Napateg ken Jehova ti Amin-Kararua a Panagserbiyo
“Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao.”—COLOSAS 3:23.
1, 2. (a) Ania ti kapatgan a pribilehio a magun-odantayo? (b) Apay a no dadduma ditay maaramid ti amin a kayattay nga aramiden iti panagserbi iti Dios?
TI PANAGSERBI ken Jehova ti kapatgan a pribilehio a magun-odantayo. Adda naimbag a rason nga idi pay a parparegtaen daytoy a pagiwarnak dagiti Kristiano a makiraman iti ministerio, nga agserbida “nga ad-adda pay a naan-anay” aginggat’ mabalin. (1 Tesalonica 4:1) Nupay kasta, saan a kanayon a maaramidtayo ti amin a tarigagayan ti pusotayo nga aramiden iti panagserbi iti Dios. “Gapu iti kasasaadko, kasapulan nga agtrabahoak iti amin a tiempo,” inlawlawag ti maysa a balasang a kabsat a nabautisaran agarup 40 a tawenen ti napalabas. “Agtartrabahoak, saan a tapno makagatang kadagiti agkakangina a kawes wenno tapno makapagbakasion ken agnam-ay, no di ket tapno adda pangalaak iti masapsapulko, a pakairamanan dagiti magastos iti panagpaagas ken panangaywan iti ngipen. Mariknak a kas man la sobsobra ti ipapaayko ken Jehova.”
2 Ti ayat iti Dios tignayennatayo a mangaramid iti amin a kabaelantayo iti trabaho a panangasaba. Ngem dagiti kasasaad iti biag masansan a limitaranna ti maaramidantayo. Ti panangasikaso kadagiti dadduma pay a Nainkasuratan a rebbengentayo, a pakairamanan dagiti obligasion iti pamilia, mabalin nga ibusenna ti panawen ken pigsatayo. (1 Timoteo 5:4, 8) Kadagitoy “napeggad a tiempo a narigat a pakilangenan,” rumigrigat ti biag. (2 Timoteo 3:1) No ditay maaramid ti amin a kayattay nga aramiden iti ministerio, mabalin a maladingitantayo. Nalabit panunotentayo no makaay-ayo met laeng iti Dios ti panagdayawtayo.
Ti Pintas ti Amin-Kararua a Panagserbi
3. Ania ti namnamaen ni Jehova kadatayo amin?
3 Iti Salmo 103:14, sibabara nga ipanamnama ti Biblia kadatayo a ni Jehova “ammona ti pannakasukogtayo; isu malagipna a datayo tapoktayo.” Awanen sabali nga ad-adda a makatarus kadagiti limitasiontayo no di isu laeng. Dina kalikaguman ti ditay kabaelan nga ited. Ania ti namnamaenna? Ti kabaelan nga ited ti tunggal maysa, uray ania ti kasasaadna iti biag: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao.” (Colosas 3:23) Wen, namnamaen ni Jehova a datayo—amintayo—ket agserbi kenkuana iti amin a kararua.
4. Ania ti kayat a sawen ti panagserbi ken Jehova iti amin a kararua?
4 Ania ti kayat a sawen ti panagserbi ken Jehova iti amin a kararua? Ti termino a Griego a naipatarus nga “amin-kararua” literal a kaipapananna “manipud iti kararua.” Ti “kararua” tumukoy iti tao a mismo, agraman amin a pisikal ken mental nga abilidadna. Ngarud, ti panagserbi iti amin a kararua kaipapananna ti panangipaay iti bagbagitayo, panangusar a naan-anay iti amin a kabaelan ken pigsatayo iti panagserbi iti Dios. Iti ababa a pannao, kaipapananna ti panangaramid iti amin a kabaelan nga aramiden ti kararuatayo.—Marcos 12:29, 30.
