Maysakayo Kadi Kadagiti Ay-ayaten ti Dios?

“Ti addaan kadagiti bilinko ket tungpalenna ida, isu dayta ti agayat kaniak. Kalpasanna ti agayat kaniak ayatento ni Amak.”​—JUAN 14:21.

1, 2. (a) Kasano nga impakita ni Jehova ti panagayatna iti sangatauan? (b) Ania ti inyussuat ni Jesus iti rabii ti Nisan 14, 33 K.P.?

AY-AYATEN ni Jehova dagiti pinarsuana a tattao. Kinapudnona, ay-ayatenna ti amin a tattao “iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Bayat nga umad-adani ti panangrambak iti Memorial ti ipapatay ni Kristo, ad-adda koma a silalagip dagiti pudno a Kristiano nga “inayatnatayo [ni Jehova] ket imbaonna ti Anakna a kas pangikappia a sakripisio maipaay kadagiti basoltayo.”​—1 Juan 4:10.

² Iti rabii ti Nisan 14, 33 K.P., naguummong da Jesus ken ti 12 nga apostolna iti makinngato a siled idiay Jerusalem tapno rambakanda ti Paskua, kas panglaglagip iti pannakaispal dagiti Israelita idiay Egipto. (Mateo 26:17-20) Kalpasan a rinambakanda dayta a piesta dagiti Judio, pinapanaw ni Jesus ni Judas Iscariote ket inyussuatna ti maysa a pangrabii a nagbalin kas ti Nakristianuan a Panglaglagip iti ipapatay ni Kristo.a Babaen ti panangusarna iti awan lebadurana a tinapay ken nalabaga nga arak kas mangisimbolo iti pisikal a bagi ken darana, inraman ni Jesus ti 11 a nabati nga apostolna iti daytoy a pangrabii. Dagiti detalye no kasano nga inyussuatna dayta ket inlanad dagiti mannurat iti Ebanghelio a da Mateo, Marcos, ken Lucas, agraman ni apostol Pablo, a nangawag iti dayta kas “ti pangrabii ti Apo.”​—1 Corinto 11:20; Mateo 26:26-28; Marcos 14:22-25; Lucas 22:19, 20.

3. Kadagiti ania a pamay-an a nagpaiduma ti salaysay ni apostol Juan maipapan iti naudi a pannakisarita ni Jesus kadagiti adalanna iti makinngato a siled?

³ Makapainteres ta saan a dinakamat ni apostol Juan ti pannakaipasa ti tinapay ken arak, nalabit gapu ta iti tiempo nga insuratna ti salaysayna iti Ebanghelio (agarup 98 K.P.), ti kasta a panangipasa ket gagangayen kadagiti nagkauna a Kristiano. (1 Corinto 11:23-26) Nupay kasta, ni napaltiingan a Juan ti kakaisuna a nangted kadatayo kadagiti napateg nga impormasion maipapan iti kinuna ken inaramid ni Jesus sakbay unay ken kalpasan nga inyussuatna ti Panglaglagip iti ipapatayna. Saan a nakurkurang ngem lima a kapitulo iti Ebanghelio ni Juan ti naglaon kadagitoy a makapagagar a detalye. Ilawlawagda no ania a kita ti tattao ti ay-ayaten ti Dios. Intay usigen ti Juan kapitulo 13 agingga 17.

Agsursurokayo iti Mapagulidanan nga Ayat ni Jesus

4. (a) Kasano nga intampok ni Juan ti kangrunaan a tema ti pannakisarita ni Jesus kadagiti adalanna idi inyussuatna ti Memorial? (b) Ania ti maysa a napateg a rason no apay nga inayat ni Jehova ni Jesus?

⁴ Ti ayat ti maysa a kangrunaan a tema kadagitoy a kapitulo a naglaon iti pammakada a balakad ni Jesus kadagiti pasurotna. Kinapudnona, 31 a daras a nagparang kadagitoy a kapitulo ti nadumaduma a porma ti sao nga “ayat.” Ad-adda a nayebkas kadagitoy ti nasged nga ayat ni Jesus iti Amana, ni Jehova, ken kadagiti adalanna. Ti panagayat ni Jesus ken ni Jehova ket naiparangarang iti amin a salaysay ti Ebanghelio maipapan iti biagna, ngem ni laeng Juan ti nangirekord iti napanayag a panangikuna ni Jesus iti: “Ay-ayatek ti Ama.” (Juan 14:31) Kinuna met ni Jesus nga ay-ayaten ni Jehova ti Anakna ket inlawlawagna no apay. Kinunana: “Kas iti panagayat kaniak ti Ama ken panagayatko kadakayo, agtalinaedkayo iti ayatko. No tungpalenyo dagiti bilinko, agtalinaedkayto iti ayatko, kas iti panangtungpalko kadagiti bilin ti Ama ken panagtalinaedko iti ayatna.” (Juan 15:9, 10) Wen, ay-ayaten ni Jehova ti Anakna gapu iti naan-anay a kinatulnogna. Anian a nagsayaat a leksion para iti amin a pasurot ni Jesu-Kristo!

