Adaywanyo ti Di Umiso a Panagdayaw!

“‘Rummuarkayo manipud iti tengngada, ket isinayo ti bagbagiyo,’ kuna ni Jehova, ‘ket isardengyo a sagiden ti di nadalus a banag.’”​—2 CORINTO 6:17.

1. Ania ti kasasaad ti espiritualidad ti adu a napasnek a tattao ita?

ADU a napasnek a tattao ti di makaammo iti kinapudno maipapan iti Dios ken iti masanguanan ti sangatauan. Gapu ta dida masarakan dagiti sungbat kadagiti kangrunaan a naespirituan a pakaseknanda, mariribukan ken agduaduada. Minilion ti sibubulsek a mangan-annurot kadagiti an-anito, ritual, ken selebrasion a saan a makaay-ayo iti Namarsua kadatayo. Mabalin nga adda kaarruba wenno kabagianyo a mamati iti umap-apuy nga impierno, Trinidad, imortal a kararua, wenno dadduma pay a di umiso a sursuro.

2. Ania ti inaramid dagiti lider ti relihion, ket ania ti resultana?

² Apay a nasaknap ti naespirituan a kinasipnget ita? Nakalkaldaang, maigapu dayta iti relihion―dagiti narelihiosuan nga organisasion ken dagiti liderda a mangitantandudo kadagiti kapanunotan a maisupadi kadagiti kapanunotan ti Dios. (Marcos 7:7, 8) Kas resultana, adu ti mangipagarup nga agdaydayawda iti pudno a Dios idinto ta iti kinapudnona, isu ket pagledleddaangenda. Ti palso a relihion ti direkta a makimbasol iti kastoy a nakaay-ay-ay a kasasaad.

3. Siasino ti kangrunaan a mangitantandudo iti palso a relihion, ken kasano ti pannakailadawanna iti Biblia?

³ Adda maysa a di makita a persona iti likudan ti palso a relihion. Kinuna ni apostol Pablo maipapan iti daytoy a persona: “Ti dios daytoy a sistema ti bambanag binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.” (2 Corinto 4:4) “Ti dios daytoy a sistema ti bambanag” ket awan sabali no di ni Satanas a Diablo. Isu ti kangrunaan a mangitantandudo iti di umiso a panagdayaw. “Ni Satanas a mismo pagbalbalinenna ti bagina a kasla anghel ti lawag,” insurat ni Pablo. “Saan ngarud a banag a naindaklan no dagiti ministrona pagbalbalinenda met ti bagbagida a kasla ministro ti kinalinteg.” (2 Corinto 11:14, 15) Pagparangen ni Satanas a naimbag ti dakes ken allilawenna dagiti tattao tapno mamatida kadagiti kinaulbod.

4. Ania ti sagudayen ti Mosaiko a Linteg maipapan kadagiti ulbod a mammadto?

⁴ Saan a pakasdaawan a ti Biblia kasta unay ti panangkondenarna iti palso a relihion! Kas pagarigan, ti Mosaiko a Linteg espesipiko a pakdaaranna ti ili ti Dios maibusor kadagiti ulbod a mammadto. Asinoman a mangitantandudo kadagiti di umiso a sursuro ken iti panagdayaw kadagiti didiosen ket nasken a ‘mapapatay maigapu iti panagsaona iti iyaalsa ken Jehova.’ Naibilin kadagiti Israelita nga ‘ikkatenda ti dakes iti tengngada.’ (Deuteronomio 13:1-5) Wen, matmatan ni Jehova a dakes ti palso a relihion.​—Ezequiel 13:3.

5. Aniada a pakdaar ti nasken nga ipangagtayo ita?

⁵ Ni Jesu-Kristo ken dagiti apostolna inyanninawda ti pannakarimon ni Jehova kadagiti palso a relihion. Pinakdaaran ni Jesus dagiti adalanna: “Siputanyo dagiti ulbod a mammadto nga umay kadakayo iti kawes ti karnero, ngem iti uneg loboda a narawet.” (Mateo 7:15; Marcos 13:22, 23) Insurat ni Pablo a “ti pungtot ti Dios maipampanayag manipud langit maibusor iti isuamin a di kinanadiosan ken kinakillo dagiti tattao a manglaplapped iti kinapudno.” (Roma 1:18) Anian a nagpateg a dagiti pudno a Kristiano ipangagda dagitoy a pakdaar ket liklikanda ti asinoman a manglaplapped iti pannakaipakaammo ti kinapudno ti Sao ti Dios wenno mangirakrakurak kadagiti ulbod a sursuro!―1 Juan 4:1.

