Mangted ni Jehova iti “Nasantuan nga Espiritu Kadagidiay Agdawdawat Kenkuana”
“No dakayo, nupay nadangkeskayo, ammoyo no kasano ti mangted iti naimbag a sagsagut ti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”—LUCAS 11:13.
1. Kaano a nangnangruna a kasapulantayo ti tulong ti nasantuan nga espiritu?
‘DIAK madaeran daytoy no agmaymaysaak. Ti laeng nasantuan nga espiritu ti makatulong kaniak tapno maibturak daytoy a pakasuotan!’ Nariknam kadin ti kasta a naimpusuan a sentimiento? Narikna daytan ti kaaduan a Kristiano. Nalabit a kasta ti nariknam idi maammuam nga adda nakaro a sakitmo. Wenno nalabit simken kenka dayta a rikna idi pimmusay ti asawam a nakatakunaynaymo iti nabayag a tiempo. Wenno nalabit a dayta ket idi napukaw ti rag-om gapu iti panagleddaangmo. Kadagiti nasaem a tiempo iti biag, nalabit a nariknam a sitatakderka pay latta gapu iti nasantuan nga espiritu ni Jehova a nangipaay kenka iti “pannakabalin a nalablabes ngem ti gagangay.”—2 Corinto 4:7-9; Salmo 40:1, 2.
2. (a) Ania dagiti rigat a sangsanguen dagiti pudno a Kristiano? (b) Ania dagiti saludsod nga usigentayo iti daytoy nga artikulo?
2 Nasken a daeran dagiti pudno a Kristiano dagiti rigat ken ibubusor bayat nga agbibiagda iti daytoy dakes a lubong. (1 Juan 5:19) Maysa pay, dagiti pasurot ni Kristo ket rarauten a mismo ni Satanas a Diablo, a siuulpit a manggubgubat kadagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:12, 17) Di ngarud pakasdaawan a nangnangruna ita a kasapulantayo ti tulong ti espiritu ti Dios. Ania ti mabalintay nga aramiden tapno masiguradotayo nga agtultuloy a magun-odantayo a sipaparabur ti nasantuan nga espiritu ti Dios? Ken apay a masiguradotayo a sidadaan ni Jehova a mangipaay kadatayo iti bileg a kasapulantayo kadagiti tiempo ti pannakasuot? Masungbatan dagita babaen iti dua kadagiti pangngarig ni Jesus.
Agkararagkayo a Sipipinget
3, 4. Ania a pangngarig ti insalaysay ni Jesus, ken kasano nga inyaplikarna dayta iti panagkararag?
3 Kiniddaw idi ti maysa kadagiti adalan ni Jesus: “Apo, isurom kadakami no kasano ti agkararag.” (Lucas 11:1) Kas sungbat, nangted ni Jesus kadagiti adalanna iti dua nga agkanaig a pangngarig. Ti umuna ket maipapan iti maysa a tao a nangsangaili, ken ti maikadua ket maipapan iti maysa nga ama a nangipangag iti anakna. Usigentayo ti tunggal maysa kadagitoy dua a pangngarig.
4 Kinuna ni Jesus: “Asino kadakayo ti maaddaan iti gayyem ket mapanto kenkuana iti tengnga ti rabii ket kunana kenkuana, ‘Gayyem, pautangannak iti tallo a tinapay, agsipud ta ti maysa a gayyemko kasangsangpetna kaniak iti panagbaniaga ket awan ti maidasarko kenkuana’? Ket dayta a tao manipud iti uneg kunana kas sungbat, ‘Sumardengka a mangrirriribuk kaniak. Napunitanen ti ruangan, ket dagiti ubbing nga annakko addadan a kaduak iti pagiddaan; saanko a mabalin ti bumangon ket mangted kenka iti aniaman.’ Ibagak kadakayo, uray no saan a bumangon ken mangted kenkuana iti aniaman gapu ta gayyemna, pudno unay gapu iti natured a kinapingetna bumangonto ket mangted kenkuana iti bambanag a kasapulanna.” Kalpasanna, inlawlawag ni Jesus no kasano nga agaplikar daytoy a pangngarig iti panagkararag, a kunkunana: “Mayanatup unay kunak kadakayo, Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo. Ta ti tunggal maysa nga agdawdawat umawat, ken ti tunggal maysa nga agsapsapul makasarak, ket iti tunggal maysa nga agtuktuktok mailukatto dayta.”—Lucas 11:5-10.