5. Kasano nga ipakita ti ehemplo dagiti apostol a saan nga amin ket masapul nga agpapada ti magapuananda iti ministerio?
5 Ti kadi amin-kararua a panagserbi kaipapananna a masapul nga agpapada ti kaadu ti maaramidantayo iti ministerio? Saan a posible dayta, ta agduduma ti kasasaad ken abilidad ti tunggal tao. Usigenyo dagiti matalek nga apostol ni Jesus. Saan nga agpapada ti kabaelanda nga aramiden. Kas pagarigan, nagbassit ti ammotayo maipapan iti dadduma kadagiti apostol, kas kada Simon a Cananeo ken ni Santiago nga anak ni Alfeo. Nalabit limitado laeng ti naaramidanda idi kas apostol. (Mateo 10:2-4) Iti kasupadina, nabalinan ni Pedro nga inawat dagiti nadadagsen a rebbengen—kinapudnona, inted pay ketdi kenkuana ni Jesus dagiti “tulbek ti pagarian”! (Mateo 16:19) Ngem, saan a natantan-ok ni Pedro ngem kadagiti dadduma. Idi nakaawat ni Juan iti sirmata maipapan iti Baro a Jerusalem iti Apocalipsis (agarup 96 K.P.), nakitana dagiti 12 a pamuon a bato a nakaisuratan “dagiti sangapulo ket dua a nagan dagiti sangapulo ket dua nga apostol.”a (Apocalipsis 21:14) Impateg ni Jehova ti panagserbi dagiti amin nga apostol, nupay ad-adu ti naaramidan ti dadduma kadakuada.
6. Iti pangngarig ni Jesus maipapan iti agmulmula, ania ti napasamak iti bukel a naimula iti “nasayaat a daga,” ket aniada a saludsod ti tumaud?
6 Kasta met, saan a parepareho ti kaadu ti panawen a kalikaguman ni Jehova kadatayo amin iti panangasaba. Impamatmat daytoy ni Jesus iti ilustrasion maipapan iti agmulmula, a nangyarig iti trabaho a panangasaba iti panangimula kadagiti bukel. Nagdisso ti bukel iti agduduma a klase ti daga, a mangiladawan iti agduduma a kasasaad ti puso nga iparangarang dagidiay makangngeg iti mensahe. “No maipapan iti daydiay naimula iti nasayaat a daga,” inlawlawag ni Jesus, “daytoy isu daydiay dumdumngeg iti sao ket maal-alana ti kababagasna, isu a pudno nga agbunga ken mangpataud, daytoy maysa sagsangagasut, daydiay maysa innem a pulo, ti sabali tallopulo.” (Mateo 13:3-8, 18-23) Ania daytoy a bunga, ken apay a saan a parepareho ti kaaduna?
7. Ania ti bunga ti bukel a naimula, ket apay a saan a parepareho ti kaadu ti bungana?
7 Tangay ti bukel a naimula ket isu “ti sao ti pagarian,” ti panangpataud iti bunga tuktukoyenna ti panangisaknap iti sao, panangisarsarita iti dayta kadagiti sabsabali. (Mateo 13:19) Saan a parepareho ti kaadu ti bunga—manipud tallopulo agingga iti sangagasut—agsipud ta agduduma dagiti abilidad ken kasasaad iti biag. Ti tao a nakaradkad ken napigsa mabalin nga ad-adu ti panawenna a mangasaba ngem daydiay nakapsut gapu iti nakaro a sakit wenno gapu iti kinalakay. Ti agwaywayas nga agtutubo nga awanan kadagiti rebbengen iti pamilia mabalin nga ad-adu ti maaramidanna ngem daydiay agtartrabaho iti amin a tiempo tapno maipaayna ti kasapulan ti pamiliana.—Idiligyo ti Proverbio 20:29.
8. Kasano ti panangmatmat ni Jehova kadagidiay mangipapaay iti kasayaatan a maited ti kararuada?
8 Iti panangmatmat ti Dios, ad-adda kadi a matalek ti tao a makasangagasut ngem daydiay amin-kararua a makatallopulo? Saan! Mabalin nga agduduma ti kaadu ti bunga, ngem maay-ayo ni Jehova no la ket ta ti panagserbitayo isu ti kasayaatan a maited ti kararuatayo. Laglagipenyo, nagtaud amin iti puso a “nasayaat a daga” ti agduduma a kaadu ti bunga. Ti Griego a termino (ka·losʹ) a naipatarus a “nasayaat” iladawanna ti maysa a banag a “napintas” ken “makaay-ayo iti puso, ken nakaay-ayat kadagiti mata.” Anian a makaliwliwa a maammuan a no aramidentayo ti amin a kabaelantayo, napintas ti pusotayo iti imatang ti Dios!
