LEKSION 55
Suportaram ti Kongregasionmo
Iti intero a lubong, minilion ti naragsak nga agdaydayaw ken Jehova iti rinibu a kongregasion. Agyamyamanda kadagiti instruksion ken direksion a maaw-awatda, ken naragsakda a mangsupsuporta iti kongregasion iti adu a pamay-an. Kasta kadi ti marikriknam iti kongregasionmo?
1. Ania dagiti pamay-an a mausarmo ti tiempo ken pigsam a mangsuporta iti kongregasion?
Adda amin maitulongtayo iti kongregasion. Kas pagarigan, adda kadi lallakay wenno babbaket, wenno agsakit iti kongregasionyo? Mabalinmo kadi ida a tulongan a mapan makigimong? Wenno mabalinmo kadi ida a tulongan iti dadduma pay a pamay-an, kas kadagiti trabaho iti balayda wenno iti panaggatang iti kasapulanda? (Basaen ti Santiago 1:27.) Mabalintayo met a tumulong nga agdalus ken mangmantener iti Kingdom Hall-tayo. Saantayo a mapilit a mangaramid kadagita. ‘Sisasaganatayo nga agboluntario’ gapu ta ay-ayatentayo ti Dios ken dagiti kakabsattayo.—Salmo 110:3.
Adda pay dagiti mabalin nga aramiden dagiti bautisado a Saksi tapno masuportaranda ti kongregasion. Dagiti kakabsat a lallaki a makagaw-at kadagiti kualipikasion nga ibagbaga ti Biblia ket mabalin nga agserbi iti kongregasion kas ministerial nga adipen wenno panglakayen, inton agangay. Mabalin a sireregta a suportaran dagiti kakabsat a lallaki ken babbai ti trabaho a panangasaba babaen ti panagpayunirda. Dadduma a Saksi ti tumultulong nga agibangon kadagiti lugar a pagdaydayawan wenno umakarda kadagiti kongregasion nga agkasapulan iti tulong.
2. Kasanotayo a mausar ti kuarta ken sanikuatayo a mangsuporta iti kongregasion?
‘Maidaydayawtayo ni Jehova kadagiti napateg a banagtayo.’ (Proverbio 3:9) Maragsakantayo nga agdonar iti kuarta ken dadduma a sanikuatayo tapno masuportaran ti kongregasiontayo ken ti trabaho a panangasaba iti intero a lubong. (Basaen ti 2 Corinto 9:7.) Maus-usar met dagiti donasiontayo a pangtulong kadagiti biktima ti kalamidad. Adu dagiti regular a “mangilasin” iti idonarda. (Basaen ti 1 Corinto 16:2.) Mabalintayo nga itinnag dagiti donasiontayo kadagiti donation box kadagiti lugar a pagdaydayawantayo wenno agdonartayo online iti donate.jw.org. Ik-ikkannatayo ni Jehova iti oportunidad a mangipakita iti ayattayo kenkuana babaen ti panangusartayo kadagiti material a sanikuatayo.
AMMUEM TI AD-ADU PAY
Kitaem ti dadduma a pamay-an a masuportaram ti kongregasion.
3. Mabalintayo nga usaren dagiti material a sanikuatayo
Ay-ayaten ni Jehova ken ni Jesus dagiti naragsak a mangmangted. Kas pagarigan, inapresiar ni Jesus ti maysa a balo a nangikagumaan nga agdonar uray narigat ti biagna. Basaen ti Lucas 21:1-4, sa pagsaritaan dagitoy a saludsod:
Masapul kadi a dakkel ti idonartayo tapno maparagsaktayo ni Jehova?
Ania ti marikna ni Jehova ken ni Jesus no naragsaktayo a mangted?
Tapno maammuam no kasano a maus-usar dagiti donasiontayo, i-play ti VIDEO. Kalpasanna, pagsaritaan ti sumaruno a saludsod.
