Kasanoka nga Agkararag Tapno Denggennaka ti Dios?

AGKARARAG KEN JEHOVA A DIOS ITI NAGAN NI JESUS

“Patganto ti Ama ti aniaman a kiddawenyo iti naganko.”—Juan 16:23.

Nalawag nga ipakita ti sasao ni Jesus a kayat ni Jehova nga agkararagtayo kenkuana, saan a babaen kadagiti imahen, santo, anghel, wenno inapo, no di ket iti nagan ni Jesu-Kristo. No agkararagtayo iti Dios iti nagan ni Jesus, bigbigbigentayo ti nagpateg nga akem ni Jesus. Kinuna ni Jesus: “Awan ti makapan iti Ama no saan a magna kaniak.”—Juan 14:6.

AGSAO MANIPUD ITI PUSO

“Iyebkasyo kenkuana dagiti linaon ti pusoyo.”—Salmo 62:8.

No agkararagtayo ken Jehova, masapul nga agsaotayo a kas iti pannakisaritatayo iti naayat nga ama. Imbes a basaentayo iti libro wenno ikabesatayo dagiti kararagtayo, masapul a siraraem ken naimpusuan nga agkararagtayo.

AGKARARAG MAITUNOS ITI PAGAYATAN TI DIOS

“Uray ania ti dawatentayo maitunos iti pagayatanna, denggennatayo.”—1 Juan 5:14.

Iti Biblia, ibaga ni Jehova a Dios no ania ti aramidenna para kadatayo ken no ania ti kayatna nga aramidentayo para kenkuana. Tapno awaten ti Dios dagiti kararagtayo, masapul nga agkararagtayo “maitunos iti pagayatanna.” Masapul nga adalentayo ti Biblia tapno maam-ammotayo a naimbag ti Dios. No aramidentayo dayta, makaay-ayo kenkuana dagiti kararagtayo.

ANIA DAGITI MABALINTAYO NGA IKARARAG?

Ikararagmo Dagiti Kasapulam. Mabalintayo nga ikararag iti Dios dagiti kasapulantayo iti inaldaw—makan, bado, ken pagtaengan. Mabalintayo met nga ikararag ti sirib tapno makaaramidtayo kadagiti umiso a desision ken bileg a mangibtur kadagiti pakasuotantayo. Mabalintayo nga ikararag iti Dios a patibkerenna ti pammatitayo, pakawanennatayo, ken tulongannatayo.—Lucas 11:3, 4, 13; Santiago 1:5, 17.

Ikararagmo ti Sabsabali. Maragsakan dagiti nagannak no agiinnayat dagiti annakda. Kayat met ni Jehova nga agiinnayat dagiti annakna ditoy daga. Nasayaat met no iramantayo iti kararagtayo ti asawa, annak, pamilia, ken gagayyemtayo. Insurat ni adalan a Santiago: “Ikararaganyo ti maysa ken maysa.”—Santiago 5:16.

Agyamanka. Kuna ti Biblia maipapan iti Namarsua kadatayo: “Babaen ti nasayaat nga ar-aramidna, . . . ipapaayannakayo iti tudo manipud langit ken adu nga apit, a pempennekennakayo iti taraon ken parparagsakenna ti pusoyo.” (Aramid 14:17) No panunotentayo ti amin nga inaramid ti Dios para kadatayo, matignaytayo nga agyaman kenkuana iti kararag. Ipakitatayo met ti panagayattayo iti Dios babaen ti panagtulnogtayo kenkuana.—Colosas 3:15.

AGANUS KEN AGTULTULOY NGA AGKARARAG

No dadduma, mabalin a maupaytayo gapu ta saan a dagus a nasungbatan dagiti naimpusuan a kararagtayo. Kayat kadi a sawen dayta a saan nga interesado ti Dios kadatayo? Saan! Kitaentayo dagiti kapadasan a mangipakita a masapul nga itultuloytayo ti agkararag.

Inamin ni Steve a nadakamat iti umuna nga artikulo: “No saan a gapu iti kararag, nabayag koman a simmukoak.” Ania ti nakatulong kenkuana? Nagadal iti Biblia ket nasursurona a masapul nga agtultuloy nga agkararag. Kunana: “Agyamyamanak iti Dios iti kararagko gapu iti naayat a suporta dagiti ipatpategko a gagayyem. Naragragsakak itan.”

Ni ngay Jenny, a nakarikna a saan a maikari a denggen ti Dios ti kararagna? Imbagana: “Iti karirigatan a situasionko, impakaasik iti Dios a tulongannak a mangtarus no apay a marikriknak a kasla awan ti serserbik.” Kasano a nakatulong dayta kenkuana? “Nakatulong ti pannakisaritak iti Dios tapno mailintegko ti panangmatmatko iti bagik, nga uray no babbabalawennak ti pusok, saannak a babbabalawen ti Dios. Nakatulong met dayta tapno saanak a sumuko.” Ania ti resultana? “Gapu iti kararag, nagbalin a napaypayso kaniak ni Jehova kas naayat, maseknan a Dios, Ama, ken Gayyem a kanayon a nakasagana a tumulong kaniak basta itultuloyko nga aramiden ti pagayatanna.”

Kitaentayo met ti kapadasan ni Isabel. Idi nagsikog, imbaga ti doktorna nga addanto nakaro a depekto ti anakna. Nalidayan unay iti dayta. Adda pay ketdi nangibaga nga iparegregnan ti sikogna. “Kasla ipatayko ti nakaro a ladingitko.” Ania ti inaramidna? Imbagana: “Kararagak a kararag iti Dios tapno tulongannak.” Idi agangay, inyanakna ni Gerard nga adda depektona. Narikna kadi ni Isabel a sinungbatan ni Jehova dagiti kararagna? Wen! Kasano? Imbaga ni Isabel: “Katorse itan ti tawen ti anakko. No makitkitak a naragsak latta uray adda depektona, mariknak nga isu ti kasayaatan a sungbat ni Jehova a Dios kadagiti kararagko, ken ti kasayaatan a bendision nga intedna kaniak.”

Dagita a kapadasan ipalagipna kadatayo ti sasao ti salmista: “Denggemto ti kiddaw dagiti naemma, O Jehova. Pabilgemto ti pusoda ken ipangagmo ida.” (Salmo 10:17) Nagsayaat dagita a rason nga agtultuloytayo nga agkararag!

Mabasatayo iti Biblia ti adu a kararag ni Jesus. Sigurado a ti kalatakan kadagita ket ti insurona kadagiti adalanna. Ania ti maadaltayo iti dayta?