Kapitulo 32

“Babaen Itoy Mailasindanto Amin a Dakayo Dagiti Adalak”

IDI Nisan 14, 33 K.P., ti maudin a rabii ti naindagaan a biag ni Jesus. Ammona nga asidegen ti ipapatayna, ngem saan a ti bagina ti pampanunotenna. Imbes ketdi, siaanus nga inaprobitsarna daytoy a gundaway a mangpabileg kadagiti adalanna.

Ammo ni Jesus a marigatandanto kalpasan ti ipapanawna. Agbalindanto a “puntiria ti igugura dagiti amin a nasion” maipuon iti naganna. (Mat. 24:9) Ikagumaanto ni Satanas a paglalasinen ken ballikugen ida. (Luc. 22:31) Kas ibanag ti apostasia, sidadarasto a rumsua dagiti imitasion a Kristiano. (Mat. 13:24-30, 36-43) Ket ‘gapu ta agraira ti kinakillo ti ayat dagiti adu lumamiisto.’ (Mat. 24:12) Gapu ta sarangtenda amin ti kastoy, anianto ti mamagsinggalut kadagiti napudno nga adalan? Kangrunaan amin, ti panagayatda ken Jehova agserbinto a mamagkaykaysa a singgalut kadakuada. (Mat. 22:37, 38) Ngem masapul met nga ayatenda ti maysa ken maysa ket aramidenda iti wagas a mangisalumina kadakuada iti lubong. (Col. 3:14; 1 Juan 4:20) Ania a kitat’ ayat ti kinuna ni Jesus a nabatad a mangilasin kadagiti pudno a pasurotna?

Iti daydi maudi a rabii, inted ni Jesus kadakuada daytoy a bilin: “Mangtedak kadakayo ti maysa a baro a bilin, nga ayatenyo ti maysa ken maysa; kas iti panagayatko kadakayo, nga ayatenyo met ti maysa ken maysa. Babaen itoy mailasindanto amin a dakayo dagiti adalak, no adda panaginnayan-ayatyo.” (Juan 13:34, 35) Nasurok a namin-20 a daras a nadakamat ni Jesus ti ayat ken iti dayta a rabii namitlo a daras nga imbilinna kadakuada nga “ayaten[da] ti maysa ken maysa.” (Juan 15:12, 17) Nabatad a pampanunoten ni Jesus idi saan la a ti 11 a matalek nga apostolna a kaduana idi a rabii no di ket dagiti amin a mangabrasanto iti pudno a Kinakristiano. (Idiligyo ti Juan 17:20, 21.) Ti bilin nga ayaten ti maysa ken maysa agaplikarto kadagiti pudpudno a Kristiano “iti amin nga aldaw agingga iti panagngudo ti sistema ti bambanag.”​—Mat. 28:20.

Ngem kayat kadi a sawen ni Jesus nga uray asino nga indibidual adinoman ditoy lubong nga ipakitana ti panangaasi ken ayat iti padana a tao ket malasinen kas pudno nga adalan ni Jesus?

“Adda Panaginnayan-ayatyo”

Iti dayta met la a rabii, adu met ti imbaga ni Jesus maipapan iti panagkaykaysa. “Agtalinaedkayo a naikaykaysa kaniak,” imbagana kadagiti adalanna. (Juan 15:4) Inkararagna a dagiti pasurotna “agmaymaysada” koma amin, ket innayonna, “kas met sika, Ama, nakikaykaysaka kaniak ket siak nakikaykaysaak kenka, tapno isuda met makikaykaysada kadata.” (Juan 17:21) Sigun itoy a konteksto binilinna ida: “Adda panaginnayan-ayatyo.” (Juan 13:35) No kasta ti ayatda iyebkasda saan laeng nga iti sumagmamano a nasinged a gagayyem wenno iti las-ud la ti maymaysa a kongregasion. Kas panangulitna iti dayta a bilin, insurat kalpasanna ni apostol Pedro: “Ayatenyo ti intero nga asosasion dagiti kakabsat [wenno, ‘ti panagkikinnabsat’].” (1 Ped. 2:17, Kingdom Interlinear; idiligyo ti 1 Pedro 5:9.) Isu nga agbalindanto a nadekket, sangalubongan nga agkakabsat. Ti naisangsangayan nga ayat rumbeng nga ipaay kadagiti amin iti las-ud ti sangalubongan a pamilia dagiti manamati gapu ta isuda ket mamatmatan a kas kakabsat.