Rummuarkayo iti “Babilonia a Dakkel”

6. Kasano ti panangiladawan ti Biblia iti “Babilonia a Dakkel”?

⁶ Usigenyo no ania ti kuna ti Apocalipsis a libro ti Biblia maipapan iti palso a relihion. Inladawanna dayta kas maysa a nabartek a balangkantis a mangim-impluensia kadagiti adu a pagarian ken kadagiti umilida. Dayta a piguratibo a babai nakiabig iti adu nga ar-ari ken nabartek iti dara dagiti pudno nga agdaydayaw iti Dios. (Apocalipsis 17:1, 2, 6, 18) Adda nagan a naisurat iti mugingna a maitutop iti narugit ken makarimon a kababalinna. Ti naganna ket “Babilonia a Dakkel, ti ina dagiti balangkantis ken ti makarimon a bambanag iti daga.”​—Apocalipsis 17:5.

7, 8. Kasano a nakikamalala ti palso a relihion, ken ania dagiti resulta?

⁷ Ti panangiladawan ti Biblia iti Babilonia a Dakkel mayanatup a tukoyenna ti sangalubongan a palso a relihion. Nupay dagiti rinibu a relihion saanda a literal a maymaysa a sangalubongan nga organisasion, nagkaykaysada no iti panggep ken aramid. Kas maysa nga imoral a babai sigun iti pannakailadawanna iti Apocalipsis, ti palso a relihion dakkel ti impluensiana kadagiti gobierno. Kas iti maysa a babai a saan a matalek kadagiti karina iti nakiasawaanna, nakikamalala ti palso a relihion babaen ti pannakialiansana iti nadumaduma a napolitikaan a pannakabalin. “Dakayo a mannakikamalala, saanyo aya nga ammo a ti pannakigayyem iti lubong ket pannakibusor iti Dios?” insurat ni adalan a Santiago. “Siasinoman, ngarud, nga agtarigagay nga agbalin a gayyem ti lubong ibilbilangna ti bagina a kabusor ti Dios.”​—Santiago 4:4.

⁸ Daytoy a panaglaok ti palso a relihion ken dagiti gobierno nagbanag iti nakaro a panagsagaba dagiti tattao. Ni Dr. Xolela Mangcu, Africano nga analista iti politika, napaliiwna a “ti pakasaritaan ti lubong ket napno iti reprep a panangikisap iti biag maipuon iti panaglaok ti relihion ken ti politika.” Nabiit pay a kinuna ti maysa a pagiwarnakan: “Dagiti karanggasan ken kapeggadan a salisal ita . . . ket maipuon iti relihion.” Minilion a tattao ti napapatay gapu kadagiti gubat a sinuportaran ti relihion. Indadanes ken pinapatay pay ketdi ti Babilonia a Dakkel dagiti pudno nga adipen ti Dios, gapuna isu ket nabartek kadagiti darada no ar-arigen.―Apocalipsis 18:24.

9. Kasano a nayebkas iti libro nga Apocalipsis ti gura ni Jehova iti palso a relihion?

⁹ Ti ibaga ti Biblia a pagbanaganto ti Babilonia a Dakkel ket nalawag a pammaneknek a kagura ni Jehova ti di umiso a panagdayaw. Kuna ti Apocalipsis 17:16: “Ti sangapulo a sara a nakitam, ken ti atap nga animal, dagitoy guraendanto ti balangkantis ket pagbalinendanto a walangwalang ken lamolamo, ket lamutendanto dagiti nalasag a pasetna ket isu puorandanto a naan-anay iti apuy.” Umuna, maysa a dakkel nga atap nga animal ti mangpapatay kenkuana ken manglamut kadagiti lasagna. Kalpasanna, mapuoran ti aniaman a matedda. Asidegen a kasta ti aramiden dagiti gobierno maibusor iti palso a relihion. Ti Dios ti mangimaniobra iti dayta. (Apocalipsis 17:17) Naikeddengen ti pannakadadael ti Babilonia a Dakkel, ti sangalubongan nga imperio ti palso a relihion. Isu “saanto a pulos masarakanen.”​—Apocalipsis 18:21.

