Dagiti Gunggona iti Panangipateg iti Sao ti Dios
“Ayatem [ti sirib], ket saluadannakanto. . . . Ipannakanto iti kinadayaw, inton isu arakupem.”—PROVERBIO 4:6, 8.
1. Ania ti kaipapanan ti pudpudno a panangipateg iti Sao ti Dios?
NAPATEG iti maysa a Kristiano ti panagbasa iti Biblia. Nupay kasta, ti basta panagbasa laeng dina ipamatmat ti panangipateg iti Sao ti Dios. Kasanon no basbasaen ti maysa a tao ti Biblia ngem ar-aramidenna met dagiti banag a kondenaren ti Biblia? Nalawag a dina ipatpateg ti Sao ti Dios a kas iti panangipateg iti dayta ti nangputar iti maika-119 a Salmo. Ti panangipateg iti Sao ti Dios ti nangtignay kenkuana nga agbiag a mayannurot kadagiti pagalagadan daytoy.—Salmo 119:97, 101, 105.
2. Ania ti naimbag a maaramidan ti sirib a naibatay iti Sao ti Dios?
2 Ti panagbiag a maitunos iti Sao ti Dios kalikagumanna ti agtultuloy a panangbalbaliw iti panagpampanunot ken kabibiag. Ti kasta a tignay iyanninawna ti nadiosan a sirib, a kaipapananna ti praktikal a panangyaplikar iti pannakaammo ken pannakaawat a nagun-od iti panagadal iti Biblia. “Ayatem [ti sirib], ket saluadannakanto. Itantan-okmo, ket isu ipangatonakanto; ipannakanto iti kinadayaw, intono isu arakupem. Ikkannanto ta ulom iti balangat ti saniata: balangat ti kinapintas ti iyawatnanto kenka.” (Proverbio 4:6, 8, 9) Nagsayaat ketdin a pammaregta maipapan iti panangipateg iti Sao ti Dios ken panagpaidalan iti dayta! Siasino ti dina kayat ti masaluadan, maitan-ok, ken maidayaw?
Masaluadan iti Agnanayon a Pannakadangran
3. Apay nga ad-adda ita a kasapulan a masaluadan dagiti Kristiano, ken manipud siasino?
3 Kasano a masaluadan ti maysa a tao babaen ti sirib a magun-odanna iti panagadal ken panangyaplikar iti Sao ti Dios? Umuna, masaluadan manipud ken Satanas a Diablo. Insuro ni Jesus dagiti pasurotna nga ikararagda ti pannakailisida iti managdakdakes a ni Satanas. (Mateo 6:13) Iti tiempotayo, pudno a nagpateg nga iramantayo nga idawat daytoy kadagiti kararagtayo. Naitapuak ni Satanas ken dagiti demoniona manipud langit kalpasan ti 1914, isut’ gapuna nga addaan ni Satanas iti “dakkel nga unget, yantangay ammona nga ababan ti periodo ti tiempona.” (Apocalipsis 12:9, 10, 12) Tangay bassit laengen ti tiempona, sigurado a gumilgil-ayab ti pungtotna bayat a di naballigi a makigubgubat kadagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.”—Apocalipsis 12:17.
4. Kasano a masaluadan dagiti Kristiano kadagiti impluensia ken silo ni Satanas?
4 Agtultuloy a sipupungtot a rirriribuken ni Satanas dagitoy a Kristiano a ministro ken mangparparnuay iti naranggas a panangidadanes wenno dadduma pay a tubeng iti aktibidadda. Kayatna met nga allukoyen dagiti manangiwaragawag iti Pagarian a mangipangpangruna kadagiti banag a kas iti nailubongan a kinalatak, panaglinglingay, panagpabaknang, ken ragragsak, imbes a ti panangikasaba iti Pagarian. Ania ti mangsaluad kadagiti matalek nga adipen ti Dios tapno saan ida a maimpluensiaan ni Satanas wenno matnag kadagiti palab-ogna? Siempre, nasken ti panagkararag, nasinged a relasion ken ni Jehova, ken panagtalek kadagiti di makeltay a karina. Ngem mainaig amin dagitoy iti pannakaammo ken determinasion a mangipangag kadagiti pammalagip ti Sao ti Dios. Mapalagipantayo babaen ti panagbasa iti Biblia ken kadagiti katulongan iti panagadal iti Biblia, itatabuno kadagiti Nakristianuan a gimong, panangipangag iti Nainkasuratan a balakad ti maysa a kapammatian, wenno babaen laeng ti napasnek a panangutob kadagiti prinsipio ti Biblia nga ipalagip ti espiritu ti Dios.—Isaias 30:21; Juan 14:26; 1 Juan 2:15-17.