Dina Pagdidinniligen
9, 10. (a) Ti pusotayo mabalin nga ituggodnatayo iti ania a negatibo a panagrasrason? (b) Kasano nga ipakita ti ilustrasion iti 1 Corinto 12:14-26 a saan a pagdidinniligen ni Jehova ti maaramidan ti tunggal maysa kadatayo?
9 Nupay kasta, mabalin a naiduma ti panangtingiting ti imperpekto a pusotayo kadagiti bambanag. Mabalin nga idiligna ti panagserbitayo iti maar-aramidan dagiti sabali. Mabalin nga ikalinteganna, ‘Ad-adu nga adayo ti magapgapuanan dagiti dadduma iti ministerio ngem ti magapgapuanak. Kasano a maay-ayo ni Jehova iti panagserbik?’—Idiligyo ti 1 Juan 3:19, 20.
10 Nangatngato nga amang ti pampanunot ken daldalan ni Jehova ngem ti pampanunot ken daldalantayo. (Isaias 55:9) Makitatayo ti panangmatmat ni Jehova iti maaramidan ti tunggal maysa kadatayo iti 1 Corinto 12:14-26, nga iti dayta nayarig ti kongregasion iti maysa a bagi nga adu ti pasetna—mata, ima, saka, lapayag, ken dadduma pay. Utobenyo iti apagbiit ti literal a bagi. Anian a kinamaag ti panangidilig ti matayo iti imayo wenno ti sakayo iti lapayagyo! Nagduduma ti panggep ti tunggal paset, ngem adda serbi ken napateg ti amin a paset. Umasping iti dayta, napateg ken Jehova ti amin-kararua a panagserbiyo, ad-adu man wenno basbassit ti maaramidan dagiti dadduma.—Galacia 6:4.
11, 12. (a) Apay a mabalin a marikna ti dadduma a “nakapkapuy” wenno “nakurkurang ti dayaw[da]”? (b) Kasano ti panangmatmat ni Jehova iti panagserbitayo?
11 No limitado ti maaramidantayo gapu iti nakapuy a salun-at, kinalakay, wenno dadduma pay a kasasaad, no maminsan mabalin a marikna ti dadduma kadatayo a “nakapkapuy” wenno “nakurkurang ti dayaw[tayo].” Ngem saan a kasta ti panangmatmat ni Jehova kadagiti bambanag. Kuna ti Biblia kadatayo: “Ad-adda ketdi a nasken dagiti kamkameng ti bagi a kasla nakapkapuy, ket dagiti paset . . . a pagarupentayo a nakurkurang ti dayawda, dagitoy palikmutantayo iti nawadwadwad a dayaw . . . Nupay kasta, ti Dios binukelna ti bagi, nga impaayanna iti nawadwadwad a dayaw ti paset nga addaan pagkurangan.” (1 Corinto 12:22-24) No kasta, mabalin a napateg ken Jehova ti tunggal maysa. Ilalaenna ti panagserbitayo iti inggat’ kabaelantayo. Saannakay kadi a tignayen ti pusoyo a mangaramid iti amin a kabaelanyo nga agserbi iti kasta a mannakaawat ken naayat a Dios?
12 Ngarud, ti nasken ken Jehova ket saan a ti panangaramidyo iti kas kaadu ti maaramidan ti sabali no di ket ti panangaramid iti kabaelanyo—ti kabaelan ti kararuayo. Ti panangipateg ni Jehova iti maaramidan ti tunggal maysa kadatayo ket naipamatmat iti makatukay a pamay-an babaen ti pannakilangen ni Jesus iti dua a nagduma a babbai kadagiti maudi nga aldaw ti biagna ditoy daga.
Ti “Nangina Unay” a Sagut ti Manangipateg a Babai
13. (a) Ania dagiti kasasaad a nainaig iti panangibukbok ni Maria iti napabanglo a lana iti ulo ken kadagiti saka ni Jesus? (b) Ania ti material a pateg ti lana ni Maria?