5. Kasano nga impakita ni Jesus ti panagayatna kadagiti adalanna?

⁵ Ti nasged nga ayat ni Jesus kadagiti pasurotna ket naitampok iti rugrugi ti salaysay ni Juan maipapan iti maudi a pannakisarita ni Jesus kadagiti apostolna. Insalaysay ni Juan: “Ita, agsipud ta ammona sakbay ti piesta ti paskua a ti orasna dimtengen maipaay kenkuana tapno pumanaw iti daytoy a lubong nga agturong iti Ama, ni Jesus, yantangay inayatna ti kukuana nga adda iti lubong, inayatna ida agingga iti panungpalan.” (Juan 13:1) Iti dayta a nakallalagip a rabii, insurona kadakuada ti di malipatan a leksion maipapan iti naayat a panagserbi iti sabsabali. Binugguanna dagiti sakada. Maysa daytoy a banag a situtulok koma nga inaramid ti tunggal maysa kadakuada agpaay ken Jesus ken kadagiti kakabsatda, ngem nagkedkedda. Inaramid ni Jesus daytoy a nanumo nga annongen sana kinuna kadagiti adalanna: “No siak, nupay Apo ken Mannursuro, binugguak dagiti sakayo, rebbengyo met a bugguan dagiti saka ti maysa ken maysa. Ta impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.” (Juan 13:14, 15) Nasken a situtulok ken siraragsak a pagserbian dagiti pudno a Kristiano dagiti kakabsatda.​—Mateo 20:26, 27; Juan 13:17.

Surotenyo ti Baro a Bilin

6, 7. (a) Ania a napateg a detalye ti inwardas ni Juan mainaig iti pannakayussuat ti Memorial? (b) Ania a baro a bilin ti inted ni Jesus kadagiti adalanna, ket ania ti baro iti dayta?

⁶ Ti salaysay ni Juan maipapan iti napasamak iti makinngato a siled iti dayta a rabii ti Nisan 14 ti kakaisuna nga espesipiko a nangdakamat iti ipapanaw ni Judas Iscariote. (Juan 13:21-30) No pagtutunosen dagiti salaysay ti Ebanghelio, ipamatmatda a sa la inyussuat ni Jesus ti Panglaglagip iti ipapatayna idi nakapanawen ti manangliput. Nakisarita ngarud iti nalapat kadagiti matalek nga apostolna, a nangibati iti pammakada a balakad ken instruksion kadakuada. Bayat nga isagsaganatayo ti bagitayo a tumabuno iti Memorial, sigagagartayo koma a mangammo no ania ti kinuna ni Jesus iti dayta nga okasion, nangnangruna ta kayattayo ti maibilang kadagidiay ay-ayaten ti Dios.

⁷ Baro a banag ti immuna nga instruksion ni Jesus kadagiti adalanna kalpasan nga inyussuatna ti Panglaglagip iti ipapatayna. Kinunana: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Ania ti baro iti daytoy a bilin? Di nagbayag iti dayta a rabii, linawlawagan ni Jesus ti bambanag, idi kunana: “Daytoy ti bilinko, nga ayatenyo ti maysa ken maysa kas iti panagayatko kadakayo. Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 15:12, 13) Imbilin ti Mosaiko a Linteg kadagiti Israelita nga ‘ayatenda ti padada a tao a kas iti bagida.’ (Levitico 19:18) Ngem nalawlawa ti ramanen ti bilin ni Jesus. Nasken nga ayaten dagiti Kristiano ti tunggal maysa kas iti panagayat ni Kristo kadakuada, a situtulok nga isakripisioda ti mismo a biagda agpaay iti kakabsatda.

8. (a) Ania ti iraman ti managsakripisio nga ayat? (b) Kasano nga ipakpakita ita dagiti Saksi ni Jehova ti managsakripisio nga ayat?