5. Kadagiti ania a pamay-an a masaluadannatayo ti sirib a naibatay iti Sao ti Dios?
5 Masaluadan dagidiay mangipatpateg iti Sao ti Dios iti dadduma pay a pamay-an. Kas pagarigan, maliklikanda ti pannakaburibor ken dagiti sakit nga ibunga dagiti banag a kas iti panagdroga, panagtabako, ken seksual nga imoralidad. (1 Corinto 5:11; 2 Corinto 7:1) Saanda a degdegan ti nariribuk a relasion babaen ti panagtsismis wenno nagubsang a panagsasao. (Efeso 4:31) Maliklikanda met ti panagduadua a maigapu iti panangsukimat kadagiti makaallilaw a pilosopia ti sirib ti lubong. (1 Corinto 3:19) Babaen ti panangipateg iti Sao ti Dios, masaluadanda kadagiti banag a mangrabsut iti relasionda iti Dios ken iti namnama a biag nga agnanayon. Nagagetda a tumultulong kadagiti kaarrubada nga agtalek kadagiti nakaskasdaaw a kari nga adda iti Biblia, nga ammoda a no aramidenda dayta ‘maisalakandanto agpadpada ti bagbagida ken dagidiay agimdeng kadakuada.’—1 Timoteo 4:16.
6. Kasano a masaluadannatayo ti sirib a naibatay iti Sao ti Dios uray iti sidong dagiti narigat a kasasaad?
6 Pudno a sumangbay iti tunggal maysa—uray kadagidiay mangipatpateg iti Sao ti Dios—“ti panawen ken di mapakpakadaan a pasamak.” (Eclesiastes 9:11,) Di maliklikan a mapasaran ti dadduma kadatayo dagiti natural a didigra, nakaro a saksakit, aksidente, wenno di mapakpakadaan nga ipapatay. Kaskasdi, masaluadantayo latta. Awan ti kalamidad a permanente a mangdangran iti tao a pudno a mangipatpateg iti Sao ti Dios. Ditay koma ngarud pakariribukan unay ti mabalin a mapasamak iti masanguanan. No inaramidtayon amin a rasonable a panagannad, nasaysayaat nga italektayo ken ni Jehova dagiti bambanag ket ditay ipalubos a paidamannatayo iti talna ti kinaawan talged ti biag ita. (Mateo 6:33, 34; Filipos 4:6, 7) Laglagipenyo a dinto makeltay ti namnama a panagungar ken ti nasaysayaat a biag inton ti Dios ‘pagbalinenna a baro amin a banag.’—Apocalipsis 21:5; Juan 11:25.
Paneknekanyo a ‘Naimbagkayo a Daga’
