Juan 15:13—“Awan ti Addaan Dacdackel nga Ayat Ngem Daytoy”

“Awan ti dakdakkel nga ayat ngem iti daytoy, nga ited ti maysa ti biagna para kadagiti gagayyemna.”—Juan 15:13, Baro a Lubong a Patarus.

“Awan ti addaan dacdackel nga ayat ngem daytoy: ti mangted ti biagna gapu cadagiti gagayyemna.”—Juan 15:13, Ti Biblia.

Kaipapanan ti Juan 15:13

Tultulongan ni Jesus dagiti pasurotna tapno matarusanda a rumbeng koma a nakabilbileg ti ayatda nga uray la situtulokda a matay para iti maysa ken maysa.

Kadagiti sasaona sakbay dayta, imbaga ni Jesus kadagiti apostolna: “Ibilinko nga agiinnayatkayo kas iti panangayatko kadakayo.” (Juan 15:12) Ania a kita ti ayat ti narikna ni Jesus para kadakuada? Managsakripisio ken saan a managimbubukodan nga ayat. Bayat ti ministeriona ditoy daga, inyun-unana ti kasapulan ken pagimbagan ti sabsabali. Pinaimbagna ti sakit dagiti tattao ken insurona kadakuada ti Pagarian ti Dios.a Inaramidna pay dagiti nanumo a trabaho a pakabenepisiaran ti dadduma. (Mateo 9:35; Lucas 22:27; Juan 13:3-5) Ngem iti Juan 15:13, tuktukoyen ni Jesus ti adayo a dakdakkel a panangipakita iti ayat. Kinapudnona, mano la nga oras kalpasan nga imbaga ni Jesus dagidiay a sasao, impakitana dayta a dakdakkel nga ayat idi situtulok nga intedna ti “biagna kas pangsubbot iti adu.” (Mateo 20:28; 22:39) Impakitana ngarud iti naisangsangayan a pamay-an a dakdakkel ti panagayatna iti sabsabali ngem iti bagina.

Ay-ayaten ni Jesus dagiti tattao. Ngem nangnangruna nga ay-ayatenna dagiti mangtungtungpal kadagiti pannursurona. Imbilangna dagiti adalanna a nadekket a gagayyemna gapu ta nagtulnogda kadagiti bilbilinna ken nagtalinaedda a matalek kenkuana bayat a naipasango kadagiti pannubok. (Lucas 22:28; Juan 15:14, 15) Isu nga ad-adda pay a determinado a mangisakripisio iti biagna para kadakuada.

Inyaplikar dagiti Kristiano idi umuna a siglo dagiti imbaga ni Jesus isu a nakasaganada a matay para iti maysa ken maysa. (1 Juan 3:16) Wen, ti di agimbubukodan nga ayat—ti ayat nga impakita ni Jesus—ti kangrunaan a pakabigbigan dagiti pudno a Kristiano.—Juan 13:34, 35.

Konteksto ti Juan 15:13

Mabasa iti kapitulo 13 agingga iti 17 iti Ebanghelio ni Juan ti balakad ni Jesus kadagiti 11 a matalek nga apostolna ken ti maudi a kararagna a kaduana ida. Natay ni Jesus sumagmamano nga oras kalpasanna. Iti kapitulo 15, inyarig ni Jesus dagiti adalanna kadagiti bunga manipud iti puon ti ubas. Ipakita dayta a nagpateg nga agtalinaedda a naikaykaysa kenkuana tapno mapaneknekanda a pudnoda a pasurotna. Pinaregtana ida nga itultuloyda ti “agbunga iti adu.” (Juan 15:1-5, 8) Ti maysa a pamay-an a maaramidda dayta ket babaen ti panangipakitada iti managsakripisio nga ayat para iti dadduma, a pakairamanan ti panangikasaba iti mensahe nga inkasaba ni Jesus—“ti naimbag a damag ti Pagarian ti Dios.”—Lucas 4:43; Juan 15:10, 17.

Buyaem daytoy ababa a video tapno makitam ti pakabuklan ti libro a Juan.