Inaramidda ti Pagayatan ni Jehova

Ibaon ni Jesus Dagiti 70 nga Adalan

OTONIO idi ti 32 K.P. Innem a bulan laengen ti nabatbati sakbay ti ipapatay ni Jesus. Gapuna, tapno pumartak ti trabaho a panangasaba ken masanay pay ti dadduma kadagiti pasurotna, nangdutok iti 70 nga adalan ket “imbaonna ida a sinagdudua nga umun-una ngem isu iti tunggal siudad ken lugar nga umayannanto a mismo.”​—Lucas 10:1.a

‘Pinauna’ ni Jesus dagiti adalanna tapno nabibiit a makapagdesision dagiti tattao no awaten wenno busorenda ti Mesias inton dumteng a mismo ni Jesus. Ngem apay nga imbaonna ida a “sinagdudua”? Nabatad, tapno makapagpipinnabilegda no maipasangoda iti ibubusor.

Kas panangyunay-unay iti kinaganat ti trabahoda a panangasaba, kinuna ni Jesus kadagiti pasurotna: “Kinapudnona, dakkel ti anien, ngem bassit dagiti managobra. Gapuna ipakaasiyo iti Apo ti panagani a mangibaon kadagiti managobra iti panaganina.” (Lucas 10:2) Maitutop a pangyaspingan ti panagani, ta no maitantan ti panagani mabalin a masayang dagiti napateg nga apit. Umasping iti dayta, no liwayan dagiti adalan ti trabahoda a panangasaba, mabalin a mapukaw ti napateg a biag dagiti tattao!​—Ezequiel 33:6.

Dagiti Di Masinga a Ministro

Binilin pay ni Jesus dagiti adalanna: “Dikay mangawit iti supot ti kuarta, uray supot ti taraon, uray kadagiti palluka, ket dikay arakupen ti asinoman iti dalan kas panangkablaaw.” (Lucas 10:4) Saan la a supot ken taraon ti kadawyan idi nga itugot ti maysa nga agdaldaliasat no di pay ket kanayonan a sangaparis a palluka, agsipud ta mabalin a marunot dagiti suelas ken mapugsat dagiti kurdon. Ngem di rumbeng a pagdanagan dagiti adalan ni Jesus dagiti kasta a banag. Imbes ketdi, agtalekda nga ited ni Jehova ti kasapulanda babaen kadagiti padada nga Israelita, a kadawyan idi kadakuada ti panagpadagus.

Ngem apay a kinuna ni Jesus kadagiti adalanna a saanda nga arakupen ti asinoman kas panangkablaaw? Rumbeng kadi nga agbalinda a nalamiis, nasabrak pay ketdi? Saan! Saan a basta nadayaw a “komusta” wenno “naimbag nga aldawmo” ti mabalin a kaipapanan ti Griego a sao nga a·spaʹzo·mai, a kayatna a sawen, arakupen kas panangkablaaw. Mabalin a ramanenna pay ti kaugalian a panaginnagek, panaginnarakup, ken napaut a panagtungtong no agsabat ti dua nga agam-ammo. Kuna ti maysa a komentarista: “Ti panagkablaaw dagiti taga-Oriente ket saan a basta apagapaman a panagtamed, wenno panangalamano, kas kadatayo, no di ket maaramid babaen ti adu nga arakup, ken panagruknoy, ken panagrukob pay ketdi iti daga. Kasapulan amin daytoy ti adu a panawen.” (Idiligyo ti 2 Ar-ari 4:29.) No kasta, tinulongan ni Jesus dagiti pasurotna a mangliklik kadagiti di kasapulan, nupay kaugalian, a pakasingaan.

Kamaudiananna, kinuna ni Jesus kadagiti adalanna a no sumrekda iti maysa a balay ket maawatda, rumbeng nga ‘aggianda iti dayta a balay, a kanen ken inumenda dagiti banag nga ipaayda.’ Ngem no sumrekda iti maysa a siudad ket saan ida nga awaten dagiti tattao, “rummuar[da] a mapan kadagiti akaba a dalanna ket kuna[da], ‘Uray ti tapuk a kimpet kadagiti saksakami manipud iti siudadyo punasenmi a maibusor kadakayo.’” (Lucas 10:7, 10, 11) Ti panagpigad wenno panangpampag iti tapok a kimpet iti saka ipasimudaagna a dagiti adalan sitatalna a panawanda ti di immawat a balay wenno siudad ket ipabiangdan iti Dios ti pagbanaganna. Ngem maparaburan dagidiay siaayat nga umawat kadagiti adalan ni Jesus. Iti sabali a gundaway, kinuna ni Jesus kadagiti apostolna: “Ti umawat kadakayo awatennak met, ket ti umawat kaniak awatenna met ti nangibaon kaniak. Ket siasinoman a mangted iti maysa kadagitoy babassit iti sangakopa laeng a nalamiis a danum nga inumen agsipud ta isu maysa nga adalan, ibagak kadakayo a pudno, dinanto pulos mapukaw ti gunggonana.”​—Mateo 10:40, 42.

Dagiti Maadaltayo

Ti annongen a panangikasaba iti naimbag a damag ti Pagarian ti Dios ken panangaramid kadagiti adalan ket itungtungpal ita ti nasurok a 5,000,000 a Saksi ni Jehova iti intero a lubong. (Mateo 24:14; 28:19, 20) Ammoda a naganat ti mensaheda. Gapuna, usarenda a naimbag ti panawenda, a liklikanda dagiti pakasingaan a manglapped kadakuada a mangipamaysa iti napateg nga annongenda.

Ikagumaan dagiti Saksi ni Jehova ti agbalin a mannakigayyem kadagiti amin a makasaritada. Nupay kasta, saanda a basta makitungtong, wenno makidebate maipapan kadagiti sosial nga isyu wenno iti pannakapaay daytoy lubong a mangilinteg iti kinaawan hustisia. (Juan 17:16) Imbes ketdi, ipamaysada ti saritaanda iti kakaisuna a manayon a solusion dagiti parikut ti tao​—ti Pagarian ti Dios.

Masansan a mangaskasaba dagiti Saksi ni Jehova a sinagdudua. Saan ngata nga ad-adu ti magapuanan no agbukbukod a mangasaba ti tunggal maysa kadakuada? Nalabit. Ngem, ammo dagiti Kristiano ita ti pagimbagan ti pannakipagtrabaho iti kapammatian. Maysa daytoy a proteksion no mangaskasaba kadagiti napeggad a lugar. Ti panagkadua a mangasaba tulonganna met dagiti agdadamo a makasursuro kadagiti natenneb nga agibumbunannag iti naimbag a damag. Wen, agpada a makapagpinnaregtada.​—Proverbio 27:17.

Di pagduaduaan, ti panangasaba ti kaganatan a trabaho a maar-aramid kadagitoy “maudi nga al-aldaw.” (2 Timoteo 3:1) Maragsakan dagiti Saksi ni Jehova iti suporta ti sangalubongan a panagkakabsat nga agtartrabaho “nga agdadanggay a maipaay iti pammati iti naimbag a damag.”​—Filipos 1:27.

[Footnote]