Nangbalakad ni Jesus Maipapan iti Pannakaitibkol ken Basol

Kalkalpas laeng nga inladawan ni Jesus ti kababalin a masapul nga ipakita dagiti pasurotna. Matmatanda koma ti bagida kas ubbing, napakumbaba ken saan a napannakkel. Dagiti adalan tuladenda koma ni Jesus babaen ti panangtuladda iti kababalin dagiti ubbing.​—Mateo 18:5.

Nabiit pay a nagsusupiatan dagiti apostol no asino ti katan-okan, isu a mabalin nga ibilangda a pannubngar dagiti sasao ni Jesus. Idi kuan, adda imbaga ni apostol Juan a kalkalpas pay laeng a napasamak: “Nakakitakami iti maysa a tao a mangus-usar iti naganmo a mangparparuar kadagiti demonio ket linapdanmi ta saantayo met a kadua.”​—Lucas 9:49.

Panagkuna kadi ni Juan a dagiti laeng apostol ti adda karbenganna a mangpaimbag ken mangparuar iti demonio? No kasta, apay ngarud a kabaelan daytoy a Judio ti mangparuar kadagiti dakes nga espiritu? Mabalin a narikna ni Juan a saan koma nga agaramid kadagiti milagro daydiay a tao ta saan a makikadkadua ken Jesus ken kadagiti apostol.

Nasdaaw ni Juan idi kinuna ni Jesus: “Bay-anyo latta, ta ti asinoman a mangus-usar iti naganko a mangaramid kadagiti milagro ket saan a makapagsao a dagus iti maibusor kaniak. Ta ti saan a bumusor kadatayo ket kaduatayo. Ken asinoman a mangted iti sangabaso a danum nga inumenyo gapu ta pasurotnakayo ni Kristo, ipasiguradok a mabendisionanto.”​—Marcos 9:​39-41.

Iti daydi a tiempo, saan a masapul a makikuyog ken Kristo daydiay a tao tapno maibaga nga adda iti dasig ni Jesus. Saan pay idi a nabukel ti kongregasion Kristiano, isu a saanna kayat a sawen a ti lalaki ket bumusbusor wenno mangiparparegta iti palso a relihion gapu ta saan a makikuykuyog ken Jesus. Nalawag a mamati ken Jesus ti lalaki, ket ipakita ti imbaga ni Jesus a mabendisionanto ti lalaki.

Iti sabali a bangir, dakdakes no maitibkol ti lalaki gapu iti sasao ken tigtignay dagiti apostol. Kinuna ni Jesus: “Asinoman a mangitibkol kadagitoy a nanumo nga addaan pammati, nasaysayaat laengen a maigalut iti tengngedna ti dakkel a bato, sa maitapuak iti baybay.” (Marcos 9:42) Kalpasanna, imbaga ni Jesus kadagiti pasurotna a masapul nga ikkatenda ti aniaman a pakaitibkolanda, kasanoman kapateg dayta, kas iti ima, saka, wenno mata. Nasaysayaat a mapukaw dagita a napateg a bambanag ket makastrek iti Pagarian ti Dios ngem ti maaddaan kadagita ket agtungpal iti Gehenna (Tanap ti Hinnom). Mabalin a nakitan dagiti apostol daytoy a tanap iti asideg ti Jerusalem a pagpuoran kadagiti basura, isu a maawatanda nga iladawan dayta ti agnanayon a pannakadadael.

Impakdaar pay ni Jesus: “Siguraduenyo a diyo laisen ti maysa kadagitoy a nanumo, ta ibagak kadakayo a dagiti anghel idiay langit a mangay-aywan kadakuada ket kanayon nga adda iti sanguanan ni Amak nga adda idiay langit.” Kasano kapateg iti Amana dagitoy a “nanumo”? Imbaga ni Jesus ti maipapan iti maysa a tao nga addaan iti 100 a karnero ngem napukaw ti maysa. Panawanna ti 99 tapno birokenna daydiay napukaw ket no masarakanna, ad-addanto ti ragsakna iti daytoy a karnero ngem iti 99 a saan a napukaw. Kinuna pay ni Jesus: “Saan a kayat ni Amak idiay langit a mapukaw ti uray maysa laeng kadagitoy a nanumo.”​—Mateo 18:​10, 14.

Mabalin a pampanunoten ni Jesus dagiti agsusupiat nga apostolna no asino ti agbalin a katan-okan kadakuada idi kinunana: “Agbalinkayo a kas iti asin, ket agkakappiakayo.” (Marcos 9:50) Ti asin ket mangpaimas iti taraon. Makatulong met ti piguratibo nga asin tapno nalaklaka nga akseptaren ti ibaga ti maysa ken tapno mataginayon ti talna, saan a kas ti ipaay ti panagsusupiat.​—Colosas 4:6.

No dadduma, tumaud dagiti nakaro a di pagkikinnaawatan, ket ibaga ni Jesus no kasano a tamingen dagita. “No makabasol kenka ti kabsatmo,” kuna ni Jesus, “kasaritam a dakdakayo ket ibagam ti basolna. No dumngeg kenka, natulongam ti kabsatmo nga agbabawi.” Kasano ngay no saan a dumngeg? “Mangikuyogka iti maysa wenno dua a testigo,” imbalakad ni Jesus, “tapno malawlawagan ti amin a banag babaen ti pammaneknek ti dua wenno tallo a testigo.” No saan latta a maurnos, ibagam “iti kongregasion,” kayatna a sawen, kadagiti panglakayen a mabalin nga agdesision. No ngay saan latta a dumngeg ti nakabasol? “Ibilangmo kas kadagiti tattao iti lubong ken kas agsingsingir iti buis,” dagiti tattao a saan a kalanglangen dagiti Judio.​—Mateo 18:​15-17.

Masapul a suroten dagiti manangaywan iti kongregasion ti Sao ti Dios. No adda nagbasol ket masapul a madisiplina, ti pangngeddengda “nagalutanen idiay langit.” Ngem no makitada nga awan basol ti maysa, dayta ket “nawarwaranen idiay langit.” Makatulong dagitoy a pagannurotan inton mabukel ti kongregasion Kristiano. Kadagita a serioso a pagsasaritaan, kinuna ni Jesus: “No adda aguummong a dua wenno tallo a tattao gapu iti naganko, addaakto iti tengngada.”​—Mateo 18:​18-20.