Isu ti Nangyam-ammo iti Mesias

PINAGMINAR ti akaba a barikes a lalat ti kayumanggi a kudilna. Nakakawes iti pagan-anay a naaramid iti dutdot ti kamelio, pudno a kasla aglanglanga a mammadto. Adut’ naawis kenkuana idiay karayan Jordan. Adda sadiay daytoy makaguyugoy a lalaki a nangiwaragawag a situtured nga isut’ nakasaganan a mangbautisar kadagiti agbabbabawi a managbasol.

Nasdaaw dagiti tattao! Asino daytoy a lalaki? Aniat’ panggepna?

Kinuna ni Jesu-Kristo maipapan iti daytoy a tao: “Apay a rimmuarkayo? Tapno kitaen ti maysa a mammadto? Wen, ibagak kadakayo, ket adayo nga ad-adda pay ngem iti maysa a mammadto. . . . Kadagidiay naiyanak kadagiti babbai awan ti naibangon a dakdakkel ngem ni Juan a Mammautisar.” (Mateo 11:9-11) Apay a kastat’ kinanaisangsangayan ni Juan? Agsipud ta isut’ nangyam-ammo iti Mesias.

Naipadto ti Annongenna

Nasurok a 700 a tawen sakbay ti pannakayanak ni Juan, impakaammo ni Jehova a daytoy [ni Juan] agpukkawto iti let-ang: “Isaganayo ti dalan ni Jehova, dakayo a tattao! Palanasenyo iti tay-ak ti maysa a dalan a maipaay iti Diostayo.” (Isaias 40:3; Mateo 3:3) Nasurok nga 400 a tawen sakbay ti pannakayanak ni Juan, impakaammo ti Mannakabalin-amin a Dios: “Adtoy, nga ibaonkonto kadakayo ni Elias a mammadto iti sakbay ti iyaay ti dakkel ken nakakigkigtot nga aldaw ni Jehova.” (Malakias 4:5) Ti kinapudno a nayanak ni Juan a Mammautisar iti agarup innem a bulan sakbay ni Jesus ket saan a basta naiparparna, ket saan met a basta naaramid daytoy babaen ti gagangay a pamay-an ti panagpaadu. Kas iti pannakayanak ti naikari nga ubing a ni Isaac, maysa a milagro ti pannakayanak ni Juan, ta agpada a nakalabesen dagiti nagannakna, da Zacarias ken Elisabet, iti gagangay a tawen para iti panagpataud kadagiti annak.​—Lucas 1:18.

Uray pay sakbay ti pannakayinaw ni Juan, naibutaktaken ti rebbengen, trabaho, ken kita ti panagbiagna babaen ken ni anghel Gabriel. Babaen ti pigsa ken espiritu ni Elias, pagtallikuden ni Juan dagiti nasukir manipud iti dalan ni patay ket isaganana ida tapno awatenda ni Jesus kas ti Mesias. Manipud pannakayanak, nagbalin ni Juan a Nazareo, a naan-anay a naidedikar iti Dios, ket saan nga imminum iti arak wenno naingel nga inumen. Kinapudnona, ti taraonna iti disierto ket “insekto a dudon ken atap a diro.” (Marcos 1:6; Numeros 6:2, 3; Lucas 1:13-17) Kas ken Samuel, manipud kinaubing, naitudingen ni Juan maipaay iti nadayag a serbisio ti Kangatuan a Dios.​—1 Samuel 1:11, 24-28.

Pinili met ti Dios uray ti nagan a Juan. Ti Hebreo a nagan a naipatarus a “Juan” kaipapananna ti “Impakita ni Jehova ti Anamong; Managparabur ni Jehova.”

Idi nakugit ti ubing iti maikawalo nga aldaw, ti amana, ni Zacarias, pinaltiingan ti Dios a mangipakaammo: “No maipapan kenka, nga ubing, maawagankanto iti mammadto ti Kangatuan, ta mapankanto nga umun-una iti sanguanan ni Jehova tapno isaganam dagiti dalanna, tapno mangtedka iti pannakaammo ti pannakaisalakan iti ilina babaen ti pannakapakawan dagiti basbasolda, gapu iti nadungngo a pannakipagrikna ti Diostayo. Babaen itoy a pannakipagrikna sarungkarannatayto ti maysa nga anaraar manipud iti ngato.” (Lucas 1:76-78) Ti ministerio ni Juan iti publiko isut’ kapatgan a banag iti biagna. Saan a napateg dagiti amin a banag no maidilig iti daytoy. Gapuna, inlawlawag ti Kasuratan dagiti immuna a 30 a tawen ti panagbiag ni Juan iti maysa laeng a bersikulo: “Ti ubing nagtultuloy a dumakkel ken bumileg iti espiritu, ket nagtalinaed kadagiti disierto agingga iti aldaw a panangiparangna a sipapanayag ti bagina iti Israel.”​—Lucas 1:80.

