Ti Kabibiag Dagiti Kristiano Idi Umuna a Siglo
“Ti Allawagi”
“Saan aya nga isu daytoy ti anak ti allawagi?”—MATEO 13:55.
NAAWAGAN idi ni Jesus saan laeng a kas “ti anak ti allawagi” no di ket kas “ti allawagi.” (Marcos 6:3) Nasursurona la ketdi dayta a paglaingan manipud ken Jose a pannakaamana.
Ania dagiti paglaingan ken alikamen a nasken a sursuruen nga usaren ni Jesus tapno makapagtrabaho kas allawagi wenno karpintero? Ania a produkto wenno serbisio ti nalabit impaayna kadagiti umili iti Nazaret? Ken idi agangay, ania ti nalabit epekto iti biagna ti nasapa a pannakasanayna kas karpintero?
Pagsapulan ti Pamilia Ipakita ti ladawan iti baba ti panangisuro ti maysa nga ama iti inauna a baritona no kasano ti epektibo ken natalged a panangusar iti barrena. Dumdumngeg ken kumitkita a naimbag ti in-inaudi a barito.
Mangrugi a masanay dagiti babbarito no agtawendan iti agarup 12 agingga 15. Kaaduanna a ti amada ti mangsanay kadakuada. Adu a tawen ti panagsanay dagiti babbarito ken kasapulan nga agreggetda no kayatda ti agbalin a nalaing a karpintero. Panunotem laengen ti adu a naragsak nga oras a binusbos ni Jose iti panangsanayna ken Jesus—nga inramanna iti trabaho ken inlawlawagna ti bambanag tapno agbalin met a nasigo a karpintero ti anakna. Nakaragragsak la ketdi ni Jose a makakita iti panagbalin ni Jesus a nasigo a karpintero!
Kasapulan ti Pannakaammo, Pigsa, ken Kinasigo Kasapulan nga ammo ti karpintero dagiti kita ti kayo nga usarenna. Mabalin a mangpili kadagiti kayo a masarakan iti lugarna, kas iti sipres, dir-an, sedro, sikomoro, ken olibo. Awan pay idi ti paggatangan iti kayo a naputputeden iti nagduduma a kadakkel ken nakasaganan a mausar. Imbes ketdi, kasapulan a mapan iti kabakiran, mangpili iti kayo, pukanenna, ken guyodenna nga ipan iti pagtrabahuanna.
Ania dagiti mabalin a pangusaran ti karpintero iti innala a kayo? Mabalin a mangbusbos iti adu nga oras a tumulong iti panangibangon kadagiti balay. Nalabit agaramid kadagiti pasanggir para iti atep, agaramid iti agdan para iti uneg ti balay, ken agaramid kadagiti ridaw, tawa, ken baskag para kadagiti diding.
Agaramid ti karpintero kadagiti muebles. Nailadawan iti daytoy a panid ti dadduma kadagita a produkto—aparador nga addaan kadagiti uuyosan, estante, wenno rikep (1); bangkito (2), tugaw (3), ken lamisaan (4) a nagduduma ti kadakkel ken sukogna; ken kona a pangaywanan iti maladaga. Tapno adda dekorasion ti dadduma a muebles, mabalin a parabawanna dayta iti napintas a kayo a nakitikitan iti naririkut a disenio. Tapno agpaut ken pumintas dagiti muebles, mabalin a kalupkopanna dagita iti allid, barnisanna, wenno punasanna iti lana.
Mangaramid met ti karpintero kadagiti alikamen ti mannalon a kas iti sangol (5) a naaramid iti natangken a kayo, agraman dagiti karaid, karaykay, ken pala (6). Ti aramidenna nga arado (7) ket masapul a natangken, yantangay nabato a daga ti kalien ti landok a tadem ti arado. Agaramid met kadagiti kayo a karomatilia (8) ken kariton sa iyaramidanna dagita kadagiti natangken a pilid nga addaan kadagiti rayos. Mabalin a karaman pay iti panggedanna ti panangtarimaan ken panangmantener kadagiti inaramidna a muebles, alikamen, ken lugan.