7. Ania nga ilustrasion ti insarita ni Jesus kadagiti tattao nga immay dimngeg kenkuana?
7 Naipaganetget iti maysa kadagiti pangngarig ni Jesus ti kinapateg ti umiso a panangmatmat iti Sao ti Dios. Bayat nga inkaskasaba ni Jesus ti naimbag a damag iti intero a Palestina, naguurnong dagiti tattao tapno dumngegda kenkuana. (Lucas 8:1, 4) Nupay kasta, saan nga amin ket pudno a mangipatpateg iti Sao ti Dios. Awan duadua nga adu ti immay dimngeg kenkuana ta kayatda ti makakita kadagiti milagro wenno gapu ta magustuanda ti nakaskasdaaw a wagas ti panangisurona. Gapuna, adda maysa nga ilustrasion nga insarita ni Jesus kadagidi tattao: “Maysa a managmula ti rimmuar tapno imulana ti bin-ina. Ala ket, bayat nga agimulmula, sumagmamano iti dayta nagdissoda iti igid ti dalan ket naipayatpayatda, ket dagiti tumatayab iti langit kinnanda dayta. Ti dadduma pay nagdisso iti masa a bato, ket, kalpasan a timmubo, nagango agsipud ta awan dam-egna. Ti dadduma nagdisso iti nagbabaetan dagiti sisiitan, ket lineppes dayta dagiti sisiitan a nakigiddan a dimmakkel iti dayta. Ti dadduma pay nagdisso iti naimbag a daga, ket, kalpasan a timmubo, nangpataud iti bunga a sagsangagasut.”—Lucas 8:5-8.
8. Iti ilustrasion ni Jesus, ania ti bin-i?
8 Impakita ti pangngarig ni Jesus a nagduduma dagiti reaksion iti pannakaikaskasaba ti naimbag a damag, depende iti panagpuspuso ti agdengdengngeg. Ti bin-i a naimula isu “ti sao ti Dios.” (Lucas 8:11) Wenno, kas kuna ti maysa pay a salaysay maipapan iti pangngarig, ti bin-i isu “ti sao ti pagarian.” (Mateo 13:19) Mabalin nga aramaten ni Jesus ti aniaman kadagita nga ebkas, tangay ti tema ti Sao ti Dios isu ti nailangitan a Pagarian iti sidong ni Jesu-Kristo kas Ari. Dayta a Pagarian ti usaren ni Jehova a mangalangon iti kinasoberanona ken mangsantipikar iti naganna. (Mateo 6:9, 10) No an-anagen ngarud, ti bin-i isu ti mensahe maipapan iti naimbag a damag a masarakan iti Sao ti Dios, ti Biblia. Itamtampok dagiti Saksi ni Jehova daytoy a mensahe maipapan iti Pagarian bayat ti panangimulada iti bin-i kas panangtulad iti immuna a Managmula, ni Jesu-Kristo. Ania a reaksion ti masarakanda?
9. Ania ti iladladawan ti bin-i a nagdisso iti (a) igid ti dalan? (b) kabatuan? (c) kasiitan?
9 Kinuna ni Jesus nga agdisso ti sumagmamano a bin-i iti igid ti dalan a pakapayatpayatanda. Kasta ti kayarigan dagiti tattao nga adu unay ti pakakumikomanda, isu a saan nga agramut ti bin-i ti Pagarian iti pusoda. Sakbay a maipategda ti Sao ti Dios, “ti Diablo umay ket ikkatenna ti sao manipud kadagiti pusoda tapno dida koma mamati ket maisalakanda.” (Lucas 8:12) Adda met sumagmamano a bin-i nga agdisso iti kabatuan. Kasta ti kayarigan dagiti tattao a maay-ayo iti mensahe ti Biblia ngem saan nga umukuok iti pusoda. No dumteng ti ibubusor wenno no marigatanda a mangsurot iti balakad ti Biblia, “umikayda” gapu ta awan ramutda. (Lucas 8:13) Sa adda dagidiay dumngeg iti sao ngem malapunosda kadagiti “pakaringgoran ken kinabaknang ken ragragsak daytoy a biag.” Inton agangay, kas kadagiti mula a mapulipolan iti sisiit, “naan-anay a malpesda.”—Lucas 8:14.
10, 11. (a) Siasino ti iladladawan ti nasayaat a daga? (b) Ania ti masapul nga aramidentayo tapno ‘agtalinaed’ ti Sao ti Dios iti pusotayo?