Timek iti Let-ang

Iti maika-15 a tawen ti panagturay ni Tiberio Cesar, idi ni Poncio Pilato ti gobernador iti Judea, nagparang ni Juan a Mammautisar iti let-ang nga addaan iti makapakigtot a mensahe a kastoy: “Agbabawikayo, ta ti pagarian ti langlangit immasidegen.” (Mateo 3:2; Marcos 1:4; Lucas 3:1, 2) Nagutugot dagiti agnanaed iti intero a rehion. Inapektaran dayta a nabileg a pakaammo ti puspuso dagiti tattao a magagaran iti sierto a namnama. Ti pakaammo ni Juan sinubokna met ti kinapakumbaba ti maysa a tao gapu ta kinalikaguman dayta ti naimpusuan a panagbabawi. Ti kinapasnek ken pammati ni Juan tinignayna ti adu a napudno ken napasnek a tattao a mangbigbig kenkuana kas lalaki nga imbaon ti Dios.

Nagsaknap ti kinalatak ni Juan a kas iti panagbannawag ti baro nga agsapa. Kas mammadto ni Jehova, nalaka laeng a mabigbig gapu iti kawes ken debosionna. (Marcos 1:6) Uray la nagdaliasat dagiti padi ken Levita manipud Jerusalem tapno kitaenda no aniat’ namagrissik amin iti daytoy nga interes. Agbabawi? Apay, ken iti ania? Asino daytoy a lalaki? Kayatda a maammuan. Inlawlawag ni Juan: “‘Saan a siak ti Kristo.’ Ket inimtuodda kenkuana: ‘Ania, ngarud? Sika kadi ni Elias?’ Ket kinunana: ‘Saan a siak.’ ‘Sika kadi Ti Mammadto?’ Ket simmungbat: ‘Saan!’ Gapuna kinunada kenkuana: ‘Siasinoka? tapno makaitedkami ti sungbat kadagidiay nangibaon kadakami. Ania ti maikunam maipapan iti bagim?’ Kinunana: ‘Maysaak a timek ti maysa nga agpukpukkaw idiay let-ang, “Palintegenyo ti dalan ni Jehova,” a kas iti kinuna ni Isaias a mammadto.’ Ita dagidiay naibaon naggapuda kadagiti Fariseo. Gapuna sinaludsodanda ket kinunada kenkuana: ‘Apay, ngarud, a mangbautisarka no saan a sika a mismo ti Kristo wenno ni Elias wenno Ti Mammadto?’”​—Juan 1:20-25.

Ti panagbabawi ken bautismo ket napategda nga addang agpaay kadagidiay sumrek iti Pagarian. Gapuna, simmungbat ni Juan: ‘Bautisarak dagiti agbabbabawi a managbasol iti danum, ngem kalpasan kaniak, ti maysa a nabilbileg bautisarannakayto iti nasantuan nga espiritu ken iti apuy. Adtoy, saanak pay a maikari a mangwarwar iti pallukana. Ket agannadkayo! Ti supladna a pagtaep adda iti imana ket urnongennanto ti trigo iti kamaligna ngem puoran ken dadaelennanto ti taep.’ (Lucas 3:15-17; Aramid 1:5) Kinapudnona, maitedto ti nasantuan nga espiritu kadagiti pasurot ti Mesias, ngem mapasaranto dagiti kabusorna ti apuy ti pannakadadael.

Naballaagan ti “Amin a Kita ti Tattao”

Natignay unay ti adu a nasingpet panagpuspusona a Judio babaen kadagiti sasao ni Juan ket sibabatad nga impudnoda dagiti basolda iti di kinamatalek iti Linteg ti tulag. Imparangarangda a sibabatad ti panagbabawida babaen ti panangipalubosda ken ni Juan a mangbautisar kadakuada iti Karayan Jordan. (Mateo 3:5, 6) Kas banagna, dagiti pusoda ket adda iti nasayaat a kasasaad a mangawat iti Mesias. Iti panangep-ep iti wawda iti pannakaammo kadagiti nalinteg a pagannurotan ti Dios, siraragsak nga insuro ida ni Juan kas ad-adalanna, nga insurona pay kadakuada no kasanot’ agkararag.​—Lucas 11:1.

Maipapan iti daytoy a nangyam-ammo iti Mesias, nagsurat ni apostol Juan: “Daytoy a lalaki immay a kas pangsaksi, tapno saksianna ti maipapan ti silaw, tapno amin a kita ti tattao mamatida koma babaen kenkuana.” (Juan 1:7) Gapuna, dimteng dagiti amin a kita ti tattao tapno umimdeng ken Juan a Mammautisar bayat nga “inkaskasabana kadagiti isuamin nga umili ti Israel ti bautismo kas simbolo ti panagbabawi.” (Aramid 13:24) Binallaaganna dagiti agsingsingir iti buis maibusor iti panagkikil. Pinakdaaranna dagiti soldado maibusor iti panangriribuk iti asinoman wenno panangaramid kadagiti ulbod a darum. Ket kinunana kadagiti managpammarang, managinsisingpet a Fariseo ken Saduceo: “Dakayo a putot dagiti karasaen, asino ti nangiparipirip kadakayo nga aglisikayo manipud um-umay a pungtot? Gapuna ngarud mangpataudkayo iti bunga a maitutop iti panagbabawi; ket dikay ipapan a kunaenyo iti bagbagiyo, ‘Kas maysa nga ama adda kadakami ni Abraham.’ Ta kunak kadakayo a ti Dios kabaelanna ti mangpatanor kadagiti annak ken Abraham manipud kadagitoy a batbato.”​—Mateo 3:7-9; Lucas 3:7-14.

