Naisangsangayan a Namnama!

“Tunggal maysa a sibibiag ken alagadenna ti pammati kaniak saanto a pulos matay.”—JUAN 11:26.

1. Dagiti minilion a natnatayen mapagungardanto iti sidong dagiti ania a kasasaad?

INTON mapagungar dagiti minilion, saandanto nga agnaed iti kalawakaw a daga. (Aramid 24:15) Mariingdanto iti napintas ti pannakapasayaatna nga aglawlaw ken makitadanto nga addan nakasagana a pagtaenganda, kawes, ken naruay a taraon. Siasino ti mangisagana amin kadagitoy? Nabatad, masapul nga adda tattao nga agbibiag idiay baro a lubong sakbay a mangrugi ti panagungar ditoy daga. Ngem siasino?

2-4. Ania a naisangsangayan a namnama ti agur-uray kadagiti agbibiag “kadagiti maudi nga al-aldaw”?

² Ti kaitungpalan ti padto ti Biblia ipakitana nga agbibiagtayon “kadagiti maudi nga al-aldaw” daytoy a sistema ti bambanag.a (2 Timoteo 3:1) Din agbayag, bumallaetton ni Jehova a Dios kadagiti gannuat ti tao ket pukawenna ti kinadakes ditoy daga. (Salmo 37:10, 11; Proverbio 2:21, 22) Iti dayta a tiempo, anianto ti mapasamak kadagiti simamatalek nga agserserbi iti Dios?

³ Saan nga iraman ni Jehova dagiti nalinteg inton dadaelenna dagiti nadangkes. (Salmo 145:20) Awan pay pulos inaramidna a kasta, ket dinanto aramiden dayta inton dalusanna ti daga kadagiti amin a kinadakes. (Idiligyo ti Genesis 18:22, 23, 26.) Kinapudnona, ti maudi a libro ti Biblia dakamatenna ti “maysa a dakkel a bunggoy, nga awan ti tao a makabael a mangbilang, manipud kadagiti isuamin a nasion ken kadagiti tribo ken kadagiti il-ili ken kadagiti pagsasao,” nga aggapu “iti dakkel a rigat.” (Apocalipsis 7:9-14) Wen, addanto dakkel nga umariwekwek a makalasat iti dakkel a rigat a mamagpatingga iti agdama a nadangkes a lubong, ket sumrekdanto iti baro a lubong ti Dios. Sadiay, magunggonaanto a naan-anay ti natulnog a sangatauan manipud iti nakaskasdaaw a probision ti Dios a mangwayawaya iti sangatauan manipud basol ken ipapatay. (Apocalipsis 22:1, 2) Gapuna, ti “dakkel a bunggoy” saandan a masapul a mapasaran ti ipapatay. Anian a naisangsangayan a namnama!

⁴ Mapagtalkantay kadi daytoy nakaskasdaaw a namnama? Sigurado! Impakita a mismo ni Jesu-Kristo nga addanto tiempo a panagbiag dagiti tattao a dida pulos matay. Sakbay la unay a pinagungarna ni gayyemna a Lazaro, kinuna ni Jesus ken ni Marta: “Tunggal maysa a sibibiag ken alagadenna ti pammati kaniak saanto a pulos matay.”​—Juan 11:26.

Mabalinyo Met ti Agbiag nga Agnanayon

5, 6. No kayatyo ti agbiag nga agnanayon iti Paraiso ditoy daga, aniat’ rumbeng nga aramidenyo?

⁵ Kayatyo kadi ti agbiag nga agnanayon iti Paraiso ditoy daga? Il-iliwenyo kadi a makita manen dagiti patpatgenyo? Masapul ngarud a gun-odenyo ti umiso a pannakaammo maipapan iti pagayatan ken pangpanggep ti Dios. Iti kararag ni Jesus iti Dios, kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

⁶ Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) Ammuenyo itan no kasanokayo, agraman kadagiti minilion a sabsabali pay a mangar-aramiden iti pagayatan ti Dios, a mabalin nga agbiag nga agnanayon iti Paraiso ditoy daga. Maragsakan dagiti Saksi ni Jehova a tumulong kadakayo a mangammo iti ad-adu pay maipapan iti Dios ken kadagiti kalikagumanna. Apay a dikay makiuman kadakuada iti Kingdom Hall nga asideg kadakayo wenno agsurat iti kaasitgan a direksion a nailista iti sumaganad a panid?

[Footnote]

[Ladawan iti panid 31]

Ti “dakkel a bunggoy” saandan a masapul a mapasaran ti ipapatay