GENESARET

1. Maysa a bassit ken sinan-trianggulo a tanap a kabinneddeng ti makin-amianan a laud nga igid ti Baybay ti Galilea ken addaan iti rukod nga agarup 5 por 2.5 km (3 por 1.5 mi). Iti daytoy a rehion a nangaramid ni Jesu-Kristo kadagiti namilagruan a panangpaimbag. (Mt 14:34-36; Mr 6:53-56; LADAWAN, Tomo 2, p. 739) Sigun iti Judio a historiador a ni Josephus, daytoy a tanap ket napintas, nabunga, ken nasayaat ti pannakapadanumna a rehion, a sadiay naruay ti kaykayo a nogales, palma, ken olibo, ken sadiay adda dagiti maburas a higos ken ubas iti uneg ti sangapulo a bulan iti makatawen.​—The Jewish War, III, 516-521 (x, 8).

2. “Ti danaw ti Genesaret” ket sabali pay a nagan ti Baybay ti Galilea. (Lu 5:1) Patien ti dadduma nga eskolar a ti Genesaret ket nalabit Griego a porma ti nagkauna a Hebreo a nagan a Kinneret.​—Nu 34:11; kitaenyo ti GALILEA, BAYBAY TI.