Kasano a maiparangarang ti kasta nga ayat? Aniat’ nakaisaluminaan unay, nakaigiddiatan unay, ti ayatda iti maysa ken maysa tapno makita dagiti dadduma ti nabatad nga ebidensia ti pudno a Kinakristiano?

“Kas iti Panagayatko Kadakayo”

“Masapul nga ayatem ti padam a tao a kas iti bagim,” kuna ti Linteg ti Dios iti Israel nasurok 1,500 a tawen sakbay a nagbiag ni Jesus ditoy daga. (Lev. 19:18) Ti kasta a panagayat iti kaarruba, nupay kasta, saan nga isut’ kita ti ayat a mangigiddiat kadagiti pasurot ni Jesus. Ti ayat nga adda iti panunot ni Jesus ket artapanna ti panagayat kadagiti sabali a kas iti bagim.

Ti bilin a panagayat iti maysa ken maysa ket, kas kinuna ni Jesus, “maysa a baro a bilin.” Baro, saan a gapu ta naud-udi ngem ti Linteg Mosaico, ngem baro no iti kawadwad ti saklawen dayta nga ayat. Ayatenyo ti maysa ken maysa “kas iti panagayatko kadakayo,” inlawlawag ni Jesus. (Juan 13:34) Napigsa, di agbaliw ti ayatna kadagiti adalanna. Managsakripisio nga ayat daytoy. Saanna la nga indemostra dayta babaen iti panangipaayna ti sumagmamano a naimbag nga aramid kadakuada. Tinaraonanna ida iti naespirituan ket, no nesesita, inasikasona dagiti pisikal a kasapulanda. (Mat. 15:32-38; Mar. 6:30-34) Ket kas kangrunaan a pammaneknek iti ayatna, intedna ti biagna para kadakuada.​—Juan 15:13.

Kasta ti nagpaiduma a kita ti ayat a kalikaguman ti “baro a bilin,” ti ayat a rumbeng a maadda kadagiti pudno a pasurot ni Jesus. (1 Juan 3:16) Asino itatta ti mangipapaay ti nabatad a pammaneknek a tungtungpalenda ti “baro a bilin”? Ti ebidensia a naidatag nga immun-unan iti daytoy a libro awan duadua nga itudona ti maymaysa a sangalubongan nga asosasion dagiti Kristiano.

Nalatakda, saan a gapu iti naisalumina a kawes wenno naiduma a kustombreda, no di ket babaen iti napigsa ken nabara a singgalutda iti maysa ken maysa. Nasayaat ti pakasarsaritaanda no iti panangidemostra iti ayat a mangartap kadagiti naggigiddiatan ti rasa ken nasional a pagbedngan. Adindinamag a dida kayat ti aglalaban uray no dagiti nasion a pagtataenganda ket mapan makigubat. Dagiti dadduma dinayawda ti panagtitinnulongda no tiempo ti kalamidad, a kas koma no adda dagiti natural a didigra wenno no adda kakabsatda a maidadanes gaput’ panangtaginayonda iti kinatarnawda iti Dios. Sidadaanda a mangibtur iti rigat wenno mangsaranget iti peggad tapno tulonganda dagiti kakabsatda a lallaki ken babbai a nakatayan ni Kristo. Ken, wen, situtulokda a matay para iti maysa ken maysa. Ti ayat nga indemostrada ket nagpaiduma iti lubong a kumarkaro ti panagimbubukodanna. Saksi ida ni Jehova.a