13 Iti rabii ti Biernes, Nisan 8, dimteng ni Jesus idiay Betania, maysa a bassit a purok iti makindaya nga arisadsad ti Bantay dagiti Olibo, agarup tallo a kilometro manipud Jerusalem. Iti daytoy nga ili, addaan ni Jesus kadagiti patpatgen a gagayyem—da Maria, Marta, ken ni Lazaro a kabsatda. Nalabit masansan idi a sangailienda ni Jesus. Ngem iti rabii ti Sabado, nakipangan ni Jesus ken dagiti gagayyemna idiay balay ni Simon, dati nga agkukutel a nalabit pinaimbag ni Jesus. Bayat a nakasadag ni Jesus iti panganan, adda sipapakumbaba nga inaramid ni Maria a mangipakita iti nasged a panagayatna iti tao a nangpagungar iti kabsatna. Linuktanna ti prasko a naglaon iti napabanglo a lana, a “nangina unay.” Pudno a nangina! Agpateg iti 300 a denario, ti katupag ti agarup makatawen a tangdan. Imbukbokna daytoy nabanglo a lana iti ulo ken kadagiti saka ni Jesus. Impunasna pay ketdi ti buokna kadagiti saka ni Jesus.—Marcos 14:3; Lucas 10:38-42; Juan 11:38-44; 12:1-3.
14. (a) Ania ti reaksion dagiti adalan iti inaramid ni Maria? (b) Kasano nga indepensa ni Jesus ni Maria?
14 Nakapungtot dagiti adalan! ‘Apay daytoy a panangsayang?’ insaludsodda. Ni Judas, a nangilimed iti panggepna nga agtakaw babaen ti panangisingasingna iti panangtulong kadagiti napanglaw, kinunana: “Apay a daytoy napabanglo a lana di nailako iti tallo gasut a denario ket naited kadagiti napanglaw a tattao?” Nagulimek ni Maria. Ngem, kinuna ni Jesus kadagiti adalan: “Baybay-anyo. Apay a padasenyo a riribuken? Inaramidna kaniak ti maysa a nasayaat [maysa a porma ti ka·losʹ] nga aramid. . . . Inaramidna ti nabalinanna; inkagumaanna nga isapsapo a nasaksakbay iti bagik ti napabanglo a lana maipaay iti pannakaitabon. Pudno kunak kadakayo, Sadinoman a ti naimbag a damag maikaskasaba iti isuamin a lubong, ti inaramid daytoy a babai maisaritanto met kas pakalaglagipan kenkuana.” Anian a pannakabang-ar ni Maria iti makaliwliwa a sasao ni Jesus!—Marcos 14:4-9; Juan 12:4-8.
15. Apay a natukay unay ni Jesus iti inaramid ni Maria, ket ania ti maadaltayo iti dayta maipapan iti amin-kararua a panagserbi?
15 Natukay ti rikna ni Jesus iti inaramid ni Maria. Iti panangmatmatna, nadayaw ti inaramid ni Maria. Saan a ti material a pateg ti sagut ti nasken ken Jesus no di ket ti banag nga ‘inaramid [ni Maria] ti nabalinanna.’ Ginundawayanna ti oportunidad ket intedna ti kabaelanna nga ited. Kastoy ti kuna ti dadduma a patarus, “Inaramidna ti amin a kabaelanna,” wenno, “Inaramidna ti kabaelanna nga aramiden.” (An American Translation; The Jerusalem Bible) Amin-kararua ti panangted ni Maria agsipud ta impaayna ti amin a kabaelanna. Dayta ti kayat a sawen ti amin-kararua a panagserbi.
Ti “Dua a Babassit a Sinsilio” ti Balo
16. (a) Kasano a napaliiw ni Jesus ti kontribusion ti napanglaw a balo? (b) Kasano kadakkel ti pateg dagiti sinsilio ti balo?
