“Di Ibain ti Naimbag a Damag”

“Ta diak ibain ti naimbag a damag; ta isu ti pannakabalin ti Dios a maipaay iti pannakaisalakan ti tunggal maysa a mamati.”​—ROMA 1:16.

1. Masansan kasano a maaw-awat ti naimbag a damag, ngem kasanot’ panangmatmat dagiti awan-pammatina a tattao ditoy lubong iti naimbag a damag ti Pagarian ti Dios?

TI AGPARANG iti maysa a tao a naimbag a damag mabalin a di matmatan kas naimbag a damag iti sabali. Iti gagangay, ti addaan naimbag a damag ket maaw-awat buyogen iti naimpusuan a panangabrasa, ket ti lapayag a magagaran a makangngeg ti damag maiturong kenkuana. Nupay kasta, impadto ti Biblia a dagiti tattao nga awanan pammati ditoy lubong didanto matmatan a naimbag a damag ti Pagarian ti Dios ken ti mensahena ti pannakaisalakan kas makaay-ayo.​—Idiligyo ti 2 Corinto 2:15, 16.

2. Aniat’ kuna ni apostol Pablo maipapan ti naimbag a damag nga inwaragawagna, ket apay a ti mensahe nga inwaragawagna kaskasdi a naimbag a damag agingga itatta?

² Ni apostol Pablo ti maysa a naibaon a mangawit ti naimbag a damag iti publiko. Kasanot’ panagriknana maipapan ti nakaibaonanna? Kunana: “No maipapan kaniak sisasaganaak a mangikasaba ti naimbag a damag kadakayo met dita Roma. Ta diak ibain ti naimbag a damag.” (Roma 1:15, 16) Tapno ti damag ket kaskasdi a naimbag agingga itatta, ngangngani 2,000 a tawenen kalpasan ti panagsurat ni apostol Pablo kadagiti Kristiano idi idiay Roma, kasapulan a daytat’ talaga a napaut a naimbag a damag. Dayta, iti kinapudnona, ket “agnanayon a naimbag a damag.”​—Apocalipsis 14:6.

3, 4. Apay a kinuna ni apostol Pablo nga isut’ saan a mabain iti naimbag a damag?

³ Apay a kinuna ni apostol Pablo a dina ibain ti naimbag a damag? Apay a mabalin nga ibainna koma dayta? Gapu ta daytat’ saan a popular a mensahe, ta daytat’ maipapan iti lalaki a naibayubay iti kayo a pagtutuokan kas maysa a malalais a kriminal, nga iti amin a pammarang a langa daytat’ mangikabkabil kenkuana iti nagdakes a kasasaad. Iti tallo ket kagudua a tawen, daytoy a tao ti nanglawlaw ti Palestina iti naimbag a damag ket naipasango iti nakaro nga ibubusor manipud kadagiti Judio, nangnangruna kadagiti narelihiusuan a papangulo. Ket ita ni Pablo, nga aw-awitenna itan ti nagan ti tao a nalalais, naipasango iti isu met laeng a kinauyong.​—Mateo 9:35; Juan 11:46-48, 53; Aramid 9:15, 20, 23.

⁴ Gapu iti kasta nga ibubusor, mabalin a namatmatan da Pablo ken dagiti padana nga ad-adalan ni Jesu-Kristo kas addaan ti banag nga ibain. Pudno unay, salsalimetmetan itan ni Pablo ti maysa a banag a dati mismo a matmatmatanna a nakababain. Isut’ personal a nakiraman a nangibunton ti pananglais kadagiti paspasurot ni Jesu-Kristo. (Aramid 26:9-11) Ngem pinanawannan ti kasta a panagtignay. Kas resultana, isu, agraman dadduma a nagbalin a Kristiano, agsagsagabadan ti narungsot a pannakaidadanes.​—Aramid 11:26.