10 Kamaudiananna, adda bin-i nga agdisso iti nasayaat a daga. Maipapan daytoy kadagiti tattao a dumngeg iti mensahe buyogen ti “nasayaat ken naimbag a puso.” Natural laeng a kayat a panunoten ti tunggal maysa kadatayo a maibilangtayo kadagiti kasta a tattao. Ngem ti napateg isu ti panangmatmat ti Dios. (Proverbio 17:3; 1 Corinto 4:4, 5) Kuna ti Saona a maipaneknektayo nga addaantay iti “nasayaat ken naimbag a puso” babaen kadagiti aramidtayo manipud ita agingga iti ipapataytayo wenno agingga a pagpatinggaen ti Dios daytoy dakes a sistema ti bambanag. Nasayaat no positibo ti damo a reaksiontayo iti mensahe ti Pagarian. Nupay kasta, dagidiay addaan nasayaat ken naimbag a puso ipangagda ti Sao ti Dios ken “pagtalinaedenda dayta ket agbungada buyogen ti panagibtur.”—Lucas 8:15.
11 Ti kakaisuna a sigurado a pamay-an tapno agtalinaed ti Sao ti Dios iti pusotayo isu ti panangbasa ken panangadal iti dayta a personal ken no kaduatayo dagiti kapammatiantayo. Ramanen daytoy ti naan-anay a panangaprobetsar iti naespirituan a taraon a maipapaay babaen ti kalasugan a natudingan a mangaywan iti naespirituan a pagimbagan dagiti pudno a pasurot ni Jesus. (Mateo 24:45-47) Babaen kadagita a pamay-an, dagidiay mangtaginayon iti Sao ti Dios iti pusoda magutugotda gapu iti ayat nga ‘agbunga buyogen ti panagibtur.’
12. Ania ti bunga a masapul a pataudentayo buyogen ti panagibtur?
12 Ania a bunga ti patauden ti nasayaat a daga? Iti literal a panagmula, agtubo dagiti bukel agingga nga agbalinda a mula a mangpataud iti bunga nga addaan iti isu met la a kita ti bukel, a mabalin nga ibunubon tapno agbunga met. Umasping iti dayta, kadagidiay addaan nasayaat ken naimbag a panagpuspuso, agtubo kadakuada ti bin-i ti sao, ket dumakkelda iti naespirituan agingga nga isudanto met ti agimula iti bin-i iti puso dagiti dadduma. (Mateo 28:19, 20) Ket nabuyogan iti panagibtur ti trabahoda a panagmula. Impakita ni Jesus ti kinapateg ti panagibtur iti panagmula idi kinunana: “Ti nakapagibtur agingga iti panungpalan isunto ti maisalakan. Ket daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”—Mateo 24:13, 14.
‘Panagbunga iti Tunggal Naimbag nga Aramid’
13. Ania ti inkararag ni Pablo a namagnaig iti panagbunga ken ti pannakaammo iti Sao ti Dios?
13 Nadakamat met ni apostol Pablo ti kinapateg ti panagbunga, ket innaigna ti panagbunga iti Sao ti Dios. Inkararagna a dagiti kapammatianna “mapno[da] koma iti umiso a pannakaammo iti pagayatan [ti Dios] iti isuamin a sirib ken naespirituan a pannakaawat, tapno magna[da] a maikari ken Jehova maipaay iti panggep a panangay-ayo a naan-anay kenkuana bayat nga agtultuloy[da] nga agbunga iti tunggal naimbag nga aramid.”—Colosas 1:9, 10; Filipos 1:9-11.
14-16. Maitunos iti kararag ni Pablo, ania dagiti bunga a patauden dagidiay mangipatpateg iti Sao ti Dios?
14 No kasta, impakita ni Pablo a saan nga umdas ti pananggun-od iti pannakaammo iti Biblia. Imbes ketdi, ti panangipateg iti Sao ti Dios gutugotennatayo a ‘magna a maikari ken Jehova’ babaen ti agtultuloy a ‘panagbungatayo iti tunggal naimbag nga aramid.’ Ania a naimbag nga aramid? Ti panangikasaba iti naimbag a damag ti Pagarian isu ti naisangsangayan nga annongen dagiti Kristiano kadagitoy maudi nga al-aldaw. (Marcos 13:10) Mainayon pay, dagidiay mangipatpateg iti Sao ti Dios aramidenda ti amin a kabaelanda a mangipaay iti regular a pinansial a suporta iti daytoy a trabaho. Pagragsakanda daytoy a pribilehio, ta ammoda a ti “Dios ayatenna ti naragsak a manangited.” (2 Corinto 9:7) Mausar dagiti kontribusionda a pangsupusop iti magastos iti trabaho iti nasurok a sangagasut a pasilidad ti Bethel a mangimatmaton iti trabaho a panangikasaba iti Pagarian ket dadduma kadagita ti pakaaramidan dagiti Biblia ken dagiti literatura a mainaig iti Biblia. Makatulong met dagiti kontribusionda a pangsupusop iti magastos kadagiti dadakkel a Nakristianuan a kombension ken iti pannakaibaon dagiti agdaldaliasat a manangaywan, misionero, ken dadduma pay nga amin-tiempo nga ebanghelisador.