5. No maipapan iti kababalintayo iti panagkararag, ania ti isuro kadatayo ti pangngarig mainaig iti napinget a tao?
5 Ipakita daytoy nalawag a pangngarig maipapan iti maysa a napinget a lalaki no ania ti rumbeng a kababalintayo no agkararagtayo. Imutektekanyo ta kinuna ni Jesus a nagun-odan daydi a tao dagiti kasapulanna “gapu iti natured a kinapingetna.” (Lucas 11:8) Naminsan laeng a nagparang iti Biblia ti sasao a ‘natured a kinapinget.’ Naipatarus dayta manipud iti Griego a sao a literal a kayatna a sawen ti “kinaawan bain.” Ti kinaawan bain masansan nga ipasimudaagna ti di nasayaat a kababalin. Ngem no ti kinaawan bain wenno kinapinget ket maipakita gapu iti nasayaat a rason, mabalin a naimbag a galad dayta. Kasta ti kinaawan bain ti tao a nangsangaili kas nadakamat iti pangngarig. Di pulos nagbain idi sipipinget a nagkiddaw kadagiti kasapulanna. Yantangay imparang ni Jesus daytoy a nangsangaili kas maysa nga ulidan kadatayo, rumbeng a napinget met dagiti kararagtayo. Kayat ni Jehova nga ‘itultuloytayo ti agdawat, itultuloytayo ti agsapul, itultuloytayo ti agtuktok.’ Kas sungbat, ‘mangted ni Jehova iti nasantuan nga espiritu kadagidiay agdawdawat kenkuana.’
6. Idi kaaldawan ni Jesus, kasano a namatmatan ti kaugalian a kinamanagpadagus?
6 Ipakpakita ni Jesus saan laeng a no kasano ti rumbeng a panagkararagtayo—a nabuyogan iti natured a kinapinget—no di ket no apay a kasta ti rumbeng nga aramidentayo. Tapno nalawag a matarusantayo dayta a leksion, nasken nga usigentayo no kasano a dagidiay nakangngeg iti pangngarig ni Jesus maipapan iti daydiay napinget a nangsangaili minatmatanda ti kaugalian a kinamanagpadagus. Adu a salaysay iti Kasuratan ti mangipakita nga idi panawen ti Biblia, nakapatpateg a kaugalian ti panangaywan kadagiti sangaili, nangruna kadagiti adipen ti Dios. (Genesis 18:2-5; Hebreo 13:2) Maysa a pakaibabainan ti saan a panangipakita iti kinamanagpadagus. (Lucas 7:36-38, 44-46) Bayat a sipapanunottayo iti dayta, usigentayo manen ti salaysay ni Jesus.
7. Apay a ti nangsangaili iti pangngarig ni Jesus ket saan a nagbain a mangriing iti gayyemna?
7 Ti agsangaili iti pangngarig dimteng ti bisitana iti tengnga ti rabii. Mariknana a masapul a pakanenna ti sangailina ngem ‘awan ti maidasarna kenkuana.’ Para kenkuana, nasken ti panagapura! Aramidenna ti amin tapno laeng makaala iti tinapay. Isu a napan iti gayyemna ken saan a nagbain a nangriing kenkuana. “Gayyem, pautangannak iti tallo a tinapay,” kinunana iti gayyemna. Nagkiddaw a sipipinget agingga a nagun-odanna dagiti kasapulanna. Sa la nagbalin a naimbag a manangsangaili idi nakaalan iti tinapay.
Dakdakkel a Panagkasapulan—Napingpinget a Panagkiddaw
8. Ania ti mangtignay kadatayo tapno sipipinget nga agkiddawtayo iti nasantuan nga espiritu?
8 Ania ti ipakita daytoy a pangngarig maipapan iti rason no apay nga agkararagtayo a sipipinget? Daydiay agsangaili intultuloyna ti nagkiddaw iti tinapay agsipud ta minatmatanna a kasapulan unay dayta tapno maaramidna ti rebbengenna kas agsangaili. (Isaias 58:5-7) No awan ti tinapay, saanna a maipakita ti kinaimbagna kas agsangaili. Umasping iti dayta, agsipud ta ammotayo a kasapulantayo unay ti espiritu ti Dios tapno maitungpaltayo ti ministeriotayo kas pudno a Kristiano, itultuloytayo ti agkararag iti Dios, nga agkiddawtayo iti espirituna. (Zacarias 4:6) Mapaaytayo no awan dayta. (Mateo 26:41) Makitayo kadi ti napateg a maadaltayo iti daytoy a pangngarig? No matmatantayo ti espiritu ti Dios kas banag a kasapulantayo unay, napingpingettayo la ketdi a mangkiddaw iti dayta buyogen ti kinatured.
