Ti Biag ken Ministerio ni Jesus

Inikkat ni Jesus ti Panagladingit ti Balo

DI NAGBAYAG kalpasan ti panangagasna ti adipen ti panguluen dagiti buyot, nagturong ni Jesus idiay Nain, maysa a siudad a nasurok a 20 milia (32 km) iti abagatan a laud ti Capernaum. Dagiti ad-adalanna ken maysa a dakkel a bunggoy ti kimmuyog kenkuana. Nalabit agsurepeten idi nga umadanida iti masungadan ti Nain, a sadiay nasabatda ti maysa a pamompon. Ti bangkay ti maysa nga agtutubo a lalaki imbaklayda nga inruar iti siudad a maitabon.

Ti kasasaad ti ina ti nangnangruna a nakalkaldaang, agsipud ta isu ket maysa a balo ket daytoy ti kakaisuna nga anakna. Idi natay ni lakayna, isu ti naliwliwa iti kinapudno nga isut’ addaan iti maysa nga anak a lalaki. Dagiti namnamana, tartarigagayna, ken ambisionna naigamerda amin iti masanguanan ti anakna. Ngem itan awanen ti uray maysa a pakasarakanna ti liwliwa. Nagdakkel ti leddaangna bayat nga isut’ kinuyog dagiti umili nga agturong iti pakaitabunan.

Idi nakita ni Jesus ti baket, natignay ti pusona iti napalalo a kinaladingitna. Buyogen iti kinamanangngaasi, kaskasdi addaan kinatibker nga isut’ nangiparikna iti panagtalek, kunana iti baket: “Dika agsangit.” Ti kababalinna ken ti panagtignayna ti nangallukoy iti atension dagiti umariwekwek. Gapuna idi umasideg ket sagidenna ti nakaikabilan ti bangkay nga aw-awitenda, nagsardeng dagiti manangibaklay. Mabalin nga amin pampanunotenda no ania ti aramidenna.

Pudno a dagidiay kimmuyog ken ni Jesus ti nakakita kenkuana a nangpaimbag a simimilagro iti adu a tattao kadagiti saksakitda. Ngem kaawatan saanda pay pulos a nakitkita a nangpagungar iti asinoman manipud ken patay. Maaramidanna aya ti kasta a banag? Nagsao iti bangkay, binilin ni Jesus: “Baro, kunak kenka, Bumangonka!” Ket bimmangon daydi lalaki! Isu ti kinasaritana, ket isu ti inted ni Jesus ken inana.

Idi nakita dagiti tattao a ti baro ti pudpudno a sibibiag, kunada: “Ti maysa a dakkel a mammadto timmaud kadatayo.” Dadduma kunada: “Ti Dios sinarungkaranna dagiti tattaona.” Dagdagus nagrakurak daytoy a damag iti intero a Judea ken iti pay met amin a daga a kabangibang.

Ni Juan a Mammautisar ti kaskasdi adda pay idiay pagbaludan. Ngem dagiti ad-adalanna impadamagda kenkuana amin dagitoy a bambanag a nakitada nga ar-aramiden ni Jesus. Ania ti rikna ni Juan? Ket ania ti rikna dagiti adu pay a sabsabali iti dayta a lugar a nangaramidan ni Jesus kadagiti datdatlagna? Ti sumaruno a ruartayo ti sumungbat. Lucas 7:11-18.

◆ Aniat’ mapaspasamak idi umadani ni Jesus idiay Nain?

◆ Kasano a naapektaran ni Jesus iti inna nakita, ket ania ti aramidenna?

◆ Kasanot’ panagtignay dagiti tattao iti datdatlag nga inaramid ni Jesus?