10. Ania ti rumbeng a panangmatmattayo iti palso a relihion?

¹⁰ No kadagiti pudno nga agdaydayaw, ania ti rumbeng a panangmatmatda iti Babilonia a Dakkel? Nalawag ti bilin ti Biblia: “Rummuarkayo kenkuana, tattaok, no saanyo a kayat ti makiraman kenkuana kadagiti basolna, ken no saanyo a kayat ti umawat iti paset dagiti saplitna.” (Apocalipsis 18:4) Dagidiay agtarigagay a maispal nasken a rummuarda manipud iti palso a relihion sakbay a naladaw ti amin. Idi adda ditoy daga, impadto ni Jesus a kadagiti maudi nga al-aldaw, adu ti mangibaga a sumursurotda kenkuana. (Mateo 24:3-5) Ngem kunaenna kadakuada: “Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:23) Ti agturturay ita nga Ari, ni Jesu-Kristo, inlaksidna ti palso a relihion.

Adaywanyo​—Kasano?

11. Ania ti nasken nga aramidentayo tapno maadaywantayo ti palso a relihion?

¹¹ Dagiti pudno a Kristiano adaywanda ti palso a relihion, a laksidenda dagiti di umiso a narelihiosuan a sursuro. Kaipapananna a ditay buyaen wenno denggen dagiti narelihiosuan a programa iti telebision wenno iti radio ken ditay met basaen dagiti narelihiosuan a literatura a mangirakrakurak iti kinaulbod maipapan iti Dios ken iti Saona. (Salmo 119:37) Nainsiriban met a liklikantayo ti tumabuno kadagiti taripnong wenno panaglinglingay nga inisponsoran ti aniaman nga organisasion a nainaig iti palso a relihion. Kanayonanna, saantay a suportaran ti palso a relihion iti aniaman a wagas. (1 Corinto 10:21) No aramidentayo dagita a panagannad, maliklikantayo ti agbalin a biktima kadagidiay ‘mangan-anup babaen iti pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.’​—Colosas 2:8.

12. Kasano a makalapsut ti maysa manipud iti aniaman a pakainaiganna kadagiti palso a relihion?

¹² Kasano no ti maysa nga agtarigagay nga agbalin a Saksi ni Jehova ket rehistrado a kameng ti palso a relihion? Kadawyanna a maaramid ti maysa a surat ti panaglusulos kas pammaneknek a saanen a kayat dayta a tao ti agpabigbig kas kameng ti palso a relihion. Napateg met a sigaganat nga agtignay dayta a tao tapno naan-anay a maliklikannan ti aniaman a kita ti naespirituan a pannakamulit manipud iti palso a relihion. Iti publiko ken iti naggapuanna a relihion, nasken a silalawag nga ipakitana babaen dagiti aramid a kayatnan ti agbalin a Saksi ket ginupednan ti pannakitimpuyogna iti sigud a relihionna.

13. Ania ti balakad ti Biblia maipapan iti kinapateg ti iyaadayo iti di umiso a panagdayaw?

¹³ “Dikay agbalin a di agkaasmang a naisangol kadagiti di manamati,” insurat ni apostol Pablo. “Ta ania ti pagkaduaan ti kinalinteg ken kinakillo? Wenno ania ti pakiramanan ti lawag iti sipnget? Kanayonanna, ania ti pagtunosan da Kristo ken Belial? Wenno ania ti pakiramanan ti matalek a tao iti di manamati? Ket ania ti pakitunosan ti templo ti Dios kadagiti idolo? . . . ‘Gapuna rummuarkayo manipud iti tengngada, ket isinayo ti bagbagiyo,’ kuna ni Jehova, ‘ket isardengyo a sagiden ti di nadalus a banag.’” (2 Corinto 6:14-17) Maipangagtayo dagitoy a sasao no adaywantayo ti di umiso a panagdayaw. Ti kadi balakad ni Pablo iramanna ti pananglikliktayo kadagiti ulbod nga agdaydayaw?