5. Kasanot’ panangilawlawag ni Pablo iti saona maipapan ti saanna a panagbain iti naimbag a damag?

⁵ No palubosan ti maysa a tao ti bagina nga agbain kas pasurot ni Jesu-Kristo, isut’ mangal-ala iti natauan a panangmatmat kadagiti bambanag. Saan a kasta ni apostol Pablo. Imbes ketdi, iti panangilawlawag ti saanna a panangibain ti naimbag a damag nga inkaskasabana, kunana: “Ta isu ti pannakabalin ti Dios a maipaay iti pannakaisalakan ti tunggal maysa a mamati.” (Roma 1:16) Ti pannakabalin ti Dios ket saan a pagtaudan ti panagbain no daytat’ agtigtignay iti maysa nga adalan ni Jesus a maipaay ti pannakaaramid ti nadayaw unay a panggep ti nadayag a Dios isu a ni Jesu-Kristo mismo ket maysa a managdaydayaw.​—Idiligyo ti 1 Corinto 1:18; 9:22, 23.

Ti Naimbag a Damag Naiwarwaragawag iti Sangalubongan

6, 7. (a) Ania a responsabilidad maipapan ti naimbag a damag ti pagregreggetan dagiti Saksi ni Jehova a sursuroten, ket aniat’ resultana? (b) Nupay ditay kayat a palubosan ti buteng a mamagsarimaddeng kadatayo iti panangted pammaneknek, aniat’ mabalin a nesesita no maminsan? (Kitaenyo ti footnote.)

⁶ Kas ken Pablo, dagiti Saksi ni Jehova itatta ket ad-adalan ti naipadayag nga Anakna, a ni Jesu-Kristo. Kadagitoy a Saksina, intalek ni Jehova daytoy a gameng “ti nadayag a naimbag a damag.” (1 Timoteo 1:11) Saan a napaay dagiti Saksi ni Jehova a nangitungpal iti daytoy nadagsen a responsabilidad, ket maidagadag kadakuada a saanda koma nga ibain dayta. (2 Timoteo 1:8) Nasken a di palpalubosan ti buteng wenno panagbabain a mangigawid kadatayo a mangted pammaneknek ken mangipabigbig iti bagbagitayo kas dagiti Saksi ni Jehova.a

⁷ Ti kasta a natured ken awan butengna a panangaskasaba nagresulta iti pannakaiwaragawag ti nagan ti Kangatuan a Dios iti intero a daga ken iti pannakaikaskasaba ti naimbag a damag ti Pagarianna iti sangalubongan. Kuna ti Anak ti Dios: “Ket daytoy naimbag a damag ti pagarian maikaskasabanto iti amin a mapagnaedan a daga kas pammaneknek kadagiti isuamin a nasion; ket iti kasta umayton ti panungpalan,” ket pulos a di mapalubosan a ti padtona agpasar iti pannakapaay. (Mateo 24:14) Itan ti naimbag a damag maikaskasaban iti nasurok a 210 a dagdaga, ket ti panungpalan daytoy a trabaho a panangaskasaba di pay nagtengan. Di mabain iti naimbag a damag ken sisasango iti masanguanan a simamaingel, ikararagtayo kas kadagiti immuna nga adalan ni Jesu-Kristo: “Ket ita ngarud, Jehova, . . . ipaaymo a dagiti adipenmo sawenda a situtured unay ti saom.”​—Aramid 4:29.

8. Apay a di rebbeng a maupay dagiti Saksi ni Jehova gaput’ ibubusor ti amin a nasnasion ti daga?

⁸ Nupay pudno a dagiti Saksi ni Jehova ket magurgurada ken mabusbusorda iti amin a nasnasion ti daga, daytoy ket kaitungpalan ti adda a naipadton kas pakailasinan a tanda dagiti pudno a managdaydayaw ti maymaysa a sibibiag ken pudno a Dios. (Juan 15:20, 21; 2 Timoteo 3:12) Isu nga imbes a maupay ken maladingitan iti daytoy, dagiti manangiwaragawag ti naimbag a damag ket napatalgedan nga addaandat’ nadiosan nga anamong ken naitiponda iti naanamongan nga organisasion ti Sapasap a Soberano, a ni Jehova,

