Dagiti Saludsod Manipud Kadagiti Managbasa
◼ Maigapu kadagiti sasao ni Jesus idiay Juan 15:15, masapul kadi a matmatan dagiti Kristiano dagiti bagbagida kas “ad-adipen,” wenno mabalintay kadi nga ibilang ti bagbagitayo kas dagiti “gagayyemna”?
Mabalintayo nga ibilang dagiti bagbagitayo ken masapul nga agpada a kasta ti pagbalinantayo. Tapno makita no apay, paliiwentayo no ania ti kinuna ni Jesus sadiay kadagiti matalek nga apostolesna iti maudi a rabii a kaaddana kadakuada:
“Awan ti addaan dakdakkel nga ayat ngem daytoy, ti mangted ti biagna gapu kadagiti gagayyemna. Dakayo ti gagayyemko, no aramidenyo dagiti ibilinko kadakayo. Dikay naganenen ti ad-adipen, ta ti adipen dina ammo ti aramiden ni apona. Ngem ninagankayo ti pagpagayam, ta isuamin dagiti nangngegko ken Amak, impakaammok kadakayo.”—Juan 15:13-15.
Umuna, ania ti kayat a sawen ni Jesus babaen iti panagkunana kadagiti nasungdo nga ad-adalanna nga ad-adipen? Dina kayat a sawen nga ad-adipen iti pannakaawat a dagiti amin a tattao a kaputotan ni Adan ket naipasngayda nga imperpekto, ket nailakoda iti wenno naadipenda iti basol. (Juan 8:34; Roma 5:18, 19; 6:16; 7:14) Kas met kadagiti Kristiano nanipud idin, dagiti apostoles naadipenda idi iti kasta a pamay-an, ngem ti daton ni Jesus ti nangipaay iti pamay-an ti pannakawayawayada, wenno pannakalapsutda kadakuada. (1 Pedro 1:18, 19; Galacia 4:5) Kaskasdi, saanda a nagbalin a naan-anay a siwayawaya. Kas iti insurat ni apostol Pablo kamaudiananna, dagitoy “nagatangda iti pateg,” iti dara ni Jesus, gapuna nagbalinda nga ad-adipen iti Dios ken ni Kristo.—1 Corinto 6:20; 7:22, 23.
Idiay Juan 15:15 saan nga isingsingasing ni Jesus a dagiti matalek nga apostoles nga iti di agbayag ket umawatda iti nasantuan nga espiritu ken agbalin a napulotan a Kristiano ket saandan nga ad-adipen. (Idiligyo ti Juan 15:20.) Siempre, ti panagserbi iti Dios babaen ken ni Kristo ket saan a manangilupitlupit ken makapapatay. Daytat’ naayat ken makaitalimeng iti biag. (2 Timoteo 4:8; Tito 1:1, 2) Ti maysa a Kristiano a siraragsak a mangawat iti pateg ti dara ni Kristo ken agbalin nga adipen iti Dios mabalin a mapasanguan iti agnanayon nga ipapatay no laeng no kamaudiananna dina awaten dayta a daton ken itulokna ti bagina met laeng nga agsubli iti basol, nga agbalin nga adipen manen dayta. (Galacia 1:10; 4:8, 9; Hebreo 6:4-6) Gapuna, dagiti ad-adalan ni Jesus agtultuloyda nga agbalin nga ad-adipen ti Dios ken ni Kristo, ngem dagitoy saanda laeng nga ad-adipen. Apay?
Ni Jesus ken dagiti apostoles naawatanda nga idi, iti gagangay a nalamiis wenno pormal a relasion ti apoadipen, ‘ti maysa nga adipen mabalin a dina ammo ti ar-aramid ti apona.’ Gagangay, ti tao nga apo saan a makisarita iti ginatangna nga adipen, wenno ipalgak kenkuana dagiti pribado a kapanunotan ken rikriknana.
Makitatayo manipud kadagiti sasao ni Jesus, nupay kasta, a naiduma dayta kadagiti apostoles. Kinunana: “Ngem ninagankayo ti papagayam, ta isuamin dagiti nangngegko ken Amak impakaammok kadakayo.” (Juan 15:15) Wen, kas iti gagangay kadagiti ingungoten a gagayyem, ni Jesus impakaammona kadakuada dagiti amin a detalye ken pannakaawat a palimed idi. (Mateo 13:10-12; 1 Corinto 2:14-16) Nupay no ad-adipenda pay laeng, wenno tagabu, iti Dios babaen ken Jesus, dagiti apostoles tinagiragsakda ti nabara a kinasinged a nangtanda kadakuada kas dagiti mapagtalkan a papagayam. (Idiligyo iti Salmo 25:14.) Dayta mabalin ken pudno koma met kadatayo. Anian a pribilehio ti maaddaan kadagiti Appo idiay langit Dagidiay a mangtrato kadatayo a kas mapagtalkan ken mararaem a pagipudnuan, kas gagayyem!