Biag ken Ministerio ni Jesus
Sangapulo nga Agkukutel Naagasan Bayat ti Maudi nga Ipapan ni Jesus Idiay Jerusalem
PINAAY ni Jesus ti panangikagumaan iti Sanedrin a mangpapatay kenkuana babaen ti ipapanawna idiay Jerusalem ken ipapanna iti siudad iti Ephraim, nalabit 24 kilometros laeng wenno ad-adayo pay iti amianan a daya iti Jerusalem. Sadiay nakikadua kadagiti adalanna, nga adayo manipud kadagiti kabusorna.
Nupay kasta, ti tiempo iti Paskua iti 33 K.P. ket umadanin, ket agdaliasat manen ni Jesus. Isut’ nagdaliasat a limmasat iti Samaria ken nagturong iti Galilea. Daytoy ti naudi nga isasarungkarna ditoy sakbay ti ipapatayna. Idi adda idiay Galilea, mabalin nga isu ken dagiti adalanna nakikaduada kadagiti dadduma a mapmapan idiay Jerusalem a maipaay iti panangrambak iti Paskua. Nagnada iti distrito ti Perea, iti daya ti Karayan Jordan.
Nasapa pay iti biahe, idi isut’ simrek iti bario iti asideg ti Samaria wenno Galilea, isut’ sinabet dagiti sangapulo a lallaki nga agkukutel. Daytoy a nakaam-amak a sakit ti mangrunot iti paspaset ti bagi ti maysa a tao—dagiti ramayna, ramay ti sakana, laplapayagna, agongna, ken dagiti bibigna. Tapno masalakniban dagiti dadduma manipud iti pannakaakar, kuna ti Linteg ti Dios maipapan iti maysa nga agkukutel: “Abbongannanto ti akinngato a bibigna ket agpukkawto, ‘Saan a nadalus, saan a nadalus!’ Dagup dagiti aldaw a panagbayag kenkuana ti saksakiten maibilangto a saan a nadalus. . . . Iti ruar ti pakarso ti pagtaengannanto.”
Dagiti sangapulo nga agkukutel al-alagadenda a naimbag ti ikeddeng ti Linteg ket nakaad-adayoda ken Jesus. Kaskasdi, napigsa ti pukkawda: “Jesus, Mannursuro, kaasiannakami!”
Ket idi makitana ida iti adayo, imbilin ni Jesus: “Inkayo agparangkayo kadagiti papadi.” Imbaga ni Jesus daytoy ta ti Linteg ti Dios ipalubosna dagiti papadi a mangibaga a nadalusan dagiti agkukutel a naimbagen iti sakitda. Iti kastoy a pamay-an dagita maawatdanto ti anamong nga agbiag manen a kadua dagiti nasalun-at a tattao.
Agtalek dagiti sangapulo nga agkukutel iti namilagruan a pannakabalin ni Jesus. Gapuna nagdardarasda a nagpakita kadagiti papadi, uray no saanda pay a naagasan. Idi magmagnada a mapan, nagunggonaan ti pammatida. Makitadan ken mariknada ti naisublin a salun-atda!
Siam kadagiti nadalusan nga agkukutel ti nagtultuloy iti dalanda, ngem ti sabali nga agkukutel, maysa a Samaritano, nagsubli a nangsapul ken Jesus. Apay? Agsipud ta agyaman iti kasta unay iti napasamak kenkuana. Dinaydayawna ti Dios iti dakkel a timek, ket idi nasarakanna ni Jesus, inruknoyna ti rupana kadagiti saksakana, a nagyaman kenkuana.
Simmungbat ni Jesus ket kinunana: “Saanda a sangapulo aya dagiti nadalusan? Ket dagiti siam adino ti yanda? Awan aya ti nagsubli a nagyaman iti Dios no saan a daytoy ganggannaet?”
Ket kinunana idi Samaritano: “Tumakderka, inkan; ti pammatim insalakannaka.”
No mabasatayo ti panangagas ni Jesus kadagiti sangapulo nga agkukutel, ipapusotay koma ti leksion nga ipanayag ti saludsodna: “Ket dagiti siam adino ti yanda?” Ti kinaawan panagyaman nga imparangarang dagiti siam ket maysa a serioso a biddut. Datayo kadi, kas iti Samaritano, agyamantayo kadagiti bambanag a maawattayo manipud iti Dios, agraman ti kari a biag nga agnanayon iti nalinteg a baro a lubong? Juan 11:54, 55; Lucas 17:11-19; Levitico 13:16, 17, 45, 46; Apocalipsis 21:3, 4.
◆ Kasano ti panangpaay ni Jesus iti panangikagumaanda a mangpapatay kenkuana?
◆ Sadino ti sumaganad a nagdaliasatan ni Jesus, ket ania ti pagturonganna?
◆ Apay a dagiti agkukutel addada iti adayo, ken apay nga imbaga ni Jesus a mapanda kadagiti papadi?
◆ Ania ti leksion a maadaltayo manipud itoy a kapadasan?
[Ladawan iti panid 9]