⁸ Ti Memorial ket mayannugot a tiempo tapno sukimaten ti bagitayo, kas indibidual ken kas maysa a kongregasion, ket kitaentayo no pudpudno met laeng nga adda kadatayo ti pagilasinan ti pudno a Kinakristiano​—ti ayat nga impakita ni Kristo. Ti kasta a managsakripisio nga ayat ket mangkalikagum, ken nangkalikagum idi, iti panangisakripisio ti Kristiano iti biagna imbes a liputanna ti kakabsatna. Ngem kaaduanna a kalikagumanna ti situtulok a panangisakripisio iti personal a pagimbagantayo tapno matulongan ken mapagserbiantay dagiti kakabsattayo ken ti sabsabali. Mapagulidanan ni apostol Pablo iti daytoy a banag. (2 Corinto 12:15; Filipos 2:17) Agdindinamag dagiti Saksi ni Jehova iti intero a lubong gapu iti kinamanagsakripisioda, a tultulonganda ti kakabsat ken kaarrubada ken us-usarenda ti biagda a mangidanon iti kinapudno a linaon ti Biblia kadagiti sabsabali.b​—Galacia 6:10.

Relasion a Nasken a Tagipatgen

9. Tapno mataginayon ti napateg a relasiontayo iti Dios ken iti Anakna, ania ti siraragsak nga aramidentayo?

⁹ Awanen ti napatpateg kadatayo ngem iti panagayat ni Jehova ken ti Anakna, ni Kristo Jesus. Ngem tapno matagiragsak ken mariknatayo daytoy nga ayat, adda ti masapul nga aramidentayo. Iti maudi a rabii a kaduana dagiti adalanna, kinuna ni Jesus: “Ti addaan kadagiti bilinko ket tungpalenna ida, isu dayta ti agayat kaniak. Kalpasanna ti agayat kaniak ayatento ni Amak, ket isu ayatekto ket silalawag nga iparangkonto kenkuana ti bagik.” (Juan 14:21) Gapu ta tagipatgentayo ti relasiontayo iti Dios ken iti Anakna, sirarag-o nga agtulnogtayo kadagiti bilinda. Iraman daytoy ti baro a bilin nga ipakita ti managsakripisio nga ayat ken ti imbilin ni Jesus kalpasan ti panagungarna ‘a mangasaba kadagiti tattao ken mangipaay iti naan-anay a panangsaksi,’ nga ikagumaan nga ‘aramiden nga ad-adalan’ dagidiay mangipangag iti naimbag a damag.​—Aramid 10:42; Mateo 28:19, 20.

10. Ania a napateg a relasion ti maaprobetsar dagiti napulotan ken ti “sabsabali a karnero”?

¹⁰ Kalpasanna, iti dayta met la a rabii, sinungbatan ni Jesus ti saludsod ti matalek nga apostol a ni Judas (Tadeo): “No ti asinoman agayat kaniak, tungpalennanto ti saok, ket isu ayatento ni Amak, ket umaykamto kenkuana ket makipagyankamto kenkuana.” (Juan 14:22, 23) Uray bayat nga addada ditoy daga, dagiti napulotan a Kristiano a makipagturay ken Kristo idiay langit ti addaan iti nasinged a relasion ken ni Jehova ken iti Anakna. (Juan 15:15; 16:27; 17:22; Hebreo 3:1; 1 Juan 3:2, 24) Ngem ti “sabsabali a karnero” a kakaduada, a mangnamnama nga agbiag nga agnanayon ditoy daga, ti addaan met iti napateg a relasion iti ‘maymaysa a pastorda,’ ni Jesu-Kristo, ken iti Diosda, ni Jehova, la ketdi no ipakitada a natulnogda.​—Juan 10:16; Salmo 15:1-5; 25:14.

“Saankayo a Paset ti Lubong”

11. Ania ti mamagpanunot a pakdaar ni Jesus kadagiti adalanna?

¹¹ Iti daytoy maudi a pannakisaritana kadagiti matalek nga adalanna sakbay ti ipapatayna, mamagpanunot ti pakdaar ni Jesus: Guraen ti lubong ti asinoman nga ay-ayaten ti Dios. Kinunana: “No guraennakayo ti lubong, ammoyo a ginuranak dayta sakbay a ginuranakayo. No pasetnakayo koma ti lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong. Laglagipenyo ti sao a kinunak kadakayo, Ti adipen saan a dakdakkel ngem iti apona. No indadanesdak, idadanesdakayto met; no tinungpalda ti saok, tungpalendanto met ti saoyo.”​—Juan 15:18-20.