9, 10. (a) Ilawlawagyo babaen ti pangngarig no apay a kasapulan a napingettayo a mangkiddaw iti Dios iti espirituna. (b) Ania a saludsod ti nasken nga iyimtuodtayo iti bagbagitayo, ken apay?
9 Tapno mayaplikartayo daytoy a leksion iti agdama a biag, panunotem nga iti tengnga ti rabii, nagsakit ti maysa kadagiti kameng ti pamiliam. Riingem kadi ti maysa a doktor tapno agpatulongka kenkuana? Saan, no saan met a nakaro ti sakit ti pasiente. Ngem no maat-atake ti pusona, saanka la ketdi a mabain a mangawag iti doktor. Apay? Agsipud ta emerhensia dayta. Ammom a kasapulan unay ti tulong ti maysa nga eksperto. Mabalin a matay ti pasiente no dika agpatulong. Umasping iti dayta, sumangsango dagiti pudno a Kristiano iti emerhensia, no ar-arigen. Kinapudnona, agtigtignay ni Satanas a kasla “leon a ngumerngernger” a mangikagkagumaan a mangalun-on kadatayo. (1 Pedro 5:8) Tapno agtalinaedtayo a sibibiag iti naespirituan, kasapulantay unay ti tulong ti espiritu ti Dios. Mabalin a pakatayantayo ti saan a panagpatulong iti Dios. Gapuna, buyogen ti natured a kinapinget, kiddawentayo iti Dios ti nasantuan nga espirituna. (Efeso 3:14-16) Babaen laeng ti panangaramid iti dayta a mataginayontayo ti bileg a kasapulan tapno ‘makapagibturtayo agingga iti panungpalan.’—Mateo 10:22; 24:13.
10 Masapul ngarud a no dadduma, imtuodentayo iti bagitayo, ‘Kasano aya a talaga ti kinapingetko nga agkararag?’ Laglagipenyo a no naan-anay a mabigbigtayo a kasapulantayo ti tulong ti Dios, napingpinget dagiti kararagtayo a mangkiddaw iti nasantuan nga espiritu.
Ania ti Mangtignay Kadatayo nga Agkararag Buyogen ti Panagtalek?
11. Kasano a ti pangngarig maipapan iti ama ken anak ket inyaplikar ni Jesus iti panagkararag?
11 Ti pangngarig ni Jesus maipapan iti napinget a nangsangaili itampokna ti kababalin ti maysa nga agkarkararag—ti manamati. Ti sumaganad a pangngarig itampokna ti kababalin daydiay dumdumngeg kadagiti kararag—ni Jehova a Dios. Inyimtuod ni Jesus: “Kinapudnona, siasino kadakayo ti ama a, no ti anakna dumawat iti ikan, nalabit iyawatnanto kenkuana ti maysa a serpiente imbes nga ikan? Wenno no dumawat met iti itlog, iyawatnanto kenkuana ti maysa a manggagama?” Kas panangyasping, intuloy ni Jesus: “Gapuna, no dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”—Lucas 11:11-13.
12. Kasano a ti pangngarig maipapan iti ama a nangipangag iti kiddaw ti anakna itampokna ti kinamasindadaan ni Jehova a sumungbat kadagiti kararagtayo?
12 Babaen daytoy a pagarigan ti panangtulong ti ama iti anakna, ipakpakita ni Jesus no ania ti rikna ni Jehova maipapan kadagidiay umadani kenkuana iti kararag. (Lucas 10:22) Umuna, utobenyo ti nagdumaan ti dua a pangngarig. Saan a kas iti tao iti umuna a pangngarig nga agkedked a tumulong, ni Jehova ket kasla maysa a maseknan a nagannak, a sigagagar a sumaranay iti agpatpatulong nga anakna. (Salmo 50:15) Ad-adda pay nga impakita ni Jesus ti kinamasindadaan a kababalin ni Jehova kadatayo babaen ti panangidiligna iti nagdumaan ti tao nga ama ken ti nailangitan nga ama. Kunana a no ti tao nga ama, nupay ‘nadangkes’ gapu iti natawid a kinamanagbasol, ket mangipapaay iti naimbag a sagut iti anakna, nangnangruna pay a namnamaentayo a ti nailangitan nga Amatayo, a naparabur, ket mangted iti nasantuan nga espiritu iti pamiliana nga agdaydayaw kenkuana!—Santiago 1:17.