Ti pangarigan ti kasta nga agtigtignay nga ayat naimatangan kalpasan ti Bagyo nga Andrew, a nangdupag iti kosta ti Florida, E.U.A., idi agsapa ti Lunes, Agosto 24, 1992. Gaput’ didigra nga imbungana agarup 250,000 dagiti tattao a naawanan ti balay. Rinibo a Saksi ni Jehova dagiti biktima. Gistay dagus a nagtignay ti Bagi a Manarawidwid dagiti Saksi ni Jehova babaen iti panangdutokna ti komite ti saranay ken inyurnosna ti isasangpet dagiti pundo a pannaranay. Dagiti Kristiano a manangaywan dita a lugar dagdagus a sinapulda dagiti tunggal Saksi tapno matingitingda dagiti kasapulan ket maitedda ti badang. Iti bigat ti Lunes, a kaaldawan daydi bagyo, dagiti Saksi a taga South Carolina, ginasut a kilometro ti kaadayoda, nagturongdan iti lugar a nadidigra a kakuyogda ti trak a nagkarga kadagiti generator, chain saw, ken danum nga inumen. Iti Martes, awitda dagiti ad-adu pay nga abasto a naidonar, ginasut a boluntario a naggapu kadagiti sabali nga ili ti simmangpet tapno tulonganda dagiti lokal a kakabsat a mangtarimaan kadagiti Kingdom Hall ken pribada a balbalay. No maipapan iti naiyurnos a pannaranay, kinuna ti maysa a di-Saksi a babai nga agnanaed iti asideg ti Kingdom Hall: “Talaga a daytoy ti Nakristianuan nga ayat a sarsaritaen ti Biblia.”

Agbaawto ngata dayta nga ayat kalpasan ti maysa wenno dua nga aramid a naimbag? Maipaay laeng ngata kadagiti agpapada ti rasa ken nasionalidadda? Talaga a saan! Kas resulta ti di natibker a napolitikaan ken ekonomiko a kasasaad sadi Zaire, idi 1992 adda nasurok a 1,200 a Saksi a napukawda dagiti balbalay ken amin a kupkupikopanda. Dagus a tinulongan ida dagiti dadduma a Saksi idiay Zaire. Nupay narigat ti mismo a panagbiagda, inranudda met kadagiti nagkamang iti Zaire a naggapu idiay Sudan. Di nagbayag, simmangpet dagiti saranay nga abasto manipud Sud Africa ken Francia; inraman daytoy ti makan a mais, naasinan nga ikan, ken ag-agas​—dagiti bambanag a talaga a masapulda. Di agsarday a naipaay ti tulong, sigun iti kasasaad. Ket bayat a maar-aramid daytoy, maipapaay met ti kasta a tulong kadagiti adu a sabsabali a daga.

Kaskasdi, ti kaadda kadakuada ti kasta nga ayat saan nga isut’ mamagbalin kadagiti Saksi ni Jehova a basta kontentodan. Mabigbigda a, kas paspasurot ni Jesu-Kristo, masapul nga itultuloyda pay ti agsalukag.

[Footnote]

[Blurb iti panid 710]

Ania a kitat’ ayat ti kinuna ni Jesus a nabatad a mangilasin kadagiti pudno a pasurotna?

[Blurb iti panid 711]

Agbalindanto a nadekket, sangalubongan nga agkakabsat

[Kahon iti panid 712]

“Aywanan Dagiti Saksi Dagiti Kapammatianda​—Ken Dadduma Pay”

Iti dayta a paulo, inreport ti Miami Herald ti urnos a pannaranay dagiti Saksi ni Jehova idiay South Florida kalpasan ti didigra nga imbunga ti Bagyo nga Andrew idi Agosto 1992. Kinuna ti artikulo: “Awan ti uray maysa ditoy Homestead a mangirikep ti ruanganna kadagiti Saksi ni Jehova itoy a lawas​—uray no adda pay laeng ruangan nga irikepda. Agarup 3,000 a boluntario a Saksi manipud iti intero a pagilian ti nagtitipon iti lugar ti didigra, a tumulong nga umuna kadagiti kapammatianda, kalpasanna kadagiti dadduma. . . . Agarup 150 tonelada a taraon ken abasto ti naurnong iti sentro a lugar idiay Assembly Hall iti lumaud a Broward County sada inturong kadagiti dua a Kingdom Hall idiay Homestead. Manipud kadagiti hall, agsisina dagiti grupo iti kada bigat tapno tarimaanenda dagiti nadadael a balay dagiti kakabsatda a Saksi. . . . Adda kusina idiay ruar a napartak a nangluto ti taraon ti 1,500 a tattao, mamitlo iti inaldaw. Ket saan a hot dog ken doughnut laeng ti ipakpakanda. Pakanenda dagiti boluntario iti kalluto a tinapay, macaroni, dagiti nateng a salad, lauya, flapjacks ken French toast​—nga amin ket naidonar.”​—Agosto 31, 1992, panid 15A.