12. (a) Apay a pinakdaaran ni Jesus dagiti adalanna a guraen ida ti lubong? (b) Ania ti nasayaat nga usigen ti amin bayat nga umad-adani ti Memorial?

¹² Kasta ti pakdaar ni Jesus kadagiti 11 nga apostolna ken iti amin a pudno a Kristiano a sumaruno kadakuada tapno dida maupay ken sumuko gapu iti pananggura ti lubong. Innayonna: “Sinaok kadakayo dagitoy a banag tapno saankay koma a maitibkol. Paruarendakayto dagiti tattao manipud iti sinagoga. Kinapudnona, um-umayen ti oras inton tunggal maysa a mangpapatay kadakayo pagarupennanto a nakaipaay iti sagrado a panagserbi iti Dios. Ngem aramidendanto dagitoy a banag agsipud ta saanda a naam-ammo uray ti Ama wenno siak.” (Juan 16:1-3) Sigun iti maysa a diksionario ti Biblia, ti kaipapanan ti maysa a porma ti sao a naipatarus ditoy kas “maitibkol” ket “panamagbalin iti maysa nga agsardeng nga agtalek ken mangpanaw iti maysa a pagtalkan ken pagtulnoganna koma; pagbaw-ingen.” Bayat nga umad-adani ti panangrambak iti Memorial, nasayaat no usigentay amin ti panagbiag dagiti matalek a tattao, iti naglabas ken iti agdama, ket tuladentayo ti kinatibkerda iti sidong dagiti pakasuotan. Diyo itulok ti ibubusor ken panangidadanes a mamagbaw-ing kadakayo manipud ken Jehova ken ni Jesus. Imbes ketdi, determinadokayo koma nga agtalek ken agtulnog kadakuada.

13. Ania ti kiniddaw ni Jesus agpaay kadagiti pasurotna idi nagkararag iti Amana?

¹³ Iti pangserra a kararagna sakbay a pinanawanda ti makinngato a siled idiay Jerusalem, kinuna ni Jesus iti Amana: “Intedko kadakuada ti saom, ngem ginura ida ti lubong, agsipud ta saanda a paset ti lubong, a kas kaniak a saan a paset ti lubong. Kiddawek kenka, a saanmo nga ikkaten ida iti lubong, no di ket aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong.” (Juan 17:14-16) Masiguradotayo nga aywanan ni Jehova dagidiay ay-ayatenna, a pabilgenna ida bayat nga agtalinaedda a naisina iti lubong.​—Isaias 40:29-31.

Agtalinaedkayo iti Panagayat ti Ama ken Anak

14, 15. (a) Nangyaspingan ni Jesus iti bagina, a maisupadi iti ania a ‘nakapuy a puon ti ubas’? (b) Siasino dagiti “sanga” ti “pudno a puon ti ubas”?

¹⁴ Idi nakisarita iti nalapat kadagiti matalek nga adipenna idi rabii ti Nisan 14, inyarig ni Jesus ti bagina iti “pudno a puon ti ubas,” a maisupadi iti ‘nakapuy a puon ti ubas’ ti di matalek nga Israel. Kinunana: “Siak ti pudno a puon ti ubas, ket ni Amak ti agtaltalon.” (Juan 15:1) Sinigsiglo sakbayna, inrekord ni propeta Jeremias dagitoy a sinao ni Jehova iti rebelioso nga ilina: “Immulaka a kas napili a nalabaga nga ubas . . . Gapuna kasano a nagbalinka kaniak a nakapuy a sarsaringit ti ganggannaet nga ubas?” (Jeremias 2:21) Ken insurat ni propeta Oseas: “Ti Israel maysa a kumapkapuy a puon ti ubas. Agtultuloy a mangpataud iti bunga maipaay iti bagina. . . . Ti pusoda nagbalin a managinsisingpet.”​—Oseas 10:1, 2.

¹⁵ Imbes a patanorenna ti bungbunga ti pudno a panagdayaw, nagapostasia ti Israel ket nangpataud iti bukodna a bunga. Tallo nga aldaw sakbay ti maudi a pannakisaritana kadagiti matalek nga adalanna, kinuna ni Jesus kadagiti managinsisingpet a papanguluen a Judio: “Kunak kadakayo, Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mateo 21:43) Dayta a baro a nasion isu ti “Israel ti Dios,” a buklen ti 144,000 a napulotan a Kristiano, ket nayaspingda ‘kadagiti sanga’ ti “pudno a puon ti ubas,” ni Kristo Jesus.​—Galacia 6:16; Juan 15:5; Apocalipsis 14:1, 3.