Kas maysa a grupo, saan a namati kenkuana dagiti relihiuso a pangulo idi kaaldawan ni Juan ket siuulbod a pinabasolda nga adda sairona. Linaksidda ti dalan ti kinalinteg a mangiturong iti biag nga agnanayon. Iti sabali a bangir, nagbabawi ken nabautisaran dagiti managbasol nga agsingsingir iti buis ken balangkantis a namati iti pammaneknek ni Juan. Idi agangay, inawatda ni Jesu-Kristo kas ti Mesias.​—Mateo 21:25-32; Lucas 7:31-33.

Nayam-ammo ti Mesias

Iti innem a bulan​—manipud iti primavera agingga iti otonio ti 29 K.P.​—inturong ti matalek a saksi ti Dios a ni Juan ti atension dagiti Judio iti um-umayen a Mesias. Panawen idin ti panagparang ti Mesianiko nga Ari. Ngem idi nagparang, isut’ napan iti isu met laeng a danum ti Jordan ket kiniddawna a mabautisaran. Idi damo, nagtukiad ni Juan, ngem immanamong kalpasanna. Panunotenyo ti rag-ona idi bimmaba ken Jesus ti nasantuan nga espiritu ket nangngegan ti timek ni Jehova a nangyebkas iti anamongna iti Anakna.​—Mateo 3:13-17; Marcos 1:9-11.

Ni Juan ti immuna a nakabigbig ken Jesus kas ti Mesias, ket inyam-ammona dagiti mismo nga adalanna iti daytoy a Napulotan. “Kitaenyo,” kinuna ni Juan, “ti Kordero ti Dios a mangikkat ti basol ti lubong!” Impakaammona met: “Isu daytoy daydiay a maipapan kenkuana kinunak, Iti likudak umay ti maysa a tao nga immun-una iti sanguanak, agsipud ta naadda nga immun-una ngem siak. Uray pay diak am-ammo idi, ngem ti rason no apay nga immayak mangbautisar iti danum ket tapno isu maiparangarang koma iti Israel.”​—Juan 1:29-37.

Ti trabaho ni Juan ket kagiddan ti ministerio ni Jesus iti agarup innem a bulan. Agpadada a makatarus iti trabaho nga ar-aramiden ti tunggal maysa. Minatmatan ni Juan ti bagina kas gayyem ti Nobio ket naragsakan a makakita iti irarang-ay ni Kristo bayat nga isut’ kumapkapuy ken ti trabahona.​—Juan 3:22-30.

Binigbig ni Jesus ni Juan kas ti mangyam-ammo kenkuana, nga inladawan ni Elias. (Mateo 11:12-15; 17:12) Iti maysa nga okasion, kinuna ni Jesus: “Ti Linteg ken dagiti Mammadto naginggada ken Juan. Manipud idin ti pagarian ti Dios ket maidekdeklara a kas naimbag a damag, ket tunggal kita ti tao agregregget nga agturturong iti dayta.”​—Lucas 16:16.

Matalek Agingga ken Patay

Natiliw ken naibalud ni Juan agsipud ta situtured nga impakaammona ti kinapudno. Saanna a liniklikan ti responsabilidadna a mangibutaktak uray pay ti basol ni Ari Herodes. Maisalungasing iti linteg ti Dios, nakikamalala dayta nga ari iti mismo nga asawa ti kabsatna, ni Herodias. Situtured a nagsao ni Juan tapno agbabawi koma [ni Ari Herodes] ket makagun-od iti asi ti Dios.

Anian a nagsayaat ni Juan a pagulidanan iti pammati ken ayat! Insakripisiona ti personal a wayawayana, pinaneknekanna ti kinamatalekna ken Jehova a Dios ken ti ayatna kadagiti padana a tao. Kalpasan ti makatawen a pannakaibaludna, naputolan ni Juan maigapu iti impaltiing ti Diablo a ganuat nga insayangkat ni nadangkes a Herodias, nga adda ‘ing-ingpenna idi a sakit ti nakem’ kenkuana. (Marcos 6:16-19; Mateo 14:3-12) Ngem tinaginayon ti nangyam-ammo iti Mesias ti kinatarnawna ken Jehova ket iti din agbayag, mapagungarton kadagiti natay tapno tagiragsakenna ti biag iti baro a lubong ti Dios iti kinalinteg.​—Juan 5:28, 29; 2 Pedro 3:13.