Dagiti Leksion a Maadaw Kadagiti Milagro ni Jesus

“ITAN iti maikatlo nga aldaw a maysa a padayá ti kasar ti naaramid idiay Cana ti Galilea . . . Ni Jesus ken dagiti adalanna naawisda met iti padayá ti kasar. Ti ina ni Jesus kinunana kenkuana idi nagkurang ti arak: ‘Awanen ti arakda.’” Nangipaay daytoy a pasamak iti gundaway para iti immuna a milagro ni Jesus.​—Juan 2:1-3.

Agpayso kadi a saan a napateg ti kasta a parikut, a bassit laeng, tapno mayeg iti atension ni Jesus? Ilawlawag ti maysa nga eskolar ti Biblia: “Ti kinamanagpadagus idiay Dumaya ket maysa a sagrado a pagrebbengan . . . Ti pudno a kinamanagpadagus, nangruna iti padayá ti kasar, kalikagumanna ti nawadwad unay [a makan ken mainum]. No [maibus] ti abasto iti maysa a padayá ti kasar, maibabain ti pamilia ken ti baro a pagassawaan.”

Gapuna, nagtignay ni Jesus. Nakitana ti “innem a burnay a bato a nakadisso idiay kas kalikaguman dagiti paglintegan dagiti Judio iti panaggugor.” Kadawyan dagiti Judio ti ritual a panagbuggo sakbay ti pannangan, ket kasapulan ti adu a danum para kadagiti dimmar-ay. “Punnuenyo dagiti burnay iti danum,” imbilin ni Jesus kadagidiay mangay-aywan kadagiti sangaili. Saan a ni Jesus ti “manangiturong iti padayá,” ngem isut’ nagsao lattan ken addaan autoridad. Kuna ti salaysay: “Itan, idi a ti manangiturong iti padayá rinamananna ti danum, [nagbalinen] nga arak.”​—Juan 2:6-9; Marcos 7:3.

Mabalin a kasla di nakappapati a maaramid ti umuna a milagro ni Jesus iti maysa a gagangay nga okasion a kas iti kasar, ngem adut’ ipalgak dayta a pasamak maipapan ken Jesus. Isu ket baro, ket kadagiti simmaganad a gundaway, inlawlawagna kadagiti adalanna dagiti pagimbagan ti agwaywayas. (Mateo 19:12) Nupay kasta, ti kaaddana iti maysa a padayá ti kasar ipalgakna nga isut’ saan a pulos a simmupiat iti panagasawa. Isut’ natimbeng, manangsuporta iti urnos ti panagasawa; minatmatanna daytoy kas banag a nadayaw iti imatang ti Dios.​—Idiligyo ti Hebreo 13:4.

Ni Jesus ket saan a maysa a naladingit a kas iti panangiladawan kenkuana dagiti artesano ti simbaan idi agangay. Nalawag a tinagiragsakna ti makipulapol kadagiti tattao ket saan a bimmusor iti panagtitimpuyog. (Idiligyo ti Lucas 5:29.) Gapuna, dagiti tignayna nangipaayda iti pagwadan kadagiti pasurotna. Personal nga impakita ni Jesus a saanda koma nga agbalin a naulimek wenno naliday nga awan gapgapuna​—a kasla ket tay kinaawan ragsak ti kaipapanan ti kinalinteg. Iti kasumbangirna, naibilin kamaudiananna kadagiti Kristiano: “Kankanayon nga agrag-okayo iti Apo.” (Filipos 4:4) Pagannadan dagiti Kristiano itatta a pagtalinaeden ti panaglinglingay iti las-ud dagiti nainkalintegan a pagbeddengan. Pagrag-oanda ti agserbi iti Dios, ngem kas panangsurot iti ulidan ni Jesus, sagpaminsan a maragsakanda a makilangen kadagiti dadduma iti sosial a pasken.

Paliiwenyo met ti kinadungngo ti rikrikna ni Jesus. Isut’ saan nga obligado a mangaramid iti milagro. Awan kastoy a naipadto a masapul a matungpal. Agparang a natignay laeng ni Jesus gapu iti pannakaseknan ti inana ken ti sasaaden dagiti agkasar. Isut’ maseknan iti rikriknada ket tinarigagayanna nga iliklik ida iti pannakaibabain. Saan kadi a patauden dayta ti panagtalekyo nga adda napudno a pannakaseknan ni Kristo kadakayo​—uray kadagiti inaldaw a pakarikutanyo?​—Idiligyo ti Hebreo 4:14-16.

