Paspasamak a Nangiturong iti Ipapatay ni Kristo

NAARAMID iti uneg ken aglawlaw ti Jerusalem ti paspasamak a nangiturong iti ipapatay ni Jesus. Ditoy, naidatag ti Anak ti Dios kas Ari daytoy a nasion. Idi umas-asideg iti siudad, impukkaw ti maysa nga umariwekwek dagiti adalan: “Bendito ti Maysa nga um-umay kas Ari iti nagan ni Jehova!” (Lu 19:37, 38) Ngem isu linaksid dagiti panguluen ti relihion iti dayta a nasion ken siuulbod a pinabasolda a sulsulbogenna nga umalsa dagiti umili. Idi sipaprangka nga inimtuod kenkuana ti Romano a gobernador a ni Poncio Pilato no isu ket maysa nga ari, insungbat ni Jesus: “Ti pagariak saan a paset daytoy a lubong.” (Ladawan iti baba) Idi a ni Jesus ket indatag a mismo ni Pilato kadagiti Judio, a kunkunana: “Kitaenyo! Ti ariyo!” insungbat ti panguluen a papadi: “Awan ti arimi no di ni Cesar.”​—Jn 18:33-38; 19:14, 15.