15 Maibilang met a naimbag nga aramid ti panangbangon ken panangaywan kadagiti pasdek a mausar iti pudno a panagdayaw. Gapu iti panangipategda iti Sao ti Dios, magutugot dagiti agdaydayaw kenkuana a mangsierto a saan a mabaybay-an dagiti Assembly Hall ken Kingdom Hall. (Idiligyo ti Nehemias 10:39.) Yantangay agparang ti nagan ti Dios iti sango dagita a patakder, nasken a kanayon a nadalus ken makaay-ayo dagitoy iti uneg ken ruar ken awan koma ti pakababalawan ti kondukta dagidiay agdaydayaw nga adda iti uneg dagita a patakder. (2 Corinto 6:3) Adu pay ti maaramidan dagiti dadduma a Kristiano. Ti panangipateg iti Sao ti Dios ti mangtignay kadakuada a mapan kadagiti adayo a disso tapno tumulongda a mangbangon kadagiti baro a lugar a pagdayawan kadagiti paset ti lubong nga adda panagkasapulan gapu iti kinapanglaw wenno kinakurang dagiti nalaing a trabahador.—2 Corinto 8:14.
16 Ti ‘panagbunga iti tunggal naimbag nga aramid’ ramanenna met ti panangtungpal kadagiti obligasion iti pamilia ken pannakaseknan kadagiti pada a Kristiano. Ti panangipateg iti Sao ti Dios gutugotennatayo a tumulong kadagidiay “nainaig kadatayo iti pammati” nga agkasapulan ken ‘mangannurot iti nadiosan a debosion iti bukodtayo a sangakabbalayan.’ (Galacia 6:10; 1 Timoteo 5:4, 8) Iti daytoy a banag, naimbag nga aramid ti panangbisita kadagiti masakit ken panangliwliwa kadagiti agladladingit. Ken anian a nagsayaat ti magapgapuanan dagiti panglakayen iti kongregasion ken dagiti Hospital Liaison Committee a tumultulong kadagiti indibidual a maipasango kadagiti narikut a medikal a situasion! (Aramid 15:29) Umad-adu met dagiti didigra—a ti dadduma kadagitoy ket nakaparsuaan ken adda met dagidiay gapuanan ti kinamaag ti tao. Iti tulong ti espiritu ti Dios, nasayaat ti pakasarsaritaan dagiti Saksi ni Jehova iti adu a paset ti daga gapu iti naalibtak a panangsaranayda kadagiti kapammatianda ken iti dadduma pay a biktima dagiti didigra ken aksidente. Amin dagitoy ket naimbag a bunga nga iparparangarang dagidiay mangipatpateg iti Sao ti Dios.
Dagiti Nadayag a Gunggona iti Masanguanan
17, 18. (a) Ania ti maitungtungpal ti pannakaimula ti bin-i ti Pagarian? (b) Aniada a makapakintayeg a pasamak ti maimatanganto iti saan a mabayag dagiti mangipatpateg iti Sao ti Dios?
17 Ti pannakaimula ti bin-i ti Pagarian ket agtultuloy a mangpatpataud iti agkakaimbag a gunggona iti sangatauan. Kadagitoy kallabes a tawen, nasurok a 300,000 a tattao kada tawen ti nangipalubos iti mensahe ti Biblia nga agramut iti pusoda ket indedikarda ti biagda ken ni Jehova ket insimboloda daytoy babaen ti panagpabautisar iti danum. Anian a nagdayag a masanguanan ti agur-uray kadakuada!