13. Ania ti masiguradotayo no agkararagtayo ken ni Jehova?
13 Ania ti masursurotayo? Makapagtalektayo a no agkiddawtayo iti nasantuan nga espiritu iti nailangitan nga Amatayo, sidadaan unay a mangipaay iti dayta. (1 Juan 5:14) No maulit-ulit nga agkararagtayo kenkuana, arigna a dinto pulos ibaga kadatayo ni Jehova: “Sumardengka a mangrirriribuk kaniak. Napunitanen ti ruangan.” (Lucas 11:7) Imbes a kasta, kinuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Lucas 11:9, 10) Wen, ni Jehova ‘sungbatannatayo iti aldaw nga iyaawagtayo.’—Salmo 20:9; 145:18.
14. (a) Ania a di umiso a kapanunotan ti mangpadpadagsen iti dadduma nga agpaspasar kadagiti pakasuotan? (b) No masusuottayo, apay a mabalintayo ti agkararag ken Jehova buyogen ti panagtalek?
14 Ti pangngarig ni Jesus maipapan iti naasi nga ama ipagpaganetgetna met a ti kinaimbag ni Jehova ket adayo a nasaysayaat ngem iti kinaimbag ti siasinoman a tao a nagannak. Gapuna, no adda dagiti pakasuotantayo, awan koma kadatayo ti mangipapan a di maay-ayo ti Dios kadatayo. Ni Satanas, ti kangrunaan a kabusortayo, ti agtarigagay a panunotentayo ti kasta. (Job 4:1, 7, 8; Juan 8:44) Saan a Nainkasuratan ti kasta a panangkondenar iti bagi. Ni Jehova saannatayo a suoten “iti dakes a bambanag.” (Santiago 1:13) Saannatayo nga iyawatan iti arig serpiente a pakasuotan wenno arig manggagama a pannubok. Mangipapaay ti nailangitan nga amatayo iti “naimbag a bambanag kadagidiay agdawdawat kenkuana.” (Mateo 7:11; Lucas 11:13) Kinapudnona, no ad-adda a maawatantayo ti kinaimbag ni Jehova ken ti kinamasindadaanna a tumulong kadatayo, ad-adda a matignaytayo nga agkararag buyogen ti panagtalek. Iti kasta, mayebkastayo met ti kas iti sentimiento ti salmista a nangisurat: “Pudno a ti Dios nangngegna; impangagna ti timek ti kararagko.”—Salmo 10:17; 66:19.
No Kasano a Katulongantayo ti Nasantuan nga Espiritu
15. (a) Ania ti inkari ni Jesus mainaig iti nasantuan nga espiritu? (b) Ania ti maysa a pamay-an a tulongannatayo ti nasantuan nga espiritu?
15 Di nagbayag sakbay ti ipapatayna, inulit manen ni Jesus ti pammatalged nga impaayna kadagiti pangngarigna. Maipapan iti nasantuan nga espiritu, kinunana kadagiti apostolna: “Agkiddawakto iti Ama ket ikkannakayto iti sabali a katulongan tapno adda kadakayo iti agnanayon.” (Juan 14:16) Inkari ngarud ni Jesus a ti katulongan, wenno ti nasantuan nga espiritu, addanto kadagiti adalanna iti masanguanan, agraman iti kaaldawantayo. Ania ti maysa a napateg a pamay-an a magun-odtayo ita ti kasta a tulong? Ti nasantuan nga espiritu tulongannatayo a mangibtur iti nagduduma a pakasuotan. Kasano? Iti suratna kadagiti Kristiano iti Corinto, ni apostol Pablo, a naipasango met kadagiti pannubok, dineskribirna no kasano ti panangtulong ti espiritu kenkuana. Usigentayo biit ti insuratna.