Yantangay tunggal burnay ket “kabaelanna a laonen ti dua wenno tallo a likido a rukod” ti danum, adda nawadwad nga arak iti milagro ni Jesus​—nalabit 390 litro (105 a galon)! (Juan 2:6) Apay a kasapulan ti kasta a kaadu? Saan nga itantandudo ni Jesus ti panagbartek, banag a kondenaren ti Dios. (Efeso 5:18) Imbes ketdi, iparparangarangna ti kinamanagparabur a kas iti Dios. Yantangay ti arak ket maysa a gagangay a mainum, mabalin a maaramat ti aniaman a sobra kadagiti sabali nga okasion.​—Idiligyo ti Mateo 14:14-20; 15:32-37.

Tinulad dagiti immuna a Kristiano ti ulidan ni Jesus iti kinamanagparabur. (Idiligyo ti Aramid 4:34, 35.) Ken kasta met a naparegta ti ili ni Jehova itatta nga “iyugali[da] ti panangted.” (Lucas 6:38) Nupay kasta, adda met naimpadtuan a kaipapanan ti immuna a milagro ni Jesus. Iturturongna ti atensiontayo iti masanguanan inton sipaparabur nga ipaay ti Dios ti “maysa a rambak dagiti nalukmeg a banag, maysa a rambak dagiti arak iti rabaw dagiti aributed,” a pukawennanton a naan-anay ti bisin.​—Isaias 25:6.

Komusta met ngay dagiti adu a milagro nga inaramid ni Jesus a pakairamanan ti pisikal a panangagas? Aniat’ maadaltayo kadagitoy?

Panagaramid iti Naimbag iti Sabbath

“Bumangonka, bagkatem ta langkapim ket magnaka.” Imbaga ni Jesus dagitoy a sasao iti maysa a lalaki a masaksakit iti 38 a tawenen. Ituloy ti salaysay ti Ebanghelio: “Iti kasta ti lalaki dagus a simmayaat ti salun-atna, ket binagkatna ti langkapina ket rinugianna ti magna.” Nakaskasdaaw, saan a naay-ayo ti amin iti daytoy a panagbalbaliw ti kasasaad. Kuna ti salaysay: “Dagiti Judio indadanesda ni Jesus, agsipud ta inar-aramidna dagitoy a bambanag kabayatan ti Sabbath.”​—Juan 5:1-9, 16.

Nairanta ti Sabbath kas maysa nga aldaw ti panaginana ken panagrag-o ti amin. (Exodo 20:8-11) Nupay kasta, idi kaaldawan ni Jesus, nagbalin daytoy a manangirurumen, aramid-tao a pagannurotan. Insurat ti eskolar a ni Alfred Edersheim nga iti pangatiddogen a paspaset ti linteg ti Sabbath iti Talmud, “siiinget a nausig dagiti bambanag kas addaan nasken a narelihiusuan a kinapateg, bambanag a di unay usigen ti maysa a masirib a tao.” (The Life and Times of Jesus the Messiah) Inikkan dagiti rabbi iti biag-ken-patay a kinapateg dagiti saan a napateg, agbaliwbaliw a pagannurotan a nangiwanwan iti gistay amin nga aspeto ti panagbiag dagiti Judio​—a masansan a saanda unay a maseknan iti natauan a karirikna. Imbilin ti maysa a pagannurotan ti Sabbath: “No natupakan ti maysa a tao iti patakder ket adda panagduadua no adda sadiay wenno awan, wenno no isut’ sibibiag wenno natayen, wenno no isu ket maysa a Gentil wenno Israelita, mabalinda nga ikkaten ti naigabur kenkuana. No makitada a sibibiag, mabalinda nga ikkaten pay ti ad-adu a naigabur kenkuana; ngem no [isu ket] natayen, panawanda.”​—Salaysay ti Yoma 8:7, The Mishnah, impatarus ni Herbert Danby.

Kasanot’ panangmatmat ni Jesus iti kasta a nainget a panangipaannurotda kadagiti awan kaes-eskanna a banag? Idi binabalawda gaput’ panangagasna iti Sabbath, kinunana: “Ni Amak nagtultuloy nga agar-aramid agingga ita, ket agtultuloyak nga agar-aramid.” (Juan 5:17) Saan a nagtrabaho ni Jesus tapno agpabaknang. Imbes ketdi, inaramidna ti pagayatan ti Dios. No kasano a dagiti Levita napalubosan a mangituloy iti sagrado a panagserbida iti Sabbath, siuumiso a maaramidan ni Jesus dagiti intuding-Dios a pagrebbenganna kas Mesias a saanna a masalungasing ti Linteg ti Dios.​—Mateo 12:5.

