Tuladem ti Naindaklan a Managaramid iti Adalan
“Siputanyo no kasano ti panagimdengyo.”—LUCAS 8:18.
1, 2. Apay a rumbeng nga utobem no kasano ti pannakilangen ni Jesus kadagiti tattao bayat ti ministeriona?
ITUNGTUNGPAL ni Jesu-Kristo ti akemna kas ti Naindaklan a Mannursuro ken Managaramid iti Adalan idi kinunana kadagiti pasurotna: “Siputanyo no kasano ti panagimdengyo.” (Lucas 8:16-18) Dayta a prinsipio ket agaplikar met iti ministeriom kas maysa a Kristiano. No siputam wenno ipangagmo ti pannursuro maipapan iti Dios ken iti pangpanggepna, matignayka a mangyaplikar iti dayta ken agbalinka nga epektibo a manangiwaragawag iti Pagarian. Siempre, saanmo itan a mangngeg ti timek ni Jesus, ngem mabalinmo a basaen ti maipapan kadagiti imbaga ken inaramidna, kas naipalgak iti Kasuratan. Ania ti ipalgak ti Biblia maipapan iti pannakilangen ni Jesus kadagiti tattao bayat ti ministeriona?
2 Ni Jesus ket maysa a nalaing a manangikasaba iti naimbag a damag ken mapagulidanan a mannursuro iti Nainkasuratan a kinapudno. (Lucas 8:1; Juan 8:28) Ti trabaho a panagaramid iti adalan agpadpada a ramanenna ti panangasaba ken panangisuro. Nupay kasta, nalaing a mangasaba ti dadduma a Kristiano ngem marigatanda a mangisuro a sieepektibo. Ti panangasaba ramanenna ti panangiwaragawag iti maysa a mensahe, ngem ti panangisuro kadagiti tattao maipapan ken Jehova ken iti pangpanggepna masansan a kalikagumanna a ti mangyad-adal ket maaddaan iti nasayaat a relasion kadagiti iyad-adalanna. (Mateo 28:19, 20) Mabalin a maaramid dayta babaen ti panangtulad ken Jesu-Kristo, ti Naindaklan a Mannursuro ken Managaramid iti Adalan.—Juan 13:13.
3. Ania ti maitulong ti panangtuladmo ken Jesus iti panagreggetmo nga agaramid kadagiti adalan?
3 No tuladem dagiti pamay-an ti panangisuro ni Jesus, ipangpangagmo ti balakad ni apostol Pablo: “Itultuloyyo ti magna a sisisirib kadagidiay adda iti ruar, a gatangenyo ti nainggundawayan a tiempo maipaay iti bagbagiyo. Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.” (Colosas 4:5, 6) Kas panangtulad ken Jesus iti trabaho a panagaramid iti adalan, kasapulam ti panagregget, ngem dayta ti mamagbalin nga epektibo ti panangisurom agsipud ta tumulong dayta kenka ‘a sumungbat iti tunggal maysa’ sigun iti kasapulanna.
Pinaregta ni Jesus ti Sabsabali Tapno Agsaoda
4. Apay a maikunatayo a ni Jesus ket maysa a naimbag a managimdeng?
4 Sipud kinaubingna, ugali ni Jesus ti dumngeg kadagiti tattao ken mangparegta kadakuada a mangyebkas kadagiti kapanunotanda. Kas pagarigan, idi agtawen iti 12, ni Jesus ket nasarakan ti dadakkelna iti tengnga dagiti mannursuro iti templo, nga “agim-imdeng kadakuada ken agsalsaludsod kadakuada.” (Lucas 2:46) Saan a napan ni Jesus idiay templo tapno pabainanna dagiti mannursuro babaen ti pannakaammona. Napan sadiay tapno agimdeng, nupay nagsalsaludsod met. Mabalin a ti maysa a rason a nagun-odna ti pabor ti Dios ken dagiti tattao ket ti kinalaingna nga agimdeng.—Lucas 2:52.
5, 6. Kasanotay nga ammo a nagimdeng ni Jesus kadagiti ebkas dagidiay sinursuruanna?