Mapanunotmo kadi no ania ti langa ni Jesus bayat ti panagtrabahona kas karpintero? Panunotem ti kudil ni Jesus a kimmayumanggi gapu iti init ti Makintengnga a Daya, dagiti maselna a pinapigsa ti adu a tawen a pisikal a panagtrabahona, ken dagiti dakulapna a kimmersang gapu iti kanayon a panagwasay, panagmartilio, panagragadi, ken ti panangpetpetna kadagiti nagaspang a kayo.
Inusarna Kadagiti Ilustrasionna Sisisigo nga inusar ni Jesus dagiti simple ken pamiliar a banag tapno maisurona dagiti nauneg a naespirituan a kinapudno. Nagusar kadi kadagiti ilustrasion a mainaig kadagiti kapadasanna kas karpintero? Usigem ti sumagmamano a posibilidad. “Apay, ngarud, a matmatam ti garami iti mata ni kabsatmo, ngem saanmo nga imutektekan ti pasanggir iti bukodmo a mata?” kinunana iti naguummong a tattao. Ammo dagiti karpintero no kasano kadakkel ti maysa a pasanggir. (Mateo 7:3) Idi agangay, kinuna ni Jesus iti sabali pay a grupo: “Awan ti tao a nangyiggem ti imana iti arado ket kumita iti bambanag iti likudan ti maikari maipaay iti pagarian ti Dios.” Mabalin nga adu met ti inaramidna nga arado. (Lucas 9:62) Ti maysa kadagiti naasi unay nga awis ni Jesus ket nainaig iti maysa nga alikamen nga inaramid ti karpintero. “Ibaklayyo ti sangolko ket agsursurokayo kaniak,” kinuna ni Jesus. “Ti sangolko nalanay ken ti awitko nalag-an.” (Mateo 11:29, 30) Awan duadua nga ammo ni Jesus no kasano ti agaramid iti sangol a saan a manggurad no di ket “nalanay,” wenno apaghusto ti rukodna.
Nupay kasta, kas idi umuna a siglo, ibilang ita dagiti Kristiano a maysa a pakaidayawan ti panangsurot iti daytoy a napakumbaba a dati a karpintero.
[Kahon/Dagiti Ladawan iti panid 26]
Kahon Dagiti Alikamen ti Karpintero
Ti karpintero a kas ken Jesus idi umuna a siglo masapul nga ammona nga usaren dagiti alikamen a nailadawan ditoy. Ti ragadina (1) a buklen ti baskag a nangtengngel iti tadem nga addaan kadagiti ngipen ket nadisenio a mangputed iti kayo no guyoden. Agusar iti eskuala (2) a pangrukod iti anggulo ken tinnag (3) a pangrukod iti kinadiretso dagiti nakatakder a banag. Adda met iti kahonna ti nibel (4), pagrukod a kayo (5), katam a natarumamis ken nasimpa ti tademna tapno mapalanas daytoy ti nagaspang a kayo (6), ken wasay (7) a pagpukan kadagiti kayo.
Ti pagtornuan (8) ken likup (9) ti karpintero ket nausar a mangputed ken mangsukog kadagiti takbian. Iti kalub ti kahon, naiparabaw ti kayo a maso (10) a nausar a mangipalnek iti pangisilpo a kayo wenno pangmalo iti paet. Makita pay ditoy ti bassit a ragadi (11), pagkayas a kutsilio (12), ken dagiti lansa (13). Iti sango ti kahon, makita ti maysa a martilio (14) ken pandaras (15) a mausar iti dadakkel a kayo. Naiparabaw iti kalub ti maysa a buneng (16) ken dagiti paet (17) a nagduduma ti kadakkelda. Maysa a barrena (18) ti nakasanggir iti kahon.