CAINAN

1. Anak ni Enos; inapo ni Maria a natauan nga ina ni Jesus. (Lu 3:37) Ni Cainan ket nabatad a naawagan Quenan iti Genesis 5:9-14 ken 1 Cronicas 1:2.

2. Anak ni Arpaksad sigun iti kapuonan ni Jesu-Kristo nga inlanad ni Lucas. (Lu 3:36) Agparang ti nagan a Cainan kadagiti listaan ti kapuonan kadagiti agdama a kopia ti Griego a Septuagint, kas iti Alexandrine Manuscript iti maikalima a siglo K.P. (Ge 10:24; 11:12, 13; 1Cr 1:18 ngem awan iti 1Cr 1:24), nupay saan a masarakan dayta kadagiti adda pay la ita a Hebreo a manuskrito ti Hebreo a Kasuratan. Awan met ti nagan a Cainan iti Lucas 3:36 iti dua a manuskrito ti Biblia (Papyrus Bodmer 14, 15, iti a. 200 K.P.; Codex Bezae, iti maikalima a siglo K.P.). Daytoy a panangikkat ket maitunos iti Masoretiko a teksto iti Genesis 10:24; 11:12, 15; ken iti 1 Cronicas 1:18, a sigun kadagitoy, ni Sela, saan a ni Cainan, ti anak ni Arpaksad.​—Kitaenyo ti ARPAKSAD; KAPUONAN NI JESU-KRISTO (Parikut iti Listaan ti Kapuonan ni Jesus nga Inlanad ni Lucas).