5 Kalpasan a nabautisaran ken napulotan kas Mesias, intultuloy nga impakita ni Jesus nga isu ket interesado a dumngeg kadagiti tattao. Saan a nalabes ti panangipamaysana iti isursurona nga uray la a dinan inkankano dagiti immay dimngeg kenkuana. Masansan nga agsardeng biit tapno damagenna ti pampanunotenda, ken imdengan dagiti sungbatda. (Mateo 16:13-15) Kas pagarigan, kalpasan ti ipapatay ni Lazaro a kabsat ni Marta, kinuna ni Jesus kenkuana: “Tunggal maysa a sibibiag ken mangwatwat iti pammati kaniak saanto a pulos matay.” Sana inyimtuod kenkuana: “Patiem kadi daytoy?” Ket sigurado a nagimdeng ni Jesus bayat a simmungbat ni Marta: “Wen, Apo; namatiak a sika ti Kristo nga Anak ti Dios.” (Juan 11:26, 27) Anian a makaparagsak a denggen ti panangyebkas ni Marta iti pammatina!
6 Idi a ni Jesus ket pinanawan ti adu kadagiti adalanna, isu ket interesado a dimngeg iti kapanunotan dagiti apostolna babaen ti panangyimtuodna: “Kayatyo kadi met ti mapan?” Simmungbat ni Simon Pedro: “Apo, iti siasino ti papananminto? Addaanka iti sasao ti agnanayon a biag; ket namatikami ken naammuanmi a sika Daydiay Santo ti Dios.” (Juan 6:66-69) Naragsakan la ketdi ni Jesus iti dayta a nangngegna! Sigurado a pakaragsakam met no mangngegmo manipud iti iyad-adalam iti Biblia ti kasta nga umasping nga ebkas ti pammati.
Nagimdeng ni Jesus Buyogen ti Panagraem
7. Apay nga adu a Samaritano ti namati ken Jesus?
7 Ti maysa pay a rason nga epektibo ni Jesus iti panagaramid iti adalan ket ti pannakaseknanna kadagiti tattao ken ti panagimdengna kadakuada buyogen ti panagraem. Kas pagarigan, adda idi gundaway a kinasabaan ni Jesus ti maysa a Samaritana iti asideg ti bubon ni Jacob idiay Sicar. Bayat ti panagpatangda, saan a binukbukodan ni Jesus ti nagsao no di ket inimdenganna met dayta a Samaritana. Bayat nga im-imdenganna, nadlaw ni Jesus a dayta a babai ket interesado iti panagdayaw isu nga imbaga kenkuana ni Jesus a ti Dios birbirokenna dagidiay agdayaw Kenkuana iti espiritu ken kinapudno. Impakita ni Jesus ti panagraem ken pannakaseknan iti dayta a babai. Kalpasan ti panagpatangda, napanna impakaammo iti sabsabali ti maipapan ken Jesus, ket “adu kadagiti Samaritano manipud iti dayta a siudad naaddaanda iti pammati kenkuana maigapu iti sao ti babai.”—Juan 4:5-29, 39-42.
8. Kasano a ti kinatulok dagiti tattao a mangyebkas iti opinionda tulongannaka a mangirugi iti saritaan no mapanka mangasaba?
8 Kaaduanna a situtulok dagiti tattao a mangyebkas iti kapanunotanda. Kas pagarigan, kaay-ayo dagiti umili iti nagkauna nga Atenas nga iyebkas ti opinionda ken imdengan ti baro a banag. Dayta ti makagapu a nagbalin nga epektibo ni apostol Pablo iti diskursona iti Areopago iti dayta a siudad. (Aramid 17:18-34) No mapanka mangasaba ita nga aldaw ket makasaritam ti maysa a bumalay, mabalin a kunaem, “Simmarungkarak ta kayatko nga ammuen ti kapanunotam maipapan iti [maysa a topiko].” Imdengam ti kapanunotan dayta a tao, agkomentoka wenno agimtuodka maipapan iti dayta. Kalpasanna, ipakitam no ania ti ibagbaga ti Biblia maipapan iti dayta a topiko.