16 Dua nga aldaw kalpasanna, iti Nisan 11, nagbayag ni Jesus iti templo, a sadiay kinaritda ti autoridadna ken sinungbatanna dagiti narikut a saludsod maipapan iti buis, panagungar, ken dadduma pay a banag. Binabalawna dagiti eskriba ken Fariseo ta, malaksid iti dadduma pay a bambanag, ‘al-alun-onenda ti balbalay dagiti balo.’ (Marcos 12:40) Kalpasanna nagtugaw ni Jesus, nalabit iti Paraangan dagiti Babbai, a sadiay, sigun iti tradision dagiti Judio, adda 13 a baul ti gameng. Nagtugaw iti apagbiit, a pinalpaliiwna a naimbag ti panangipisok dagiti tattao iti kontribusionda. Adu a babaknang ti immay, a ti dadduma nalabit nagpammarangda a nalinteg, nagparammagda pay ketdi. (Idiligyo ti Mateo 6:2.) Minatmatan a naimbag ni Jesus ti maysa a babai. Mabalin nga awan a pulos ti naisangsangayan a mapaliiw dagiti ordinario a tattao iti babai wenno iti datonna. Ngem ni Jesus, a makabalin a mangammo iti puso dagiti sabali, ammona a ti babai ket “maysa a napanglaw a balo.” Ammona met ti eksakto a pateg ti datonna—“dua a babassit a sinsilio, a bassit unay ti pategna.”b—Marcos 12:41, 42.
17. Kasano nga impateg ni Jesus ti kontribusion ti balo, ket ania ti maadaltayo iti dayta maipapan iti panangted iti Dios?
17 Inawagan ni Jesus dagiti adalanna, ta kayatna a makitada a mismo ti leksion nga isurona. “Nangipisok iti ad-adu ngem kadagidiay amin a mangipispisok iti kuarta kadagiti baul ti gameng,” kinuna ni Jesus. Iti panangmatmatna, ad-adu ti intinnag ti balo ngem ti dagup ti amin nga intinnag dagiti sabali. Intedna “ti isuamin nga adda kenkuana”—ti kakaisuna a nabatbati a kuartana. Iti kasta nga inaramidna, impannurayna ti bagina ken Jehova. Isu a ti tao a napili a kas pagwadan iti panangted iti Dios ket isu daydiay a ti datonna kasla awan a pulos ti material a pategna. Nupay kasta, iti imatang ti Dios, di magatadan dayta!—Marcos 12:43, 44; Santiago 1:27.
Ti Maadal iti Panangmatmat ni Jehova iti Amin-Kararua a Panagserbi
18. Ania ti maadaltayo iti pannakilangen ni Jesus kadagiti dua a babbai?
18 Iti pannakilangen ni Jesus kadagitoy dua a babbai, adda makaliwliwa a maadaltayo maipapan iti panangmatmat ni Jehova iti amin-kararua a panagserbi. (Juan 5:19) Saan a pinagdilig ni Jesus ti balo ken ni Maria. Impategna ti dua a babassit a sinsilio ti balo a kas iti panangipategna iti “nangina unay” a lana ni Maria. Tangay inted ti tunggal babai ti kabaelanna, agpada a napateg iti imatang ti Dios dagiti datonda. Isu a no mariknayo a kasla awan serbiyo gapu ta diyo maaramid amin a kayatyo nga aramiden iti panagserbi iti Dios, dikay maupay. Maragsakan ni Jehova a mangawat iti kasayaatan a maitedyo. Laglagipenyo, ni Jehova “kitaenna ti puso,” isu a pagaammona ti tarigagay ti pusoyo.—1 Samuel 16:7.
19. Apay a ditay koma babalawen ti magapuanan dagiti sabali iti panagserbi iti Dios?
19 Ti panangmatmat ni Jehova iti amin-kararua a panagserbi rebbeng nga impluensiaanna ti panangmatmat ken pannakilangentayo kadagiti sabsabali. Anian a kinaawan ayat ti panangbabalaw iti panagregget dagiti sabali wenno ti panangidilig iti panagserbi ti maysa iti sabali! Nakalkaldaang, insurat ti maysa a Kristiano: “No maminsan iparikna dagiti dadduma nga awan serserbim no saanka a payunir. Dagidiay mangikagkagumaan kadatayo nga agtultuloy a kas regular nga agibumbunannag ‘laeng’ iti Pagarian kasapulan a mariknada a maapresiarda met.” Laglagipentayo nga awan kalintegantayo a mangikeddeng no ania ti amin-kararua a panagserbi para iti padatayo a Kristiano. (Roma 14:10-12) Napateg ken Jehova ti amin-kararua a panagserbi ti tunggal maysa kadagiti minilion a matalek nga agibumbunannag iti Pagarian, ket kastatay met koma.
