Ti Biag ken Ministerio ni Jesus

Naiyawat ken Naipanaw

IDI ni Pilato, natignay babaen iti naulimek a kinatakneng ni naparigatan a Jesus, ket pinadpadasna manen a wayawayaan, ad-adda a nakaunget dagiti pangulo a papadi. Determinadoda nga awan aniaman a makasinga iti dakes a panggepda. Gapuna pinabaroda ti panagariwawada: “Ilansam! Ilansam!”

“Dakayo ti mangala kenkuana ket ilansayo,” makarurod nga insungbat ni Pilato. Maikontra iti immuna a panagkunada, mabalin nga addaan pannakabalin dagiti Judio a mangpapatay kadagiti kriminal gapu kadagiti narelihiusuan a basol a supisiente ti kadagsenna. Kalpasanna, iti agarup maikalima a daras, indeklara ni Pilato nga awan basol ni Jesus, a kunkunana: “Diak makasarak ti babak kenkuana.”

Dagiti Judio, idi makitada nga awan maibunga dagiti napolitikaan a pammabasolda, nagsublida manen iti narelihiusuan a pammabasol a panagtabbaaw nga inusarda sumagmamano nga orasen a nasapsapa iti pannakaukom ni Jesus iti sango ti Sanhedrin. “Adda maysa a lintegmi,” kunada, “ket gapu iti dayta a linteg rebbengna ti matay, ta inaramidna ti bagina nga anak ti Dios.”

Daytoy a pammabasol ket baro ken Pilato, ket daytat’ ad-adda a nangpabuteng kenkuana. Itan mabigbignan a ni Jesus saan nga ordinario a tao, kas ipamatmat ti tagtagainep ni baketna ken iti nakaskasdaaw a kinapigsa ti personalidad ni Jesus. Ngem “anak ti Dios”? Ammo ni Pilato a ni Jesus ket taga Galilea. Ngem, posible kadi nga isut’ nagbiag sakbayna? Idi isut’ insublina manen idiay palasio, nagsaludsod ni Pilato: “Taga anoka aya?”

Ni Jesus nagulimek latta. Idi damo imbagana ken Pilato nga isut’ maysa nga ari, ngem ti Pagarianna saan a paset daytoy a lubong. Awanen ti kanayonan a panangilawlawag itatta nga agpaay iti nausar a panggep. Nupay kasta, nasaktan ti dayaw ni Pilato iti saanna a panangsungbat, ket nakapungtot ken Jesus kadagiti sasao a: “Saannak aya a kasao? Dika ammo nga adda pannakabalinko a mangibbet kenka ken pannakabalinko a mangilansa kenka?”

“Awan koma ti aniaman a pannakabalinmo kaniak no di koma naited kenka manipud ngato,” sidadayaw nga insungbat ni Jesus. Tuktukoyenna ti panangted ti Dios ti pannakabalin kadagiti natauan nga agturay a mangipaandar kadagiti naindagaan a bambanag. Innayon ni Jesus: “Gapuna ti nangyawat kaniak kenka dakdakkel ti basolna.” Pudno unay, ti nangato a padi a ni Caifas ken dagiti kakumplotna ken ni Judas Iscariote ket nadagdagsen amin ti responsabilidadda ngem ni Pilato gapu iti di nainkalintegan a panangtratoda ken Jesus.

Iti ad-adda manen a panagsiddaawna ken Jesus ken mabutbuteng di la ket ta Isut’ addaan nadiosan a namunganayan, pinabaro ni Pilato ti panangipamuspusanna a mangibbet Kenkuana. Dagiti Judio, nupay kasta, kinontradan Pilato. Inulitda manen ti napolitikaan a pammabasolda, a nangbutbuteng a sisisikap: “No ibbatam daytoy a tao, saannaka a gayyem ni Cesar. Ti tunggal maysa a mangaramid iti bagina nga ari sumalungasing ken Cesar.”