9. Apay nga awan balena a ti intero a lubong ket maibusor kadatayo?

⁹ Dikay liplipatan: Addaantay ti tulong ti Kangatuan a Dios iti intero nga uniberso. Gapuna, aniat’ kuentana no ti lubong agraman amin a narelihiusuan a sektana ken napolitikaan a partidona ti bumusor kadatayo? Ti bugbugtong nga Anak ti Dios ket binusor ti intero a lubong, ket ditay agbain a masarakan iti isu met laeng a kasasaad. Kas kinunana kadagiti apostolna: “No ti lubong guraennakayo, ammoyo a ginuranak nga immun-una ngem dakayo. No taga lubongkay koma, ti lubong ayatenna koma ti kukuana. Ngem gapu ta saankay a taga lubong, no di ket pinilikayo iti lubong, gapuna guraennakay ti lubong.”​—Juan 15:18, 19.

10. Manipud ania a gubuayan ti pagtataudan ti adu kadagiti pannakaidadanes dagiti Saksi, ken apay a saanda nga agbain gapu iti dayta?

¹⁰ Gapuna inibturan dagiti Saksi ni Jehova ti pannakaidadanes iti intero a lubong ngem ad-adda pay kadagidiay nasnasion a mangbukel ti makunkuna a Kakristianuan. Ti kasta a panangidadanes babaen iti Kakristianuan ket saanna a paneknekan dagiti Saksi kas di-Kristiano. Imbes ketdi, suportaran dayta ti panagkunada kas isudat’ pudno a Kristiano, dagiti Saksi ti Dios ken Ama ni Jesu-Kristo, nga awan sabali, ni Jehova. Gapu ta isuda dagiti Saksi ti Dios, saanda nga agbain no agsagabadat’ pannakaidadanes kadagita a narelihiusuan a pakaigapuan. Gapuna, ti pammagbaga ni apostol Pablo kadagiti Kristiano idi umuna a siglo a saanda nga agbain ket apagpag-isu a maiyaplikar kadagiti Saksi ni Jehova itatta.​—Kitaenyo ti Filipos 1:27-29.

Kasasayaatan a Damag a Maibunannag

11. Babaen iti panangalada iti nagan a dagiti Saksi ni Jehova, apay a ditay nagsardeng kas paspasurot ni Jesu-Kristo?

¹¹ Situtured nga inawat dagiti Saksi ni Jehova ti naganda a kaitungpalan ti kari ni Jehova iti naitulag nga ilina idiay Isaias 43:10. Ngem, di kayat a sawen daytoy, a didan sursuroten ni Jesu-Kristo. Ni Jesus ti Panguloda, a ti padronna isut’ sursurotenda. Isu a mismo ket maysa met kadagiti saksi ni Jehova. Kinapudnona, isut’ kangrunaan a Saksi ni Jehova.​—1 Timoteo 6:13; Apocalipsis 1:5.

12. Ania a kita ti damag ti ikaskasaba dagiti Saksi ni Jehova iti intero a lubong, ken apay?

¹² Ti mensahe nga ikaskasaba dagitoy a Saksi ni Jehova iti intero a lubong ket isut’ kasasayaatan a damag a mabalin a maibunannag. Awanen nasaysayaat a gobierno nga agpaay iti sangatauan ngem iti Mesianiko a Pagarian nga impasdek ni Jehova iti intero a lubong ti sangatauan, a tapno subboten imbaonna ti bugbugtong nga Anakna. (Isaias 9:6, 7) Dagiti agnanaed iti daga nga isut’ pakaikaskasabaan ti naimbag a damag ti Pagarian maik-ikkandan iti gundaway a mangakseptar iti dayta ken mangpaneknek a maikarida iti sagut ti biag nga agnanayon iti natauan a kinaperpekto iti maysa a paraiso a daga.

13. Apay a makasigurotayo a ti Mesianiko a gobierno ti Pagarian isunto ti kasasayaatan, ket aniat’ di pagbainan nga irekomendar dagiti Saksi?