Kasano a maus-usar dagiti donasiontayo para iti pagsayaatan dagiti kongregasion iti intero a lubong?
4. Mabalintayo ti agboluntario
Idi panawen ti Biblia, nakagaggaget dagiti agdaydayaw ken Jehova a mangmantener kadagiti lugar a pagdaydayawanda. Ngem dayta ket saan la a basta panagdonar iti kuarta. Basaen ti 2 Cronicas 34:9-11, sa pagsaritaan daytoy a saludsod:
Kasano a timmulong ti amin nga Israelita tapno maaywanan ti balay ni Jehova wenno ti lugar a pagdaydayawanda?
Tapno makitam no kasano a sursuroten dagiti Saksi ni Jehova dayta a pagtuladan iti Biblia, i-play ti VIDEO. Kalpasanna, pagsaritaan dagiti sumaruno a saludsod.
Apay nga importante a kanayon a nadalus ken nasayaat ti pannakamantener ti Kingdom Hall-tayo?
Ania dagiti mabalin a maitulongmo?
5. Mabalin a gumaw-at dagiti kakabsat a lallaki iti ad-adu pay a responsabilidad
Parparegtaen ti Kasuratan dagiti Kristiano a lallaki a mangaramid iti amin a kabaelanda a mangsuporta iti kongregasion. Tapno makitam ti maysa a pagarigan, i-play ti VIDEO. Kalpasanna, sungbatan ti sumaruno a saludsod.
Iti video, ania ti inaramid ni Ryan tapno ad-adda a masuportaranna ti kongregasion?
Ibaga ti Biblia dagiti kualipikasion dagiti agbalin a ministerial nga adipen ken panglakayen. Basaen ti 1 Timoteo 3:1-13, sa pagsaritaan dagitoy a saludsod:
Ania ti masapul nga ipakita dagiti kakabsat a lallaki a mayat nga agserbi kas ministerial nga adipen ken panglakayen?
Ania met ti masapul nga aramiden dagiti kapamiliada?—Kitaen ti bersikulo 4 ken 11.
No agporsegi dagiti kakabsat a lallaki a manggaw-at kadagitoy a kualipikasion, kasano a pagimbagan dayta ti kongregasion?
NO ADDA AGSALUDSOD: “Paggapgapuan ti pondo dagiti Saksi ni Jehova?”
Ania ti isungbatmo?
SUMARIO
Ipatpateg unay ni Jehova ti panagreggettayo a mangusar iti tiempo, pigsa, ken material a sanikuatayo a mangsuporta iti kongregasion.
Rebiu
Kasanotayo a mausar ti tiempo ken pigsatayo a mangsuporta iti kongregasion?
Kasanotayo a mausar dagiti material a sanikuatayo a mangsuporta iti kongregasion?
Ania dagiti kayatmo nga aramiden tapno masuportaram ti kongregasion?
AGDISKOBREKA PAY
Ammuem no apay a saanen a kidkiddawen ti Dios a mangted dagiti agdaydayaw kenkuana iti apagkapullo.
“Ania ti Kuna ti Biblia Maipapan iti Panangted iti Apagkapullo?” (Artikulo iti website)
Ibaga ti Biblia a ti dadduma a responsabilidad ket para laeng kadagiti bautisado a lallaki. Ngem kasano no masapul nga aramiden dagitoy ti maysa a bautisado a babai?
“Ti Kaipapanan ti Kinaulo iti Kongregasion” (Ti Pagwanawanan, Pebrero 2021)
Am-ammuem ti dadduma a natutured a Saksi nga agsaksakripisio tapno maitulodda dagiti publikasion kadagiti kapammatianda.
Panangitulod Kadagiti Naibatay iti Biblia a Publikasion Idiay Congo (4:25)
Kitaem no paggapgapuan ti pondotayo ken no kasano a naiduma dayta iti dadduma a relihion.
“Pagtataudan ti Pondo Para iti Trabaho Dagiti Saksi ni Jehova?” (Artikulo iti website)