwarsi laeng saan nga umiso a bautismo?
17 Kasano a nabautisaran dagitoy? Babaen laeng kadi ti pannakaiwarsi ti danum kadakuada, kas ti kostumbre ti kaaduan a relihion ti Kakristianuan? Nikaanoman! Ni Jesus ‘simmang-at manipud iti danum’ kalpasan ti pannakabautisarna. Nalawag ti panangipamatmat daytoy nga isut’ naitaneb iti danum. (Marcos 1:9, 10) Kinapudnona, awan sabalin a kaipapanan ti bautismo, ta ti sao a Griego a naipaulog a “bautisar” kaipapananna ti “panangitaneb, panangitapug.”—Aramid 8:36-39.
18. Apay a ti panangitaneb ti maiyanatup a simbolo iti dedikasion ti maysa a tao iti Dios?
18 Ti kasta a bautismo isut’ maiyanatup unay a simbolo ti dedikasion. Iti ipapan iti uneg ti danum iyilustrarna a naimbag ti ipapatay ti maysa a tao iti napalabas a kababalinna. Ti pannakairukkuasna manipud iti danum iladladawanna ti pannakaibangonna iti maysa a baro a pamay-an ti panagbiag. Kas iti maysa a seremonia iti kasar tulonganna a mangipasagepsep iti naikasaren a kasasaad iti maysa a nobia ken nobio, kasta met ti pannakaitaneb iti danum iti imatang dagiti sasaksi ti mangaramid met iti napaut nga impresion iti kandidato ti bautismo. Awan duadua maipapan iti dayta: Babaen iti pannakabautisar, ti dedikasion ti maysa ken ni Jehova ti rebbeng a maimula a naan-anay iti isip ken laglagip iti maysa kas ti kapatgan a pasamak iti panagbiagna. Markaan dayta ti pagbalbaliwanna manipud panagserserbi iti bagina nga agturong iti panagserbi ken ni Jehova a Dios.
19. Aniat’ kanayonan pay a rason a mabautisaran?
19 Ditay koma met liplipatan ti kinapudno a ti bautismo iti danum ket maysa kadagiti umuna a pagannurotan iti pananggun-od ti nadalus a konsiensia ken ni Jehova. Daytoy ti naaramid a sibabatad idiay 1 Pedro 3:21, a mabasa: “Isu a napaypayso a kaasping ti pammautisar, a mangisalakan ita kadatayo met, (saanna nga ikkaten kadatayo ti rugit ti lasag, no di ket kasla dawat ti maysa a nadalus a konsiensia iti Dios,) gapu iti panagungar ni Jesu-Kristo.”
Mabautisaran iti Ania nga Edad?
20. Apay a dagiti maladaga saanda a maikari iti bautismo?
20 Ti sasao ni Jesus idiay Mateo 28:19, 20 ipakitana a dagidiay laeng napagbalin nga ad-adalan ti rebbeng a mabautisaran. Gapuna; kaipapananna nga awan ti maladaga wenno bassit nga ubing a makatungpal kadagiti Nainkasuratan a pagalagadan agpaay iti bautismo. Ti maysa a maladaga ket saanna pay a maalagad ti pammati iti Sao ti Dios, iti Dios a Namarsua, ken ni Jesu-Kristo nga Anakna. Ti maysa a maladaga saanna a maawatan a ti nasantuan nga espiritu ket isut’ aktibo a puersa ti Dios; wenno di met makapagbabawi kadagiti napalabas a basbasol ken mangaramid iti maysa a nasantuan a kari a mangaramid iti pagayatan ti Dios.
21. Maiyanatup aya a mabautisaran dagiti agtutubo?
21 Ngem agparang a kasla dadduma kadagiti adda iti ili ni Jehova nagturongda iti kinamanaglablabes. Adu kadagiti Kristiano a nagannak palubosanda dagiti annakda nga aguray agingga nga addadan kadagiti panagpatingga ti kinatin-edyerda sakbay a lukatanda ti tema ti bautismo. Masansan, makangngegkayo kadagiti agtutubo a mangar-aramid ti maikari a dedikasion iti kabukbbukodanda a panagregget. Kas pangarigan, maysa a saan pay a tin-edyer nga anak a lalaki ti maysa a panglakayen sipapasnek a tarigagayanna ti pannakabautisarna. Gapuna impaisalaysay ni amana kadagiti tallo a sabsabali a panglakayen a kadua ti agtutubo dagiti saludsod a nairanta nga agpaay kadagidiay agngayangay a mabautisaran.a Ti konklusionda ket, nupay nakaub-ubing pay, isut’ kualipikadon a mabautisaran kas ordinado a ministro ni Jehova a Dios. Apay, timmabuno iti Pioneer Service School idiay Bahamas iti nabiit pay isu ti sangapulo ti tawenna nga ubing a babai, ti anak a babai ti dua nga amin-tiempo a ministro!
22. No mangibangon dagiti nagannak kadagiti Nakristianuan a personalidad kadagiti annakda, aniat’ manamnamada kadagiti agtutuboda?
22 Iti daytoy a banag, agparang a dadduma kadagiti nagannak ti adda pagkuranganda. Kasano kasaknap ti pangus-usaranda kadagiti ‘materiales a di mauram iti apuy’ a mangibangon kadagiti Nakristianuan a personalidad kadagiti annakda? (1 Corinto 3:10-15) Umuna, ti panangaramid iti dayta sapulenna a ti nadalus a panagdayaw ken ni Jehova ti agbalin koma a kapatgan a banag iti panagbiag dagiti nagannak. Mainayon pay, masapul a dagiti nagannak ipangagda ti nasayaat a balakad a naited idiay Deuteronomio 6:6, 7 ken Efeso 6:4. Ti resulta daytoy ket mabalin a dagiti nagannak kasapulan a lapdanda dagiti annakda a mabautisaran a nakaub-ubing unay, imbes a kasapulan ti panangidurduronto kadakuada iti kamaudiananna.
23. Apaman a magtengan ti maysa a tao ti punto ti dedikasion ken bautismo, ania pay ti kasapulan?
23 Apaman nga idemostra ti maysa a tao ti panagtalekna ken Jehova babaen iti dedikasion ken bautismo iti danum, masapul nga itultuloyna nga idemostra dayta a panagtalek. Ti sumaganad nga artikulo, “Panagserbi kas Managtalek a Katulongan ni Jehova,” tulongannatayo a mangapresiar no ania ti ramanen daytoy.
[Dagiti Footnote]
a Dagiti serie ti salsaludsod a sungbatan dagiti amin nga agngayangay a mabautisaran kas Saksi ni Jehova masarakanda iti libro nga Organisado a Mangitungpal ti Ministeriotayo. Daytat’ magun-odan dagidiay agsagsagana iti bautismo.
Kasano ti Isusungbatyo?
◻Ania dagiti kinapudno a mangitampok ti kinamaag ti panagtalektayo kadagiti tattao?
◻ Kasano a dagiti galad ken pannakilangenlangen ni Jehova itdenna kadatayo dagiti nasin-aw a rason nga agtalek kenkuana?
◻ Apay a ti panagtalek ken Jehova kasapulanna ti dedikasion ket saan a basta panagkari laeng?
◻ Kasano a maipasagepsep dagiti nagannak kadagiti annakda ti tarigagay a mangidedikar ti bagbagida ken Jehova iti naganus pay nga edad?
[Ladawan iti panid 10]
Mabalintay nga isaad ti panagtalektayo ken Jehova kas ti Naindaklan a Manangispal