Ti Kinapintas a Di Agkupas

“MANASANAS ti kinapintas; aglabas ti kinapintas,” kuna ni mannaniw a Walter De la Mare. Sigurado a kastoy ti mapasamak kadagiti napusaksak a sabong ti cactus a nailadawan ditoy. Napardas nga agkupas ti kinalapsatda.

Nagsurat ni Kristiano nga adalan a Santiago: “Isu [ti nabaknang a tao] lumabasto a kas iti sabong ti root. Ta lumgak ti init agraman angin a nabara ket magango ti root, ket agtinnag ti sabongna, ket ti napintas a buyana manasanas. Kasta met, ti nabaknang a tao makeltayto kadagiti isuamin a turturongenna.”​—Santiago 1:10, 11.

Iti daytoy di natalged a lubong, pudno a mapukaw ti kinabaknang a di mapakpakadaan. Maysa pay, ti nabaknang a tao​—kas kadagiti sabsabali pay​—ket ‘ababa ti biagna, kas iti sabong.’ (Job 14:1, 2) Sinarita ni Jesus ti maysa a pangngarig maipapan iti maysa a tao a maringgoran nga agur-urnong iti kinabaknang tapno makapaginana ken makapagragsak. Ngem idi impapanna nga addan kenkuana dagiti amin a kasapulan iti nanam-ay a biag, isu ket natay. Namakdaar ni Jesus: “Kastoy ti agurnong iti gamgameng a maisagana kenkuana, ngem saan a nabaknang iti Dios.”​—Lucas 12:16-21.

“Nabaknang iti Dios.” Aniat’ kayat a sawen ni Jesus iti dayta? Ti tao a nabaknang iti daytoy a wagas ket addaan “gupgupit sadi langit”​—maysa a naimbag a nagan iti Dios. Pulos a di agkupas ti kasta a gupit. (Mateo 6:20; Hebreo 6:10) Imbes a mayasping iti maysa a sabong a malaylay, idiay Biblia, mayarig ti kasta a tao iti maysa a kayo a dagiti bulongna saan a malaylay. Ket, mangnamnamatayo, “isuamin nga aramidna rumang-ayto.”​—Salmo 1:1-3, 6.