“Itultuloyyo ti Magna a Sisisirib”

14. Rumbeng kadi a naan-anay a liklikantayo dagidiay makipaspaset iti di umiso a panagdayaw? Ilawlawagyo.

¹⁴ Rumbeng kadi a dagiti pudno nga agdaydayaw naan-anay a liklikanda dagiti tattao a makipaspaset iti di umiso a panagdayaw? Rumbeng kadi a ditay pulos makitimpuyog kadagiti saantayo a kapammatian? Ti sungbat ket saan. Kuna ti maikadua kadagiti dua a kangrunaan a bilin: “Masapul nga ayatem ti padam a tao a kas iti bagim.” (Mateo 22:39) Awan duadua nga ipakpakitatayo nga ay-ayatentayo dagiti kaarrubatayo no iranudtayo kadakuada ti naimbag a damag ti Pagarian. Ipakpakitatayo met nga ay-ayatentayo ida no iyadalantay ida iti Biblia ken ipakaammotayo kadakuada a nasken nga adaywanda ti di umiso a panagdayaw.

15. Ania ti kayat a sawen ti panagbalin a ‘saan a paset ti lubong’?

¹⁵ Ngem nupay ikaskasabatayo ti naimbag a damag kadagiti kaarrubatayo, kas paspasurot ni Jesus ‘saantayo a paset ti lubong.’ (Juan 15:19) Ti sao ditoy a “lubong” tukoyenna ti kagimongan dagiti tattao a naisina iti Dios. (Efeso 4:17-19; 1 Juan 5:19) Naisinatayo iti lubong gapu ta likliklikantayo dagiti kababalin, panagsasao, ken kondukta a di makaay-ayo ken ni Jehova. (1 Juan 2:15-17) Malaksid iti dayta, gapu ta ammotayo ti prinsipio a “dagiti dakes a pannakitimpuyog dadaelenda dagiti makagunggona nga ugali,” ditay makisinninged kadagidiay saan nga agbibiag maitunos kadagiti Nakristianuan a pagalagadan. (1 Corinto 15:33) Ti panagbalin a saan a paset ti lubong kaipapananna ti panagtalinaed “nga awanan mulit manipud iti lubong.” (Santiago 1:27) Gapuna, ti panagbalin a naisina iti lubong dina kaipapanan a literal a ditay pulos makilangen kadagiti tattao.―Juan 17:15, 16; 1 Corinto 5:9, 10.

16, 17. Kasano ti rumbeng a panangtrato dagiti Kristiano kadagiti saan a makaammo iti kinapudno iti Biblia?

¹⁶ Kasano ngarud ti panangtratotayo kadagiti saan a makaammo kadagiti kinapudno iti Biblia? Insurat ni Pablo iti kongregasion ti Colosas: “Itultuloyyo ti magna a sisisirib kadagidiay adda iti ruar, a gatangenyo ti nainggundawayan a tiempo maipaay iti bagbagiyo. Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.” (Colosas 4:5, 6) Insurat ni apostol Pedro: “Santipikarenyo ti Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.” (1 Pedro 3:15) Binalakadan ni Pablo dagiti Kristiano “a saanda nga agsao iti makadangran iti asinoman, saanda a mannakiringgor, nga agbalinda a nainkalintegan, nga ipakitada ti isuamin a kinaalumamay kadagiti amin a tattao.”​—Tito 3:2.

¹⁷ Kas Saksi ni Jehova, liklikantayo ti agbalin a nasabrak wenno napangas. Pulos a ditay agusar kadagiti manginsulto a sasao a pangdeskribir kadagiti tattao a kameng ti sabali a relihion. Imbes ketdi, agtalinaedtayo a naannad uray pay no nauyong wenno mangusar kadagiti mangirurumen a sasao dagiti bumalay, kaarruba, wenno katrabahuantayo.―Colosas 4:6; 2 Timoteo 2:24.