16. Kasano a ti kasasaadtayo ket mabalin nga umasping iti kasasaad ni Pablo?
16 Umuna, sipaprangka a kinuna ni Pablo kadagiti kapammatianna nga adda ib-ibturanna a “siit iti lasag,” maysa a pakasuotan, sa innayonna: “Namitlo a nagpakaasiak iti Apo [ni Jehova] tapno sumina koma kaniak dayta.” (2 Corinto 12:7, 8) Uray pay nagpakaasi ni Pablo iti Dios tapno maikkat ti pakarigatanna, nagtalinaed dayta. Nalabit nga umasping iti dayta ti kasasaadmo ita. Kas ken Pablo, nalabit a sipipinget ken sitatalek a nagkararagka, a kidkiddawem ken Jehova nga ikkatenna ti pakasuotam. Ngem nupay maulit-ulit nga immararawka, adda latta dayta a parikutmo. Kayatna kadi a sawen dayta a saan sinungbatan ni Jehova dagiti kararagmo ken saannaka a tultulongan ti espirituna? Saan a pulos a kasta! (Salmo 10:1, 17) Imutektekam ti simmaganad a kinuna ni Pablo.
17. Kasano a sinungbatan ni Jehova ti karkararag ni Pablo?
17 Kas sungbat iti karkararag ni Pablo, kinuna kenkuana ti Dios: “Umdasen kenka ti di kaikarian a kinamanangngaasik; ta ti pannakabalinko maan-anay iti pagkapuyan.” Kinuna ni Pablo: “Siraragsak unay, ngarud, nga agpasindayagakto pay ketdi no maipapan kadagiti pagkapuyak, tapno ti pannakabalin ti Kristo agtalinaed koma kaniak kas iti maysa a tolda.” (2 Corinto 12:9; Salmo 147:5) Gapuna, napasaran ni Pablo a babaen ken Kristo, kasla tolda a nayabbong kenkuana ti nabileg a pannalaknib ti Dios. Iti agdama, sungbatan ni Jehova dagiti kararagtayo iti umasping a pamay-an. Iyabbongna ti pannalaknibna a kasla salinong kadagiti adipenna.
18. Apay a kabaelantayo nga ibturan dagiti pakasuotan?
18 Siempre, ti tolda saanna a mapasardeng ti tudo wenno ti napigsa nga angin, ngem mangsalaknib dayta manipud kadagita nga elemento. Umasping iti dayta, ti salinong nga ipaay “ti pannakabalin ti Kristo” saanna a pasardengen dagiti pakasuotan wenno pakarigatantayo. Nupay kasta, mangipaay dayta iti naespirituan a salaknib maibusor kadagiti makadangran nga elemento daytoy a lubong ken iti iraraut ti agturay iti dayta a ni Satanas. (Apocalipsis 7:9, 15, 16) No kasta, uray no addaanka iti pakasuotan a di ‘sumina kenka,’ masiguradom nga ammo ni Jehova ti pannakidangadangmo ken simmungbat iti “uni ti ikkismo.” (Isaias 30:19; 2 Corinto 1:3, 4) Insurat ni Pablo: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”—1 Corinto 10:13; Filipos 4:6, 7.
19. Ania ti rumbeng nga aramidem buyogen ti determinasion, ken apay?
19 Pudno a dagiti agdama a “maudi nga aldaw” daytoy dakes a lubong ket mailasin kas “dagiti napeggad a tiempo a narigat a pakilangenan.” (2 Timoteo 3:1) Nupay kasta, para kadagiti adipen ti Dios, kabaelanda a pakilangenan dagitoy a tiempo. Apay? Gapu iti tulong ken pannalaknib ti nasantuan nga espiritu ti Dios, a sidadaan ken sipaparabur nga ipapaay ni Jehova iti amin a mangkiddaw iti dayta buyogen ti kinapinget ken panagtalek. Determinadotayo ngarud koma nga agtultuloy nga agkararag nga inaldaw a mangkiddaw iti nasantuan nga espiritu.—Salmo 34:6; 1 Juan 5:14, 15.
Ania ti Sungbatmo?
• Ania ti masapul nga aramidentayo tapno magun-odantayo ti nasantuan nga espiritu ti Dios?
• Apay a makapagtalektayo a sungbatan ni Jehova ti kararagtayo a panagkiddaw iti nasantuan nga espiritu?
• Kasano a tulongannatayo ti nasantuan nga espiritu a mangibtur kadagiti pakasuotan?
[Ladawan iti panid 21]
Ania ti masursurotayo iti pangngarig ni Jesus maipapan iti napinget a nangsangaili?
[Ladawan iti panid 22]
Sipipinget kadi nga agkarkararagka tapno magun-odam ti nasantuan nga espiritu ti Dios?
[Ladawan iti panid 23]
Ania ti masursurotayo maipapan ken Jehova manipud iti pangngarig maipapan iti naasi nga ama?