¹³ Pudno unay, a no ni Jesus situtulok a lumasat iti nakakaskas-ang nga ipapatay tapno masubbotna dagidiay agbalinto nga iturayanna, sigurado a dinanto ited kadakuada ti sabali a gobierno no di ti kasasayaatan. Mairekomendarmi iti tunggal natauan a parsua ditoy daga: Agbalinkay a matalek, natulnog nga iturayan dayta a gobierno. Saankami nga agbain iti gobierno a sipapasnek nga irekomendarmi iti amin a sangatauan. Saankam nga agkedked a mangikaskasaba iti dayta a Pagarian, nupay daytoy a kurso ti mangyeg pannakaidadanes kadakami. Kas ken apostol Pablo, tunggal maysa kadakami ti agkuna: “Ta diak ibain ti naimbag a damag.”

14. Sigun ken ni Jesus, kasano kasaknap ti pakaikaskasabaan ti naimbag a damag ti Pagarian iti kaaldawantayo?

¹⁴ Impadto ni Jesus a ti panangikaskasaba iti naimbag a damag ti Pagarian ket sangalubonganto, ket daytoy nalawa, nasaknap a padto maikari iti kasta a mensahe. (Marcos 13:10) Isut’ di agalikaka a mangipadto ti pannakaikaskasaba ti Pagarian ni Jehova iti kakaadayuan ingganat’ mabalin​—wen, agingga kadagiti ungto ti daga. (Aramid 1:8) Ammo ni Jesus a sadinoman a pakasarakan kadagiti tattao, dagiti matalek a paspasurotna mangaramidda ti napasnek a panagregget a mangdanon kadakuada iti naimbag a damag ti Pagarian.

15, 16. (a) Siasinodat’ maikari a danonen ti naimbag a damag? (b) Apay a ti trabaho a panangaskasaba maaramid agpapan pay pannakaidadanes babaen iti organisasion ti Diablo?

¹⁵ Dagiti agnanaed ti daga itatta ket binilbilion ti bilangda ket naiwarasda kadagiti amin a kontinente ken dadakkel a purpuro ti taaw. Kaskasdi, awan paset ti mapagnaedan a daga ti adayo unay kadagiti Saksi ni Jehova tapno pagreggetan a danonen dayta iti naimbag a damag. Ti intero a mapagnaedan a daga isut’ simboliko a pagbatayan ni Jehova a Dios. (Isaias 66:1) Dagiti natauan a parparsua a manguk-okupar ti aniaman a paset ti pagbatayan ti sakana maikarida a madanon iti daytoy mensahe ti pannakaisalakan.

¹⁶ Ti naimbag a damag itatta ket makaparagsak a damag maipapan ti naarian a gobierno a naipasdeken kadagiti im-ima ti Mesias. Ammo ni Jesus nga agpapan pay kadagiti narungsot unay a panangidadanes iti biang ti organisasion ti Diablo, ti espiritu ti Dios ti manggutugot kadagiti pudno a paspasurot ti Mesias a mapan ingganat’ punget tapno “daytoy naimbag a damag ti pagarian” kas naipasdeken a kinapudno ket “maikaskasaba iti amin a mapagnaedan a daga.”​—Mateo 24:14.

Di Ibain ni Jesu-Kristo ken ni Jehova

17. (a) Dagiti pudno a managdaydayaw saanda nga agbain iti ania? (b) Ania a pagalagadan ti inwayat ni Jesus idiay Marcos 8:38, ket aniat’ pateg dayta?

