Insagana ni Juan a Mammautisar ti Dalan

Napalabasen ti 17 a tawen manipud idi nagsalsaludsod ni Jesus, idi agtawen iti 12, kadagiti mannursuro idiay templo. Primavera itan ti 29 C.E. Pagsasaritaan ti adu a tattao ti maipapan iti kasinsin ni Jesus a ni Juan, a mangaskasaba iti intero a pagilian iti makinlaud a paset ti Karayan Jordan.

Nakaskasdaaw ti panaglanglanga ken panagsasao ni Juan. Naaramid iti dutdot ti kamelio ti badona, ken nakabarikes iti lalat a sinturon. Dudon ken diro ti kankanenna. Ania ti mensahena? “Agbabawikayo, ta asidegen ti Pagarian ti langit.”—Mateo 3:2.

Matuktukay ti puso dagidiay dumdumngeg iti mensahe ni Juan. Nabigbig ti adu a masapul nga agbabawida, kayatna a sawen, balbaliwanda ti ugali ken tigtignayda, a tallikudanda ti dakes a kabibiagda. Dagidiay mapmapan kenkuana ket manipud “Jerusalem ken Judea ken dagiti lugar iti aglawlaw ti Jordan.” (Mateo 3:5) Kaaduan kadakuada ti talaga nga agbabbabawi. Binautisaranna ida, wenno intanebna ida iti danum ti Jordan. Apay?

Bautisaranna dagiti tattao kas simbolo ti naimpusuan a panagbabawida kadagiti basolda iti Linteg ti tulag nga inted ti Dios. (Aramid 19:4) Ngem saan nga amin ket nabautisaran. Idi immay kenkuana dagiti lider ti relihion, dagiti Fariseo ken Saduceo, inawagan ida ni Juan a “kaputotan ti uleg.” Kinunana: ‘Ipakitayo ngarud babaen ti aramidyo nga agbabbabawikayo. Diyo ipagarup a makalisikayo babaen ti panagkunayo, “Ni Abraham ti amami.” Kinapudnona, kabaelan ti Dios ti mangpataud iti annak ni Abraham babaen kadagitoy a bato. Nakadisson ti wasay iti puon dagiti kayo. Gapuna, mapukan ken mapuoran ti amin a kayo a saan nga agbunga iti nasayaat.’—Mateo 3:7-10.

Gapu ta nalatak ni Juan, napuersa ti mensahena, ken adu ti babautisaranna, naibaon dagiti padi ken Levita tapno isaludsodda kenkuana: “Asinoka?”

“Saan a siak ti Kristo,” insungbat ni Juan.

“Asinoka ngarud? Sika kadi ni Elias?” dinamagda.

Insungbatna: “Saan a siak.”

“Sika kadi ti Propeta?” dinamagda, a ti tuktukoyenda ket daydiay naindaklan a Propeta nga imbaga ni Moises nga umay.—Deuteronomio 18:15, 18.

“Saan!” insungbat ni Juan.

Saanda nga ininggaan a dinamag: “Asinoka? Ibagam tapno adda maisungbatmi kadagiti nangibaon kadakami. Asinoka a talaga?” Imbaga ni Juan: “Siak daydiay mangipukpukkaw idiay let-ang, ‘Pasayaatenyo ti dalan iti sanguanan ni Jehova,’ kas kinuna ni propeta Isaias.”—Juan 1:19-23.

Gapuna, dinamagda: “Apay ngarud a mangbabautisarka no saan a sika ti Kristo wenno ni Elias wenno ti Propeta?” Napnuan kaipapanan ti sungbatna: “Mangbabautisarak iti danum. Adda agtaktakder iti tengngayo a saanyo nga am-ammo, daydiay sumaruno kaniak.”—Juan 1:25-27.

Wen, bigbigen ni Juan nga isagsaganana ti dalan babaen ti panangiturongna kadagiti tattao iti umiso a kasasaad ti puso tapno awatenda ti naikari a Mesias, daydiay agbalinto nga Ari. Kinuna ni Juan maipapan kenkuana: “Nabilbileg ngem siak daydiay sumaruno kaniak ken diak maikari a mangikkat kadagiti sandaliasna.” (Mateo 3:11) Kinapudnona, kinuna pay ni Juan: “Daydiay adda iti likudak ket addan iti sanguanak, ta immun-una a naadda ngem siak.”—Juan 1:15.

Ngarud, talaga a maitutop ti mensahe ni Juan nga “Agbabawikayo, ta asidegen ti Pagarian ti langit.” (Mateo 3:2) Agserbi dayta kas pakaammo a dandanin mangrugi ti ministerio ti pinili ni Jehova nga Ari, ni Jesu-Kristo.