Ti panangagas ni Jesus iti kaaldawan ti Sabbath impalgakna met dagiti Judio nga eskriba ken Fariseo kas ‘nalabes ti kinalintegda’​—nainget ken di natimbeng ti panagpampanunotda. (Eclesiastes 7:16) Awan duadua a saan a pagayatan ti Dios a maiparit dagiti naimbag nga aramid kadagiti masnup nga aldaw ti lawas; saan met nga inranta ti Dios ti Sabbath kas awan mamaayna a nainget a pagalagadan. Kinuna ni Jesus iti Marcos 2:27: “Napaadda ti sabbath maigapu iti tao, ket saan a ti tao maigapu iti sabbath.” Inayat ni Jesus dagiti tattao, saan a dagiti di nainkalintegan a pagannurotan.

Nasayaat ngarud para kadagiti Kristiano itatta ti agbalin a saan a nalabes ti kinaingetna wenno kankanayon a paiturturong kadagiti pagannurotan. Masapul a liklikan dagidiay addaan autoridad iti kongregasion ti agipabaklay iti sabsabali kadagiti nalabes a pagannurotan ken pagalagadan nga inaramid ti tao. Parparegtaennatay met ti ulidan ni Jesus a sumapul iti gundaway nga agaramid iti naimbag. Kas pagarigan, pulos a saan koma nga ikalintegan ti maysa a Kristiano nga iburayna laeng dagiti kinapudno ti Biblia no pormal a makiramraman iti panagbalaybalay a ministerio wenno no isut’ agpalpalawag iti plataporma. Kuna ni apostol Pedro a dagiti Kristiano rumbeng koma a “kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo.” (1 Pedro 3:15) Awan naikeddeng a panawen a panagaramid iti naimbag.

Maysa a Leksion iti Kinamanangaasi

Ti sabali pay a naisangsangayan a milagro ket nailanad iti Lucas 7:11-17. Sigun iti salaysay, “nagdaliasat [ni Jesus] iti siudad a maawagan Nain, ket nakipagdaliasat kenkuana dagiti adalanna ken ti maysa a dakkel a bunggoy.” Agingga ita, masarakan pay laeng dagiti lugar a pagitaneman iti abagatan a daya ti moderno nga Arabo a purok ti Nein. “Idi a nakaasideg iti ruangan ti siudad,” nasabatna ti maysa a naariwawa nga eksena. “Ay ket, adtoy! adda mairuruar a maysa a natay a tao, ti bugbugtong nga anak a lalaki ni inana. Malaksid iti dayta, isu ket maysa a balo. Naikuyog met kenkuana ti maysa a dakkel a bunggoy manipud iti siudad.” Napaliiw ni H. B. Tristram a “ti kadawyan a panagitabon ket saan a nagbaliw” manipud idi un-unana a panawen, nga innayonna: “Nakakitaakon kadagiti babbai a sarsarunuen ti nakaikabilan [ti minatay], nga idadauluan dagiti natangdanan a dumudung-aw a babbai. Iwagwagtengda dagiti takiagda, pungotenda ti buokda, a kasta unay ti panagdung-awda, ken yik-ikkisda ti nagan ti natay.”​—Eastern Customs in Bible Lands.

Iti tengnga ti kasta a naariwawa a riribuk, magmagna ti malmaldaangan a balo a ti langana yanninawna ti nakaro a saem. Gapu ta napukawnan ni lakayna, imbilangna ti anakna, sigun iti sasao ni autor Herbert Lockyer, kas “sarukod iti kinabaketna, ken ti liwliwa iti kinalidayna​—ti sadiri ken adigi ti pagtaengan. Iti pannakapukaw ti kakaisuna a barona, napukawen ti kakaisuna a nabati a sammakedna.” (All the Miracles of the Bible) Kasanot’ panagrikna ni Jesus? Iti nagsayaat a sasao ni Lucas, “idi nakita ti Apo, simnek ti asina kenkuana, ket kinunana kenkuana: ‘Sumardengka nga agsangsangit.’” Ti sasao a “simnek ti asina” ket naadaw iti Griego a sao a literal a kaipapananna “dagiti bagis.” Kaipapanan dayta ti “nauneg nga emosional a pannakatignay.” (Vine’s Expository Dictionary of Old and New Testament Words) Wen, natignay ni Jesus agingga iti kaunggan ti kinataona.