Ammo ni Jesus no Kasano a Rugian ti Saritaan
9. Ania ti inaramid ni Jesus sakbay a ‘linukatanna a naan-anay dagiti Kasuratan’ para kenni Cleopas ken iti kaduana?
9 Kanayon nga adda maibaga ni Jesus. Malaksid iti kinalaingna nga agimdeng, masansan nga ammona ti pampanunoten dagiti tattao, isu nga ammona no ania a talaga ti nasken nga ibagana. (Mateo 9:4; 12:22-30; Lucas 9:46, 47) Kas panangyilustrar: Di nagbayag kalpasan ti panagungar ni Jesus, dua kadagiti adalanna ti magmagna manipud Jerusalem agingga idiay Emmaus. Kuna ti salaysay ti Ebanghelio a “bayat nga agpatpatang ken agsarsaritada idi, ni Jesus a mismo immasideg ket nangrugi a nagna a makikuyog kadakuada; ngem nakullaapan dagiti matada a makailasin kenkuana. Kinunana kadakuada: ‘Ania dagitoy a banag a pagdebdebateanyo bayat a magmagnakayo?’ Ket nagintekda a naliday dagiti rupada. Kas sungbat kinuna kenkuana ti maysa a managan Cleopas: ‘Agtataengka kadi a siksika laeng kas ganggannaet idiay Jerusalem ket iti kasta saanmo nga ammo ti bambanag a napasamak kenkuana kadagitoy nga aldaw?’ Ket kinunana kadakuada: ‘Ania a bambanag?’” Nagimdeng ti Naindaklan a Mannursuro bayat nga inlawlawagda a ni Jesus a Nazareno sinuruanna dagiti tattao, nagaramid kadagiti milagro, ken napapatay. Ita adda dagiti mangibagbaga nga isu ket napagungaren. Binay-an ni Jesus nga agsao ni Cleopas ken ti kaduana. Kalpasanna, inlawlawagna ti nasken a maammuanda, a ‘linukatanna a naan-anay dagiti Kasuratan’ para kadakuada.—Lucas 24:13-27, 32.
10. Kasanom a maammuan ti narelihiosuan a kapanunotan ti maysa a bumalay?
10 Mabalin nga awan ti ammom maipapan iti narelihiosuan a kapanunotan ti maysa a bumalay. Tapno maammuam, nalabit nga ibagam a kaay-ayom ti umimdeng iti kapanunotan dagiti tattao maipapan iti kararag. Kalpasanna, mabalin nga iyimtuodmo, “Iti panagkunam, adda met la ngata dumdumngeg kadagiti kararag?” Ti sungbat ti bumalay ket mabalin nga adu ti ipalgakna maipapan iti kapanunotan ken narelihiosuan a nalikudanna. No interesado iti narelihiosuan a banag, mabalin nga ammuem ti ad-adu pay maipapan iti kapanunotanna babaen ti panangisaludsodmo, “Patiem kadi nga imdengan ti Dios ti amin a kararag, wenno adda kadi dagiti kararag a dina anamongan?” Dagiti kasta a saludsod ti mabalin a manggutugot iti bumalay a sidadaan a makitungtong kenka. No maitutop nga ipakitam kenkuana ti kunaen ti Biblia iti dayta a banag, aramidem dayta a sitataktika, a saanmo a babalawen ti patpatienna. No magustuanna ti agimdeng kenka, mabalin a pakaragsakanna no sarungkaramto manen. Ngem kasano ngay no adda insaludsodna a dimo masungbatan? Mabalin nga agsirarakka pay tapno inton agsublika, nakasaganakanton a mangipaay iti ‘rason maipaay iti namnama nga adda kenka, ngem aramidem ti kasta buyogen ti naalumamay a kababalin ken nauneg a panagraem.’—1 Pedro 3:15.
Sinuruan ni Jesus Dagidiay Maikari
11. Ania ti tumulong kenka a mangbirok kadagidiay maikari a masursuruan?
11 Kas perpekto idi a tao, ni Jesus ket addaan iti pannakaawat a nakatulong kenkuana a mangilasin kadagiti maikari a masursuruan. Ngem saan a kasta kalaka kadatayo ti mangsapul kadagidiay “siuumiso nga agannayas iti agnanayon a biag.” (Aramid 13:48) Narigatan met uray dagiti apostol a nagkunaan ni Jesus: “Iti aniaman a siudad wenno purok a serkanyo, birokenyo no siasino iti dayta ti maikari.” (Mateo 10:11) Kas kadagiti apostol ni Jesus, masapul a birokem dagiti tattao a sidadaan nga agimdeng ken agpaisuro iti maipapan iti Nainkasuratan a kinapudno. Masarakam dagiti maikari babaen ti panagimdengmo a naimbag iti amin a kaskasabaam, a siputam ti kababalin ti tunggal maysa kadakuada.