¹⁷ Saan a nagkedked ti Kangatauan a Dios a mangted iti bagina ti nagan, a Jehova; ket saan met nga agbain dagiti matalek a managdaydayawna iti dayta a nagan. Dagiti pudno a managdaydayaw maragsakanda a maam-ammo ken mabigbig kas dagidiay mangmangted ti di nabingay a panagdayaw ken panagtulnog kenkuana. Maipapan iti bagina, nangikeddeng ni Jesus ti pagalagadan, wenno prinsipio, idiay Marcos 8:38: “Ta siasinoman a mangibain kaniak ken kadagiti saok iti daytoy a kaputotan a naabig ken managbasol, toy Anak ti tao ibainnanto met intono umay iti gloria ni Amana agraman dagiti sasanto nga anghelna.” Kasta met laeng, siasinoman a mangibain iti Dios ken Ama ni Apo Jesu-Kristo, nainkalintegan ti panangibain met ni Jehova iti kasta a tao. Ken siasinoman a parsua a pagbainan ni Jehova gapu iti di matalek nga ar-aramidna saanda a maikari a mangtagiragsak iti panagbiag iti aniaman a paset ti sakup ti Dios idiay langit wenno ditoy daga.​—Lucas 9:26.

18. (a) Apay a ti sasao ni Jesus idiay Mateo 10:32, 33 rebbeng a maiyukuok iti puspuso ken is-isiptayo? (b) Aniat’ mapasamak kadagidiay mangtallikud ken Jesus ken ni Jehova gaput’ butengda iti tao? (Mangtedkay kadagiti pangarigan a naibatay iti footnote.)

¹⁸ Bay-an a dagiti sumaganad a sasao ni Jesu-Kristo ti maiyukuok kadagiti puspuso ken is-isiptayo: “Tunggal maysa ngarud a mangipaduyakyak kaniak iti sanguanan dagiti tao, isu ipaduyakyakkonto met iti sanguanan ni Amak nga adda sadi langit; ngem uray siasino nga aglikudto kaniak iti sanguanan dagiti tao, isu paglikudakto met iti sanguanan ni Amak nga adda sadi langit.” (Mateo 10:32, 33; Lucas 12:8, 9) Maibatay met laeng iti dayta, siasinoman a mangtallikud iti Dios ken Ama ni Apo Jesu-Kristo tallikudanto met ti Dios. Isuntot’ di maikari a mabilang a kameng ti sangakabbalayan a sadiay ni Jesu-Kristo isut’ kangrunaan nga Anak. Isunto ngarud ti madadael iti naikeddeng a panawen ti Dios.b

19, 20. (a) Apay a dagidiay nangikarkararag a ti nagan ni Jehova masantipikarto ket awan banag a pagbainanda? (b) Aniat’ naaramidan dagiti awan-butengna a manangiwaragawag ti Pagarian, ken babaen iti ania a tulong?

¹⁹ Ti modelo a kararag nga insuro ni Jesus kadagiti adalanna ti masungbatanto: “Amami nga addaka sadi langit, masantipikar koma ti naganmo. Umay koma ti pagariam. Maaramid koma ti pagayatam kas sadi langit kasta met ditoy daga.” (Mateo 6:9, 10) Inton mapasamak dayta, awanton ti pagbainan dagiti naayat nga ad-adalan ni Jesus. Ti nagan ni Jehova ket maidaydayawto, masantipikarto, saan laeng a babaen iti minilmilion nga agbibiag itan a saandanto pulos matayen no di ket babaen met kadagiti rinibo a milion a sangatauan nga ayabannanto manipud tantanemda bayat ti sangaribo-tawen a panagturay ti Pagarianna. Addaandanto ti gundaway nga agbiag iti paraiso a daga iti agnanayon.

²⁰ Awan panagbabain, dagitoy awan butengna a manangiwaragawag ti naimbag a damag ti Pagarian naaramidandan ti sangalubongan a pammaneknek agpapan pay sangalubongan nga ibubusor agsipud ta addaanda ti napigpigsa ngem tao a pannakabalin iti likudanda​—ti tulong dagiti nailangitan nga anghel. Gapuna, dagiti Saksi ni Jehova “agbuteng[da] iti Dios ket isu dayawen[da].”​—Apocalipsis 14:6, 7.