Mabalin a maysa idin a balo ti mismo nga ina ni Jesus, isu a nalabit ammona unay ti saem ti agminatay idi napukawna ti pannakaamana, ni Jose. (Idiligyo ti Juan 19:25-27.) Saanen a kasapulan nga agpakpakaasi ti balo ken Jesus. Sibubulos nga “immasideg [ni Jesus] ket sinagidna ti idda ti natay,” nupay sigun iti Linteg Mosaiko, ti panangsagid iti bangkay pagbalinenna ti maysa a di nadalus. (Numeros 19:11) Babaen ti datdatlag a pannakabalinna, maikkat ni Jesus ti pakaigapuan iti kinarugit! “Kinunana: ‘Agtutubo a lalaki, kunak kenka, Bumangonka!’ Ket ti natay a tao bimmangon ket nangrugi nga agsao, ket intedna ken inana.”

Anian a makatignay a leksion iti kinamanangaasi! Saan a rumbeng a tuladen dagiti Kristiano ti awan ayatna, nalamiis a kababalin a maiparparangarang kadagitoy “maudi nga al-aldaw.” (2 Timoteo 3:1-5) Maisupadi iti dayta, ibalakad ti 1 Pedro 3:8: “Kamaudiananna, agkakapanunotankay koma amin, a mangipakitakayo iti pannakipagmaymaysa ti rikna, addaan iti nainkabsatan a panagayat, nadungngo a mannakipagrikna.” No ti maysa a tao a nasinged kadatayo ket nagminatay wenno addaan nakaro a sakit, saantay a mabalin ti mangpagungar wenno mangpaimbag iti masakit. Ngem mabalintay ti mangipaay iti praktikal a tulong ken liwliwa, nalabit a babaen laeng ti kaaddatayo sadiay ken pannakipagladingittayo kadakuada.​—Roma 12:15.

Ipakita met daytoy a dramatiko a panangpagungar ni Jesus ti mapasamak iti masanguanan​—inton “amin dagidiay adda kadagiti pakalaglagipan a tanem mangngegdanto ti timekna ket rummuardanto”! (Juan 5:28, 29) Iti intero a daga, personal a mapasaranto dagiti nagminatay ti kinamanangaasi ni Jesus inton agsubli dagiti pimmusay nga inna, amma, annak, ken gagayyem manipud iti tanem!

Dagiti Leksion Kadagiti Milagro

Nalawag, no kasta, a dagiti milagro ni Jesus ket saan laeng a nakaay-ayat a pannakaiparangarang ti pannakabalin. Intan-okda ti Dios, a nangipasdek iti pagtuladan para kadagiti Kristiano a maparegta a ‘mangipadayag iti Dios.’ (Roma 15:6) Iparparegtada ti panagaramid iti naimbag, ti panangipakita iti kinamanagparabur, ti panangiparangarang iti kinamanangaasi. Napatpateg pay, agserbi dagitoy kas pakpakauna dagiti mannakabalin nga aramid a mapasamakto kabayatan ti Milenio a Panagturay ni Kristo.

Idi adda ditoy daga, inaramid ni Jesus dagiti mannakabalin nga ar-aramidna iti las-ud ti bassit laeng a geograpiko a lugar. (Mateo 15:24) Kas naipadayag nga Ari, masakupannanto ti intero a daga! (Salmo 72:8) Idi adda ditoy daga, dagidiay immawat iti namilagruan a pannakaagas ken pannakapagungar natayda met laeng. Iti sidong ti nailangitan a kinaarina, naan-anayton a maikkat ti basol ken ipapatay, a mamagbalin a posible iti panagbiag nga agnanayon. (Roma 6:23; Apocalipsis 21:3, 4) Wen, ipasimudaag dagiti milagro ni Jesus ti yaay ti maysa a nadayag a masanguanan. Riniwriw ti natulongan dagiti Saksi ni Jehova a maaddaan iti pudno a namnama nga agbalin a paset dayta. Agingga iti yaay dayta a tiempo, anian a nakaskasdaaw a pakpakauna maipapan iti maaramidto iti saanen a mabayag ti impaay dagiti milagro ni Jesu-Kristo!

[Ladawan iti panid 7]

Pinagbalin ni Jesus nga arak ti danum