12. Kasanom a maitultuloy a tulongan ti maysa nga interesado?
12 Kalpasan a nakasaritam ti maysa nga interesado iti mensahe ti Pagarian, nasayaat no itultuloymo a panunoten no ania a Nainkasuratan a kinapudno ti nasken nga isurom kenkuana. No inotarmo ti naammuam kalpasan ti pannakisaritam kenkuana maipapan iti naimbag a damag, dayta ti makatulong kenka tapno maitultuloymo a tulongan a rumang-ay iti naespirituan. Bayat dagiti panagsarungkarmo, nasken nga agimdengka a naimbag tapno maammuam ti ad-adu maipapan iti patpatien, kababalin, wenno kasasaadna.
13. Ania ti mabalin a makatulong kenka tapno maammuam ti kapanunotan ti maysa a tao maipapan iti Biblia?
13 Kasano a maparegtam dagiti tattao a mangyebkas iti kapanunotanda maipapan iti Dios? Iti dadduma a lugar, epektibo ti panangisaludsod iti, “Pinadasmo kadin a tarusan ti Biblia?” Ti sungbat ti maysa a tao iti dayta a saludsod masansan nga ipalgakna ti kapanunotanna maipapan iti Dios ken iti Biblia. Ti sabali pay a pamay-an ket ti panangibasam iti maysa a teksto samo isaludsod, “Panagkunam, rasonable kadi dayta?” Kas ken Jesus, mabalin a nabunga ti ministeriom no agusarka kadagiti maitutop a saludsod. Ngem nasken nga agannadka.
Sieepektibo a Nagusar ni Jesus Kadagiti Saludsod
14. Kasano a maipakitam nga interesadoka iti kapanunotan dagiti tattao iti pamay-an a saanka a kasla agpalpalutpot?
14 Ipakitam nga interesadoka iti kapanunotan ti sabsabali ngem iti wagas a dida koma mapabainan. Tuladem ti pamay-an ni Jesus. Saan a sidadarasudos a nagpalutpot, no di ket nagusar kadagiti mamagpanunot a saludsod. Siaasi met a nagimdeng ni Jesus isu a nabang-aran dagiti napasnek a tattao ken saanda nga alusiisen a makilangen kenkuana. (Mateo 11:28) Saan a bimdeng a nakisarita kenkuana ti amin a kita ti tattao tapno iyebkasda dagiti pakaseknanda. (Marcos 1:40; 5:35, 36; 10:13, 17, 46, 47) Tapno saan nga alusiisen dagiti tattao a mangibaga kenka iti kapanunotanda maipapan iti Biblia ken kadagiti pannursurona, nasken a liklikam ti pamay-an a kasla agpalpalutpotka.
15, 16. Kasanom a magutugot dagiti tattao a makisarita maipapan kadagiti narelihiosuan a banag?
15 Malaksid iti epektibo a panagusar kadagiti saludsod, mabalinmo a parayrayen ti saritaan babaen ti panangdakamatmo iti makapainteres a banag samo imdengan ti sungbat. Kas pagarigan, kinuna ni Jesus ken ni Nicodemo: “Malaksid no ti asinoman mayanak manen, saanna a mabalin a kitaen ti pagarian ti Dios.” (Juan 3:3) Makapainteres dagita a sasao isu a natignay ni Nicodemo a sumungbat ken agimdeng ken Jesus. (Juan 3:4-20) Mabalinmo met a gutugoten dagiti tattao a makisarita kenka babaen iti kasta a pamay-an.
16 Ti iyaadu ita ti adu a baro a relihion ket makapainteres a pagsasaritaan kadagiti lugar a kas iti Africa, Makindaya a Europa, ken Latin America. Kadagiti kasta a teritoria, masansan a mabalinmo a rugian ti saritaan babaen ti panangibagam iti: “Pampanunotek no apay ngata a nagadu ita ti relihion. Ngem namnamaek nga iti din agbayag, dagiti amin a tattao iti amin a nasion ket agkaykaysadanto iti pudno a panagdayaw. Kayatmo kadi a mapasamak dayta?” Babaen ti panangdakamatmo iti banag a makapainteres maipapan iti namnamam, mabalin a magutugotmo dagiti tattao a mangyebkas iti kapanunotanda. Ken nalaklaka a sungbatan dagiti saludsod no adda ti dua a posible a sungbat kadagita. (Mateo 17:25) Kalpasan a komentuan ti maysa a bumalay ti saludsodmo, sungbatam dayta babaen ti maysa wenno dua a teksto. (Isaias 11:9; Sofonias 3:9) Babaen ti panagimdeng a naimbag ken panangpanunot iti sungbatna, mabalinmo nga ikeddeng no ania ti pagsaritaanyo iti sumaganad nga isasarungkarmo.