Dida Agbain nga Agbuteng iti Dios ken Mangidayaw Kenkuana

21. Aniat’ di pagbainan dagiti Saksi ni Jehova nga aramiden, ket aniat’ resultana?

²¹ Pinaneknekan dagiti Saksi ni Jehova ti bagbagida a dida agbain nga agbuteng iti Dios ken mangidayaw kenkuana, nga us-usarenda pay ti mismo a personal a naganna, a Jehova. Daytoy ti nangibunga iti aglaplapusanan a bendision kadakuada. Dagitoy a bendision dimtengda kas matalek a kaitungpalan dagiti karkari ti Kangatuan a Dios. Anian a pannakaalangon daytoy kenkuana kas ti maymaysa a sibibiag ken pudno a Dios, ti Soberano ti uniberso!

22. Apay a maipasangonto dagiti Saksi ni Jehova iti narungsot a pannakaidadanes, ngem anianto a rag-o ti kukuada?

²² Iti sumungsungaden a masanguanan, dagiti sekular a gobierno bummueltadanto a maibusor kadagiti narelihiusuan a turturay ket talipuposendanto ida amin​—agraman ti Kakristianuan. (Apocalipsis 17:16, 17) Kalpasanna, maipasangonto met dagiti Saksi ni Jehova iti panawen ti narungsot a pannakaidadanes babaen kadagiti nailubongan nga el-elemento. Saandanto a makapagibtur ken makalasat no ti Dios nga agnanayon ket awan kadakuada. Ngem isut’ addanto kadakuada, gapuna addaandanto ti rag-o a makakita kadagiti amin a kakasta nga anti-Kristiano, anti-Jehova a kabkabusor a talipuposen ti Dios nga isut’ di maisin a pagdaydayawan dagiti Saksi. Saandanto nga agsagaba iti bain a maibutaktak ken madadael kas kabkabusor ti pudno a teokrasia no di ket lak-amendanto ti di maiyeb-ebkas a rag-o nga agkanta ken Jehova: “Manipud pay ketdi iti kinaagnanayon agingga iti kinaagnanayon sika ti Dios.”​—Salmo 90:2.

23. Apay a dagiti Saksi ni Jehova awan banag a pagbainanda, ket anianto ti resultana?

²³ Maipadayagdanto iti Dios, ti Ama ni Jesu-Kristo, a babaen kenkuana nasubbot ti natauan a pamilia tapno tagiragsakenda ti biag nga agnanayon iti natauan a kinaperpekto ken kinaragsak iti paraiso a daga. Anian a nagpigsa a Dios ti panangipakita ni Jehova iti bagina babaen ken Kristo Jesus! Anian a nagpintas ti panangiparangarang ni Jehova ti bagina kas masirib ken naayat a managusar, saan a managabusar, iti mannakabalin-amin a pigsana! Gapu itoy, awan aniaman a pagbainantayo maipapan kenkuana wenno ti bugbugtong-nga-Anakna, a ni Jesu-Kristo. Saantay nga agbain kas dagiti manangiwaragawag ti nadayag a naimbag a damag, a mangiwayat iti manangparmek-amin a pannakabalin ni Jehova a Dios babaen ken Kristo Jesus, a nagkuna kadagiti maudi nga oras ti naindagaan a biagna: “Agmaingelkayo! Siak pinarmekko ti lubong.” (Juan 16:33) Iti panangala itoy a kurso, surotentay koma a kankanayon ti ulidan ni apostol Pablo, a dina pulos imbain ti naimbag a damag. No aramidentay dayta, saannatay met nga ibain ti Dios a Mannakabalin-amin.

[Dagiti Footnote]

Dagiti Saludsod a Panggupgop

◻ Kas ken apostol Pablo, ania a kababalin ti rebbeng a maadda kadatayo maipapan iti panangiwaragawag ti naimbag a damag, ken apay?

◻ Apay a ti mensahe nga iwarwaragawag dagiti Saksi ni Jehova ti kasasayaatan pay laeng a damag?

◻ Ania a pakdaar ti inted ni Jesus maipapan iti asinoman a mangibain kenkuana inton dumteng iti dayag ti Pagarianna?

◻ Aniat’ mapasamak kadagidiay mangtallikud ken Jesus ken ni Jehova?

◻ Aniat’ nabalinan nga aramiden dagiti manangiwaragawag ti naimbag a damag nga awan panagbain, ken apay?