GABRIEL

[Ti Nabaneg ti Dios].

Ti nasantuan nga anghel nga isu laeng ti nadakamat ti naganna iti Biblia malaksid pay ken Miguel; ti naglasag nga anghel nga isu laeng ti nangibaga iti naganna. Ni Gabriel ket namindua a nagparang ken Daniel: ti damo, iti asideg ti Karayan Ulai “iti maikatlo a tawen ti panagari ni Belsazar” tapno ilawlawagna ti sirmata ni Daniel maipapan iti kalakian a kalding ken iti kalakian a karnero (Da 8:1, 15-26); ket ti maikadua, “iti umuna a tawen ni Dario” a Medo, tapno idanonna ti padto maipapan iti “pitopulo a lawas.” (Da 9:1, 20-27) Inyeg ni Gabriel ti naimbag a damag ken Zacarias a padi, nga isu ken ti baketen nga asawana a ni Elisabet ket maaddaanda iti anak a lalaki, ni Juan (a Manangbautisar). (Lu 1:11-20) Impakaammo met ni Gabriel ken Maria, ti birhen a babai a naitulag ken Jose, a kunkunana: “Naimbag nga aldawmo, maysa a naparaburan unay, ni Jehova adda kenka.” Kalpasanna, imbagana ken Maria nga ipasngaynanto ti maysa nga anak a lalaki, ni Jesus​—isu ket “maawaganto iti Anak ti Kangatuan; ket ni Jehova a Dios itednanto kenkuana ti trono ni David nga amana, . . . ket awanto ti panungpalan ti pagarianna.”​—Lu 1:26-38.

Manipud iti rekord ti Biblia, maammuantayo a ni Gabriel ket nangato ti ranggona nga angheliko a parsua nga adda nasinged a pannakitimpuyogna iti nailangitan a trono, daydiay “agtaktakder iti asideg ti sanguanan ti Dios”; nga isu daydiay ‘imbaon’ ti Dios tapno mangidanon kadagiti naisangsangayan a mensahe kadagiti adipen ni Jehova ditoy daga (Lu 1:19, 26); a ti mismo a langana iti sirmata wenno idi naglasag ket maitunos iti kaipapanan ti naganna, “kas iti nabaneg a lalaki.”​—Da 8:15.