NICODEMO

[Manangparmek Kadagiti Umili].

Maysa a Fariseo ken mannursuro iti Israel, agturay kadagiti Judio (kayatna a sawen, kameng ti Sanhedrin) a nadakamat laeng iti Ebanghelio ni Juan. Nagsiddaaw ni Nicodemo kadagiti pagilasinan nga inaramid ni Jesus idiay Jerusalem idi tiempo ti Paskua ti 30 K.P. Gapuna, sinarungkaranna ni Jesus iti maysa a rabii ket binigbigna a ni Jesus naggapu la ketdi iti Dios. (Iti daytoy umuna nga isasarungkarna, pinilina ti mapan kabayatan ti rabii nalabit gapu iti butengna kadagiti Judio.) Ni Jesus inlawlawagna ken Nicodemo a ti maysa a tao masapul a “mayanak manen” tapno makitana ti Pagarian ti Dios, kasta met nga awan ti tao nga immuli sadi langit, a ti ayat ti Dios naipakita babaen ti panangibaonna iti Anak ditoy daga, ken kasapulan ti panangiparangarang iti pammati.​—Jn 2:23; 3:1-21.

Agarup dua ket kagudua a tawen kalpasanna, iti Piesta dagiti Abong-abong, dagiti Fariseo nangibaonda kadagiti opisial a mangtiliw ken Jesus. Idi nagsubli nga ima-ima dagiti opisial, linais ida dagiti Fariseo gapu iti impadamagda a pabor ken Jesus. Maipapan iti dayta, nagsao ni Nicodemo, ket kinunana: “Ukomen aya ti lintegtayo ti maysa a tao malaksid no umuna a dimngeg kenkuana ken inammona ti ar-aramidenna?” Gapu iti daytoy, isu inuy-uyaw dagiti dadduma. (Jn 7:45-52) Kalpasan ti ipapatay ni Jesus, immay ni Nicodemo a kaduana ni Jose a taga Arimatea, daydiay mabutbuteng nga adalan. Nangyeg iti nadagsen a sangalukot a mirra ken aloe (a. 100 libra ti Roma [33 kg; 72 lb]), maysa a nangina unay a daton, tapno maaramat a pangisagana iti bagi ni Jesus maipaay iti pannakaitabon. (Jn 19:38-40) Adda dagiti nabayagen a patpatien a mangipakpakita nga idi agangay nagbalin ni Nicodemo nga adalan, naparuar manipud Sanhedrin ken Jerusalem, natay kas martir, ken dadduma pay, ngem saan a paneknekan wenno supiaten dagita ti Kasuratan.