16. Ania ti indagadag ni Jesus nga aramiden dagiti 11 a matalek nga apostol, ket ania ti maikuna maipapan kadagiti matalek a natda iti daytoy aldaw ti panungpalan?

¹⁶ Kinuna ni Jesus kadagiti 11 nga apostol a kaduana iti makinngato a siled: “Tunggal sanga nga adda kaniak a saan a mangpatpataud iti bunga ikkatenna, ket tunggal maysa a mangpatpataud iti bunga dalusanna, tapno mangpataud iti ad-adu pay a bunga. Agtalinaedkayo a naikaykaysa kaniak, ken siak a naikaykaysa kadakayo. Kas iti sanga saan a makapataud a bukbukodna iti bunga malaksid no agtalinaed iti puon ti ubas, iti kasta met laeng a pamay-an uray dakayo saanyo a mabalin, malaksid no agtalinaedkayo a naikaykaysa kaniak.” (Juan 15:2, 4) Ipakita ti moderno a pakasaritaan ti ili ni Jehova a dagiti matalek a natda dagiti napulotan a Kristiano nagtalinaedda a naikaykaysa iti Uloda, ni Kristo Jesus. (Efeso 5:23) Inawatda ti pannakagugor ken pannakaarbas. (Malakias 3:2, 3) Nanipud 1919, naruay ti pinataudda a bunga ti Pagarian. Umuna, naurnong ti dadduma pay a napulotan a Kristiano ken, nangrugi idi 1935, naurnong ti agtultuloy nga umad-adu a “dakkel a bunggoy” a kakaduada.​—Apocalipsis 7:9; Isaias 60:4, 8-11.

17, 18. (a) Ania a sasao ni Jesus ti tumulong kadagiti napulotan ken iti sabsabali a karnero nga agtalinaed iti panagayat ni Jehova? (b) Kasano a makatulong kadatayo ti itatabuno iti Memorial?

¹⁷ Maipapan iti amin a napulotan a Kristiano ken iti kakaduada, kastoy ti kinuna pay ni Jesus: “Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak. Kas iti panagayat kaniak ti Ama ken panagayatko kadakayo, agtalinaedkayo iti ayatko. No tungpalenyo dagiti bilinko, agtalinaedkayto iti ayatko, kas iti panangtungpalko kadagiti bilin ti Ama ken panagtalinaedko iti ayatna.”​—Juan 15:8-10.

¹⁸ Kayattay amin ti agtalinaed iti panagayat ti Dios, ket daytoy ti mangtignay kadatayo nga agbalin a nabunga a Kristiano. Maaramidtayo daytoy no aprobetsarentayo ti tunggal gundaway a mangikasaba iti “naimbag a damag ti pagarian.” (Mateo 24:14) Pagreggetantayo met koma nga iparangarang “ti bunga ti espiritu” iti personal a panagbiagtayo. (Galacia 5:22, 23) Ti itatabunotayo iti Panglaglagip iti ipapatay ni Kristo pabilgenna ti determinasiontayo a mangaramid iti dayta, ta maipalagip ti dakkel a panagayat kadatayo ti Dios ken ni Kristo.​—2 Corinto 5:14, 15.

19. Ania a kanayonan a tulong ti mausig iti sumaruno nga artikulo?

¹⁹ Kalpasan nga inyussuatna ti Memorial, inkari ni Jesus nga ipaayan ni Amana dagiti matalek a pasurotna iti maysa a “katulongan, ti nasantuan nga espiritu.” (Juan 14:26) Mausig iti sumaruno nga artikulo no kasano a tumulong daytoy nga espiritu kadagiti napulotan ken iti sabsabali a karnero nga agtalinaed iti panagayat ni Jehova.

[Footnotes]

Pangrepaso a Salsaludsod

• Ania a praktikal a leksion maipapan iti naayat a panagserbi ti insuro ni Jesus kadagiti adalanna?

• Ti Memorial ket mayannugot a tiempo tapno sukimaten ti bagitayo mainaig iti ania?

• Apay a ditay koma maitibkol iti pakdaar ni Jesus maipapan ti pananggura ken panangidadanes ti lubong?

• Siasino ti “pudno a puon ti ubas”? Asino dagiti “sanga,” ket ania ti manamnama kadakuada?

[Ladawan iti panid 15]

Insuro ni Jesus kadagiti apostolna ti di malipatan a leksion maipapan iti naayat a panagserbi

[Dagiti Ladawan iti panid 16, 17]

Nagtulnog dagiti adalan ni Kristo iti bilinna nga iparangarangda ti managsakripisio nga ayat