“Itultuloymo a Salimetmetan ti Pagtuladan iti Makapasalun-at a Sasao”

18. Ania ti nakalkaldaang a naespirituan a kasasaad dagidiay agsubli iti di umiso a panagdayaw?

¹⁸ Anian a nakaay-ay-ay no agsubli ti maysa iti di umiso a panagdayaw kalpasan a naammuanna dagiti kinapudno iti Biblia! Kastoy ti panangiladawan ti Biblia kadagiti dakes a pagbanagan ti kasta a tignay: “Pudno unay a no, kalpasan a nakalapsutdan kadagiti pakatulawan ti lubong babaen ti umiso a pannakaammo iti Apo ken Manangisalakan a ni Jesu-Kristo, maigamerda manen kadagitoy met laeng a banag ken maparmekda, dagiti kamaudianan a kasasaad nagbalin a dakdakes kadakuada ngem iti immuna. . . . Napasamak kadakuada ti sasao ti pudno a proverbio: ‘Ti aso nagsubli iti bukodna a sarwa, ken ti nadigus a takong iti panagtulidtulid iti kapitakan.’”​—2 Pedro 2:20-22.

19. Apay a napateg nga agtalinaedtayo nga alerto iti aniaman a mamagpeggad iti espiritualidadtayo?

¹⁹ Nasken nga agtalinaedtayo nga alerto kadagiti aniaman a mamagpeggad iti espiritualidadtayo. Umas-assibay dagiti peggad! Namakdaar ni apostol Pablo: “Ti naipaltiing a sasao kunaenna a silalawag a kadagiti maud-udi a periodo ti tiempo umikayto ti sumagmamano manipud iti pammati, nga ipangagda dagiti makayaw-awan a naipaltiing a sasao ken sursuro dagiti sairo.” (1 Timoteo 4:1) Agbibiagtayo iti “maud-udi a periodo ti tiempo.” Dagidiay saan a mangpanaw iti di umiso a panagdayaw mabalin a ‘mayallo-allonda a kas panangyallon dagiti dalluyon ket mayalla-allada ditoy ken idiay iti tunggal angin ti sursuro babaen ti panangallilaw dagiti tattao, babaen ti kinasikap iti panangparnuay iti biddut.’​—Efeso 4:13, 14.

20. Kasanotayo a masaluadan ti bagitayo kadagiti makadangran nga impluensia ti palso a relihion?

²⁰ Kasanotayo a masaluadan ti bagitayo kadagiti makadangran nga impluensia ti palso a relihion? Panunotenyo laengen ti amin nga impaay ni Jehova. Adda kadatayo ti Sao ti Dios, ti Biblia. (2 Timoteo 3:16, 17) Ipapaay met ni Jehova ti aglaplapusanan a naespirituan a taraon babaen “ti matalek ken masirib nga adipen.” (Mateo 24:45) Bayat a rumangrang-aytayo iti kinapudno, saan kadi a rumbeng a patanorentayo ti tarigagaytayo a mangan iti “nakired a taraon agpaay kadagiti nataengan a tattao” ken ti tarigagaytayo a tumabuno kadagiti Nakristianuan a gimong a pakaadalantayo kadagiti naespirituan a kinapudno? (Hebreo 5:13, 14; Salmo 26:8) Determinadotayo koma a naan-anay a mangaprobetsar kadagiti probision ni Jehova tapno ‘maitultuloytayo a masalimetmetan ti pagtuladan iti makapasalun-at a sasao’ a nangngegtayo. (2 Timoteo 1:13) Iti kasta, maadaywantayo ti di umiso a panagdayaw.

Ania ti Naadalyo?

• Ania ti “Babilonia a Dakkel”?

• Ania ti nasken nga aramidentayo tapno maadaywantayo ti palso a relihion?

• Ania dagiti mamagpeggad iti espiritualidadtayo a nasken a liklikantayo?

[Ladawan iti panid 28]

Ammoyo kadi no apay a nailadawan kas imoral a babai ti “Babilonia a Dakkel”?

[Ladawan iti panid 29]

Naikeddengen ti pannakadadael ti “Babilonia a Dakkel”

[Ladawan iti panid 31]

Ipakitatayo ti “naalumamay a kababalin ken nauneg a panagraem”uray kadagidiay saantayo a kapammatian