20. Ania ti kaaduanna a kasayaatan a panunotentayo maipapan kadagiti padatayo a managdaydayaw?
20 Ngem kasanon no dagiti dadduma agparang a saanda nga ar-aramiden ti amin a kabaelanda iti ministerio? Ti panagbaba ti oras a busbusbosen ti kapammatiantayo iti ministerio mabalin nga ipasimudaagna kadagiti maseknan a panglakayen a kasapulan ti tulong wenno pammaregta. Maigiddato iti dayta, ditay koma liplipatan a kadagiti dadduma, ti amin-kararua a panagserbi mabalin nga ad-adda nga umarngi iti babassit a sinsilio ti balo ngem iti nangina a lana ni Maria. Kaaduanna, kasayaatan a panunotentayo a dagiti kakabsattayo ay-ayatenda ni Jehova ket ti kasta nga ayat tignayenna ida a mangaramid iti amin a kabaelanda, saan a sangkabassit laeng. Sigurado nga awan ti napasnek nga adipen ni Jehova a di mangaramid iti amin a kabaelanna iti panagserbi iti Dios!—1 Corinto 13:4, 7.
21. Ania a makagunggona a karera ti sursuroten ti adu, ket aniada a saludsod ti tumaud?
21 Nupay kasta, para kadagiti adu iti ili ti Dios, ti amin-kararua a panagserbi kaipapananna ti panangsurot iti makagunggona unay a karera—ti ministerio a panagpayunir. Aniada a bendision ti sagsagrapenda? Ket komusta dagidiay dadduma kadatayo a saan pay a nakapagpayunir—kasanotay a maipakita ti espiritu ti panagpayunir? Masalaysay dagitoy a saludsod iti sumaganad nga artikulo.
[Dagiti Footnote]
a Tangay ni Matias ti nangsukat ken Judas kas apostol, nairaman la ketdi ti naganna—saan a ti nagan ni Pablo—kadagidiay nagparang iti 12 a pamuon a bato. Nupay maysa nga apostol ni Pablo, saan a maysa kadagiti 12.
b Tunggal maysa kadagitoy a sinsilio ket lepta, ti kabassitan a sinsilio dagiti Judio a maar-aramat idi. Ti dua a lepta ket katupag ti 1/64 ti tangdan iti maysa nga aldaw. Sigun iti Mateo 10:29, iti maysa a sinsilio nga asarion (ti katupag ti walo a lepta), makagatang ti maysa a tao iti dua a billit tuleng, maysa kadagiti kalalakaan a billit a taraon dagiti napanglaw. Isu a pudno a napanglaw daytoy a balo, ta kagudua laeng ti gatad a kasapulan a paggatang iti maysa a billit tuleng ti adda kenkuana, saan nga umanay para iti maysa a pannangan.
Kasanoyo a Sungbatan
◻ Ania ti kayat a sawen ti panagserbi ken Jehova iti amin a kararua?
◻ Kasano a ti ilustrasion iti 1 Corinto 12:14-26 ipakitana a dinatay idilig ni Jehova kadagiti sabali?
◻ Maipapan iti amin-kararua a panangted, ania ti maadaltayo iti komento ni Jesus iti nangina a lana ni Maria ken ti dua a babassit a sinsilio ti balo?
◻ Kasano a ti panangmatmat ni Jehova iti amin-kararua a panagserbi impluensiaanna ti panangmatmattayo iti maysa ken maysa?
[Ladawan iti panid 15]
Inted ni Maria ti amin a kabaelanna, a binangbangluanna ti bagi ni Jesus iti “nangina unay” a lana
[Ladawan iti panid 16]
Dagiti sinsilio ti balo—kasla awan a pulos ti material a pategna ngem di magatadan iti imatang ni Jehova