Agpapan pay dagiti nakabutbuteng a ramanenna, ni Pilato inruarna manen ni Jesus. “Adtoy! Ti ariyo!” indawatna manen a naminsan.

“Ipanawmo! Ipanawmo! Ilansam!” insungbatda.

“Ilansakto aya ti ariyo?” insaludsod ni Pilato a kasla awan pangnamnamaannan.

Dagiti Judio makaluksawdan iti sidong ti panagturay dagiti Romano. Wen, laisenda ti panangituray ti Roma! Kaskasdi, iti managinsisingpet a pamay-an, kuna dagiti pangulo a papadi: “Awan ti sabali nga arimi no saan a ni Cesar.”

Agamak gapu iti napolitikaan a saad ken dayawna, timmulok iti kamaudianan ni Pilato iti napilit, mangbutbuteng a dawat dagiti Judio. Inyawatna ni Jesus kadakuada. Inussoban dagiti soldado ni Jesus iti lumabbaga a tunikana ket kinawesanda iti makinruar a pagan-anayna. Idi impanawdan Jesus tapno ilansadan, isut’ pinagbaklayda ti bukodna a kayo a pagtutuokan.

Itan ket tengngat’ agsapa ti Biernes, Nisan 14; nalabit umadanin iti panagmatuon. Ni Jesus nakariingen nanipud pay parbangon ti Huebes, ket isut’ nagsagaba iti agsasaruno a nakautut-ot a kapadasan. Kaawatan, isut’ kumapkapuyen gaput’ kabantot ti kayo. Gapu itoy maysa a lumablabas, maysa a Simon a taga Cirene idiay Africa, ti pinilitda a maipaay iti serbisio a mangawit iti dayta para kenkuana. Bayat ti panagtultuloyda, naruay a tattao ti sumursurot, agraman adu a babbai a mangsangsangit ken mangdungdung-aw ken Jesus.

Idi a timmalliaw kadagiti babbai, kuna ni Jesus: “Babbai nga annak ti Jerusalem, saandak a sangitan. Ngem, sangitanyo ketdi ti bagiyo met laeng ken dagiti annakyo; ta, adtoy! nga umayda dagiti aldaw a kunkunadanto, ‘Naragsak dagiti lupes, ken dagiti tian a di naganak ken dagiti barukong a di nagpasuso!’ Iti dayta rugiandanto ti agsao kadagiti bambantay, ‘Agtinnagkayo kadakami!’ ken kadagiti turod, ‘Gaburandakami!’ Ta no iti kayo a nalangto aramidenda dagitoy a banag, ania ti aramidendanto iti nagango?”

Ni Jesus tuktukoyenna ti kayo ti nasion a Judio, a kaskasdi nga addaan pay met laeng ti kinalangto ti biag gaput’ kaadda pay ni Jesus ken ti kaadda ti natda a mamati kenkuana. Ngem inton maipanawton dagitoy manipud iti nasion, ti natay ti naespirituan a kayo mabati, wen, maysa a nagangon a nasional nga organisasion. O, anian a gapuanan ti addanto a panagsangit inton dagiti buyot a Romano, nga agserbi kas dagiti manangdusa ti Dios, rebbekenda ti nasion a Judio! Juan 19:6-17; 18:31; Lucas 23:24-31; Mateo 27:31, 32; Marcos 15:20, 21.

◆ Ania a pammabasol ti aramiden dagiti narelihiusuan a papangulo kontra ken Jesus idi dagiti napolitikaan a pammabasolda awan ti imbungana?

◆ Apay a nalabit nagbalin nga ad-adda a nagbuteng ni Pilato?

◆ Asinot’ dakdakkel ti basolna iti adda a napasamak ken Jesus?

◆ Kasano a dagiti papadi pinayawatda ken Pilato ni Jesus a maipaay ti pannakapapatay?

◆ Aniat’ imbaga ni Jesus kadagiti babbai a mangsangsangit kenkuana, ken aniat’ kayatna a sawen babaen iti panangtukoyna iti kayo kas “nalangto” ken kalpasanna “nagango”?