18 Ammo dagiti mangipatpateg iti Sao ti Dios a din agbayag agtignayto ni Jehova a Dios tapno itan-okna ti naganna. Madadaelto ti “Babilonia a Dakkel,” ti sangalubongan nga imperio ti palso a relihion. (Apocalipsis 18:2, 8) Kalpasanna, papatayento ti Ari a ni Jesu-Kristo, dagidiay agkedked nga agbiag a mayannurot iti Sao ti Dios. (Salmo 2:9-11; Daniel 2:44) Kalpasanna, ti Pagarian ti Dios pagpatinggaennanto a maminpinsan ti krimen, gubat, ken dadduma pay a didigra. Saanton a kasapulan a liwliwaen dagiti tattao gapu iti rigat, sakit, ken ipapatay.—Apocalipsis 21:3, 4.
19, 20. Ania a nadayag a masanguanan ti agur-uray kadagidiay pudpudno a mangipatpateg iti Sao ti Dios?
19 Anian nga agkakaimbagto dagiti magapuanan dagidiay mangipatpateg iti Sao ti Dios! Dagiti makalasat iti Armagedon sirarag-o a pagbalinendanto a paraiso ti daga. Maaddaandanto iti makapagagar a pribilehio a mangisagana kadagiti kasapulan dagiti natay nga agin-inana ita idiay tanem ken adda iti lagip ti Dios nga addaan namnama a mapagungar. (Juan 5:28, 29) Iti dayta a tiempo, agayusto kadagiti agnaed iti daga ti awan pagkuranganna a panangiwanwan nga agtaud ken ni Soberano nga Apo Jehova, babaen ti naitan-ok nga Anakna a ni Jesu-Kristo. ‘Maukradto dagiti lukot,’ a pakaipalgakan dagiti bilin ni Jehova para iti panagbiag iti baro a lubong.—Apocalipsis 20:12.
20 Iti panawen nga inkeddeng ni Jehova, amin dagiti matalek a napulotan a Kristiano maitan-okdanto iti nailangitan a gunggonada kas “makipagtawid ken Kristo.” (Roma 8:17) Bayat ti Sangaribu a Tawen a Panagturay ni Kristo, agbalinto a perpekto ti panunot ken bagi dagiti amin a tattao ditoy daga a mangipatpateg iti Sao ti Dios. Kalpasan a maipaneknekda ti kinamatalekda iti sidong ti maudi a pannubok, magunggonaandanto iti biag nga agnanayon ket sagrapendanto ti “nadayag a wayawaya dagiti annak ti Dios.” (Roma 8:21; Apocalipsis 20:1-3, 7-10) Anian a nagsayaatto a panawen dayta! Pudno unay, pinaraburannatay man ni Jehova iti nailangitan wenno naindagaan a namnama, ti manayon a panangipateg iti Saona ken determinasion nga agbiag a mayannurot iti nadiosan a sirib saluadannatayo. Ket iti masanguanan ‘ipannatayto iti kinadayaw agsipud ta inarakuptay dayta.’—Proverbio 4:6, 8.
Mailawlawagyo Kadi?
◻ Kasano a masaluadannatayo ti panangipateg iti Sao ti Dios?
◻ Ania ti bin-i iti ilustrasion ni Jesus, ken kasano ti pannakaimulana?
◻ Kasanotay a paneknekan a ‘naimbagtayo a daga’?
◻ Aniada a gunggona ti manamnama dagiti mangipatpateg iti Sao ti Dios?
[Ladawan iti panid 16]
Ti bin-i iti ilustrasion ni Jesus iladladawanna ti mensahe maipapan iti naimbag a damag a masarakan iti Sao ti Dios
[Credit Line]
Garo Nalbandian
[Ladawan iti panid 17]
Dagiti Saksi ni Jehova tultuladenda ti Naindaklan a Managmula
[Dagiti Ladawan iti panid 18]
Dagiti makalasat iti Armagedon sagrapendanto dagiti bunga ti daga