Nagimdeng ni Jesus Kadagiti Ubbing
17. Ania ti mangipakita nga interesado ni Jesus kadagiti ubbing?
17 Ni Jesus ket interesado saan laeng a kadagiti nataengan no di ket uray kadagiti ubbing. Ammona ti maipapan kadagiti ay-ayam dagiti ubbing ken ti bambanag a pagsasaritaanda. Adda dagiti gundaway nga inawisna ida tapno umasidegda kenkuana. (Lucas 7:31, 32; 18:15-17) Karaman ti adu nga ubbing kadagiti bunggoy a nagimdeng ken Jesus. Idi a dagiti ubbing a lallaki dinaydayawda ti Mesias babaen iti napigsa a timek, nagimdeng ni Jesus isu a naibagana a dayta ket nabayagen nga impadto ti Kasuratan. (Mateo 14:21; 15:38; 21:15, 16) Iti kaaldawantayo, adu nga ubbing ti agbalbalin nga adalan ni Jesus. Isu a kasanom ida a matulongan?
18, 19. Kasanom a matulongan ti anakmo nga agbalin nga adalan ni Jesus?
18 Tapno matulongam ti anakmo nga agbalin nga adalan, masapul nga umimdengka kenkuana. Nasken a tarusam dagiti kapanunotanna a mabalin a maikontra iti kapanunotan ni Jehova. Uray ania ti ibaga ti anakmo, nainsiriban a komendaram pay nga umuna. Kalpasan dayta, mabalinmon nga usaren dagiti maitutop a teksto iti Biblia a makatulong iti anakmo a mangtarus iti panangmatmat ni Jehova kadagiti bambanag.
19 Makatulong met dagiti saludsod tapno maammuam ti kapanunotan dagiti ubbing. Ngem kas kadagiti nataengan, saan a magustuan dagiti ubbing ti mapalpalutpot. Imbes a saludsodam ti anakmo kadagiti narigat a masungbatan, apay a dimo estoriaen biit ti maipapan kenka? Depende iti madama a pagsarsaritaanyo, mabalinmo a dakamaten ti maysa idi nga ugalim ken ilawlawagmo no apay a timmanor dayta. Kalpasan dayta, mabalinmo nga iyimtuod, “Kastaka met kadi?” Ti sungbat ti anakmo ket mabalin a mangiturong iti makatulong ken makaparegta a saritaanyo maipapan iti Biblia.
Itultuloymo a Tuladen ti Naindaklan a Managaramid iti Adalan
20, 21. Apay a nasken nga ammom ti agimdeng a naimbag iti trabahom a panagaramid iti adalan?
20 Ti man anakmo wenno maysa a nataengan ti kasarsaritam maipapan iti maysa a banag, nakapatpateg ti panagimdeng a naimbag. Kinapudnona, maysa dayta nga ebkas ti ayat. Babaen ti panagimdeng, ipakpakitam a napakumbabaka, ken adda panagraem ken naayat a konsiderasionmo iti daydiay im-imdengam. Siempre, bayat nga agim-imdengka, nasken a siputam dagiti ibagbaga ti agsasao.
21 Bayat a makipaspasetka iti Nakristianuan a ministerio, kanayon koma nga umimdengka a naimbag kadagiti bumalay. No utobem a naimbag ti ibagbagada, maamirismo la ketdi no aniada nga aspeto ti kinapudno nga isursuro ti Biblia ti nangnangruna a makaallukoy kadakuada. Kalpasanna, ikagumaam a tulongan ida babaen ti panangyaplikarmo iti nadumaduma a pamay-an ti panangisuro ni Jesus. Bayat nga ar-aramidem dayta, magunggonaankanto iti rag-o ken pannakapnek gapu ta tultuladem ti Naindaklan a Managaramid iti Adalan.
Ania ti Sungbatmo?
• Kasano a pinaregta ni Jesus dagiti sabsabali a mangyebkas iti kapanunotanda?
• Apay a nagimdeng ni Jesus kadagiti sinursuruanna?
• Kasano a mausarmo dagiti saludsod iti ministeriom?
• Ania ti maaramidam tapno matulongam iti naespirituan dagiti ubbing?
[Ladawan iti panid 28]
Agimdengka no mangaskasabaka
[Ladawan iti panid 30]
Tultuladentayo ni Jesus no tulongantayo dagiti ubbing iti naespirituan a wagas